Ol i Kamap Long Wanpela Lain Em God i Makim

“God, Bikpela bilong yumi . . . i makim [yumi] wanpela lain tasol i kamap lain manmeri bilong em stret.”​—LO 7:6.

1, 2. Jehova i bin mekim wanem ol bikpela samting bilong helpim lain pipel bilong em, na em i wokim wanem samting wantaim ol?

LONG 1513 B.C.E., wanpela nupela samting i kamap long ol wokboi bilong Jehova. Long dispela yia, Jehova i semim tru wanpela strongpela kantri na kisim bek lain Israel long wok kalabus. Taim em i mekim olsem, em i kamap Man Bilong Kisim Bek ol na Bos bilong ol. Paslain long em i kirap mekim dispela samting, God i tokim Moses: “Yu mas givim dispela tok bilong mi long ol Israel, ‘Mi yet mi Bikpela. Mi bai kisim yupela long han bilong ol Isip na long ol hevi ol i putim long yupela na bai mi mekim yupela i kamap fri. Na long strong bilong mi bai mi mekim save tru long ol, na bai mi kisim bek yupela. Bai mi mekim yupela i kamap ol manmeri bilong mi yet na bai mi stap God bilong yupela.’ ”​—Kisim Bek 6:​6, 7; 15:​1-7, 11.

² Bihain liklik long ol i lusim Isip, God bilong ol, Jehova, i wokim kontrak wantaim ol. Kirap long dispela taim, bai em i no pas wantaim wanpela man o wanpela famili tasol, nogat, nau em bai pas wantaim wanpela lain pipel hia long graun. (Kisim Bek 19:​5, 6; 24:7) Em i givim lain bilong em ol lo bilong bosim sindaun bilong ol, na bikpela samting moa, em i givim ol lo bilong bosim lotu bilong ol. Moses i tokim ol olsem: “Yupela tingim ol arapela lain pipel. Maski ol i gat bikpela strong, ol i no gat wanpela god i save sambai long helpim ol, olsem God, Bikpela bilong yumi, i save mekim long yumi. Oltaim Bikpela i stap klostu tru long yumi na taim yumi singaut long em, orait em i save helpim yumi. Na ol dispela arapela lain pipel i no gat stretpela lo olsem ol dispela lo nau mi bin skulim yupela long en. Nogat tru.”​—Lo 4:​7, 8.

Kamap Long Wanpela Lain Witnes

3, 4. Wanem wanpela bikpela as na Israel i kamap wanpela lain pipel?

³ Sampela handet yia bihain, long rot bilong profet Aisaia, Jehova i kirapim ol Israel long tingim as na ol i stap olsem wanpela lain pipel. Aisaia i tok: “Yupela ol Israel, yupela lain bilong Jekop, Bikpela i bin mekim yupela i kamap wanpela lain manmeri, na em i tokim yupela olsem, ‘Yupela i no ken pret, long wanem, mi kisim bek yupela pinis. Mi bin givim nem long yupela na mi makim yupela i bilong mi yet. Long wanem, mi Bikpela, mi God bilong yupela ol Israel, mi bai helpim yupela. Mi God bilong mekim gutpela na stretpela pasin olgeta, mi tasol mi save kisim bek yupela. . . . Maski ol manmeri bilong mi i stap longwe tru long arere tru bilong graun, bai mi bringim ol i kam bek. Yupela i lain manmeri bilong mi stret, na mi yet mi bin wokim yupela, bai ol arapela lain i ken lukim yupela na givim biknem long mi. Tasol yupela Israel, yupela i witnes bilong mi. Mi bin makim yupela bilong i stap wokman bilong mi. . . . Mi bin mekim ol dispela manmeri i kamap lain manmeri bilong mi yet, bai ol i ken amamas na tokaut long biknem bilong mi.’ ”​—Aisaia 43:​1, 3, 6, 7, 10, 21.

⁴ Nem bilong Jehova i stap long ol, olsem na ol Israel bai stap olsem ol witnes bilong tokaut long wok bos bilong em long ol narapela lain pipel. Ol i wanpela lain Jehova i ‘bin wokim bilong givim biknem long em.’ Ol i mas ‘tokaut long biknem bilong God,’ olsem stori long ol bikpela samting em i bin mekim bilong kisim bek ol man na long dispela rot em i kisim biknem. Ol i mas stap olsem wanpela lain i stap olsem witnes bilong Jehova.

