Karim Yet Kaikai Taim Ol i Lapun Pinis

“Ol i olsem ol diwai ol i planim pinis long haus bilong Bikpela. . . . Taim ol i olpela pinis, ol i save karim kaikai yet.”​—SONG 92:​13, 14.

1, 2. (a) Ol man i save kamapim wanem kain tok taim ol i stori long ol samting i makim lapun? (b) Baibel i mekim wanem tok promis long ol samting nogut em sin bilong Adam i mekim long ol man?

LAPUN pinis​—taim yu harim dispela tok yu save tingim wanem samting? Skin i go slek? Yau i no inap harim gut ol tok? Hanlek i no strong tumas? O yu tingim sampela narapela samting i kamap long “taim nogut” em Saveman 12:​1-7 i stori long en? Sapos olsem, em i bikpela samting yu mas tingim olsem ol tok bilong Saveman 12 i makim ol samting sin bilong Adam i mekim long skin bilong ol man taim krismas bilong ol i go antap. Na dispela i no laik bilong Man Bilong Wokim yumi, em God Jehova.​—Rom 5:12.

² Taim krismas bilong man i wok long i go antap, dispela i no samting nogut, long wanem, taim man i stap laip krismas bilong em i no save stap wankain tasol, nogat, krismas i mas go antap. Tingim, ol samting i gat laip i save go bikpela na dispela em i gutpela samting. Klostu nau ol samting nogut em sin i bin mekim long yumi insait long siks tausen yia bai pinis, na olgeta man i bihainim tok bai kisim laip olsem God i laik ol i mas kisim long pastaim tru, bai ol i no gat pen bilong i go lapun na i dai. (Stat 1:28; KTH 21:​4, 5) Long dispela taim bai i no gat wanpela man i tok “Mi gat sik.” (Aisaia 33:24) Ol lapun bai i “kamap gutpela na strongpela gen, wankain olsem [ol] i bin i stap long taim [ol] i yangpela man.” (Jop 33:25) Long nau yumi mas karim hevi long sin yumi kisim long Adam. Tasol ol wokboi bilong Jehova i save kisim ol gutpela blesing taim ol i wok long i go lapun.

3. Olsem wanem ol Kristen i ken ‘karim kaikai yet taim ol i olpela pinis’?

³ Baibel i tokim yumi olsem ol man husat ‘i olsem ol diwai ol i planim pinis long haus bilong Bikpela, taim ol i olpela pinis ol bai karim kaikai yet.’ (Song 92:​13, 14) Long tok piksa, man bilong raitim song i kamapim wanpela as bilong tok i tru olsem maski strong bilong wanpela wokboi bilong Jehova i wok long pinis, em inap pas gut wantaim Jehova na mekim yet wok bilong lotu. Long taim ol i raitim Baibel na long nau tu i gat planti eksampel bilong ol manmeri i bin mekim olsem.

“Ana i No Save Lusim Tempel”

4. Lapun profet meri Ana i bin mekim wanem bilong kamapim olsem em i givim bel long mekim lotu? Em i kisim wanem gutpela blesing?

⁴ Tingim profet meri Ana, em i bin stap long taim bilong Jisas. Em i gat 84 krismas na em i “no save lusim tempel. Em i save tambu long kaikai na i beten i stap, na em i holim wok bilong God long san na long nait.” Papa bilong Ana em bilong lain Aser, i no bilong lain Livai, olsem na Ana i no inap sindaun long hap bilong tempel. Tingim hatwok Ana i mas mekim bilong i stap long tempel long olgeta de, kirap long taim bilong namba wan ofa long moning i go inap laspela ofa long apinun tru! Tasol Jehova i blesim tru pasin bilong Ana long givim bel long mekim lotu. Em i stap long tempel taim Josep na Maria i bihainim Lo na kisim bebi Jisas i kam long tempel bilong givim em long Jehova. Taim Ana i lukim Jisas, em i kirap “tenkyu long God. Na em i autim tok bilong dispela pikinini long olgeta manmeri i wet long God i kisim bek ol manmeri bilong Jerusalem.”​—Luk 2:​22-​24, 36-​38; Namba 18:​6, 7.

