Tisa i Senisim Tingting Bilong Em

◼ Sampela yia i go pinis, wanpela tisa long Batumi, long kantri Jojia, i tokim ol sumatin long klas bilong em long kolim ol Tenpela Lo. Em i kirap nogut long wanpela sumatin, Anna, i kolim stret olgeta dispela Lo. Na tu, em inap bekim gut ol askim bilong Baibel. Tisa i kirap nogut na i askim em long olsem wanem em i save gut long planti tok bilong Baibel. Taim Anna i bekim tok olsem em i save stadi long Baibel wantaim ol Witnes Bilong Jehova, wantu tisa i katim tok bilong em na i tok dispela lain i save strong tumas long ol bilip bilong ol.

Wanpela taim dispela tisa i tokim ol sumatin long raitim wanpela stori long sindaun bilong ol man long Jojia na wanem ol hevi ol man i gat long dispela kantri. Long pinis bilong stori bilong Anna, em i tok: “Ol man i wok strong tru long stretim sindaun bilong ol man, tasol wok bilong ol bai no inap kamapim gutpela samting, long wanem, Jeremaia 10:23 i tok: ‘Mipela man i no inap bosim wokabaut bilong mipela yet na bihainim ol rot mipela i laikim.’ Kingdom Bilong God wanpela tasol bai stretim olgeta hevi.”

Long de bihain, tisa i mekim tok amamas long stori bilong Anna long klas na em i tok: “Mi amamas long stori bilong Anna, em i raitim dispela stori long toktok bilong em yet. Long stori bilong em, em i stori gut long olsem wanem ol samting i kamap long graun inap long senis.” Tisa i kirap nogut tu long pasin bilong Anna, na em i mekim tok amamas long Anna long ai bilong klas long gutpela pasin bilong em na long em i save pasim ol klos i stret.

Taim ol Witnes Bilong Jehova i bungim dispela tisa long haus bilong em, em i tokim ol olsem pastaim em i ting ol i save strong tumas long ol bilip bilong ol. Tasol pasin bilong sumatin bilong em, Anna, i mekim na em i senisim tingting bilong em. Long 2007, dispela tisa i bung wantaim ol Witnes Bilong Jehova long Memorial bilong tingim indai bilong Jisas Krais, na em i harim gut tok i bin kamap.

Bihain long Memorial, tisa bilong Anna i tokaut olsem em i kirap nogut olsem ol Witnes Bilong Jehova i save gut tru long Baibel. Long nau ol Witnes i save stadi wantaim em long Baibel long olgeta wik. Olsem dispela tisa, ating yu tu i gat laik long save gut long as bilong ol bilip na pasin bilong ol narapela. Yu ken askim wanpela Witnes Bilong Jehova long stadi wantaim yu long Baibel, no gat pe.

[Piksa long pes 26]

Anna i raitim stori bilong em