No Ken Surik Long Autim Tok
1. Yu mas i gat wanem pasin na bai yu ken autim tok long skul? Bilong wanem yu mas i gat dispela pasin?
1 Olsem wanem? Yu pret long autim tok long skul nogut ol bai tok bilas long yu? Yu mas i gat strongpela bel na bai yu inap autim tok, moa yet sapos yu man o meri bilong sem. Wanem samting bai helpim yu?
2. Bilong wanem i gutpela long skelim gut ol samting taim yu laik autim tok long skul?
2 Skelim Gut: Tru yu inap tingim skul olsem teritori bilong yu long autim tok, tasol yu mas tingim olsem skul i no wankain olsem taim yu autim tok long ol haus we yu inap toktok wantaim olgeta man, nogat. Yu mas skelim gut wanem taim i gutpela long autim tok. (Sav. 3:1, 7) Ating rot bai op long yu kamapim bilip bilong yu taim yu kisim wanpela asainmen long skul. O ating wanpela wanskul bai askim yu long as na yu no insait long wanpela bung i kamap long skul. Long kirap bilong skul yia, sampela yangpela Kristen i tokim tisa bilong ol olsem ol i Witnes Bilong Jehova na ol i givim tisa sampela buk na nius i stori long bilip bilong yumi. Na sampela i save putim ol buk na nius antap long des bilong ol na bai ol wanskul i ken lukim na dispela bai kirapim ol long givim sampela askim long ol.
3. Yu ken mekim wanem bilong redi long autim tok long skul?
3 Yu Mas Redi Gut: Sapos yu redi gut, bai yu no pret long autim tok. (1 Pita 3:15) Traim tingim ol askim ol narapela bai kamapim, na tingim olsem wanem yu bai bekim. (Snd. 15:28) Sapos inap, putim Baibel na ol buk olsem buk Toktok Gut, Sampela Askim Bilong Ol Yangpela, na sampela nius i stori long ol samting God i wokim, na bai yu inap yusim taim ol wanskul i givim askim long yu. Tokim papamama olsem long taim bilong famili lotu yupela i ken mekim traim soim long olsem wanem yu ken bekim askim long ol wanskul.
4. Bilong wanem yu mas wok yet long autim tok long skul?
4 Holim Stretpela Tingting: No ken ting olsem olgeta taim ol wanskul bai tok bilas long yu taim yu autim bilip bilong yu. Sampela wanskul bai laikim pasin bilong yu long strongim bel na ating ol bai harim tok bilong yu. Tasol no ken bel hevi sapos ol i no laik harim. Jehova bai amamas olsem yu bin traim long autim tok. (Hib. 13:15, 16) Wok yet long askim Jehova long helpim yu long ‘autim yet tok na no ken pret.’ (Apo. 4:29; 2 Tim. 1:7, 8) Tingim amamas yu bai kisim taim wanpela i harim tok yu autim. Ating bihain em inap kamap wanpela wokman bilong Jehova!