Barsilai​—Em i Save Long Skel Bilong Em

‘BILONG WANEM bai mi givim hevi long yu?’ Man i mekim dispela tok long King Devit bilong Israel, em Barsilai, em i gat 80 krismas. Baibel i tok “em i gat planti mani samting.” (2 Samuel 19:​32, 35) Barsilai i sindaun long graun Gileat, em ples maunten long hap is bilong wara Jordan.​—2 Samuel 17:27; 19:31.

Wanem samting i bin kamap na Barsilai i mekim dispela tok long Devit? Bilong wanem dispela lapun i tok olsem?

Ol i Bikhet Long King

Bagarap inap painim Devit. Pikinini bilong em Apsalom i mekim em yet i kamap king taim em i ‘pulim tingting bilong ol man bilong Israel na ol i laikim em.’ I klia tru olsem Apsalom bai bagarapim olgeta man i stap gut long papa bilong em. Olsem na Devit wantaim ol wokman bilong em ol i lusim Jerusalem. (2 Samuel 15:​6, 13, 14) Taim Devit i kamap pinis long Mahanaim, long hap is bilong wara Jordan, Barsilai i helpim em.

Barsilai na tupela man moa ol i givim planti samting tru long Devit. Dispela 3-pela man i stap gut long Devit i soim olsem ol i save em i stap nogut tru taim ol i tok long Devit na lain bilong em olsem: “Lain bilong Devit i hangre na nek i drai na skin bilong ol i tait tumas.” Barsilai, Sobi, na Makir i wok strong long inapim Devit wantaim lain bilong em long olgeta samting ol i sot long en, olsem ol bet, wit, bali, plaua, wit ol i bin kukim long paia, tupela kain bin, hani, bata, sipsip, na sampela samting moa.​—2 Samuel 17:​27-​29.

Man i helpim Devit, em inap kisim bagarap. Yumi save, Apsalom bai bagarapim ol man i helpim king tru. Olsem na Barsilai i gat strongpela bel taim em i soim olsem em i stap gut long Devit.

Senis i Kamap

Bihain liklik, Apsalom wantaim ol bikhetlain soldia bilong em ol i bungim lain bilong Devit. Pait i kamap long bikbus bilong Efraim, ating klostu long Mahanaim. Ami bilong Apsalom i lus long pait, na “planti . . . soldia i bin dai long dispela de yet.” Apsalom i laik ranawe, tasol i no longtaim na ol i kilim em i dai.​—2 Samuel 18:​7-​15.

Em nau, Devit i stap king gen bilong Israel. Lain bilong em i no gat wok moa long i stap olsem ol ranaweman. Na ol i bin stap gut long em, olsem na em i rispek long ol na amamas long ol.

Taim Devit i laik go bek long Jerusalem, “Barsilai bilong Gileat i lusim Rogelim na i kam daun long Jordan bilong i stap wantaim king long taim king i brukim wara [Jordan].” Long dispela taim, Devit i tokim lapun Barsilai olsem: “Yu kam wantaim mi long Jerusalem na bai mi lukautim yu.”​—2 Samuel 19:​15, 31, 33.

Yumi save, Devit i tenkyu tru long ol samting Barsilai i bin mekim bilong helpim em. Ating Devit i no tingting tasol long bekim gutpela pasin bilong Barsilai na givim kaikai samting long em. Barsilai em i maniman tru na Devit i no gat wok long helpim em long kaikai samting. Ating Devit i laik bai Barsilai i stap long haus king, long wanem, dispela lapun man i gat ol gutpela pasin. Sapos em i ken stap olgeta long haus king, em bai wanpela gutpela samting tru, na Barsilai inap i stap pren bilong king na kisim biknem na ol gutpela samting.

