Sanap na Lukluk Tasol na Lukim Jehova i Helpim Yupela!
“Taim yupela i go kamap long ples bilong pait, bai yupela i mas sanap na lukluk tasol, na bai yupela i lukim Bikpela i helpim yupela na winim pait.”—2 STORI 20:17.
1, 2. Bilong wanem pait bilong ‘Gok bilong Magok’ bai kamapim bikpela samting moa, winim pasin teroris?
SAMPELA man i tok pasin teroris em i pasin bilong pait long olgeta lain man, na sindaun bilong ol. Tru, ol man i mas tingim dispela samting nogut em inap kamap. Tasol narapela pait i bikpela moa bai kamap em ol lain man i save tingim liklik tasol o ol i no save tingim. Em i wanem samting?
2 Em i pait bilong ‘Gok bilong Magok,’ em Baibel i tok long en long Esekiel sapta 38. Olsem wanem? Tru tru yumi inap tok dispela pait bai kamapim bikpela samting moa, winim pasin teroris? Yes yumi inap tok olsem, long wanem, Gok bai no pait long ol gavman bilong ol man tasol. Em bai pait long gavman bilong God long heven! Ol manmeri i no inap mekim planti samting taim pait i kamap na i laik bagarapim sindaun bilong ol, tasol Man bilong wokim yumi inap sakim bikpela pait bilong Gok.
Pait Long Gavman Bilong God
3. Ol hetman bilong graun i bin kisim wanem tok kirap long 1914? Ol i bin mekim wanem?
3 Pait i stap namel long King em God i bin makim na graun nogut bilong Satan i bin kirap taim Kingdom bilong God i bin kamap long heven long 1914. Long dispela taim, ol hetman bilong graun i kisim tok olsem ol i mas daun long King God i bin makim. Tasol ol i no laik mekim, olsem Baibel i bin tok profet long en. Em i tok: “Ol king bilong olgeta hap graun, ol i redi long pait. Na ol hetman i bung na painim rot bilong daunim Bikpela na dispela man em i makim bilong bosim ol manmeri bilong en. Ol i tok olsem, ‘Yumi brukim hankap bilong tupela. Yumi rausim ol baklain tupela i pasim yumi long en.’ ” (Song 2:1-3) Pasin bilong sakim wok bos bilong Kingdom bai go bikpela tru taim pait bilong Gok bilong Magok i kamap.
4, 5. Olsem wanem ol man i ken pait long wanpela gavman bilong heven em ol i no inap lukim?
4 Ating yumi tingting long olsem wanem ol man inap pait long wanpela gavman i stap long heven em yumi no inap lukim. Baibel i tok, dispela gavman i gat “144,000 manmeri God i bin baim bek ol namel long olgeta manmeri bilong graun,” na “Pikinini Sipsip” em Krais Jisas. (KTH 14:1, 3; Jon 1:29) Dispela gavman i stap long heven, olsem na Baibel i kolim em olsem “nupela skai,” na ol manmeri i stap aninit long en long graun Baibel i kolim ol “nupela graun.” (Aisaia 65:17; 2 Pita 3:13) Bikpela hap bilong lain 144,000 em ol bai wok king wantaim Krais, ol i bin stap gut long God na pinisim wok bilong ol hia long graun. Ol i soim pinis olsem ol inap tru long kisim nupela wok bilong ol long heven.
5 Tasol liklik hap lain olsem remnan bilong lain 144,000 i stap yet long graun. Winim 15,000,000 manmeri i bin bung long Kaikai Bilong Bikpela long 2002, na inap 8,760 tasol i kamapim olsem God i bin makim ol bilong mekim wok long heven. Ol man i no sem long pait long dispela lain bilong Kingdom i stap yet long graun, samting ol i pait tru tru long en em Kingdom bilong God.—KTH 12:17.
King i Winim Pait
6. Jehova na Krais i gat wanem tingting long pasin birua ol man i mekim long lain bilong God?
6 Baibel i tok profet long ol samting Jehova bai mekim taim ol man i birua long Kingdom bilong em: “God i sindaun long sia king bilong en long heven, na em i lap na tok bilas long ol. Em i belhat tru na i givim strongpela tok long ol. Na bikpela kros bilong en i mekim ol i pret moa yet. Na em i tokim ol olsem, ‘Mi makim pinis dispela man bilong i stap king. Mi yet mi putim em i stap long Saion, dispela maunten bilong mi yet.’ ” (Song 2:4-6) Taim i kamap nau long Krais, em Jehova i stiaim em, long “winim pait.” (KTH 6:2) Jehova i ting olsem wanem long pasin birua ol man bai mekim long lain bilong em long taim bilong laspela pait? Em i ting ol i mekim dispela pasin long em yet na King em i bin makim. Jehova i tok: “Man i holim yupela em i holim kiau bilong ai bilong mi.” (Sekaraia 2:8, NW ) Na Jisas i tok klia olsem ol samting ol manmeri i mekim o i no mekim long ol brata bilong em God i bin makim ol, i olsem ol i mekim o i no mekim long em yet.—Matyu 25:40, 45.
