“Yupela i No Ken Bel Hevi na Pret”
“Yupela i no ken bel hevi na pret. . . . Bikpela bai i stap wantaim yupela.”—2 STORI 20:17.
1. Pasin teroris i save mekim wanem long ol manmeri? I gat wanem as na ol i pret?
PASIN TERORIS! Dispela tok i mekim na ol man i pret, bel bilong ol i no stap isi na ol i pilim olsem ol i no gat rot. Em i mekim na ol man i kirap nogut tru, na bel hevi, na kros wantaim. Na dispela tok i makim wanpela samting planti ol i ting em i wanpela hevi ol manmeri bai karim inap planti yia bihain. Inap planti yia nau sampela kantri i bin wok strong long pinisim kain kain pasin teroris, tasol wok bilong ol i no bin kamap gutpela tumas, olsem na ol man i pret.
2. Ol Witnes Bilong Jehova i ting olsem wanem long pasin teroris? Wanem ol askim i kamap long dispela?
2 Tasol i gat as tru na yumi ken wet long gutpela samting bai kamap bihain. Ol Witnes Bilong Jehova ol i autim tok long 234 kantri, ol i bilip olsem gutpela samting bai kamap. Ol i no ting pasin teroris bai stap inap oltaim, nogat; ol i bilip tru olsem em bai pinis—na ol i ting em bai pinis klostu nau. Yu ting i gutpela long kisim wankain tingting olsem ol? Husat inap pinisim dispela hevi long graun, na long wanem rot? Ating yumi olgeta i bin pilim hevi bilong pasin bilong pait na bagarapim man, olsem na i gutpela long skelim i gat wanem as na yumi inap ting gutpela samting bai kamap.
3. Ol man i save pret long wanem ol samting? Tok profet i tok wanem long taim bilong yumi?
3 Long nau i gat kain kain as na ol man i pret nogut tru. Tingim planti man husat i no inap lukautim ol yet, long wanem, ol i lapun, o ol man i gat sik i no inap pinis na i wok long pinisim strong bilong ol, na tingim ol famili i gat hevi bilong mani na ol i hatwok tru long kisim ol samting ol i mas kisim. Na yumi no inap save wanem taim i dai bai painim yumi! Eksiden inap kamap na yumi dai wantu tasol o wanpela bagarap inap kamap na pinisim olgeta samting yumi laikim tumas. Dispela kain pasin bilong pret na tingting planti, na planti narapela hevi i save painim yumi i mekim na taim bilong yumi i olsem aposel Pol i stori long en, em i tok: “Yu mas save olsem, long taim bilong las de planti hevi nogut tru bai i kamap. Ol man bai i laikim ol yet tasol. . . . Ol bai i no save long pasin bilong i stap pren bilong ol arapela, na taim ol i kros, bai i no gat rot bilong pinisim kros bilong ol. Ol bai i tok nogut long ol arapela. Ol bai i no bosim laik bilong bodi bilong ol, na ol bai i pait na bagarapim ol man nabaut. Ol bai i birua long olgeta gutpela pasin.”—2 Timoti 3:1-3.
4. Tu Timoti 3:1-3 i stori long ol samting nogut i kamap, tasol em i tok long wanem gutpela samting tu?
4 Maski dispela skripsa i stori long ol samting nogut i kamap, em i soim olsem yumi ken wet long ol gutpela samting. Ol dispela planti hevi bai kamap long “taim bilong las de” bilong pasin nogut bilong graun bilong Satan. Dispela i makim olsem klostu nau ol dispela hevi na pasin nogut bilong dispela graun bai pinis na Kingdom bilong God bai kirap bosim graun, em dispela Kingdom Jisas i bin lainim ol disaipel bilong em long beten long en. (Matyu 6:9, 10) Dispela Kingdom em gavman bilong God long heven, na em “bai i stap oltaim oltaim,” olsem profet Daniel i tok, na “em bai i daunim ol na bagarapim ol arapela king na kingdom bilong en bai i stap oltaim.”—Daniel 2:44.
