Dediket na Stap Fri Long Tingim Wanem Rot Yumi Laik Bihainim
“Krais i bin mekim yumi i kamap fri.”—GALESIA 5:1.
1. Ol tok Hibru na tok Grik yumi tanim olsem ‘makim wanpela samting bilong kamap samting bilong God stret,’ o ‘bilong makim wanpela samting i bilong God stret,’ o kain tok olsem, yumi save mekim dispela tok bilong makim wanem samting?
OL MAN bilong raitim Baibel ol i mekim wok long sampela tok Hibru na tok Grik bilong makim wanpela samting i stap narapela kain long mekim wanpela wok holi. Long Baibel Pisin ol i tanim dispela kain tok olsem ‘makim wanpela samting bilong kamap samting bilong God stret,’ o ‘bilong makim wanpela samting i bilong God stret,’ o kain tok olsem. Sampela taim ol i kolim dispela kain tok taim ol i toktok long wanpela haus—olsem haus bilong God i bin stap long Jerusalem bilong bipo na lotu ol i bin mekim long dispela haus. Tasol i no planti taim ol i save mekim dispela kain tok bilong makim wanpela samting i no bilong lotu.
Ol i Dediket Long “God, Bikpela Bilong Yumi Israel”
2. Olsem wanem na i stret ol Israel inap kolim Jehova olsem “God, Bikpela bilong yumi Israel”?
2 Long yia 1513 B.C.E., God i kisim bek ol Israel long wok kalabus bilong ol long Isip. Bihain liklik long dispela, em i makim ol bilong i stap lain manmeri bilong em stret, na em i wokim kontrak wantaim ol. Em i tokim ol: “Sapos nau yupela i holim strong kontrak bilong mi na bihainim tok bilong mi, orait bai yupela i kamap lain manmeri bilong mi. Olgeta graun na olgeta manmeri i bilong mi, tasol mi bai makim yupela i stap lain manmeri bilong mi stret.” (Kisim Bek 19:5; Song 135:4) Taim Jehova i makim lain Israel i kamap lain bilong em stret, orait i stret ol inap kolim Jehova olsem “God, Bikpela bilong yumi Israel.”—Josua 24:23.
3. Taim Jehova i makim ol Israel i kamap lain bilong em, olsem wanem dispela i no makim olsem em i save laikim sampela lain tasol na sampela nogat?
3 Taim Jehova i makim ol Israel i kamap lain bilong em stret, dispela i no makim olsem Jehova i laikim sampela lain tasol na sampela nogat, long wanem, em i marimari na tingim tu ol manmeri i no bilong lain Israel. Em i tokim lain bilong em: “Yupela i no ken mekim nogut long ol manmeri bilong narapela lain ol i stap long graun bilong yupela. Na yupela i mas laikim ol tru, olsem yupela i save laikim yupela yet. Yupela i bin i stap long Isip bipo, olsem na yupela i save long pasin bilong man i lusim as ples na i stap long narapela kantri. Olsem na yupela i mas mekim gut long ol dispela arapela lain i stap wantaim yupela. Mi Bikpela, mi God bilong yupela, mi tok pinis.” (Wok Pris 19:33, 34) Planti handet yia bihain, God i kamapim klia tingting bilong em long aposel Pita, olsem na Pita i tok: “Tru tumas, nau mi save, God i save mekim wankain pasin long olgeta manmeri, maski ol i bilong wanem lain. Long olgeta lain em i save laikim ol manmeri i aninit long em na i mekim stretpela pasin.”—Aposel 10:34, 35.
4. Bilong kamap lain bilong God stret, ol Israel i mas mekim wanem? Olsem wanem? Ol Israel i bin mekim ol dispela samting?
4 Tasol bilong kamap wanpela lain i dediket long God, olsem ol i bilong God stret, ol i mas mekim sampela samting. Sapos ol i bihainim stret tok bilong God na bihainim tok bilong kontrak em i bin mekim wantaim ol, orait ol bai kamap “lain manmeri bilong [God] stret.” Tasol sori tru, ol Israel i no winim dispela mak. Taim ol i givim baksait long Mesaia em God i bin salim i kam long taim bilong ol aposel, ol i no inap i stap moa olsem lain manmeri bilong God stret. Jehova i no stap moa olsem God bilong ol Israel. Na ol Israel bilong skin i no stap moa olsem lain i dediket pinis long God.—Skelim wantaim Matyu 23:23.
