Litimapim Nem Bilong Jehova Long Skul
LONG olgeta hap bilong graun, ol yangpela Witnes Bilong Jehova i painim ol rot bilong litimapim nem bilong God long skul—em long rot bilong toktok na wokabaut bilong ol. Yumi ken skelim sampela ekspiriens i soim pasin bilong ol yangpela long givim bel.
Tisa bilong wanpela yangpela Witnes long kantri Grik i makim em long raitim wanpela ripot i stori long ol samting i bagarapim win. Bihain long em i mekim wok painimaut long Watch Tower Publications Index, em i painim ol gutpela tok long nius Kirap! na long pinis bilong stori em i raitim olsem em i bin kisim tok long nius Kirap! Tisa i tokim em olsem dispela stori i gutpela tru. Bihain tisa i yusim ol dispela tok long wanpela miting bilong ol tisa, na ol gutpela samting i kamap. Yangpela sista i tingting long givim tisa sampela moa nius Kirap!, em wanpela i gat stori olsem, “Teachers—What Would We Do Without Them?” Bihain tisa i tokaut long klas olsem Kirap! em i gutpela nius tru, na sampela arapela sumatin i askim long kisim sampela kopi. Dispela sista i mas bringim planti kopi bilong dispela nius i kam long skul na bai ol i ken ritim ol arapela stori.
Long Benin, Afrika, wanpela yangpela Kristen i bungim narapela kain hevi. Long wanpela pasin ol i save bihainim, ol papamama bilong sampela pikinini long skul bilong em i save baim ol tisa bilong helpim ol pikinini bilong ol long redi long tes. Tasol sori tru, ol tisa i bin makim ol Sarere moning long mekim dispela klas. Yangpela sista i tok olsem: “Sarere moning em taim bilong kongrigesen olgeta long bung na autim tok. Mi amamas tru long dispela de, winim ol narapela taim long wik, na mi no laik senisim!” Papa bilong em, wanpela papa wanpis na wanpela Witnes, i wanbel long dispela tingting na em i traim long bungim sampela papamama na ol tisa bilong senisim sediul. Tasol olgeta papamama i no laik. Dispela yangpela meri i no laik kisim dispela kain klas. Em i bung wantaim kongrigesen long wok autim tok na em i no go long ol klas. Ol wanklas i tok bilas long em, na tokim em long lusim wok autim tok, na tu, lus tingting long God bilong em. Ol i ting olsem em bai feil long tes. Tasol nogat, dispela lain sumatin i bin go long skul long ol Sarere moning i feil, tasol yangpela sista bilong yumi i winim dispela tes. Em nau, tok bilas bilong ol i pinis. Nau ol sumatin i tokim em, “Yu mas mekim yet wok bilong God bilong yu.”
Long Ripablik Sek, wanpela meri i gat 12-pela krismas i mas redim ripot long wanpela buk. Mama bilong em i tokim em long yusim buk Nambawan Man Tru i Winim Olgeta Narapela Man. Em i kirapim ripot bilong em wantaim ol dispela askim: “Wanem tingting bilong yupela? Husat em i nambawan man tru i winim olgeta narapela man?” Em i stori long Jisas, laip bilong em long graun, na ol samting em i bin skulim ol man long en. Bihain em i stori long sapta i gat het tok olsem, “Em i Lainim Ol Long Lusim Rong Bilong Narapela.” Tisa i amamas long kisim wanpela kopi bilong dispela buk na em i tok, “Dispela ripot i winim olgeta narapela ripot yu bin mekim!” Sampela wanskul tu i laikim kopi bilong dispela buk. Long de bihain, dispela meri i amamas tru long tilim 18 kopi bilong dispela buk.
Ol kain yangpela olsem i painim bikpela amamas long litimapim nem bilong Jehova long skul. Yumi olgeta i mas bihainim pasin bilong ol long givim bel.