Pasin Teroris na Ol Kristen i No Insait Long Samting Bilong Graun
5. Ol lain man i bin mekim wanem taim pasin teroris i laik bagarapim ol samting?
5 Insait long planti yia, pasin teroris i bin kilim i dai planti tausen man. Planti man moa long olgeta hap i kisim save long pasin teroris, taim ol teroris i kamapim bikpela bagarap long New York City na Washington, D.C., long Septemba 11, 2001. Pasin teroris i go bikpela tru na i kamap long planti hap, olsem na kwiktaim ol kantri long olgeta hap bilong graun i bung wantaim bilong pinisim dispela pasin. Olsem: Sampela nius i ripot olsem, long Disemba 4, 2001, “ol minista bilong 55 kantri bilong Yurop, Not Amerika, na Sentral Esia i wanbel long kamapim wanpela pasin” bilong stiaim wok bilong ol long pinisim pasin teroris. Wanpela bikman long gavman bilong Yunaitet Stets i tok, dispela wok i gutpela samting tru na i givim “nupela strong” long wok bilong pinisim pasin teroris. Wantu, planti handet milion manmeri i givim bel long samting em wanpela nius (The New York Times Magazine) i kolim olsem “kirap bilong wanpela bikpela pait.” Bihain bai yumi lukim dispela wok i kamapim gutpela samting o nogat. Tasol ol samting dispela kain wok bilong pinisim pasin teroris i kamapim, i bin kirapim planti man long pret na tingting planti, tasol ol man i bilip long Jehova ol i no pret olsem.
6. (a) Bilong wanem sampela i hatwok long orait long pasin bilong ol Witnes Bilong Jehova long ol i no insait long ol samting bilong graun? (b) Jisas i gat wanem tingting long wok politik na dispela i olsem gutpela piksa ol disaipel i ken bihainim?
6 Ol Witnes Bilong Jehova i gat nem olsem ol i no save insait long wok politik. Long taim i no gat pait, planti man i orait long dispela pasin bilong ol Witnes, tasol long taim bikpela samting olsem pait i kamap, ol i no orait moa long dispela pasin bilong ol. Planti taim woa i mekim na ol man i pret na tingting planti na dispela i kirapim ol long tingting strong long kantri bilong ol. Dispela inap mekim na sampela i hatwok long klia gut long as na sampela i no laik sapotim wok bilong sampela lain politik insait long kantri. Tasol ol Kristen tru i save olsem ol i mas bihainim tok bilong Jisas long ol “i no bilong dispela graun.” (Jon 15:19; 17:14-16; 18:36; Jems 4:4) Bilong mekim olsem, ol i no ken insait long wok politik o ol samting bilong sindaun bilong ol man. Jisas yet i stap olsem gutpela piksa long dispela samting. Tingting na save bilong Jisas i gutpela olgeta na em i gat gutpela save long mekim ol samting, olsem na em inap mekim planti samting bilong helpim sindaun bilong ol man long taim bilong em. Tasol em i no laik insait long wok politik. Taim em i kirap mekim wok bilong em long graun, Jisas i sakim strong namba em Satan i laik givim long em long bosim olgeta gavman bilong graun. Bihain, Jisas i no laik kisim wok insait long gavman em ol narapela i laik givim long em.—Matyu 4:8-10; Jon 6:14, 15.
7, 8. (a) Ol Witnes Bilong Jehova i no insait long wok politik, tasol dispela i no makim wanem samting? Bilong wanem i olsem? (b) Olsem wanem tok bilong Rom 13:1, 2 i soim olsem i no stret long insait long pasin bilong pait long gavman?
7 Pasin bilong ol Witnes Bilong Jehova long ol i no insait long ol samting bilong graun i no makim olsem ol i orait o ol i no gat tok long pasin bilong pait na bagarapim man. Nogat. Sapos ol i orait long pasin pait samting, dispela bai pait wantaim tok bilong ol em ol i tok ol i wokman bilong ‘God i save givim bel isi.’ (2 Korin 13:11) Ol i bin kisim save long tingting bilong Jehova long pasin bilong pait na bagarapim man. Man bilong raitim song i tok: “Jehova yet i save skelim ol stretpela man na ol man nogut. Na em i no laikim tru ol man i laikim pasin pait.” (Song 11:5, NW ) Ol i save tu long tok Jisas i mekim long aposel Pita, em i tok: “Putim bainat bilong yu i go bek long paus bilong en. Olgeta man i pait long bainat, bainat bai i bagarapim ol.”—Matyu 26:52.