5, 6. Olsem wanem planti lapun long nau ol i bihainim pasin bilong Ana?

⁵ Planti lapun namel long yumi long nau ol i bihainim wankain pasin olsem Ana taim ol i go oltaim long ol miting, beten askim God long helpim lotu i tru, na ol i gat strongpela laik long autim gutnius. Wanpela brata i winim 80 krismas i save go oltaim long ol miting Kristen wantaim meri bilong em, em i tok: “Mipela i kisim pasin bilong i go long ol miting. Mipela i no gat laik long i stap long narapela hap. Wanem hap ol manmeri bilong God i stap long en, em dispela hap mipela i laik i stap long en. Mipela stap amamas na stap gut long ol miting.” Tupela i stap olsem gutpela piksa bilong strongim bel bilong yumi olgeta!​—Hibru 10:​24, 25.

⁶ “Sapos i gat sampela wok bilong lotu i tru mi inap insait long en, mi gat laik long mekim dispela wok.” Dispela em i tingting bilong Jean, em wanpela wido i winim 80 krismas. Em i tok moa olsem: “Tru, mi bel hevi sampela taim, tasol i no gat as na olgeta man i stap klostu long mi i mas bel hevi taim mi bel hevi, a?” Ai bilong em i lait taim em i stori long amamas em i kisim long ol bung bilong lotu em i go long en long ol narapela kantri. I no longtaim i go pinis long wanpela raun bilong em, em i tokim ol poroman bilong em: “Mi les pinis long raun lukim ples; mi laik mekim wok autim tok!” Maski Jean i no save long tok ples, em i bin kirapim ol manmeri long putim yau long tok bilong Baibel. Na tu, inap sampela yia Jean i bin wok wantaim wanpela kongrigesen i sot long sampela helpim, maski em i mas lainim nupela tok ples na lusim wanpela aua long i go i kam long ol miting.

Mekim Tingting i Wok Gut Yet

7. Taim Moses i lapun pinis, em i mekim wanem tok i soim olsem em i laik i go klostu moa long God?

⁷ Taim man i stap laip planti yia, save bilong em i go bikpela. (Jop 12:12) Tasol maski krismas bilong man i go antap, dispela samting tasol i no mekim na save man i holim long Baibel i kamap klia moa. Olsem na ol gutpela wokboi bilong God i no gat tingting olsem ol samting ol i bin lainim long bipo em inap long ol, nogat, ol i wok long “skruim save” bilong ol taim ol yia i wok long lus. (Sindaun 9:9) Taim Jehova i makim em long mekim wok, Moses i gat 80 krismas. (Kisim Bek 7:7) Long taim bilong Moses ol strongpela man tasol i winim 80 krismas. Moses i tok: “Mipela i save stap inap 70 yia tasol. Na sapos mipela i gat strong, mipela i ken i stap inap 80 yia.” (Song 90:10) Tasol Moses i no pilim olsem em i lapun tumas na em i no inap lainim nupela samting. Inap planti yia em i bin mekim planti gutpela wok bilong God, na em i bin mekim bikpela wok bilong bosim ol man, tasol maski i olsem Moses i tokim Jehova: “Mi laik yu tokim mi long tingting bilong yu na bai mi ken save gut long yu.” (Kisim Bek 33:13) Long olgeta taim Moses i gat laik long i go klostu moa long Jehova.

8. Daniel i bin mekim wanem na tingting bilong em i wok gut yet taim em i winim 90 krismas? Wanem samting i kamap long dispela?

⁸ Taim profet Daniel i winim 90 krismas em i wok yet long skelim na tingim tingim ol rait holi. Samting em i kisim save long en taim em i stadi long “ol buk bilong God”​—ating sampela bilong ol dispela buk em Buk Wok Pris, Aisaia, Jeremaia, Hosea, na Amos​—i kirapim em long beten strong long Jehova. (Daniel 9:​1, 2) Jehova i bekim beten bilong em na i givim save long em long taim Mesaia bai kam na ol samting bai painim lotu i tru long bihain.​—Daniel 9:​20-​27.