5. Olsem wanem lain Israel i wanpela lain pipel i dediket pinis long Jehova?

⁵ Tok King Solomon i bin mekim i makim olsem Jehova i makim Israel olsem wanpela lain pipel. Long wanpela beten long Jehova em i tok: “Yu bin kisim mipela Israel namel long olgeta arapela lain manmeri, na mekim mipela i kamap ol manmeri bilong yu stret.” (1 King 8:53) Pasin bilong ol wan wan manmeri Israel long pas wantaim Jehova i narapela kain tu. Pastaim Moses i bin tokim ol olsem: “Yupela i pikinini bilong God . . . Yupela i manmeri bilong God.” (Lo 14:​1, 2) Olsem na ol yangpela Israel i no gat wok long dediketim laip bilong ol long Jehova. Taim mama i karim ol, ol i insait long lain i dediket pinis long God. (Song 79:13; 95:7) Taim ol nupela tumbuna i kamap ol i kisim skul long ol lo bilong Jehova na ol i mas bihainim ol dispela lo, long wanem, ol i insait long dispela kontrak Jehova i mekim wantaim Israel.​—Lo 11:​18, 19.

Ol Yet Inap Makim

6. Ol wan wan Israel i gat wok long wokim wanem disisen?

⁶ Maski ol Israel i kamap insait long wanpela lain pipel i dediket pinis, olgeta wan wan i mas wokim disisen bilong ol yet bilong mekim wok bilong God. Paslain long ol i bin go insait long Graun Bilong Promis, Moses i tokim ol: “I gat rot bilong i stap gut na rot bilong i dai. Long wanpela rot God bai i mekim gut long yupela, na long narapela rot bai yupela i painim bagarap. Orait nau yupela i mas makim wanem rot yupela i laik bihainim. Na bai mi singautim heven na graun long lukim yupela na save long wanem rot yupela i makim. Tasol mi laikim yupela i mas bihainim rot bilong i stap gut. Yupela i mas laikim tru God, Bikpela bilong yumi, na yupela i mas harim tok bilong en na bel tru long em oltaim. Olsem na bai yupela na ol lain pikinini bilong yupela inap i stap longpela taim long dispela kantri Bikpela i bin promis long givim long ol tumbuna bilong yupela, Abraham na Aisak na Jekop.” (Lo 30:​19, 20) Olsem na em samting bilong ol wan wan Israel long makim olsem ol bai laikim Jehova, bihainim tok bilong em, na bel tru long em. Ol Israel inap makim wanem samting ol i laik mekim, olsem na ol bai kisim blesing o karim hevi long samting ol i mekim.​—Lo 30:​16-18.

7. Wanem samting i kamap bihain long taim Josua i dai?

⁷ Ol samting i bin kamap long taim bilong ol jas i stap gutpela piksa long ol samting i kamap taim man i bihainim tru tok bilong Jehova o nogat. Paslain long taim bilong ol jas, ol Israel i bin bihainim gutpela pasin bilong Josua na ol i stap gut. “Taim Josua i stap yet ol Israel i lotu long Bikpela. Na bihain long Josua i dai ol i lotu yet long Bikpela. Ol i mekim olsem inap ol lida i bin lukim ol samting Bikpela i bin mekim bilong helpim ol Israel ol tu i dai.” Tasol bihain long indai bilong Josua, wanpela “nupela lain manmeri i kamap. Dispela nupela lain i lusim tingting long Bikpela na ol samting em i bin mekim bilong helpim ol Israel. Orait ol Israel . . . i mekim pasin nogut long ai bilong Bikpela.” (Hetman 2:​7, 10, 11) I luk olsem dispela nupela lain manmeri i kamap i no tingim olsem em i wanpela gutpela samting tru olsem ol i bilong wanpela lain i dediket pinis long Jehova, em God husat i bin mekim planti strongpela samting bilong helpim ol.​—Song 78:​3-7, 10, 11.

Truim Dediket Bilong Ol

8, 9. (a) Wanem samting i givim rot long ol Israel long kamapim klia ol i dediket long Jehova? (b) Jehova i ting olsem wanem long ol man i mekim ofa long laik bilong ol yet?