8 Ol samting i bin kamap bipo i soim olsem planti taim ol Kristen giaman i bin holim “bainat,” tasol ol Witnes Bilong Jehova i no save mekim olsem. Ol i sakim olgeta kain wok olsem. Ol Witnes i bihainim gut tok i stap long Rom 13:1, 2: “Olgeta man i mas i stap aninit long ol gavman. Yumi save, i no gat wanpela gavman i kamap nating. Nogat. Olgeta wok bilong gavman i kamap long han bilong God tasol. Na olgeta gavman i stap, God yet i putim ol na ol i stap. Olsem na ol man i sakim tok bilong gavman, ol i sakim tok bilong ol man God yet i bin putim long wok bilong ol. Na ol man i mekim olsem, ol bai i kisim pe nogut long pasin ol i mekim.”
9. Long wanem tupela rot ol Witnes Bilong Jehova i helpim wok bilong pinisim pasin teroris?
9 Tasol pasin teroris i samting nogut tru, olsem na ating ol Witnes Bilong Jehova i mas mekim sampela samting bilong helpim wok bilong pinisim dispela pasin, a? Yes ol i mas mekim, na ol i save mekim. Namba wan samting, ol yet i no insait long pasin teroris. Namba tu, ol i lainim ol manmeri long bihainim ol stiatok bilong Baibel na taim ol i bihainim, dispela i save kirapim ol long lusim olgeta kain pasin bilong pait na bagarapim man.a Long las yia, ol Witnes i lusim 1,202,381,302 aua long helpim ol manmeri long save long dispela pasin Kristen. Dispela hap taim i no lus nating, long wanem, dispela wok i mekim na 265,469 manmeri i kisim baptais na kamap Witnes Bilong Jehova, na long dispela rot ol i soim olsem ol i sakim tru pasin bilong pait na bagarapim man.
10. Pasin bilong pait na bagarapim man inap pinis o olsem wanem?
10 Na tu, ol Witnes Bilong Jehova i save olsem ol yet i no inap pinisim pasin nogut long dispela graun. Olsem na ol i bilip tru long dispela man em inap mekim olsem—em God Jehova. (Song 83:18) Maski ol man i givim bel tru long pinisim pasin bilong pait na bagarapim man, ol i no inap. Wanpela man bilong raitim Baibel i givim tok lukaut long yumi long ol samting bilong taim bilong yumi, em “taim bilong las de,” na em i tok: “Ol man nogut na ol giaman profet ol bai i wok long giamanim ol manmeri. Na Satan bai i giamanim ol yet tu, na pasin bilong ol bai i kamap nogut tru.” (2 Timoti 3:1, 13) Taim yumi tingim dispela, ating ol man i no inap winim dispela pait long pinisim pasin nogut. Tasol yumi ken bilip olsem Jehova bai pinisim tru pasin bilong pait na bagarapim man.—Song 37:1, 2, 9-11; Sindaun 24:19, 20; Aisaia 60:18.
Ol i No Pret Maski Pait i Laik Kamap
11. Jehova i bin mekim wanem samting pinis bilong pinisim pasin bilong pait na bagarapim man?
11 God bilong bel isi i nolaik tru long pasin bilong pait na bagarapim man, olsem na yumi ken save i gat as na em i bin mekim ol samting bilong pinisim as bilong dispela pasin nogut, em Satan. God i semim Satan pinis taim Satan i lus long pait long han bilong nambawan ensel Maikel—em King God i putim long sia king, Krais Jisas. Baibel i stori long dispela olsem: “Bikpela pait i kirap long heven. Maikel wantaim ol ensel bilong en ol i pait long dispela traipela snek. Na snek wantaim ol ensel bilong en ol i bekim pait long ol, tasol ol i no gat strong bilong winim pait. Olsem na ol i no inap i stap moa long heven, na ol ensel bilong God i tromoi dispela snek i go daun. Em dispela snek bilong bipo yet, na ol i kolim em Satan na ‘Man I Save Kotim Olgeta Manmeri.’ Em i man bilong giamanim olgeta manmeri bilong graun. Ol i tromoi em i go daun long graun, na ol i tromoi ol ensel bilong en i go daun wantaim em.”—KTH 12:7-9.
