Mi Lukim Pinis Strong Bilong Tok Bilong Baibel

Stori bilong Vito Fraese

ATING yu no bin harim dispela nem Trentinara, a? Em wanpela liklik taun long hap saut bilong Naples, Itali. Papamama na bikbrata bilong mi, Angelo, ol i bin kamap long dispela hap. Taim mama i karim Angelo pinis, ol i lusim Itali na i go long Yunaitet Stets, na ol i sindaun long taun Rochester, long New York. Mama i karim mi long dispela hap long 1926. Long 1922 em namba wan taim papa i bin bungim ol Sumatin Bilong Baibel, em nem bilong ol Witnes Bilong Jehova long bipo. I no longtaim na em wantaim mama i kamap Sumatin Bilong Baibel.

Papa em man bilong i stap bel isi na tingim tingim ol samting, tasol em i save belhat long pasin i no stret man i mekim bilong daunim sampela lain. Em i les tru long ol pris i save pasim lain bilong ol na ol i no gat liklik save long Baibel. Olsem na taim papa i gat rot em i save autim tok i tru bilong Baibel long ol man. Taim em i ritaia, em i kirap mekim wok bilong God fultaim na em i stap gut long dispela wok i go inap long taim em i kisim sik, na tu, taim bilong bikpela kol i save givim hatwok long em, olsem na em i lusim dispela wok taim em i gat 74 krismas. Tasol em i wok yet long lusim 40 i go inap 60 aua long olgeta mun long autim tok i go inap long taim em i winim pinis 90 krismas. Pasin bilong papa i mekim bikpela samting long mi. Sampela taim em i save tok pilai, tasol em i man bilong tingting gut long ol samting. Em i save tok: “Tok i tru em i bikpela samting na yumi mas tingim gut.”

Papa na Mama i bin wok strong long skulim mipela 5-pela pikinini long ol tok bilong Baibel. Mi kisim baptais long Ogas 23, 1943, na long Jun 1944, mi kamap painia. Susa bilong mi, Carmela, i mekim wok painia long Geneva, New York, wantaim poroman bilong em Fern, em meri bilong lap na toktok. I no longtaim na mi save olsem mi laik maritim Fern na stap wantaim em. Olsem na long Ogas 1946, mitupela i marit.

Wok Misineri

Tupela asainmen mitupela i kisim pastaim em bilong mekim wok painia salim long Geneva na Norwich, long New York. Long Ogas 1948, mitupela i go long namba 12 klas bilong Skul Gileat. Bihain long en mitupela i go long Naples, Itali, wantaim tupela misineri marit, em Carl na Joanne Ridgeway. Long dispela taim bipo, ol i hatwok long stretim bek biktaun Naples, em i bin bagarap long namba tu pait. I hatwok long painim haus slip, olsem na inap sampela mun mipela i sindaun long wanpela liklik flet i gat tupela rum long en.

Taim mi wok long go bikpela, mi harim papamama i mekim tok ples bilong Naples, olsem na tok Itali bilong mi i orait liklik na ol man inap harim, maski krai bilong en i olsem bilong ol Amerika. Fern i hatwok long lainim dispela tok ples, tasol i no longtaim na em i mekim gut wankain olsem mi, na bihain em i winim mi.

Long Naples, pastaim mipela i bungim wanpela famili tasol em ol i laik harim tok bilong Baibel. Ol i save wok hait long salim smok, em lo i tambu long mekim. Long moningtaim long olgeta de bilong wok, wanpela bilong famili, em Teresa, em i save pulimapim ol smok long planti poket long siot bilong em na em i luk olsem patpela meri. Tasol long apinun, em i luk olsem wanpela stik masis. Tok i tru i senisim tru pasin bilong dispela famili. Bihain i gat 16 bilong dispela famili ol i kamap Witnes. Long biktaun Naples long nau, i gat klostu 3,700 Witnes i stap.

Ol i Birua Long Wok Bilong Mipela

Mipela i stap 9-pela mun tasol long Naples na ol bosman bilong taun i rausim mipela 4-pela na mipela i mas lusim Naples. Mipela i go i stap long Swiselan inap wanpela mun samting, na mipela i kisim visa bilong ol turis na go bek long Itali. Mitupela Fern i kisim asainmen long autim tok long Turin. Pastaim wanpela meri i larim mipela i rentim wanpela rum long haus bilong em, na em i larim mipela i yusim rum waswas na haus kuk bilong em. Orait taim tupela marit, em ol Ridgeway, i kamap long Turin, mipela fopela i rentim wanpela flet tasol. Bihain i gat 10-pela misineri marit i sindaun long wanpela haus.

Long 1955, taim ol i rausim mipela long Turin, i gat 4-pela nupela kongrigesen i kamap. Nau i gat sampela brata bilong dispela hap, ol i gat save long mekim wok bilong lukautim ol kongrigesen. Ol bosman bilong ples i tokim mipela: “Mipela i save, taim yupela ol Amerika i go pinis, olgeta wok yupela i bin mekim bai i bagarap.” Tasol taim mipela i go pinis, lain Witnes i wok long go bikpela, na dispela i soim olsem God yet i save mekim na wok i go bikpela. Long nau i gat 4,600 Witnes na 56 kongrigesen long Turin.