9, 10. Sampela i bin mekim wanem na bai tingting bilong ol i ken wok gut yet?

⁹ Wankain olsem Moses na Daniel, yumi mas wok strong long tingim ol samting bilong lotuim God long olgeta taim yumi inap mekim olsem. Planti manmeri i save mekim olsem. Worth, wanpela elda Kristen i winim 80 krismas, em i save wok strong long ritim ol buk na nius em “wokboi i gat gutpela tingting” i save kamapim. (Matyu 24:45) Em i tok: “Mi laikim tru tok i tru, mi save amamas tru long lukim olsem wanem lait bilong tok tru i wok long lait moa yet.” (Sindaun 4:18) Na Fred, husat i bin mekim fultaim sevis winim 60 yia, em i amamas long toktok wantaim ol wanbilip long ol tok bilong Baibel na dispela i kirapim em long tingim ol samting bilong lotu. Em i tok: “Oltaim tok bilong Baibel i mas i stap strong long tingting bilong mi. Sapos yu inap mekim na tok bilong Baibel i stap strong long tingting bilong yu​—olsem i gat as bilong en​—na sapos yu tingim olsem wanem ol samting yu wok long lainim i helpim ‘ol dispela gutpela tok’ em Jisas i bin kamapim, orait nau yu inap luksave olsem wanem ol narapela narapela save yu holim i stret wantaim.”​—2 Timoti 1:13.

¹⁰ Maski man i lapun pinis, dispela i no makim olsem em i no inap lainim ol nupela samting i hatwok long kisim. Sampela manmeri i gat 60, 70, o 80 krismas i bin lain long rit na rait o lainim nupela tok ples. Sampela Witnes Bilong Jehova i bin mekim olsem na bai ol i ken autim gutnius long ol man bilong ol narapela kantri. (Mak 13:10) Harry na meri bilong em ol i gat klostu 70 krismas taim ol i pasim tok long helpim ol man i save mekim tok Potugal. Harry i tok: “Yumi save, olgeta samting yumi laik mekim i save hatwok moa taim yumi lapun.” Tasol maski i olsem, tupela i wok strong na ol i no les, olsem na ol inap stadi long Baibel wantaim ol man long tok Potugal. Na tu, inap planti yia pinis, Harry i bin mekim ol tok long ol kibung distrik long nupela tok ples bilong em.

11. Bilong wanem yumi laik tingim ol samting ol lapun, em ol i stap gut long God, i bin mekim?

¹¹ Helt na sindaun i mekim na olgeta lapun i no inap mekim ol samting yumi stori pinis long en. Olsem na i gat wanem as na yumi laik skelim ol samting sampela lapun i bin mekim? I no bilong tok olsem olgeta lapun i mas mekim wankain samting, nogat. Yumi laik tingim tok aposel Pol i bin raitim long ol Kristen Hibru taim em i stori long ol gutpela elda bilong ol kongrigesen, em i tok: “Yupela i mas tingting long pasin ol i bin wokabaut long en, na yupela i mas bihainim pasin bilong bilip bilong ol.” (Hibru 13:7) Taim yumi tingim pasin bilong ol lapun bratasista long givim bel long mekim wok bilong God, dispela inap kirapim yumi long bihainim strongpela bilip bilong ol. Harry, em i gat 87 krismas, i stori long samting i save kirapim em long mekim wok, em i tok: “Mi laik mekim gutpela wok long ol yia mi stap laip yet na mekim olgeta samting mi inap mekim insait long wok bilong Jehova.” Fred, em yumi bin stori pinis long em, i save amamas tru long mekim wok bilong em long Betel. Em i tok: “Yu mas painimaut olsem wanem yu inap mekim gutpela wok bilong lotuim Jehova na wok long mekim i go i go.”

Givim Bel Long Mekim Wok Maski Sindaun i Senis

12, 13. Maski sindaun bilong Barsilai i bin senis, olsem wanem em i kamapim pasin bilong givim bel tru long God?