7. I gat wanem ol as na ol manmeri bilong bikpela lain em Kamapim Tok Hait 7:9 i tok long en, ol bai pilim belhat bilong Gok?
7 Ol man i helpim lain remnan ol tu bai pilim belhat bilong Gok. Ol dispela man bai kamap “nupela graun” ol i bikpela lain “bilong olgeta lain man na bilong olgeta kantri na bilong olgeta kain skin na bilong olgeta kain tok ples.” (KTH 7:9) Baibel i tok ol i “sanap i stap long pes bilong sia king na long ai bilong Pikinini Sipsip. Ol i bin putim ol longpela waitpela klos.” Olsem na ol i stap gut long ai bilong God na Krais Jisas. Ol i “holim ol lip bilong diwai pam” na ol i litimapim nem bilong Jehova olsem King tru bilong heven na graun, na em i mekim wok king bilong em long rot bilong King em i makim, em Jisas Krais, “Pikinini Sipsip Bilong God.”—Jon 1:29, 36.
8. Pait bilong Gok bai kirapim Krais long mekim wanem? Wanem samting bai kamap?
8 Pait bilong Gok bai kirapim King God i bin makim long mekim ol samting na mekim pait long Armagedon. (KTH 16:14, 16) Ol man husat i bin sakim wok king bilong Jehova ol bai bagarap. Tasol ol man i bin karim hevi, long wanem, ol i stap gut long Kingdom bilong God, olgeta hevi bilong ol bai pinis. Aposel Pol i tok long dispela olsem: “Long ol dispela samting i kamap long yupela, God i soim yumi olsem, em i mekim stretpela pasin tasol na em i skelim pasin bilong yumi. Yupela i karim pen, long wanem, yupela i laik kirapim kingdom bilong God, na God bai i mekim yupela inap tru long i stap insait long kingdom bilong em. God bai i mekim stretpela pasin olsem. Em bai i bekim hevi long ol man i save givim hevi long yupela. Na em bai i pinisim dispela hevi nau yupela i karim, na givim malolo long yupela na long mipela wantaim. God bai i mekim olsem long taim Bikpela Jisas wantaim olgeta strongpela ensel bilong en i lusim heven na i kamap ples klia. Em bai i kam long bikpela paia tru na em bai i mekim save long ol man i no laik save long God na i no bihainim gutnius bilong Jisas, Bikpela bilong yumi.”—2 Tesalonaika 1:5-8.
9, 10. (a) Olsem wanem Jehova i helpim Juda long daunim wanpela strongpela birua? (b) Ol Kristen long nau ol i mas wok yet long mekim wanem?
9 Long taim bilong bikpela hevi tru, em bai pinis long Armagedon, Krais bai pait long olgeta samting nogut. Tasol ol disaipel bilong em i no gat wok long pait, olsem ol man bilong 2-pela lain bilong Juda i bin stap winim 2,900 yia i go pinis, ol i no gat wok long pait. Em i pait bilong Jehova, na em i bin helpim ol long winim pait. Baibel i tok: “Bikpela i mekim ol soldia bilong Amon na Moap na Idom i kros na ol i pait namel long ol yet. Pastaim ol Amon na Moap i pait long ol Idom na kilim olgeta i dai, na bihain ol Amon na Moap i pait long ol yet inap olgeta bilong ol i bagarap. Ol soldia bilong Juda i go kamap long wanpela haus long dispela ples drai, em haus bilong ol soldia i save stap na was long ol birua. Na ol i lukluk i go bilong lukim ol birua i kam, tasol ol i kirap nogut long lukim olgeta birua i dai pinis na bodi bilong ol tasol i slip nabaut long graun. I no gat wanpela bilong ol i stap laip.”—2 Stori 20:22-24.