“Israel Tru Bilong God” i Kamap Lain Bilong God Stret
5 Olsem wanem? Dispela i makim olsem nau God i no gat wanpela lain em i makim bilong em stret? Nogat, dispela i no makim olsem. Krais Jisas i kamapim wanpela tok bilong wanpela man bilong raitim Song na em i tok profet olsem: “Ating yupela i no bin ritim dispela hap tok i stap long buk bilong God? Dispela tok i olsem, ‘Dispela ston ol kamda i ting em i nogut na ol i rausim, nau em i kamap nambawan ston bilong strongim banis bilong haus. Bikpela yet i mekim dispela samting i kamap, na mipela i lukim em i gutpela tru.’ Olsem na mi tokim yupela, God bai i rausim kingdom bilong en long han bilong yupela, na givim long wanpela lain manmeri ol i save kamapim kaikai bilong dispela kingdom.”—Matyu 21:42, 43.
5, 6. (a) Wanem insait bilong tok profet bilong Jisas i stap long Matyu 21:42, 43? (b) “Lain Israel tru bilong God” i bin kamap long wanem taim? Dispela lain i kamap olsem wanem?
6 Dispela “lain manmeri ol i save kamapim kaikai bilong dispela kingdom,” em lain Kristen. Taim Jisas i stap long graun, em i makim ol namba wan man bilong dispela lain. Tasol long de Pentikos bilong yia 33 C.E., God Jehova yet i kamapim kongrigesen Kristen taim em i kapsaitim spirit holi bilong em i kam daun long ol namba wan manmeri bilong dispela lain, em ol inap olsem 120. (Aposel 1:15; 2:1-4) Bihain aposel Pita i raitim tok olsem, long dispela taim dispela nupela kongrigesen i kamap ‘lain manmeri bilong em stret. Ol i stap ol pris bilong lain bilong king na ol i stap lain manmeri i holi, em ol lain manmeri tru bilong God. Na ol i stap lain manmeri God i bin makim bilong em yet.’ Em i bin makim ol bilong mekim wanem? Bilong ‘tokaut long olgeta gutpela pasin em i bin mekim long ol. Ol i ken tokaut long em i bin singautim ol long lusim tudak ol i bin i stap long en, na em i bringim ol i kam insait long lait bilong em.’ (1 Pita 2:9) Ol disaipel bilong Krais, em God i bin makim ol long spirit holi, nau ol i kamap wanpela lain i dediket pinis, em “lain Israel tru bilong God.”—Galesia 6:16.
7 Tru, ol manmeri bilong dispela lain holi ol i “lain manmeri God i bin makim bilong em yet,” tasol ol i no ken stap olsem ol wokboi nating, nogat. Ol bai stap fri, winim lain Israel bilong skin em ol i bin dediket long God. Jisas i tok promis long ol disaipel em ol bai insait long dispela nupela lain: “Yupela bai i save long tok tru, na tok tru bai i mekim yupela i kamap fri.” (Jon 8:32) Aposel Pol i tokaut olsem ol Kristen i no kalabus moa long bihainim kontrak bilong Lo—ol i kamap fri long dispela samting. Olsem na em i tokim ol wanbilip long Galesia olsem: “Krais i bin mekim yumi i kamap fri, bilong yumi no ken i stap aninit long lo. Olsem na yupela i mas sanap strong. Yupela i no ken larim ol man i mekim yupela i kamap olsem ol wokboi nating gen.”—Galesia 5:1.
8. Dispela pasin God i putim long lain Kristen, olsem wanem em i mekim ol i kamap fri, winim bilong taim ol Israel i bin i stap aninit long kontrak bilong Lo?