¹² Taim ol senis i kamap long bodi bilong yumi dispela inap givim hatwok long yumi. Tasol maski i gat ol kain senis olsem, yumi inap givim bel long mekim wok bilong God. Barsilai bilong distrik Gileat i stap olsem gutpela piksa long dispela samting. Taim em i gat 80 krismas em i mekim gut tru long Devit na ami bilong em. Em i givim kaikai na ples slip long ol taim Apsalom i bin bikhet long Devit. Taim Devit i go bek long Jerusalem, Barsilai i kam daun long wara Jordan wantaim king. Devit i bin tok long Barsilai i mas kam wantaim em long Jerusalem na stap long haus bilong king. Barsilai i bin mekim wanem tok? Em i tok: “Harim. Mi gat 80 krismas nau, na mi no moa save long wanpela samting i gutpela o nogat. Na sapos mi kaikai na dring, mi no inap pilim dispela samting i swit o nogat. Na yau bilong mi i no gutpela na mi no inap harim nek bilong ol man na meri i mekim song. . . . Tasol pikinini man bilong mi, Kimham, em i stap. Na em i ken i go wantaim yu. Na wanem samting yu laik mekim bilong helpim em, orait yu mekim tasol.”​—2 Samuel 17:​27-​29; 19:​31-​40.

¹³ Maski krismas i go antap na sindaun i senis, Barsilai i bin mekim olgeta samting em inap long mekim bilong sapotim king em Jehova i bin makim. Em i luksave olsem em i no inap pilim swit bilong kaikai na yau i no wok gut olsem bipo, tasol em i no bel hevi, nogat. Em i no tingim em yet tasol. Barsilai i tokim Devit long givim Kimham ol dispela samting em i bin tok long givim em. Dispela i kamapim klia olsem Barsilai em i wanpela gutpela man. Wankain olsem Barsilai, planti lapun long nau i no save tingim ol yet tasol, ol i save givim ol samting long ol narapela. Ol i mekim olgeta samting ol inap mekim bilong sapotim lotu i tru. Ol i save “em dispela kain ofa God i save laikim tru.” Em i gutpela tru yumi gat ol kain manmeri i stap namel long yumi!​—Hibru 13:16.

14. Devit i lapun pinis taim em i mekim tok bilong Song 37:​23-​25, na dispela i mekim wanem long yumi?

¹⁴ Sindaun bilong Devit i bin senis planti taim, tasol em i bilip tru olsem oltaim Jehova i save lukautim ol gutpela wokboi bilong em. Klostu long taim em i laik i dai, Devit i bin raitim Song 37. Piksaim long tingting bilong yu olsem Devit i stap na em i wok long tingim ol samting i bin painim em long laip bilong em na em i mekim musik na singim ol dispela tok hia: “Bikpela i save stiaim wokabaut bilong ol manmeri. Sapos em i laikim pasin bilong wanpela man, em i save strongim em long wokabaut stret. Maski sapos dispela man i pundaun, em i no inap bagarap olgeta. Bikpela i save holim han bilong en, na helpim em long sanap gen. Bipo mi yangpela, na nau mi lapun pinis, tasol mi no lukim God i givim baksait long wanpela stretpela man. Na mi no lukim ol pikinini bilong stretpela man i sot long kaikai, na i raun askim ol arapela man long givim kaikai long ol. Nogat tru.” (Song 37:​23-​25) Long dispela song Jehova i ting i stret long stori olsem Devit i lapun pinis. Dispela i mekim na yumi pilim tru tok Devit i mekim!

15. Olsem wanem aposel Jon i stap olsem gutpela piksa long pasin bilong i stap gut long God, maski sindaun bilong em i senis na em i lapun?

¹⁵ Aposel Jon tu i stap olsem gutpela piksa long pasin bilong i stap gut long God maski sindaun bilong em i senis na em i lapun tru. Jon i bin mekim wok bilong God klostu 70 yia, na nau em i kalabus long ailan Patmos, long wanem, em i ‘autim tok bilong God na autim tok olsem em i bilip long Jisas.’ (KTH 1:9) Tasol wok bilong em i no pinis. Olgeta hap bilong Baibel em Jon i raitim, em i bin raitim long ol laspela yia bilong em long i stap laip. Taim em i stap long Patmos em i bin kisim piksa olsem driman bilong Kamapim Tok Hait, na em i raitim olgeta samting em i bin lukim. (KTH 1:​1, 2) Ol i ting em i lusim kalabus taim Empera Nerva i bosim Rom. Bihain, klostu long 98 C.E., taim Jon i gat 90 o 100 krismas samting, em i bin raitim Gutnius bilong em na Namba 1, Namba 2, na Namba 3 Jon.