⁸ Jehova i givim rot long lain bilong em long ol i ken truim dediket bilong ol. Olsem: Lo bilong em i makim ol ofa ol inap mekim, sampela ol i mas mekim na sampela ol i mekim long laik bilong ol yet. (Hibru 8:3) Ol kain ofa olsem ol ofa bilong paia i kukim abus olgeta, kukim wit, na ofa bilong kamap wanbel wantaim God, em ol ofa man i givim long laik bilong em yet. Ol i olsem presen ol i givim long Jehova bilong em i ken orait long ol na bilong tenkyu long em.​—Wok Pris 7:​11-13.

⁹ Jehova i save amamas long ol kain ofa olsem. Baibel i tok long ofa em paia i kukim olgeta na ofa bilong kukim wit olsem: “Bikpela i smelim smel bilong dispela ofa . . . na bai em i laikim na i belgut long en.” (Wok Pris 1:​7-9; 2:2) Long ofa bilong kamap wanbel, ol i ofaim blut na gris bilong animal long Jehova, na hap mit ol pris na man i mekim ofa i save kaikai. Em i olsem wanpela kaikai i makim man i stap bel isi wantaim Jehova. Lo i tok: “Taim yupela i mekim ofa bilong kamap wanbel wantaim mi, yupela i mas bihainim lo mi bin givim yupela, bilong mekim dispela ofa. Sapos yupela i mekim olsem, bai mi laikim ofa bilong yupela.” (Wok Pris 19:5) Olgeta Israel i dediket long Jehova taim mama i karim ol, tasol ol man husat i laik kamapim klia olsem ol i makim Jehova i stap God bilong ol, ol i save mekim ol ofa long laik bilong ol yet. Long dispela rot Jehova i orait long ol na ol i kisim planti blesing.​—Malakai 3:10.

10. Long taim bilong Aisaia na Malakai, olsem wanem Jehova i bin kamapim olsem em i no amamas?

¹⁰ Tasol planti taim lain Israel i no bihainim tru lo bilong Jehova. Long rot bilong profet Aisaia, Jehova i tokim ol: “Bel na tingting bilong yupela i no pas long mi long taim yupela i mekim ol kain kain ofa bilong yupela. Taim yupela i kukim ol sipsip olsem ofa bilong paia i kukim olgeta . . . yupela i no tingting long mi na mekim ol dispela ofa. Mi no bin givim hevi long yupela na tok strong long yupela i mas bringim ol ofa . . . Nogat tru.” (Aisaia 43:23) Na tu, sapos man i no amamas long mekim ofa na pasin laikim i no kirapim em long mekim ofa, orait long ai bilong Jehova dispela ofa i no gat strong. Olsem: Tri handet yia bihain long Aisaia, long taim bilong profet Malakai, ol Israel i givim ol abus i gat lek nogut samting. Olsem na Malakai i tokim ol: “Bikpela I Gat Olgeta Strong i tok olsem, . . . Mi no save amamas long pasin bilong yupela. Na bai mi no ken kisim ol ofa yupela i bringim i kam long mi. . . . Yupela i save ofaim ol abus ol wel animal i bin kilim. Na yupela i save bringim ol abus i gat sik o i gat lek nogut. Yupela i ting mi Bikpela, mi bai laikim dispela kain ofa, a? Nogat tru.”​—Malakai 1:​10, 13; Amos 5:22.

Jehova i Sakim Lain Israel

11. Lain Israel i gat rot long kisim wanem gutpela samting?

¹¹ Taim ol Israel i kamap wanpela lain pipel i dediket long Jehova, em i tok promis long ol olsem: “Sapos nau yupela i holim strong kontrak bilong mi na bihainim tok bilong mi, orait bai yupela i kamap lain manmeri bilong mi. Olgeta graun na olgeta manmeri i bilong mi, tasol mi bai makim yupela i stap lain manmeri bilong mi stret. Na bai yupela i stap lain manmeri i save mekim wok bilong mi olsem ol pris. Na bai yupela i stap ol manmeri tru bilong mi.” (Kisim Bek 19:​5, 6) Mesaia em God i bin promis long en bai kamap long ol na givim rot long ol long insait long Kingdom Bilong God. (Stat 22:​17, 18; 49:10; 2 Samuel 7:​12, 16; Luk 1:​31-33; Rom 9:​4, 5) Tasol klostu olgeta lain Israel i no bin truim dediket bilong ol. (Matyu 22:14) Ol i sakim Mesaia na bihain ol i kilim em i dai.​—Aposel 7:​51-53.