Florence​—Wanpela Naispela Taun Tru

Narapela asainmen bilong mipela em long taun Florence. Planti taim mipela i bin harim ol stori bilong dispela ples, long wanem, susa bilong mi Carmela na man bilong en, Merlin Hartzler, i mekim wok misineri long dispela taun. Mipela i amamas tru long i go sindaun long Florence. I gat ol gutpela ples olsem Piazza della Signoria, Ponte Vecchio, Piazzale Michelangelo, na Palazzo Pitti, olsem na em i wanpela gutpela taun stret! Na mipela i amamas long sampela lain bilong Florence i gat laik long harim gutnius.

Mipela i stadi wantaim wanpela famili, na papamama i kisim baptais. Tasol papa em i man bilong smok. Long 1973, Wastaua i tokaut olsem smok em wanpela pasin i no klin, na i kirapim ol man bilong ritim Wastaua long ol i mas lusim smok. Ol bikpela pikinini i strong long papa i mas lusim smok. Em i tok promis long mekim olsem, tasol em i no mekim. Wanpela nait mama i salim tupela pikinini i gat 9-pela krismas, em ol twins, i go slip na em i no beten yet wantaim tupela. Bihain bel bilong em i gat tok na em i go long rum bilong tupela. Tasol tupela yet i beten pinis. Mama i askim tupela: “Yupela i beten long wanem samting?” Ol i bin beten olsem, “Jehova, plis helpim papa long lusim smok.” Meri i singautim man bilong em, “Yu kam harim beten bilong ol pikinini bilong yu.” Taim papa i harim beten bilong tupela, em i krai na i tok: “Mi no ken smok moa, nogat tru!” Em i bihainim tok promis bilong em na nau 15 bilong dispela famili ol i kamap Witnes pinis.

Wok Autim Tok Long Afrika

Long 1959 ol i salim mitupela i go long Mogadishu, Somalia, wantaim tupela narapela misineri, em Arturo Leveris na brata bilong mi Angelo. Taim mipela i kamap, i gat sampela kros pait insait long ol lain politik. Gavman bilong Itali i gat wok long helpim Somalia long kisim independens aninit long lo bilong Yunaitet Nesen, tasol i luk olsem ol samting i wok long go nogut. Sampela lain Itali em mipela i stadi wantaim ol, ol i lusim kantri, na mipela i no gat rot bilong kamapim wanpela kongrigesen long dispela hap.

Long dispela taim, wasman bilong son i laik bai mi kamap helpim bilong em. Olsem na mipela i kirap raun long ol kantri i stap klostu. Sampela lain mipela i stadi wantaim ol, ol i mas lusim kantri bilong ol, long wanem, i gat birua long wok bilong mipela. Sampela ol i stap, tasol planti hevi tru i painim ol.a Taim mipela i tingim pasin bilong ol long laikim tumas Jehova na ol hevi na pen ol i bin karim bilong i stap gut long Jehova, aiwara i save kamap long ai bilong mipela.

Somalia na Eritrea ol i ples hat, na sampela taim em i hat nogut tru. Na sampela kaikai bilong ples i gat planti lombo samting na skin bilong mipela i tuhat moa yet! Namba wan taim mipela i kisim dispela kain kaikai long haus bilong wanpela Baibel stadi, meri bilong mi i tok pilai olsem kaikai i mekim na yau i kamap ret!

Taim Angelo na Arturo i kisim nupela asainmen, mitupela tasol i stap. Nau i no gat wanpela bilong strongim bel bilong mipela. Tasol dispela i helpim mipela long i go klostu moa long Jehova na bilip na wet moa yet long em. Mipela i go long ol kantri i gat tambu long wok bilong mipela, na dispela i strongim bel bilong mipela.

Long Somalia, mipela i gat sampela hatwok. I no gat bokis ais, olsem na long olgeta de mipela i save baim liklik kaikai tasol inap long wanpela de, olsem hap mit bilong sak o ol prut bilong ples, olsem mango, popo, grep, kokonas, o banana. Na i gat planti ol liklik binatang i save flai. Sampela taim ol i save kam sindaun long nek bilong mipela taim mipela i mekim Baibel stadi. Maski i gat ol dispela hatwok, mipela i gat liklik motobaik, olsem na mipela i no gat wok long wokabaut long lek inap planti aua long traipela san.

Go Bek Long Itali

Sampela pren i helpim mipela long mani na mipela inap kisim sip i go bek long Itali na i go long kibung intenesenel long Turin long 1961. Mipela i harim olsem mipela bai kisim nupela asainmen gen. Long Septemba 1962, mipela i go bek long Itali na mi kirap mekim wok olsem wasman sekit. Mipela i baim wanpela liklik ka, na mipela i raun long tupela sekit inap 5-pela yia long dispela ka.

