Maski Em i Lapun, Em i Mekim Wok Bilong Jehova

PLANTI lapun i pilim olsem ol i no gat rot moa bilong i stap amamas. Wanpela meri i gat biknem long ol piksa wokabaut na taim em i go lapun, em i tok: “Mi no bin mekim gutpela wok long laip bilong mi, tasol mi no inap stretim nau. Taim . . . mi tingting bek long ol samting mi bin mekim, mi no amamas long en . . . Mi no inap sindaun gut long wanpela hap na i stap amamas.”

Wanpela lapun meri i stap klostu 2,000 yia bipo, em i no gat kain hevi olsem. Em i stap wanpis na em i gat 84 krismas, tasol em i mekim wok, na i stap amamas, na God i mekim gut tru long em. Nem bilong em Ana. I gat wanem as na Ana i amamas?

“Ana i No Save Lusim Tempel”

Luk i stori long Ana. Em i tok: “Wanpela profet meri i stap, nem bilong en Ana. Em i pikinini bilong Fanuel bilong lain bilong Aser” long Israel. Spirit holi o strong bilong God i stap long em, olsem na em inap autim ol tok profet. Taim wanpela bikpela samting i bin kamap em i autim wanpela tok profet.

Luk i stori moa olsem: “Em i lapun tru. Bipo em i marit, na i stap 7-pela yia wantaim man bilong en. Na bihain man bilong en i dai, na em i stap nating. Na nau em i gat 84 krismas bilong en.” (Luk 2:​36, 37) Ating Ana i yangpela yet na man bilong em i dai. Ol meri Kristen long nau, em man bilong ol i dai, maski ol i lapun o yangpela ol inap pilim hevi bilong Ana. Tasol Ana i no larim dispela hevi i pasim em; em i no lusim wok bilong God.

Luk i tok: “Ana i no save lusim tempel” long Jerusalem. (Luk 2:37) Em i pilim tru blesing em inap kisim taim em i mekim wok long haus bilong God. Ol samting em i mekim i kamapim klia olsem, i gat wanpela samting tasol em i askim God long en, olsem Devit i bin mekim. Em wanem samting? Devit i tok: “Mi askim [God] bai mi ken i stap long haus bilong em inap olgeta de mi gat laip. Mi laik amamas long em i gutpela tumas long mi. Na mi laik askim em long soim mi gutpela rot.” (Song 27:⁠4) Ana i olsem ol meri Kristen long nau, em ol i amamas long i go oltaim long ples bilong lotuim Jehova.

Ana i lotu long Jehova long san na long nait. “Em i save tambu long kaikai na i beten i stap.” Dispela pasin i makim em i hevi long wanpela samting, na em i gat strongpela laik long wanpela samting. (Luk 2:37) Inap planti handet yia pinis, ol Juda i stap aninit long ol narapela lain, na planti pasin nogut i kamap long lotu bilong ol, long tempel na long lain pris tu. Ating Ana i tingim dispela na em i tambu long kaikai na beten strong long God Jehova. Tasol i gat as tu na Ana i amamas. Wanpela bikpela samting i kamap long yia 2 paslain long taim bilong Krais na Ana i amamas tru long en.

Em i Kisim Blesing

Dispela bikpela samting em olsem: Mama bilong Jisas, Maria, na waspapa bilong em, Josep, i kisim pikinini Jisas i kam long tempel. Lapun Simeon i lukim pikinini na em i autim tok profet. (Luk 2:​25-35) Ana i no save lusim tempel, olsem na em i stap, na Luk i tok, “em tu i kam klostu long pikinini.” (Luk 2:38) Yumi save, lapun Ana i amamas tru long lukim dispela pikinini em bai kamap Mesaia, em man God i salim bilong kisim bek ol!

Foti de paslain, ensel bilong God i bin tokim ol wasman bilong sipsip long Betlehem: “Harim. Mi bringim gutnius i kam long yupela . . . Long dispela de long taun bilong Devit, wanpela meri i karim pikinini. . . . Em i Bikpela, na em i man God i makim bilong kisim bek ol manmeri bilong en.” Wantu planti ensel moa i kamap na ol i tok: “Litimapim nem bilong God i save stap antap tru. Na long graun ol manmeri [God i belgut long ol] i ken stap bel isi.” (Luk 2:​8-14) Olsem tasol Ana i kirap na tokaut long dispela Man em bai kamap Mesaia.

Taim Ana i lukim pikinini Jisas, em “i tenkyu long God, na em i autim tok bilong dispela pikinini long olgeta manmeri i wet long God i kisim bek ol manmeri bilong Jerusalem.” (Luk 2:38) Olsem lapun Simeon, Ana tu i laik tru bai Man bilong kisim bek ol i kam olsem God i promis pinis; Ana i beten na wetim em i kam. Em i amamas tru long gutnius olsem Jisas em i dispela Man na em i no inap pasim maus; em i tokaut long dispela samting.

Ana i lapun, na ating em i save, em i no inap lukim Jisas taim em i bikpela pinis, tasol em i mekim wanem? Em i amamas long tokim ol man, long rot bilong Mesaia bai God i kisim bek ol.

Ana Em i Gutpela Piksa

Ol man bilong dispela graun, em ol i man bilong lotu na ol i gat 84 krismas, yu ting ol i laik autim tok olsem, na mekim yet wok bilong God long san na long nait? Nogat, a? Ating longtaim pinis ol i laik lusim wok na kisim pensen. Ana na Simeon, nogat. Ol i gutpela piksa bilong ol lapun, em ol i mekim wok bilong Jehova. Tupela i laikim tumas haus bilong lotuim Jehova, na ol i givim bel olgeta long litimapim nem bilong em.

Ana em i gutpela piksa bilong ol meri wanpis long pasin bilong givim bel long God. Stori bilong Luk long dispela lapun meri i gat pasin daun i stret wantaim ol mak Pol i kolim bilong meri wanpis ol Kristen i mas lukautim. Long 1 Timoti 5:​3-16, Pol i tok, kain gutpela meri olsem em i save beten “long san na long nait,” na em “i bin i stap meri bilong wanpela man tasol,” na em i save “mekim ol kain kain gutpela wok.” Ana em i gutpela meri olsem.

Long planti tausen kongrigesen bilong ol Witnes Bilong Jehova long nau, i gat ol gutpela lapun meri wanpis olsem, em ol i save mekim wok bilong God long san na long nait. Yumi pilim tru gutpela wok bilong ol dispela lapun “Ana” i stap long lain bilong yumi!

Maski man o meri i lapun tru, em inap givim bel long God na kisim baptais. Em i no ken ting em i lapun tumas. Ol lapun inap mekim wok bilong Jehova, na autim tok bilong Kingdom bilong Krais i kamap pinis long heven na klostu nau bai em i mekim gut tru long ol man i bihainim tok. Ol lapun i mekim wok bilong God long nau, God i mekim gut tru long ol, olsem em i mekim long lapun Ana long bipo. Maski Ana i lapun, em i mekim wok bilong Jehova na litimapim nem bilong em, na ol lapun long nau tu inap mekim olsem.