Pasin Daun na Gutpela Tingting

Tasol Barsilai i tokim King Devit olsem: “Bikman, ating i no planti yia na bai mi dai. Olsem na maski long mi go wantaim yu long Jerusalem. Harim. Mi gat 80 krismas nau, na mi no moa save long wanpela samting i gutpela o nogat. Na sapos mi kaikai na dring, mi no inap pilim dispela samting i swit o nogat. Na yau bilong mi i no gutpela na mi no inap harim nek bilong ol man na meri i mekim song.” (2 Samuel 19:​34, 35) Olsem na long pasin daun Barsilai i tok em i no inap mekim olsem; em i tok nogat long gutpela samting Devit i laik givim long em. Tasol bilong wanem em i mekim olsem?

Ating wanpela as na Barsilai i mekim olsem, em i lapun pinis na i gat sampela samting em i no inap moa long mekim. Na ating Barsilai i ting em i no ken i stap longtaim. (Song 90:10) Em i bin mekim olgeta samting em inap mekim bilong helpim Devit, tasol em i save em i lapun pinis na dispela i pasim em long mekim planti samting. Barsilai i no larim tingting bilong kisim bikpela nem na namba i pasim em long skelim ol samting em i no inap moa long mekim. Apsalom i bin strong long kisim bikpela namba, tasol Barsilai i no olsem​—em i gat gutpela tingting na em i daunim em yet.​—Sindaun 11:2.

Narapela as na Barsilai i mekim olsem, ating em i tingim ol samting em i no inap moa long mekim na nogut dispela i pasim king God i bin makim long mekim gut ol wok bilong em. Barsilai i askim king: “Bilong wanem bai mi go wantaim yu na givim hevi long yu?” (2 Samuel 19:35) Barsilai i wok long helpim yet Devit, tasol ating em i bilip olsem, man i yangpela long em, em inap mekim gut moa ol wok bilong em. Barsilai i tokim Devit: “Pikinini man bilong mi, Kimham, em i stap. Na em i ken i go wantaim yu. Na wanem samting yu laik mekim bilong helpim em, orait yu mekim tasol.” Devit i no bel hevi long dispela tok​—em i orait long en. Na paslain long ol i brukim wara Jordan, “king i givim kis long Barsilai, na em i askim God long mekim gut long Barsilai.”​—2 Samuel 19:​37-​39.

Mas i Gat Stretpela Tingting

Stori bilong Barsilai i kamapim klia olsem yumi mas i gat stretpela tingting long ol samting. Olsem: Yumi no ken sakim wanpela gutpela wok bilong God yumi inap kisim, o yumi no laik winim mak bilong kisim dispela wok, long wanem, yumi laik i stap isi tasol, o yumi pilim olsem yumi no gat save inap long mekim bikpela wok olsem. God bai inapim yumi long ol samting yumi sot long en sapos yumi bilip na wetim em i givim strong na savetingting long yumi.​—Filipai 4:13; Jems 4:17; 1 Pita 4:11.

Tasol yumi mas save, i gat sampela wok yumi no inap mekim. Olsem: Ating wanpela Kristen i save wok strong tru long mekim ol wok bilong lotu. Em i save, sapos em i kisim sampela wok moa, dispela inap mekim na em i lusim sampela wok Baibel i tok em i mas mekim, olsem lukautim famili long sait bilong lotu na ol samting bilong skin. Long kain taim olsem, em i mak bilong pasin daun na stretpela tingting sapos em i no kisim ol dispela narapela wok bilong lotu ol i laik givim long em, a?​—Filipai 4:5; 1 Timoti 5:8.

Barsilai i stap olsem gutpela piksa tru, na yumi mas wok long tingim gut long bel. Em i gat pasin bilong i stap gut long man, strongpela bel, givim ol samting long narapela, na em i save long skel bilong em. Na bikpela samting moa, em i putim ol samting bilong God i go pas long ol samting bilong em yet.​—Matyu 6:33.

[Mep long pes 15]

(Bilong save ol dispela rait i stap we long pes, lukim buk o magasin)

Barsilai i gat 80 krismas, tasol em i wokabaut longwe bilong helpim Devit

GILEAT

Rogelim

Sukot

Mahanaim

Wara Jordan

Gilgal

Jeriko

Jerusalem

EFRAIM

[Piksa long pes 13]

Bilong wanem Barsilai i tok nogat long gutpela samting Devit i laik givim long em?