8 Lain Israel tru bilong God i no olsem ol Israel bilong skin long bipo, nogat. I kam inap nau, lain Israel tru bilong God ol i bihainim stret ol samting ol i mas mekim bilong i stap olsem lain i dediket long God. Yumi no ken kirap nogut long dispela, long wanem, long laik bilong ol yet ol i bihainim. Ol manmeri bilong lain Israel bilong skin, ol i bin kamap insait long wanpela lain i dediket pinis long Jehova. Tasol lain Israel tru bilong God i no olsem—long laik bilong ol yet ol i dediket long God. Olsem na pasin God i makim long lain Kristen i narapela kain long kontrak bilong Lo ol Juda i insait long en, em i gat lo olsem olgeta wan wan i dediket long God, na ol yet i no inap makim olsem ol i laik dediket long em o nogat.
9, 10. (a) Olsem wanem tok bilong Jeremaia i makim olsem bai i gat senis i kamap long pasin bilong dediket long God? (b) Yu ting olgeta Kristen i dediket pinis ol i insait long lain Israel bilong God? I gat wanem as na yu bekim tok olsem?
9 Profet Jeremaia i tok profet olsem wanpela senis bai kamap long pasin bilong dediket long God. Em i tok: “Bikpela i tok moa olsem, ‘Harim. Mi makim pinis wanpela taim na bai mi mekim nupela kontrak wantaim ol lain bilong Israel na ol lain bilong Juda. Dispela kontrak bai i no wankain olsem kontrak bipo mi bin mekim wantaim ol tumbuna bilong ol, long taim mi kisim ol long Isip na holim han bilong ol na bringim ol i kam. Ol i bin i stap olsem meri bilong mi na mi, Bikpela, mi stap olsem man bilong ol. Tasol ol i bin brukim dispela olpela kontrak. Tasol dispela nupela kontrak mi laik mekim wantaim ol manmeri bilong Israel, em i olsem. Bai mi putim lo bilong mi long tingting bilong ol na bai mi raitim tok bilong lo long bel bilong ol. Na bai mi stap God bilong ol na bai ol i stap lain manmeri bilong mi.’ ”—Jeremaia 31:31-33.
10 Lo bilong God i stap “long bel bilong ol” Israel bilong God, i olsem God i bin raitim “long bel bilong ol.” Olsem na dispela i kirapim ol long bihainim stret dediket bilong ol. Samting i kirapim ol i strong moa na i winim samting i bin kirapim ol Israel bilong skin, em mama i bin karim ol insait long lain i dediket pinis long God, na ol i no mekim long laik bilong ol yet. Long nau, dispela pasin bilong lain Israel bilong God, em bel bilong ol i kirapim ol strong long mekim laik bilong God, dispela pasin i stap tu long 5 milion wanlotu bilong ol i stap long olgeta hap bilong graun. Ol tu i bin givim ol yet long God Jehova, olsem dediket long em, bilong mekim laik bilong em. Tru, ol dispela manmeri ol i no inap wet long kisim laip long heven olsem ol manmeri bilong lain Israel bilong God, tasol ol i amamas long ol inap tingting long kisim laip i stap oltaim long graun aninit long Kingdom bilong God long heven. Bilong kamapim klia olsem ol i amamas long lain Israel bilong spirit, ol i save wok wantaim liklik hap lain bilong en ol i stap yet long graun na helpim ol long pinisim wok bilong ol long ‘tokaut long olgeta gutpela pasin God i bin mekim long ol. Ol i ken tokaut long em i bin singautim ol long lusim tudak ol i bin i stap long en, na em i bringim ol i kam insait long gutpela lait bilong em.’
Mekim Gutpela Wok Long Pasin Bilong i Stap Fri
11. Taim God i wokim man, em inapim man long mekim wanem? Yumi mas mekim wanem kain wok long dispela samting?
11 God i bin wokim ol manmeri bambai ol i ken amamas long i stap fri. Em inapim ol long tingim wanem samting ol i laik mekim. Namba wan man na meri i mekim wok long dispela pasin bilong i stap fri long tingim wanem rot ol i laik bihainim. Tasol long pasin i no gat gutpela tingting o pasin sori long en, tupela i makim wanpela rot i bagarapim ol yet wantaim ol pikinini bilong ol. Tasol dispela i kamapim klia tru olsem Jehova i no save subim ol man long bihainim wanpela rot i narapela kain long tingting na laik i stap long bel bilong ol. Na tu, “God i save laikim man i amamas na i givim samting long laik bilong em yet,” olsem na i gat wanpela as tasol bilong dediket em God i orait long en—man i mas laikim tru God, na long laik bilong man yet em i dediket na em i amamas long mekim, na em yet i bin tingim wanem rot em i laik bihainim na nau em i dediket. (2 Korin 9:7) Ol narapela kain pasin bilong dediket, God i no ken orait long en.
