Rot Bilong Kisim Pasin Bilong Laikim Tru
“Pasin laikim em i marasin bilong stretim olgeta hevi bilong laip; pasin laikim yet em i laip.”—Living to Purpose, Joseph Johnson i raitim long 1871.
OL MAN i lain long laikim narapela long wanem rot? Yu ting long rot bilong skelim tingting bilong ol man? Ritim ol buk i stori long dispela pasin? Lukim ol video? Nogat. Ol man i lain long laikim narapela taim ol i lukim pasin papamama i mekim na skul ol i kisim long ol. Ol pikinini bai lain long mining bilong pasin laikim sapos dispela pasin i stap insait long famili, na ol i lukim papamama i givim kaikai long ol na lukautim ol, toktok wantaim ol, na tingim tru ol. Na tu ol i lainim pasin laikim taim papamama i skulim ol long bihainim ol gutpela stiatok long wanem samting i stret na wanem samting i no stret.
Pasin bilong laikim tru i no samting yu pilim long bel tasol, nogat. Oltaim pasin laikim i save mekim ol samting bilong helpim tru ol narapela, maski long dispela taim stret ol narapela i no amamas long samting man i mekim. Planti taim dispela i save kamap taim ol papamama i bihainim pasin laikim na givim kanda long ol pikinini. Man i stap gutpela piksa tru long pasin bilong i no tingim em yet na kamapim pasin laikim, em Man bilong wokim yumi. Aposel Pol i tok: “Pikinini bilong mi, sapos Bikpela i mekim wanpela samting long yu bilong stretim yu, yu no ken ting dispela em i samting nating, na tu, yu no ken bel hevi tumas. Long wanem, Bikpela i save stretim ol man em i laikim tumas.”—Hibru 12:5, 6.
Ol papamama, olsem wanem yupela inap bihainim pasin bilong Jehova long kamapim pasin laikim long famili bilong yupela? Na pasin bilong yupela yet long kamapim pasin laikim namel long yutupela i bikpela samting olsem wanem?
Pasin Yu Mekim i Lainim Ol Long Pasin Laikim
Sapos yu man marit, olsem wanem? Yu save ting meri bilong yu em i wanpela gutpela samting tru na yu givim biknem na rispek long em? Sapos yu meri marit, olsem wanem? Yu save laikim tru man bilong yu na yu wok long helpim em? Baibel i tok man na meri marit i mas laikim na soim rispek long narapela narapela. (Efesus 5:28; Taitus 2:4) Taim ol i mekim olsem, ol pikinini i lukim pasin laikim Kristen long ai bilong ol yet. Kain skul olsem i gat bikpela strong na em inap helpim ol tru!
Ol papamama inap strongim pasin laikim insait long famili taim ol i bihainim ol stretpela lo long makim ol samting bilong famili olsem amamas, wanem ol pasin i stret long bihainim, ol mak ol i laik winim na wanem ol samting i bikpela samting tru. Long olgeta hap ol manmeri i kisim save olsem Baibel em i helpim ol tru long makim ol lo famili i laik bihainim, na dispela i kamapim ples klia olsem ‘spirit bilong God yet i bin kamapim olgeta tok bilong Baibel, na dispela tok em i gutpela bilong skulim yumi na stretim tingting bilong yumi na stretim wokabaut bilong yumi na skulim yumi long ol pasin i stret long ai bilong God.’ (2 Timoti 3:16) Tru tumas, planti man i ting ol gutpela tok bilong stiaim tingting na wokabaut, em ol tok i insait long bikpela tok Jisas i mekim antap long maunten, ol i gutpela tru winim ol narapela tok bilong stiaim ol man.—Matyu, sapta 5 i go 7.
Taim famili olgeta i lukluk long God long stiaim ol na ol i bihainim ol lo bilong em, olgeta wan wan insait long famili i stap bel isi, na dispela bai mekim na ol pikinini bai kisim pasin bilong laikim na rispektim papamama bilong ol. Tasol sapos famili i no bihainim ol gutpela lo, o ol i slek long bihainim, dispela inap mekim na ol pikinini bai bel hevi, belhat, na bikhet.—Rom 2:21; Kolosi 3:21.
Olsem wanem long ol papa o mama wanpis? Ol i gat bikpela hatwok moa long lainim ol pikinini bilong ol long pasin bilong laikim? Ating i no olsem. Em i gutpela tru sapos i gat papamama i wok wantaim, tasol sapos papa o mama wanpis i pas gut wantaim ol pikinini, famili inap stap gut maski ol i no gat papa o mama. Sapos yu wanpela papa o mama wanpis, wok strong long bihainim ol stiatok bilong Baibel insait long famili bilong yu. Yes, wanpela savetok i tok: “Yu mas bilip strong long Bikpela. Yu no ken ting save bilong yu yet inap helpim yu. Long olgeta samting yu mekim, yu mas tingting strong long Bikpela na yu mekim, na em bai i soim yu stretpela rot long bihainim”—em stretpela rot bilong mekim wok bilong papa o mama.—Sindaun 3:5, 6; Jems 1:5.
I gat planti gutpela yangpela em papa o mama wanpis i bin mekim bikpela long ol na ol i stap gut long mekim wok bilong God insait long planti tausen kongrigesen Kristen bilong ol Witnes Bilong Jehova long olgeta hap. Dispela i kamapim klia olsem ol papa o mama wanpis inap lainim gut ol pikinini bilong ol long pasin bilong laikim.
