Ripot Long Wok Bilong Kingdom
Ol Latvia i Givim Bel Long Gutnius
BAIBEL i tok klia olsem God i laik “kisim bek olgeta manmeri, bai ol i ken save long as bilong tok tru.” (1 Timoti 2:4) Ol man bipo ol i no gat rot long harim gutnius insait long planti yia, nau ol i harim! Long Latvia, wankain olsem long ol narapela hap bilong graun, ol man i gat kain kain krismas na kain kain sindaun, ol i bihainim gutnius, olsem ol ekspiriens hia i kamapim.
• Long Resekne, em wanpela taun i stap long hap is bilong Latvia, wanpela mama na yangpela pikinini meri bilong em ol i askim wanpela meri ol i bungim long rot long soim rot long ol. Taim dispela meri, em wanpela Witnes Bilong Jehova, i tokim ol long rot ol i mas bihainim, em i singautim ol long kam long ol miting bilong ol Witnes.
Dispela mama na pikinini meri bilong em ol i save tingim ol samting bilong lotu, olsem na ol i pasim tok long go long dispela miting. Taim ol i wokabaut i go, ol i pasim tok olsem sapos ol i lukim o harim sampela samting i no stret long dispela miting, bai ol i lusim hariap. Tasol dispela miting i kirapim tru tingting bilong ol, na ol i no gat tingting long lusim na go. Taim wanpela i askim ol long stadi long Baibel ol i amamas long mekim olsem na ol i kirap long go long olgeta miting. Insait long tripela mun tasol ol i toksave olsem ol i laik kirap autim tok na bihain ol i laik kisim baptais.
• Long wanpela taun long hap wes bilong Latvia, wanpela Witnes i bungim Anna i gat 85 krismas, na Anna i amamas tru long ol samting em i harim na em i laik kirap stadi long Baibel. Pikinini meri bilong em na sampela narapela long famili i wok strong long birua long em. Tasol maski Anna i lapun na sik na famili i birua long em, em i no larim ol dispela samting i pasim em long stadi long Baibel.
Wanpela taim Anna i tokim pikinini meri bilong em olsem em i laik kisim baptais. Pikinini meri i tokim em: “Sapos yu kisim baptais bai mi salim yu long wanpela haus sik bilong ol lapun.” Tasol dispela tok bilong pretim Anna i no senisim tingting bilong em. Skin bilong Anna i no strong olsem na ol i baptaisim em long haus bilong em.
Pikinini meri bilong Anna i mekim wanem nau? Em i senisim pasin bilong em, na bihain long baptais em i redim wanpela gutpela kaikai bilong mama bilong em. Na bihain em i askim mama: “Nau yu baptais pinis na yu pilim olsem wanem?” Na Anna i tok wanem? “Mi pilim olsem mama i karim mi nupela!”
• Long Disemba 1998, tupela Witnes i bungim wanpela ofisa bilong ami bilong hap bipo Rasia i bosim, tasol nau em i ritaia pinis. Em i bilip long God, olsem na em i amamas long kirap stadi long Baibel, na bihain meri bilong em tu i kirap stadi. Ol i kamap strong hariap, na i no longtaim na ol i kamap pablisa i no baptais yet. Long 6-pela mun samting bihain, dispela ofisa i kisim baptais. Pasin bilong tupela marit long laikim tru ol samting bilong spirit i bin strongim olgeta long kongrigesen. Na tu, ol i givim bel long insait long wok bilong stretim wanpela haus slip i kamap wanpela naispela Haus Kingdom.