I No Leit Tumas Long Mekim Wok Bilong God
Long Málaga, long sauten Spen, wanpela mama na pikinini meri bilong em—nem bilong tupela wantaim, em Ana—tupela i kisim baptais long Disemba 19, 2009. Ol i insait long dispela 2,352 manmeri i bin kisim baptais long Spen long 2009. Tasol i gat wanpela samting bilong dispela mama na pikinini meri bilong em i narapela kain—em krismas bilong tupela. Mama i gat 107 krismas na pikinini meri bilong em i gat 83 krismas!
Wanem samting i bin mekim na tupela i kisim baptais bilong makim olsem ol i dediket pinis long Jehova? Long 1972 samting, wanpela neiba i save singautim Ana—em pikinini meri—long go long Buk Stadi Bilong Kongrigesen ol i mekim long haus bilong dispela Witnes. Sampela taim Ana i save go. Tasol wok mani bilong em i mekim na em i no kamap strong.
Inap 10-pela yia samting bihain, sampela pikinini bilong Ana i kirap stadi long Baibel na bihain ol i kamap wokman bilong Jehova. Wanpela, em Mari Carmen, em i kirapim gen laik bilong mama long ol tok i tru bilong Baibel, na em i helpim mama long stadi long Baibel. Orait nau, bubu meri bilong Mari Carmen, em lapun Ana, em tu i gat laik long kisim save long tok bilong Baibel. Bihain, inap 10-pela bilong dispela famili ol i kisim baptais.
Long de bilong ol long kisim baptais, dispela tupela Ana, em mama na pikinini meri, ol i amamas nogut tru. Lapun Ana, husat i gat 107 krismas, em i tok: “Jehova i bin mekim gut tru long mi na em i larim mi i kisim save long em.” Na pikinini meri bilong em i tok: “Paslain long taim Paradais i kamap, mi laik mekim wok bilong Jehova, olsem mekim laik bilong em na autim gutnius inap tru long strong bilong mi.”
Samting i save givim bikpela amamas long dispela tupela meri em man bilong ol i dai pinis, em ol miting. Wanpela elda long kongrigesen bilong tupela i tok: “Tupela i no save lusim wanpela miting, nogat. Long olgeta taim ol i redi long bekim tok long Stadi Wastaua.”
Pasin bilong ol long i stap gut long wok bilong Jehova i kirapim yumi long tingim wanpela meri man bilong en i dai pinis, nem bilong en Ana, em “i no save lusim tempel. Em i save tambu long kaikai na i beten i stap, na em i holim wok bilong God long san na long nait.” Dispela i mekim na em i kisim gutpela pe tru—em i lukim liklik pikinini Jisas. (Lu. 2:36-38) Ana i gat 84 krismas, tasol em i no lapun tumas long mekim wok bilong Jehova, na tupela wan nem bilong em long nau i wankain.
Olsem wanem long yu? Yu gat sampela wanblut ol i gat laik long harim tok bilong Baibel? O yu bin bungim wanpela lapun i gat laik long harim tok taim yu autim tok long em long haus bilong em? Kain lain olsem ol inap kamap olsem dispela mama na pikinini long dispela stori, long wanem, i no leit tumas long ol i kirap mekim wok bilong God tru, em Jehova.
[Rait long pes 25]
“Jehova i bin mekim gut tru long mi”
[Rait long pes 25]
“Paslain long taim Paradais i kamap, mi laik mekim wok bilong Jehova”