12 Ol Witnes Bilong Jehova i save long dispela samting, olsem na ol i laik kirapim ol man long dediket long God, tasol ol i no save subim man long mekim olsem, na ol i no subim ol pikinini bilong ol yet long mekim. Ol Witnes i no bihainim pasin bilong planti misin—ol i no givim baptais long ol pikinini bilong ol taim ol i liklik yet, olsem ol inap subim ol dispela pikinini long dediket long God na ol i no gat rot long tingim samting ol yet i laik mekim. Pasin Baibel i makim na i olsem piksa bilong yumi ken bihainim, em dispela pasin yangpela man Timoti i bihainim. Taim em i bikpela pinis, aposel Pol i tokim em: “Yu mas holim strong dispela tok yu bin kisim na yu save bilip strong long en. Yu save gut long mipela ol manmeri i bin skulim yu long dispela tok. Na yu save, taim yu bin i stap liklik pikinini yet, yu stat long kisim save long ol buk i gat tok bilong God. Dispela ol buk ol inap long givim gutpela tingting long yu, na bai yu bilip long Krais Jisas, na bai God i kisim bek yu.”—2 Timoti 3:14, 15.
12, 13. Olsem wanem Timoti i stap olsem piksa bilong stretpela pasin bilong skulim pikinini? Pasin bilong Timoti i bin kirapim planti yangpela long mekim wanem?
13 Timoti i save pinis long ol tok i stap long buk bilong God, long wanem, ol i bin skulim em long en kirap long taim em i liklik pikinini yet. Em yet i bin kisim—ol i no bin subim em—na em i bilip strong long ol dispela tok Kristen em mama wantaim bubu meri i bin skulim em long en. (2 Timoti 1:5) Dispela i mekim na Timoti i save, em i bihainim gutpela tingting taim em i kamap wanpela disaipel bilong Krais, olsem na em i makim dediket Kristen olsem samting em yet i laik mekim. Long taim bilong yumi, planti tausen yangpela man na meri em papamama bilong ol i Witnes Bilong Jehova, ol i bihainim dispela pasin bilong Timoti. (Song 110:3) Sampela ol i no bihainim dispela pasin. Em laik bilong wan wan yet.
Yumi Laik Kamap Wokboi Bilong Husat?
14 I no gat wanpela man bilong graun em i stap fri olgeta. I gat sampela lo God i bin putim long dispela graun, olsem graun i gat wanpela strong i save pulim ol samting i kam daun, na sapos yumi sakim dispela lo bai yumi kisim nogut. Long ol samting bilong spirit tu, i no gat wanpela man i stap fri olgeta. Pol i tok: “Ating yupela i no save? Sapos yupela i givim yupela yet long wanpela man na bihainim tok bilong em, orait yupela bai i stap wokboi bilong em. Olsem tasol, yupela i ken i stap wokboi bilong sin, na dispela bai i mekim yupela i dai. O yupela i ken wok long bihainim tok bilong God na bai yupela i kamap stretpela manmeri.”—Rom 6:16.
15. (a) Ol man i save ting olsem wanem long i stap wokboi bilong wanpela man? Tasol bihain planti ol i save mekim wanem? (b) Yumi ken givim wanem ol askim long yumi yet i stret long dispela?