Jehova i No Inap Lusim Tingting

16. Olsem wanem ol manmeri husat i gat hevi long toktok ol i ken soim olsem ol i givim bel long lotuim Jehova?

¹⁶ I gat kain kain hevi bilong skin inap painim ol man. Sik i mekim na sampela man i gat hevi long toktok wantaim ol narapela. Tasol ol i kisim amamas taim ol i tingim ol samting i bin painim ol na dispela i kamapim pasin laikim na gutpela pasin sori bilong God. Maski long maus ol i hatwok long toktok, long bel ol i tokim Jehova olsem: “Mi laikim tru lo bilong yu. Mi save tingting long en long san na long nait.” (Song 119:97) Jehova i save long ol manmeri em ol i “tingting long em oltaim,” na em i amamas olsem ol i narapela kain long klostu olgeta narapela manmeri, em ol i no save tingim em liklik. (Malakai 3:16; Jop 35:10) Taim yumi save olsem Jehova i amamas long ol samting yumi tingting long en, dispela i save mekim gut bel bilong yumi!​—1 Stori 28:9; Song 19:14.

17. Ol wokboi bilong Jehova husat i bin mekim wok bilong em inap longtaim tru ol i kisim wanem samting i narakain tru?

¹⁷ Yumi no ken lusim tingting olsem sampela i bin mekim wok bilong Jehova inap planti yia tru na ol i winim wanpela mak i narakain tru na i no gat narapela rot long winim​—em ol i bin sanap strong na mekim wok bilong Jehova, na Em i no inap lusim tingting long dispela. Jisas i tok: “Yupela i mas i stap strong, na bai yupela i kisim laip na i stap gut.” (Luk 21:19) Bilong kisim laip oltaim man i mas sanap strong. Yupela husat i bin “bihainim laik bilong God” na ol samting yupela i bin mekim long laip bilong yupela i kamapim klia olsem yupela i bin stap gut long God, bihain “yupela i ken kisim ol gutpela samting, bipo God i promis long givim yupela.”​—Hibru 10:36.

18. (a) Taim Jehova i tingim ol lapun em i amamas long lukim wanem samting? (b) Bai yumi skelim wanem samting long stadi i kamap bihain long dispela?

¹⁸ Jehova i save tingim tru pasin bilong yupela long givim bel olgeta long mekim wok bilong em maski yupela inap mekim planti samting o liklik samting tasol. Maski wanem samting i kamap long “bodi” bilong yupela taim yupela wok long i go lapun, “bel” bilong yupela inap kamap nupela gen long olgeta de. (2 Korin 4:16) Yumi save olsem Jehova i save amamas long ol gutpela wok yupela i bin mekim long pastaim, tasol i klia tru olsem em i amamas long ol samting yupela i mekim long nau tu bilong lotuim em. (Hibru 6:10) Long stadi i kamap bihain long dispela bai yumi skelim ol samting pasin bilong i stap gut long God i save mekim.

Bai Yu Bekim Olsem Wanem?

• Ana i makim wanem gutpela piksa em ol lapun Kristen long nau i ken bihainim?

• I no olsem krismas bilong man i mas pasim em long mekim ol samting​—bilong wanem i olsem?

• Olsem wanem ol lapun i ken wok long kamapim yet pasin bilong givim bel tru long God?

• Jehova i ting olsem wanem long wok ol lapun i mekim bilong lotuim em?

[Piksa long pes 23]

Long rot bilong “ol buk bilong God” lapun Daniel i kisim save long ol Juda i mas kalabus inap hamas yia

[Ol Piksa long pes 25]

Planti lapun ol i stap gutpela piksa long pasin bilong i go oltaim long ol miting, givim bel long autim tok, na amamas long lainim ol samting