12. Jisas i bin tok wanem bilong soim olsem Jehova i sakim lain Israel, em ol i bin dediket long Em?

¹² Sampela de paslain long em i dai, Jisas i tokim ol hetman bilong lotu Juda: “Ating yupela i no bin ritim dispela hap tok i stap long buk bilong God? Dispela tok i olsem, ‘Dispela ston ol kamda i ting em i nogut na ol i rausim, nau em i kamap nambawan ston bilong strongim banis bilong haus. Bikpela yet i mekim dispela samting i kamap, na mipela i lukim em i gutpela tru.’ Olsem na mi tokim yupela, God bai i rausim kingdom bilong en long han bilong yupela, na givim long wanpela lain manmeri ol i save kamapim kaikai bilong dispela kingdom.” (Matyu 21:​42, 43) Bilong soim olsem Jehova i sakim lain Israel, em ol i bin dediket long Em, Jisas i tok: “Jerusalem, Jerusalem, yu save kilim ol profet i dai, na yu save kisim ol man God i salim i kam long yu na tromoi ston long ol bilong kilim ol i dai. Planti taim moa mi laik bungim ol pikinini bilong yu, olsem kakaruk meri i save bungim ol pikinini bilong en aninit long wing bilong en. Tasol yupela i no laik. Harim. Nau ples bilong yupela bai i bagarap na i stap nating.”​—Matyu 23:​37, 38.

Nupela Lain i Dediket Long Em

13. Jehova i mekim wanem tok profet long taim bilong Jeremaia?

¹³ Long taim bilong profet Jeremaia, Jehova i tok profet long wanpela nupela samting bilong lain pipel bilong em. Em i tok: “Harim. Mi makim pinis wanpela taim na bai mi mekim nupela kontrak wantaim ol lain bilong Israel na ol lain bilong Juda. Dispela kontrak bai i no wankain olsem kontrak bipo mi bin mekim wantaim ol tumbuna bilong ol, long taim mi kisim ol long Isip na holim han bilong ol na bringim ol i kam. Ol i bin i stap olsem meri bilong mi na mi, Bikpela, mi stap olsem man bilong ol. Tasol ol i bin brukim dispela olpela kontrak. Tasol dispela nupela kontrak mi laik mekim wantaim ol manmeri bilong Israel, em i olsem. Bai mi putim lo bilong mi long tingting bilong ol na bai mi raitim tok bilong lo long bel bilong ol. Na bai mi stap God bilong ol na bai ol i stap lain manmeri bilong mi.”​—Jeremaia 31:​31-33.

14. Nupela lain, em ol i dediket long Jehova, i bin kamap long wanem taim? Wanem samting i mekim na ol i kamap nupela lain? Dispela nupela lain ol i husat?

¹⁴ God i wokim as bilong dispela nupela kontrak taim Jisas i dai na bihain em i givim pe bilong blut bilong em long Papa bilong em, long 33 C.E. (Luk 22:20; Hibru 9:​15, 24-26) Taim holi spirit i kapsait long ol disaipel long Pentikos 33 C.E. na wanpela nupela lain i kamap, olsem “lain Israel tru bilong God,” orait long dispela taim nupela kontrak i kirap mekim wok. (Galesia 6:16; Rom 2:​28, 29; 9:6; 11:​25, 26) Aposel Pita i tok long ol Kristen God i bin makim: “God i makim yupela pinis . . . Yupela i stap ol pris bilong lain bilong king. Yupela i stap lain manmeri i holi, em ol lain manmeri tru bilong God. Yupela i stap lain manmeri God i bin makim bilong em yet, bai yupela i ken tokaut long olgeta gutpela pasin em i bin mekim long yupela. Yupela i ken tokaut long em i bin singautim yupela long lusim tudak yupela i bin i stap long en, na em i bringim yupela i kam insait long lait bilong em. . . . Bipo yupela i stap ol manmeri nating. Tasol nau yupela i stap lain manmeri bilong God.” (1 Pita 2:​9, 10) Lain Israel i no pas moa wantaim Jehova olsem lain bilong em. Long 33 C. E., Jehova i no orait moa long lain Israel bilong skin, nogat, nau em i pas wantaim lain Israel bilong spirit, olsem kongrigesen Kristen, em “wanpela lain manmeri ol i save kamapim kaikai” bilong Kingdom Bilong Mesaia.​—Matyu 21:43.