15 Planti man ol i no laik kamap wokboi bilong wanpela man. Tasol long dispela graun long nau, planti manmeri ol i save larim ol man i mekim pasin trik na pulim ol na stiaim ol i go, na nau ol i kirap mekim ol samting ol dispela man i laik bai ol i mekim, tasol i no laik bilong ol yet na ol i mekim. Olsem: Ol kampani i gat wok long kamapim ol toksave bilong baim ol samting, na ol lain i save kamapim ol piksa wokabaut na ol narapela samting bilong amamas, ol i wok strong long subim ol manmeri long bihainim wankain tingting na pasin, na ol yet i laik makim wanem pasin ol dispela manmeri i mas bihainim. Ol lain politik na ol lotu ol i save kirapim ol manmeri long helpim ol tingting na wok bilong ol, na bilong kirapim ol long mekim olsem, sampela taim ol dispela lain i no kamapim sampela gutpela as na ol i mas mekim, nogat; ol i grisim ol manmeri na ol i ting dispela em i rot bilong pas gut wantaim na narapela i stap gut long narapela. Pol i tok, ‘sapos yumi bihainim tok bilong wanpela man, orait yumi kamap wokboi bilong em.’ Olsem na yumi olgeta wan wan i mas askim yumi yet, ‘Mi stap wokboi bilong husat? Husat i save stiaim tingting bilong mi moa yet long ol samting mi mas mekim na long wokabaut bilong mi? Ol pris pasto bilong lotu, o ol hetman politik, o ol bikpela man bilong bisnis, o ol manmeri i gat nem long ol piksa wokabaut o long singsing na musik samting? Mi save bihainim tok bilong husat—bilong God o bilong ol man?’
16. Olsem wanem ol Kristen i stap wokboi bilong God? Yumi mas i gat wanem stretpela tingting long dispela kain pasin bilong i stap wokboi?
16 Ol Kristen i no ting olsem pasin bilong bihainim tok bilong God i save pasim ol na ol i no inap i stap fri long mekim laik bilong ol, nogat. Ol i stap fri, tasol ol i mekim wok long en long wankain pasin em Krais Jisas i bin mekim, em Man i stap olsem gutpela piksa bilong ol, olsem olgeta laik bilong ol na ol samting ol i ting i bikpela samting, ol i mekim i kamap stret wantaim laik bilong God (Jon 5:30; 6:38) Ol i wok long kisim “tingting bilong Krais,” na ol i daun long em olsem Het bilong kongrigesen. (1 Korin 2:14-16; Kolosi 1:15-18) Dispela i wankain olsem meri i marit na long laik bilong em yet em i wok gut wantaim dispela man em i laikim tumas. Lain Kristen em God i bin makim, Baibel i tok ol i olsem wanpela yangpela meri i stap klin tru na ol i makim em bilong marit long Krais.—2 Korin 11:2; Efesus 5:23, 24; KTH 19:7, 8.
17. Long laik bilong ol yet olgeta Witnes Bilong Jehova i kamap wanem samting?
17 Olgeta wan wan Witnes Bilong Jehova, maski ol i wet long kisim laip long heven o long graun, ol yet i bin dediket long God long mekim laik bilong em na bihainim tok bilong em olsem King bilong ol. Long olgeta wan wan Witnes, taim ol i dediket, long laik bilong ol yet ol i laik kamap wokboi bilong God—ol i no laik i stap wokboi bilong ol man. Dispela i stret wantaim tok bilong aposel Pol, em i tok: “God i bin baim bek yupela long bikpela pe tru, olsem na yupela i no ken i kamap wokboi nating bilong ol man.”—1 Korin 7:23.
Yumi Lain Long Helpim Yumi Yet
18. Wanem taim wanpela man i laik kamap Witnes i winim mak bilong kisim baptais?
18 Bilong man i ken kamap wanpela Witnes Bilong Jehova, pastaim em i mas winim ol mak em Baibel i kolim. Taim wanpela man i laik kamap Witnes, ol elda i save was gut taim ol i skelim olsem em i save tru tru long ol samting em dediket Kristen bai mekim long i stap bilong em o nogat. Olsem wanem? Em i laik tru long kamap wanpela Witnes Bilong Jehova? Em i orait long bihainim ol pasin na lo em man i dediket pinis i mas bihainim? Sapos nogat, orait em i no winim mak bilong kisim baptais.
19 Tasol sapos man i winim olgeta mak bilong kisim baptais, na long laik bilong em yet em i tingting pinis long larim God na tok bilong em long Baibel i stiaim tingting bilong em, bilong wanem bai yumi sutim tok long em long dispela samting? Ating i gutpela sapos yumi larim ol man i stiaim tingting bilong yumi na i no gutpela long larim God i mekim? O sapos yumi larim God i stiaim tingting bilong yumi, ating dispela i no helpim yumi tumas? Ol Witnes Bilong Jehova i no ting olsem. Ol i wanbel tru long tok bilong God em Aisaia i raitim, olsem: “Mi God, Bikpela bilong yupela. Oltaim mi save skulim yupela na soim yupela long ol stretpela pasin yupela i mas bihainim na bai yupela i stap gut.”—Aisaia 48:17.