12, 13. (a) Wanem samting i mekim na yia 1914 i bikpela samting? (b) Tok profet bilong Esekiel i tok long wanem samting bai painim ol man i helpim Kingdom bilong God?
12 Ol yia Baibel i makim na ol samting i kamap long graun i soim olsem dispela pait i kamap long heven long yia 1914. Kirap long dispela taim na i kam inap nau, ol samting i wok long kamap long graun i go nogut moa. Kamapim Tok Hait 12:12 i kamapim as bilong dispela samting, em i tok: “Yu heven, na yupela olgeta lain i stap long heven, yupela i ken amamas. Tasol yu graun, na yu solwara, yupela lukaut. Bikpela hevi i laik kamap long yupela. Satan i go daun pinis long yupela, na em i belhat nogut tru. Em i save, em i gat sotpela taim tasol bilong i stap.”
13 Satan i kros moa long ol Kristen God i bin makim na ol poroman bilong ol em “ol arapela sipsip.” (Jon 10:16; KTH 12:17) Klostu nau dispela pasin birua bai kamap bikpela tru taim Satan i kirap long birua tru long ol man i helpim Kingdom bilong God i kamap pinis na i bilip tru long en. Esekiel sapta 38 i tok dispela bikpela pait em pait bilong ‘Gok bilong Magok.’
14. Husat i bin helpim ol Witnes Bilong Jehova na ol i no bagarap? Ol bai kisim dispela kain helpim long olgeta taim?
14 Kirap long taim Satan i raus long heven, sampela taim sampela lain politik i bin lukautim lain bilong God na Satan i no inap bagarapim ol. Kamapim Tok Hait 12:15, 16 i mekim tok piksa bilong stori long dispela samting. Tasol Baibel i tok taim Satan i kirap pait long laspela taim, i no gat wanpela lain bilong graun bai kam na helpim ol man husat i bilip long Jehova. Olsem wanem? Dispela bai mekim na ol Kristen i pret nogut tru? Nogat tru!
15, 16. (a) Jehova i mekim ol gutpela tok long lain bilong em long taim bilong Jehosafat, olsem na ol Kristen long nau i ken tingim wanem gutpela samting? (b) Jehosafat na lain Juda i mekim wanem pasin ol wokman bilong God i ken bihainim long nau?
15 God bai helpim lain bilong em olsem em i bin helpim lain bilong em long taim bilong King Jehosafat. Baibel i tok: “King Jehosafat na yupela ol manmeri bilong Jerusalem na bilong olgeta hap bilong Juda, yupela harim gut. God, Bikpela i tok, yupela i no ken bel hevi na pret tumas long dispela bikpela lain ami. Nogat. Dispela pait em i samting bilong God tasol. I no samting bilong yupela. . . . Yupela yet i no inap pait. Nogat tru. Taim yupela i go kamap long ples bilong pait, bai yupela i mas sanap na lukluk tasol, na bai yupela i lukim Bikpela i helpim yupela na winim pait. Yupela ol manmeri bilong Jerusalem na bilong olgeta hap bilong Juda, yupela i no ken bel hevi na pret. Tumora yupela i mas i go bilong pait, na Bikpela bai i stap wantaim yupela.”—2 Stori 20:15-17.
16 God i tokim lain Juda olsem ol i no gat wok long pait. Na olsem tasol, taim Gok bilong Magok i kirap pait long lain bilong God, ol bai no kisim samting bilong pait bilong lukautim ol yet. Nogat. Ol bai ‘sanap na lukluk tasol na lukim Bikpela i helpim ol.’ Tru, pasin bilong sanap i no makim olsem man i no mekim wanpela samting, nogat; lain bilong God long taim bilong Jehosafat i no stap olsem. Baibel i tok: “Taim King Jehosafat wantaim olgeta manmeri i harim dispela tok, orait olgeta wantaim i brukim skru na i daunim het i go daun long graun na i lotu long Bikpela. . . . Na tu king i askim ol manmeri long tingting bilong ol, na bihain em i makim sampela man bilong wokabaut i go paslain long ol soldia na singim ol song olsem, ‘. . . Yumi mas tenkyu long Bikpela, long wanem, oltaim em i save laikim yumi tumas.’ ” (2 Stori 20:18-21) Yes, maski birua i pait long ol, ol manmeri i wok long litimapim nem bilong Jehova. Dispela i olsem piksa ol Witnes Bilong Jehova i ken bihainim taim Gok i kirap pait long ol.