Wan Wan i Dediket

15. Long Pentikos 33 C.E., Pita i kirapim ol man i harim tok bilong em long kisim wanem baptais?

¹⁵ Bihain long Pentikos 33 C.E., olgeta wan wan manmeri, maski ol i bilong lain Juda o bilong ol narapela lain, ol yet i mas dediket long God na kisim baptais “long nem bilong Papa na bilong Pikinini na bilong Holi Spirit.”a (Matyu 28:19) Long Pentikos, aposel Pita i tokim ol Juda na ol man bilong ol narapela lain husat i bihainim lotu bilong ol Juda: “Yupela olgeta wan wan i mas tanim bel na kisim baptais long nem bilong Jisas Krais, na God bai i lusim ol sin bilong yupela. Yupela i mekim olsem, na bai God i givim Holi Spirit long yupela.” (Aposel 2:38) Long rot bilong baptais ol kain man olsem i mas soim olsem ol i bin dediketim laip bilong ol long Jehova na ol i bilip olsem Jisas em i rot Jehova i makim bilong fogivim sin bilong ol. Ol i mas daun long em olsem Hetpris Jehova i makim na em i stap Lida bilong ol, em i Het bilong kongrigesen Kristen.​—Kolosi 1:​13, 14, 18.

16. Long taim bilong Pol, olsem wanem ol man i gat gutpela bel​—ol Juda na ol narapela lain​—ol i kam insait long lain Israel bilong spirit?

¹⁶ Planti yia bihain, aposel Pol i tok: “Mi autim tok long ol man bilong Damaskus pastaim, na bihain . . . long ol manmeri bilong Jerusalem, na long olgeta hap bilong Judia, na long ol manmeri bilong ol arapela lain tu. Mi autim tok olsem, ‘Yupela i mas tanim bel na bilip long God, na pasin bilong yupela i mas soim olsem yupela i tanim bel pinis.’ ” (Aposel 26:20) Bihain long em i kirapim ol man​—em ol Juda na ol narapela lain​—​long bilip olsem Jisas em i Krais, olsem Mesaia, Pol i helpim ol long dediket na baptais. (Aposel 16:​14, 15, 31-33; 17:​3, 4; 18:8) Taim ol dispela nupela disaipel i bilip long God, ol i kam insait long lain Israel bilong spirit.

17. Wanem wok bilong putim mak i kam klostu? Wanem narapela wok i wok long kamap hariap?

¹⁷ Long nau, wok bilong putim mak long olgeta Israel bilong spirit i stap yet long graun, i kam klostu. Taim dispela wok i pinis, orait God bai tokim “4-pela ensel” long lusim ol win ol i holimpas. Em ol win bilong bagarapim ol samting long taim bilong “bikpela hevi.” Tasol i go inap long taim dispela samting i kamap, wok bilong bungim lain “planti manmeri tru,” em ol man bilong kisim laip oltaim long graun, i wok long kamap hariap. Long laik bilong ol yet ol “arapela sipsip” i bilip long “blut bilong Pikinini Sipsip” na ol i kisim baptais bilong makim olsem ol i dediket long Jehova. (KTH 7:​1-4, 9-15; 22:17; Jon 10:16; Matyu 28:​19, 20) Insait long dispela lain em ol yangpela husat ol papamama Kristen i bin mekim bikpela long ol. Sapos yu wanpela bilong ol, orait bai yu gat laik long ritim dispela hap bilong stadi i kamap bihain long dispela.

[Futnot]

Sampela Askim

• Bilong wanem ol wan wan yangpela Israel i no gat wok long dediketim laip bilong ol long Jehova?

• Ol Israel inap mekim wanem bilong soim olsem ol i truim dediket bilong ol?

• Bilong wanem Jehova i sakim lain Israel, em ol i dediket long em? Olsem wanem narapela lain i bin kisim ples bilong ol?

• Kirap long Pentikos 33 C.E. na i kam, ol Juda na ol man bilong ol narapela lain i mas mekim wanem bilong kamap lain Israel bilong spirit?

[Piksa long pes 21]

Taim mama i karim ol, ol yangpela Israel i kamap insait long lain God i bin makim

[Piksa long pes 23]

Olgeta wan wan manmeri bilong lain Israel i mas makim olsem ol bai lotuim God o nogat

[Piksa long pes 23]

Ol ofa ol i mekim long laik bilong ol yet i givim rot long ol Israel long soim olsem ol i laikim tru Jehova

[Piksa long pes 25]

Bihain long Pentikos 33 C.E., ol disaipel bilong Krais i gat wok long dediketim ol yet long God na kisim baptais bilong makim ol i dediket pinis