Mipela i lusim pinis ples hat bilong Afrika, tasol nau mipela i stap long hap i save kamap kol nogut tru. Long namba wan yia bilong mipela long dispela hap, mipela i go lukim wanpela kongrigesen i stap long as bilong ol traipela maunten Alps. Em taim bilong kol na mipela i slip long wanpela rum antap long ples bilong bungim gras bilong ol animal, na i no gat stov bilong hatim rum. Mipela i kol nogut tru na mipela i go slip wantaim saket bilong mipela. Long dispela nait yet, 4-pela kakaruk na tupela dok i stap klostu ol i dai long dispela kol.

Bihain mi mekim wok wasman distrik tu. Long ol dispela yia mipela i raun long olgeta hap bilong Itali. Planti taim mipela i save go long Calabria na Sicily. Mipela i wok long kirapim ol yangpela long kamap strong long ol samting bilong spirit na wok strong long winim mak bilong kamap wasman bilong kongrigesen, o wasman raun, o mekim wok long Betel.

Mitupela i bin kisim planti gutpela tingting long ol pren i bin stap gut long Jehova na givim bel olgeta long mekim wok bilong em. Mipela i pilim tru ol gutpela pasin bilong ol, olsem ol i stap gut long Jehova long olgeta samting, na ol i amamas long givim ol samting, na laikim tru ol brata bilong ol, na ol i redi long senis i kamap long ol na daunim sampela laik bilong ol. Mipela i bin i go long ol weding long Haus Kingdom. Ol Witnes​—em gavman i orait long ol olsem wokman bilong lotu​—i bin wokim ol dispela weding, bipo ol i no inap mekim olsem long dispela kantri. Ol kongrigesen i no save mekim moa ol miting long haus kuk bilong ol brata o sindaun long ol plang, olsem bipo ol i bin mekim long Turin. Long nau planti kongrigesen ol i gat ol naispela Haus Kingdom i save litimapim nem bilong Jehova. Na mipela i no save mekim kibung long ol haus bung mipela i rentim na i no gutpela tumas. Nau mipela i save kibung long ol bikpela Haus Kibung bilong mipela yet. Na mipela i amamas tru long namba bilong ol pablisa i winim 243,000. Taim mitupela i bin kam nupela long Itali, i gat 490 pablisa tasol.

Mipela Makim Rot i Stret Long Bihainim

I gat sampela hevi na hatwok i bin painim mipela, olsem mipela i sori long ples bilong mipela, na sampela sik tu i painim mipela. Bipo, taim Fern i lukim solwara, em i save sori long ples bilong em. Na sik i mekim na em i bin kisim 3-pela bikpela operesen. Wanpela taim em i go bilong mekim Baibel stadi, na wanpela birua bilong tok i tru i paitim em long bikpela fok bilong wokim gaden na em i mas i go long haus sik.

Tru, sampela taim ol samting i mekim na mipela i bel hevi, tasol mipela ‘i wet long Jehova,’ olsem Krai 3:24 i tok. Em i God bilong mekim gut bel bilong ol man. Wanpela taim mitupela i bel hevi i stap na Fern i kisim wanpela gutpela pas long Brata Nathan Knorr. Em i tok, mama i bin karim em klostu long Bethlehem, Pennsylvania, long ples Fern i bin kirap mekim wok painia, olsem na em i save, ol meri bilong Pennsylvania, olsem Fern, ol i strongpela meri bilong mekim wok. Na em i tok stret. Long ol yia i kam i go pinis, long kain kain rot i gat planti samting na planti manmeri ol i bin strongim bel bilong mipela.

Maski ol hevi i bin painim mipela, mipela i wok strong long givim bel yet long mekim wok autim tok. Mipela i mekim wok sekit na wok distrik inap 40 yia na mipela i kisim nupela wok, em bilong raun na lukim ol kongrigesen na kamapim ol grup i save mekim ol narapela tok ples. Ol dispela kain grup i save autim tok long ol manmeri bilong Banglades, Eritrea, Filipins, Gana, India, Itiopia, Naijiria, Saina, Sri Lanka, na sampela kantri moa. Mipela inap kamapim planti stori moa long ol gutpela rot tru mipela i bin lukim strong bilong Tok Bilong God i senisim i stap bilong ol manmeri i bin kisim marimari bilong Jehova.​—Mai. 7:​18, 19.

Long olgeta de mitupela i save beten bai Jehova i wok yet long givim strong long mipela bilong mekim wok autim tok. Mipela i amamas long Bikpela na dispela i strongim mipela. Em i save mekim pes bilong mipela i lait na i soim mipela olsem mipela i bin makim ol rot i stret long bihainim taim mipela i mekim wok bilong autim tok i tru bilong Baibel.​—Ef. 3:7; Kl. 1:29.

[Ol Futnot]

[Sat/Ol Piksa long pes 27-29]

Papamama bilong mi long Rochester, New York

1948

Long South Lansing, long namba 12 klas bilong Gileat

1949

Mitupela Fern, paslain long mipela i go long Itali

Capri, Itali

1952

Long Turin na Naples wantaim ol narapela misineri

1963

Fern wantaim sampela Baibel sumatin bilong em

Mi na meri bilong mi long nau