Askim

Bilong wanem paragraf 7 long pes 11 bilong Wastaua Epril 1, 2002, i tok olsem taim ol nupela bilipman Juda i kisim baptais long wara long Pentikos 33 C.E., dispela i makim olsem “ol i dediket pinis long God long rot bilong Krais,” tasol tingting bilong yumi bipo i olsem, taim ol Juda i kisim baptais kirap long 33 C.E. i go inap 36 C.E., i no gat wok long ol yet wan wan i dediket long God?

Long 1513 B.C.E., God Jehova i tokim ol Israel long ol inap kamap wanpela lain holi bilong em sapos ol i ‘holim strong kontrak bilong em na bihainim tok bilong em.’ Ol i tok: “Mipela bai mekim olgeta samting olsem Bikpela i bin tok.”​​—⁠Kisim Bek 19:​3-8; 24:​1-8.

Ol i tok promis long bihainim ol tok bilong kontrak bilong Lo Bilong Moses, na long dispela rot ol Israel i dediketim ol yet long God. Ol tumbuna pikinini Juda i kamap bihain, ol i kamap insait long dispela lain i dediket pinis long God. Tasol baptais bilong ol Juda i kamap disaipel bilong Jisas Krais long Pentikos 33 C.E. na bihain long en, dispela i no makim olsem ol i bilong wanpela lain i dediket pinis na ol i givim ol yet long God, nogat. Baptais bilong ol i makim wanpela nupela samting: Ol i dediket pinis long God Jehova long rot bilong Jisas Krais. Bilong wanem i olsem?

Bihain long holi spirit i kam daun long 120 disaipel i bung long Jerusalem long wanpela rum antap long Pentikos 33 C.E., aposel Pita i sanap na autim tok long planti Juda na ol arapela man i bihainim lotu Juda em ol i bin kam bung bilong luksave long samting i bin kamap. Taim Pita i autim tok pinis, em i tokim ol dispela Juda, em bel bilong ol i gat tok, olsem: “Yupela olgeta wan wan i mas tanim bel na kisim baptais long nem bilong Jisas Krais, na God bai i lusim ol sin bilong yupela.” Pita i mekim sampela tok moa na “ol i kisim baptais. Long dispela de samting olsem 3,000 manmeri i kam insait long lain bilong ol manmeri i bilip long Jisas.”​​—⁠Aposel 2:​1-​41.

Olsem wanem? Ol dispela Juda i bihainim tok bilong Pita na kisim baptais, ol i bilong wanpela lain i bin dediket pinis long God? Bekim bilong dispela askim em nogat. Aposel Pol i tok, ‘God i bin pinisim strong bilong lo na nilim em long diwai bilong Krais.’ (Kolosi 2:​14) Long rot bilong i dai bilong Krais long 33 C.E., God Jehova i pinisim kontrak bilong Lo, em long rot bilong dispela Lo ol Israel i bin kam insait long wanpela lain i dediket pinis long Em. God i sakim dispela lain, long wanem, ol i bin sakim Pikinini bilong em. “Ol Israel” bilong skin ol i no inap tok moa ol i wanpela lain i dediket pinis long God.​​—⁠1 Korin 10:18; Matyu 21:⁠43.

Kontrak bilong Lo i pinis long 33 C.E., tasol hap taim God i bin makim bilong mekim gut long ol Juda, dispela i no pinis long dispela taim.a Dispela hap taim bai stap yet, i go inap long 36 C.E., taim Pita i autim tok long Kornilius, wanpela man bilong Itali i save givim bel long God, wantaim ol wanhaus bilong em, na sampela manmeri moa bilong ol narapela kantri. (Aposel 10:​1-​48) I gat wanem as na God i mekim gut long ol i go inap long 36 C.E.?

Daniel 9:​27 (NW ) i tok, “[Mesaia] i mas larim dispela kontrak i stap bilong helpim planti manmeri i go inap wanpela wik.” Dispela kontrak​—⁠em i bin larim i stap inap 7-pela yia, o “wanpela wik,” stat long taim Jisas i kisim baptais na kirap mekim wok bilong em olsem Mesaia long 29 C.E.​—⁠em kontrak God i bin mekim wantaim Abraham. Bilong man i ken insait long dispela kontrak, em i mas kamap insait long lain tumbuna pikinini Hibru bilong Abraham, na em tasol​—⁠i no gat narapela samting em i mas mekim. Dispela kontrak i no mekim na ol i kamap man i dediket pinis long Jehova, nogat. Olsem na taim kontrak bilong Lo i pinis, ol bilipman Juda i kisim baptais taim Pita i autim tok pinis long de Pentikos 33 C.E.​—⁠maski ol i Juda bilong skin na God i mekim gut long ol⁠—⁠ol i no inap tok ol i insait long wanpela lain i bin dediket long God, nogat. Ol yet wan wan i mas kirap na dediket long God.

I gat narapela as na ol Juda na ol arapela man i bihainim lotu Juda, em ol i kisim baptais long de Pentikos 33 C.E., ol yet wan wan i mas dediket long God. Aposel Pita i tokim ol man i harim tok bilong em long ol i mas tanim bel na kisim baptais long nem bilong Jisas. Bilong mekim olsem, ol i mas givim baksait long ol pasin bilong dispela graun na save olsem Jisas em i Mesaia na Bikpela bilong ol, na Hetpris, na em i sindaun long han sut bilong God long heven. Ol i mas singaut long nem bilong God Jehova na bai God i ken kisim bek ol long rot bilong Krais Jisas, olsem na ol i mas bilip long Krais na save em i Lida bilong ol. Nau i gat nupela as na bai ol inap pas gut wantaim God na em i lusim ol rong bilong ol. Ol bilipman Juda wan wan i mas orait long dispela nupela samting. Long wanem rot? Ol i mas dediketim ol yet long God na kisim baptais long wara long nem bilong Jisas Krais. Baptais long wara i makim olsem ol i dediket pinis long God, na dispela i helpim ol long pas gut wantaim em long rot bilong Jisas Krais.​​—⁠Aposel 2:​21, 33-​36; 3:​19-​23.

[Futnot]