20. Olsem wanem tok i tru bilong Baibel i helpim ol man long kamap fri?
20 Tok i tru bilong Baibel i save helpim ol man long kamap fri na ol i no bilip moa long ol tok giaman bilong ol lotu, olsem kisim pen inap oltaim oltaim insait long bikpaia. (Saveman 9:5, 10) Tok i tru i save mekim na bel bilong ol i tenkyu tru long samting tru tru ol man i dai pinis ol inap wetim, olsem kirap bek long matmat, em ofa bilong Krais Jisas bilong baim bek ol man em i opim rot bilong ol i ken mekim olsem. (Matyu 20:28; Aposel 24:15; Rom 6:23) Na tok i tru bilong Baibel i save helpim ol man na ol i no tingting planti na bel hevi taim ol i lukim olsem planti tok promis bilong ol lain politik i no kamap tru. Dispela i mekim na bel bilong ol i amamas tru, long wanem, ol i save Kingdom bilong Jehova i kirap pinis long mekim wok bilong en long heven na liklik taim bai em i bosim olgeta hap bilong graun. Na tok i tru bilong Baibel i save helpim ol man long lusim ol pasin i save amamasim skin bilong ol i gat sin, tasol ol dispela pasin i save bagarapim biknem bilong God na i bagarapim marit bilong ol na ol narapela pasin bilong pas gut wantaim ol narapela, na i kamapim sik, na ol i save dai taim ol i no lapun yet. Tru tumas, taim yumi stap wokboi bilong God, dispela i save helpim yumi tru na i winim moa yet pasin bilong i stap wokboi bilong ol man. Yes, ol man i dediket long God ol inap kisim ol gutpela samting long en “taim ol i stap yet long dispela graun . . . na long taim i laik kamap bihain ol bai i kisim laip i stap gut oltaim oltaim.”—Mak 10:29, 30.
21. Ol Witnes Bilong Jehova i ting olsem wanem long pasin bilong dediket long God? Wanem laik bilong ol?
21 Ol Witnes Bilong Jehova long nau ol i no bin kamap insait long wanpela lain i dediket pinis olsem ol Israel bilong bipo i bin mekim, nogat. Ol Witnes i insait long wanpela lain Kristen i dediket pinis. Olgeta wan wan Witnes i bin kamap olsem taim ol yet i tingim wanem rot ol i laik bihainim na long laik bilong ol yet ol i dediket long God. Tru tumas, taim ol Witnes Bilong Jehova i dediket long God dispela i mekim na ol i pas gut wantaim God na amamas long mekim wok bilong em. Bel bilong ol i laik tru long holim strong dispela pasin bilong pas gut wantaim God. Krais Jisas i bin mekim ol i kamap fri na ol i laik holimpas dispela pasin bilong i stap fri inap oltaim oltaim.
Bai Yu Bekim Olsem Wanem?
◻ Taim God i makim lain Israel long kamap ‘lain manmeri bilong em stret,’ olsem wanem na dispela i no makim olsem God i save laikim sampela lain na sampela nogat?
◻ I gat wanem as na yu inap tok, dediket bilong Kristen i no mekim na man i lus long i stap fri?
◻ Taim man i dediket long God Jehova, dispela i save helpim em olsem wanem?
◻ Bilong wanem pasin bilong i stap wokman bilong Jehova i winim pasin bilong i stap wokboi bilong ol man?
7. Wanem gutpela samting bai painim ol manmeri bilong lain Israel bilong God? Olsem na Pol i tok ol i no ken mekim wanem?
14. Rom 6:16 i tok wanem long yumi long pasin bilong i stap fri olgeta?
19. Taim man i tingting pinis long kamap wanpela wokman bilong God i dediket pinis long em, bilong wanem i no gat as na yumi ken sutim tok long em?
[Piksa long pes 15]
Long Israel bilong bipo, taim mama i karim ol, ol i kamap man i dediket pinis long God
[Piksa long pes 16]
Dediket bilong ol Kristen em samting man i mekim long laik bilong em yet