17, 18. (a) Ol Witnes Bilong Jehova long nau i gat wanem tingting long pait Gok bai mekim? (b) I no longtaim i go pinis na ol yangpela Kristen i bin kisim wanem gutpela tok bilong kirapim tingting bilong ol?
17 I go inap long dispela taim—na taim Gok i kirap pinis long pait—ol Witnes Bilong Jehova bai wok yet long helpim Kingdom bilong God. Ol bai wok yet long kisim strong na painim ples hait insait long 94,600 samting kongrigesen i stap long olgeta hap bilong graun. (Aisaia 26:20) Nau em i taim bilong litimapim nem bilong Jehova na no ken pret! Ol i save klostu nau Gok bai kirap pait long ol, tasol dispela i no mekim na ol i pret na surik. Nogat. Em i kirapim ol long mekim bikpela wok moa bilong litimapim nem bilong God inap tru long skel bilong ol.—Song 146:2.
18 Planti tausen yangpela long olgeta hap bilong graun i kamapim klia dispela gutpela pasin na ol i kirap mekim wok bilong God fultaim. Bilong kamapim klia olsem dispela rot em i nambawan gutpela rot bilong bihainim, ol i tokaut long liklik nius Ol Yangpela—Yupela Bai Mekim Wanem Long Laip Bilong Yupela? long ol kibung distrik long 2002. Ol Kristen, ol yangpela na lapun, ol i amamas long kain gutpela tok olsem bilong kirapim tingting.—Song 119:14, 24, 99, 119, 129, 146.
19, 20. (a) Bilong wanem i no gat as na ol Kristen i mas pret nogut tru? (b) Stori i kamap bihain long dispela bai mekim wanem?
19 Maski ol samting i kamap long graun i nogut, i no gat as na ol Kristen i mas pret nogut tru. Ol i save klostu nau Kingdom bilong Jehova bai pinisim tru olgeta kain pasin bilong pait na bagarapim man. Long rot bilong kirap bek planti man husat i bin lusim laip bilong ol long rot bilong pasin pait, ol bai kisim laip gen. Ol Kristen i save long dispela na em i mekim gut bel bilong ol. Long rot bilong kirap bek sampela man bai kisim save long Jehova long namba wan taim, na sampela ol i ken kirap gen long mekim wok bilong Jehova.—Aposel 24:15.
20 Yumi ol Kristen tru i save olsem em i bikpela samting long yumi no ken insait long ol samting bilong graun na yumi tingting strong long mekim olsem. Yumi laik holimpas pasin bilong wetim gutpela samting bai kamap na ‘sanap na lukluk tasol na lukim Bikpela i helpim yumi.’ Stori i kamap bihain long dispela bai strongim bilip bilong yumi na helpim yumi long luksave long ol samting i kamap long nau, em ol dispela samting i wok long givim sampela save moa long truim bilong ol tok profet bilong Baibel.
[Futnot]
a Bilong save long stori bilong sampela man husat i bin lusim pasin pait bilong kamap Witnes, lukim Kirap! bilong Oktoba 8, 1990, pes 17; Janueri 8, 1992, pes 24; na Wastaua Janueri 1, 1996, pes 5; Ogas 1, 1998, pes 5.
Yu Inap Stori Long Dispela?
• Bilong wanem planti man long nau i no ting gutpela samting inap kamap?
• Bilong wanem ol Witnes Bilong Jehova i ting gutpela samting bai kamap bihain?
• Jehova i mekim wanem samting pinis long as bilong olgeta kain pasin bilong pait na bagarapim man?
• Bilong wanem i no gat as na yumi mas pret long pait bilong Gok?
[Piksa long pes 13]
Jisas i no insait long ol samting bilong graun na em i stap olsem gutpela piksa long dispela samting
[Ol Piksa long pes 16]
Planti tausen yangpela Witnes i amamas long mekim wok bilong God fultaim
[Piksa Kredit Lain long pes 12]
UN PHOTO 186226/M. Grafman