Em i Autim Tok long Skul
PLANTI yangpela Kristen i save tingim skul i olsem ples bilong ol yet bilong autim tok. Ol i save autim tok long ol tisa na ol wanskul bilong ol. Wanpela yangpela meri long Kanada, nem bilong em Susan, em i gat 13 krismas na em i save autim tok long skul. Em i stori olsem:
‘Long Desemba tisa i tokim mipela long raitim wanpela stori bilong Krismas. Mi raitim wanpela stori, nem bilong en: As Bilong Krismas. Mi lukim sampela bikpela buk long skul na sampela Kirap! na mi raitim gutpela stori long dispela samting.’ Tisa i ting olsem wanem long en?
Susan i tok: ‘Long pinis bilong stori mi bin raitim, tisa i raitim sampela tok, olsem: “Em gutpela stori, Susan! Mi amamas long stretpela pasin bilong yu na mi tingim gut bilip bilong yu. Yu gat gutpela save na tingting na mi laik bai yu mas holimpas ol dispela gutpela pasin na bai yu gat gutnem oltaim. Yu yangpela yet, tasol yu no pret long kamapim bilip bilong yu na em i gutpela.”
‘Tisa i kaunim dispela stori na bihain em i givim long sampela narapela tisa na ol tu i kaunim. Long dispela rot mi inap autim tok long ol. Na dispela samting i strongim mi long autim tok long sampela moa long skul.
‘Ol wanskul bilong mi i save mi wanpela Witnes Bilong Jehova, na taim ol i save long dispela stori mi bin raitim, olgeta ol i laik kaunim. Mi tok mi ken kisim dispela Kirap! i kam em i stori long as bilong Krismas. Dispela Kirap! i gat sampela tok bilong disko tu long en.
‘Taim mi kisim dispela Kirap! i kam long skul, sampela moa ol i lukim na ol tu i laik kisim. Ol i laik kaunim ol dispela tok long disko, olsem na mi kisim sampela Kirap! i gat stori long disko na mi kisim i go givim long ol. Mi tilim 26 magasin long ol wanskul.
‘Bihain tisa i lainim mipela long ol senis i save kamap taim skin bilong mipela i go bikpela. Nes bilong skul i soim Wanpela piksa wokabaut long mipela long dispela samting. Mi kisim sampela buk Yangpela i go givim long sampela wanskul. Mi tokim ol, dispela buk inap helpim ol long save gut long ol dispela senis i save kamap long skin.
‘Sampela moa long klas bilong mi o1 i lukim ol dispela meri i kaunim dispela buk na ol tu i laik kisim—sampela manki tu i laik kisim. Mi tilim 17 buk Yangpela. …
‘Narapela taim wanpela yangpela meri long skul i tokim mi, em i save go long Sande-Skul na em i save kaunim Baibel, tasol em i no kisim gut as bilong ol dispela tok em i kaunim. Mi tokim em mi gat wanpela Baibel i no hatwok long kaunim na mi givim wanpela Baibel New World Translation long em na wanpela buk Baibel Stori tu. Em i amamas long kisim.’
Susan i ting olsem wanem long pasin bilong autim tok long skul? Susan i tok: “Mi save amamas mi inap autim tok long ol pren bilong mi. Mi save tingim skul i olsem ples bilong mi yet i ken autim tok long en.”
Yu skul yet? Yu save autim tok long skul?