10 Jehova i bin tok profet pinis long dispela: “Bai yupela yet i no inap pait.” (2 Stori 20:17) Dispela i makim pasin ol Kristen i mas bihainim taim Jisas Krais i “winim pait.” Taim dispela samting i no kamap yet, ol Kristen i wok yet long pait bilong daunim pasin nogut. Ol samting bilong pait ol i yusim i no bilong dispela graun, nogat; em ol samting bilong spirit. Olsem na ol i wok yet long ‘mekim gutpela pasin bilong daunim pasin nogut.’—Rom 6:13; 12:17-21; 13:12; 2 Korin 10:3-5.
Husat Bai Go Pas Long Pait Bilong Gok?
11. (a) Gok bai mekim wok long wanem ol lain bilong mekim pait bilong em? (b) Pasin bilong was i stap long ol samting bilong spirit em wanem samting?
11 Gok bilong Magok em Satan, kirap long taim ol i daunim em long 1914. Em i wanpela spirit, olsem na em yet i no inap pait, tasol em bai mekim wok long ol lain bilong graun bilong mekim wok bilong em. Ol dispela lain bilong graun ol i husat? Baibel i no kolim stret dispela samting, tasol em i kamapim sampela tok i helpim yumi long save ol dispela lain ol i husat. Taim ol samting i wok long kamap long graun olsem ol tok profet bilong Baibel i kamapim, isi isi bai yumi save gut moa long ol dispela lain. Lain bilong Jehova i no laik kamapim kain kain tingting long dispela samting, tasol ol i was i stap long ol samting bilong spirit, na ol i save gut long ol samting i wok long kamap insait long wok politik na lotu, em ol dispela samting i truim ol tok profet bilong Baibel.
12, 13. Profet Daniel i tok wanem long laspela pait ol bai mekim long lain bilong God?
12 Profet Daniel i kamapim sampela save moa long laspela pait ol bai mekim long lain bilong God, em i tok: “Bai em [king bilong not] i bel nogut tru na i go pait strong moa na pinisim tru planti lain manmeri. Na em bai i sanapim ol bikpela haus sel bilong em long hap graun i stap namel long nambis bilong biksolwara Mediterenian na dispela maunten i nambawan tru.”—Daniel 11:44, 45.
13 Long taim bilong ol man i bin raitim Baibel, dispela “biksolwara” em i solwara Mediterenian, na “maunten i nambawan tru” em Saion, na Jehova i tok long dispela maunten olsem: “Mi makim pinis dispela man bilong i stap king. Mi yet mi putim em i stap long Saion, dispela maunten bilong mi yet.” (Song 2:6; Josua 1:4) Olsem na long ol samting bilong spirit, dispela graun “i stap namel long nambis bilong biksolwara Mediterenian na dispela maunten,” i makim ples ol Kristen God i bin makim i mekim wok long en. Ol i no stap moa insait long lain manmeri i stap longwe long God, na ol i wet long taim ol bai mekim wok king wantaim Krais Jisas long Kingdom bilong heven. Tru tumas, ol Kristen God i bin makim na ol poroman bilong ol em bikpela lain manmeri i stap gut long God, king bilong not bai pait long ol taim em i kirapim bikpela pait bilong em olsem tok profet bilong Daniel i kamapim.—Aisaia 57:20; Hibru 12:22; KTH 14:1.
Ol Wokman Bilong God Bai Mekim Wanem?
14. Lain bilong God bai mekim wanem tripela samting taim ol lain man i kirap pait long ol?
14 Ol wokman bilong God i mas mekim wanem taim ol lain man i kirap pait long ol? Ol samting lain bilong God long taim bilong Jehosafat i bin mekim i stap olsem piksa long ol i ken bihainim. God i bin tokim ol dispela man long mekim tripela samting: (1) stap long ples bilong ol, (2) sanap na lukluk tasol, na (3) lukim Jehova i kisim bek ol. Olsem wanem lain bilong God bai mekim ol samting i stret wantaim ol dispela tok?—2 Stori 20:17.
15. Olsem wanem lain bilong Jehova i stap long ples bilong ol?
15 Stap long ples bilong ol: Lain bilong God i no surik liklik, ol bai wok yet long mekim ol samting bilong helpim wok bilong Kingdom bilong God. Ol bai stap yet olsem ol Kristen i no insait long ol samting bilong graun. Ol bai ‘stap strong na i no surik liklik’ long wok bilong Jehova na ol bai wok yet long litimapim nem bilong Jehova long gutpela pasin bilong em long laikim ol tru. (1 Korin 15:58; Song 118:28, 29) I no gat wanpela samting long nau o long bihain em inap mekim na God bai no orait long ol.
