“Nambawan Gutpela Samting i Kamap Long Pinis Bilong Haiskul”
WANPELA tisa bilong wanpela haiskul long Spen i raitim tok olsem: “Winim 100 yia, ol Witnes Bilong Jehova i kamapim olsem ol i stap wanbel tru, bihainim stretpela pasin, na bikpela samting moa, ol i gat strongpela bilip i no gat wanpela samting inap bagarapim.” Wanem samting i kirapim dispela tisa—em i tok em i no bilip olsem i gat God i stap—long mekim dispela tok?
Em i kisim dispela tingting, long wanem, Noemí, wanpela sumatin bilong haiskul na em i wanpela Witnes Bilong Jehova, em i mas raitim wanpela stori olsem hap bilong laspela eksem bilong em long skul. Em i laik raitim stori i gat het tok “Ol Pepol Traiengol Aninit Long Gavman Natsi.”
Bilong wanem em i makim dispela het tok? Noemí i tok: “Wanpela tisa bai skelim wok bilong mi, olsem na mi ting dispela em i gutpela rot bilong autim tok long em. Mi pilim tru stori bilong ol Witnes Bilong Jehova long taim bilong ol Natsi em ol i bin sanap strong na i no lusim bilip. Na mi ting ol narapela tu bai pilim dispela stori.”
Planti narapela tu i pilim stori bilong Noemí, em i no ting kain samting olsem bai kamap. Long Oktoba 5, 2002, stori bilong em i kisim prais long wanpela resis bilong wok painimaut long ol samting bilong saiens na i stap bilong ol man. Inap 20 profesa bilong ol yunivesiti long Spen i gat nem, ol i stap insait long wanpela lain i givim ol prais bilong dispela resis.
Noemí i kisim prais bilong em long Pilar del Castillo, em minista bilong ediukesen long Spen. Rot i op na Noemí i givim wanpela vidio-kaset long em, nem bilong en Jehovah’s Witnesses Stand Firm Against Nazi Assault. Minista i amamas long kisim dispela presen.
Long taun bilong Noemí, long Manresa, niuspepa i stori long gutpela wok bilong em long skul na i kamapim sampela tok bilong dispela stori. Na hetmasta long skul bilong em i askim long kisim wanpela kopi long stori bilong em bambai em i ken putim dispela stori long program bilong tingim 75 yia bilong dispela skul.
Noemí i tok: “Dispela em i nambawan gutpela samting i kamap long pinis bilong haiskul. Mi amamas tru taim mi ritim tok bilong tisa bilong mi, Mista Jorge Tomás Calot, em i raitim long kirap bilong ripot bilong mi, olsem:
“ ‘Mi wanpela man i no bilip olsem i gat God i stap, tasol mi laik bilip tru olsem dispela Nambawan Bikpela i stap tru, em Man husat i bin kirapim ol man i lotuim em long “laikim tru neiba” bilong ol.’ ”