Wisil—Wanpela Kain Pasin Bilong “Toktok”
DISPELA STORI I KAM LONG MEKSIKO
◼ Long ol ples maunten bilong Oaxaca, long Meksiko, ol asples Mazatec i no gat telefon na mobail fon samting. Tasol ol inap toktok wantaim man i stap longwe olsem 2 kilomita o i go liklik moa—olsem long taim ol i wok long ol plantesen kofi long sait bilong maunten. Ol i mekim olsem wanem? Long bipo, ol Mazatec i kamapim wanpela kain pasin bilong toktok long rot bilong wisil. Pedro, wanpela yangpela man Mazatec, i tok: “Krai bilong tok ples Mazateco em i olsem musik. Olsem na taim mipela i wisil, mipela i bihainim krai bilong nek bilong toktok. Mipela i no save putim pinga long maus na wisil.”a
Pren bilong Pedro, em Fidencio, i stori long gutpela samting bilong dispela kain wisil, olsem: “Mipela i save yusim dispela kain pasin bilong wisil long toktok wantaim man i stap longwe liklik na long mekim ol sotpela sotpela tok. Olsem: Sapos wanpela papa i salim pikinini bilong em i go long stua bilong baim bret, tasol em i lusim tingting long tokim em long baim tomato. Na sapos pikinini i go longwe na i no inap harim singaut bilong papa, orait papa bai wisil long em na tokim em long kisim tomato.”
Sampela taim ol Witnes Bilong Jehova tu i save wisil bilong toktok wantaim narapela narapela. Pedro i stori olsem: “Taim mi go long ol ples i stap longwe na sapos mi laik singautim wanpela wanlotu long go wantaim mi, mi no save go long haus bilong em bilong askim em, nogat. Mi save wisil tasol.”
Pedro i tok: “Bilong mipela i ken save long wanem man i ‘toktok,’ mipela wan wan yet i kamapim krai bilong wisil bilong mipela yet. Planti taim em ol man Mazatec tasol i save mekim wisil. Ating ol meri i kliagut long dispela kain wisil na ol i mekim tu insait long famili, tasol ol i no inap wisil bilong toktok wantaim narapela man. Sapos ol i mekim olsem, long tingting bilong ol, dispela pasin em i no stret.”
I no ol Mazatec tasol i save bihainim pasin bilong wisil olsem toktok; ol narapela hap olsem Canary Islands, Saina, na Papua Niugini, ol tu i save mekim wisil olsem toktok. Ol dispela man em ol lain i save sindaun long ol ples maunten na long ol bikbus tru. I gat olsem 70 samting pasin bilong wisil, tasol 12-pela tasol em ol man i bin stadi gut long en.
Yumi kirap nogut long save bilong ol man long kamapim ol samting. Tru tumas, taim yu bungim dispela save wantaim laik bilong toktok wantaim narapela, i olsem i no gat pinis bilong dispela samting—wanpela samting tasol i save pasim yumi, em tingting bilong yumi yet!
[Futnot]
a Wanpela buk i tok: “Long rot bilong kain kain spit bilong krai bilong wisil, na strong bilong wisil, ol Mazatec inap kamapim narapela narapela tingting.”