16. Olsem wanem ol wokman bilong Jehova bai sanap na lukluk tasol?
16 Sanap na lukluk tasol: Ol wokman bilong Jehova bai no traim long helpim ol yet long abrusim bagarap, nogat; ol bai bilip strong long Jehova. Em tasol inap kisim bek ol wokman bilong em long dispela graun nogut, na em i bin promis long mekim olsem. (Aisaia 43:10, 11; 54:15; Krai 3:26) Pasin bilong bilip long Jehova i makim olsem yumi bilip tu long dispela lain i stap long graun long taim bilong yumi em Jehova i bin mekim wok long en inap planti yia pinis bilong kamapim ol laik bilong em. Long dispela taim, winim olgeta taim bipo, ol Kristen tru i mas bilip tru long ol wanbilip em Jehova na King em i bin makim, ol i bin makim bilong go pas long wok. Ol dispela man i stap gut long God ol bai stiaim lain bilong God. Pasin bilong sakim tok bilong ol inap kamapim bikpela hevi.—Matyu 24:45-47; Hibru 13:7, 17.
17. Bilong wanem ol wokman bilong God i stap gut long em ol bai lukim Jehova i kisim bek ol?
17 Lukim Jehova i kisim bek ol: Ol man husat i stap gut long God na i bilip tru long Jehova bai kisim bek ol, ol bai abrusim bagarap. I go inap long taim pinis i kamap—na inap long mak ol inap mekim—ol bai toksave long bikpela de bilong Jehova long mekim kot. Olgeta man na ensel i mas save olsem Jehova em i trupela God na em i gat ol wokman i stap gut long em hia long graun. Bihain bai i no gat wok moa long toktok longpela taim olsem i stret long Jehova i stap nambawan bos o nogat.—Esekiel 33:33; 36:23.
18, 19. (a) Olsem wanem singsing bilong winim pait i stap long Kisim Bek sapta 15 i kamapim tingting bilong ol man husat bai abrusim bagarap long pait bilong Gok? (b) I stret lain bilong God i mekim wanem long nau?
18 Lain bilong God i kisim nupela strong na ol bai go insait long nupela taim, ol bai amamas long mekim singsing bilong winim pait, olsem lain Israel bilong bipo i bin mekim bihain long God i kisim bek ol long solwara Retsi. Inap long olgeta taim ol bai tenkyu tru long Jehova long em i lukautim ol—ol man wan wan na olgeta wantaim—na ol bai mekim wankain tok olsem lain bilong God bilong bipo i bin mekim: “Nau bai mi singim song long Bikpela, long wanem, em i winim bikpela pait tru. . . . Bikpela em i strongpela soldia tru, Bikpela tasol, em i nem bilong en. . . . Em i krungutim ol birua na wilwilim ol tru. Long bikpela strong bilong yu yet yu daunim ol birua bilong yu. Belhat bilong yu i kamap olsem paia na kukim ol olsem paia i kukim gras i drai. . . . Yu save marimari long mipela, olsem na yu bin kisim bek mipela na yu bin go pas na bringim mipela i go. Na long strong bilong yu yet yu stiaim wokabaut bilong mipela na bai yu bringim mipela i go long gutpela ples yu makim bilong yu yet i ken i stap long en. . . . Na yu bai bringim mipela i kam na mekim mipela i sindaun gut long maunten bilong yu yet. Long dispela hap yu yet bai wokim haus bilong yu. Na Bikpela, yu bai stap king oltaim oltaim.”—Kisim Bek 15:1-19.
19 Nau yumi tingting strong moa long kisim laip oltaim, winim olgeta taim bipo, olsem na nau em i gutpela taim long ol wokman bilong God long kamapim klia pasin bilong ol long givim bel long Jehova, na strongim tingting bilong ol long mekim wok bilong King bilong ol, em king bilong i stap oltaim!—1 Stori 29:11-13.
Yu Inap Stori Long Dispela?
• Bilong wanem Gok bai pait long ol Kristen God i bin makim na ol arapela sipsip?
• Olsem wanem lain bilong Jehova i stap long ples bilong ol?
• Wanem insait bilong dispela tok sanap na lukluk tasol?
• Olsem wanem lain bilong God bai lukim Jehova i kisim bek ol?
[Piksa long pes 18]
Jehova i helpim Jehosafat na lain bilong em long winim pait, ol i no gat wok long pait
[Piksa long pes 20]
Ol Kristen God i bin makim na ol arapela sipsip ol i stap gut long wok king bilong Jehova
[Piksa long pes 22]
Olsem lain Israel bilong bipo, klostu nau lain bilong God bai mekim singsing bilong winim pait