Rot Olgeta i Ken Bihainim Bilong Kisim Pasin Laikim
Baibel i tok profet olsem “long las taim” ol man bai “i no save pren long ol wanblut,” em dispela pasin pren ol lain insait long famili i save pilim long narapela narapela. (2 Timoti 3:1, 3, Nupela Testamen na Ol Sam) Tasol maski man i bin go bikpela insait long famili i no gat pasin pren, em inap lain long kisim pasin laikim. Olsem wanem em inap lain? Jehova inap lainim em. Jehova em i As tru bilong pasin laikim na em i save kamapim pasin laikim na pasin pren long olgeta man i save givim bel na kam long em. (1 Jon 4:7, 8) Man bilong raitim song i tok: “Maski papa na mama i givim baksait long mi, Bikpela bai i lukautim mi.”—Song 27:10.
Jehova i soim olsem em i laikim yumi long kain kain rot. Olsem long rot bilong ol gutpela tok bilong stiaim yumi i stap long Baibel, helpim bilong holi spirit, na helpim bilong lain brata Kristen. (Song 119:97-105; Luk 11:13; Hibru 10:24, 25) Yumi laik skelim olsem wanem dispela 3-pela samting inap helpim yumi long kisim pasin bilong laikim God na ol wantok.
Tok Bilong Stiaim Wokabaut i Kam Long God
Bilong pas gut tru wantaim narapela, yumi mas save gut long em. Jehova i singautim yumi long i go klostu long em taim em i kamapim ol pasin bilong em yet long Baibel. Tasol i no inap long yumi ritim Baibel tasol, nogat. Yumi mas bihainim tok bilong en na pilim ol gutpela samting i painim yumi taim yumi bihainim tok bilong en. (Song 19:7-10) Aisaia 48:17 i tok: “God, Bikpela bilong Israel, . . . em man bilong sambai long yupela na helpim yupela, em i tok olsem, ‘Mi God, Bikpela bilong yupela. Oltaim mi save skulim yupela na soim yupela long ol stretpela pasin yupela i mas bihainim na bai yupela i stap gut.’ ” Yes, Jehova, em Man bilong pasin laikim, em i givim skul long yumi bilong helpim yumi—em i no kamapim nating ol lo bilong pasim yumi.
Stretpela save long Baibel i helpim yumi long kisim pasin bilong laikim ol narapela man tu. Dispela em i tru, long wanem, Baibel i lainim yumi long God i gat wanem tingting long ol man na em i kamapim ol stiatok bilong bosim ol samting yumi mekim wantaim ol narapela. Ol dispela tok i helpim yumi tru long kisim pasin bilong laikim ol wantok. Aposel Pol i tok: “Oltaim mi save prea olsem, pasin bilong laikim tru ol arapela em i ken kamap strong moa long laip bilong yupela, na bai yupela i gat planti save [“stretpela save,” NW ], na tingting bilong yupela i ken kamap klia tru.”—Filipai 1:9.
Bilong kisim klia olsem wanem “stretpela save” i ken stiaim pasin laikim, tingim bikpela as tok i stap long Aposel 10:34, 35: “God i save mekim wankain pasin long olgeta manmeri, maski ol i bilong wanem lain. Long olgeta lain em i save laikim ol manmeri i aninit long em na i mekim stretpela pasin.” Sapos God i save skelim ol man long stretpela pasin bilong ol na pasin bilong ol long stap aninit long em, na em i no tingim lain o skin bilong ol, orait yumi tu mas mekim wankain pasin.—Aposel 17:26, 27; 1 Jon 4:7-11, 20, 21.
Pasin Laikim —Pasin Spirit Bilong God i As Bilong En
Olsem ren long taim stret i helpim gaden i karim planti kaikai, olsem tasol spirit bilong God i ken kamapim ol gutpela pasin long ol man i gat gutpela bel, em ol pasin “holi spirit i save kamapim.” (Galesia 5:22, 23, Nupela Testamen na Ol Sam) Nambawan bilong ol dispela pasin em pasin laikim. (1 Korin 13:13) Tasol olsem wanem yumi ken kisim spirit bilong God? Wanpela bikpela rot em prea. Sapos yumi prea long kisim spirit bilong God, em bai givim long yumi. (Luk 11:9-13) Olsem wanem? Yu save “wok long” prea long kisim holi spirit? Sapos olsem, orait yu bai kamapim moa yet long laip bilong yu ol gutpela pasin holi spirit i save kamapim, em pasin bilong laikim narapela i wanpela bilong ol.
Tasol i gat narapela kain spirit i save birua long spirit bilong God. Baibel i kolim dispela spirit olsem “spirit bilong dispela graun.” (1 Korin 2:12; Efesus 2:2) Em i save kirapim ol man long mekim pasin nogut, na as bilong en em Satan, “dispela hetman” bilong ol man bilong dispela graun ol i stap longwe long God. (Jon 12:31) Olsem win i kamap na karim nabaut das na pipia, “spirit bilong dispela graun” i kamapim ol pasin nogut i save bagarapim pasin bilong laikim narapela na i laik inapim ol pasin bilong olpela bel.—Galesia 5:19-21.
Ol manmeri i kisim dispela spirit bilong graun taim ol i tingim ol yet tasol na laikim tumas mani kago, o kisim tingting bilong pait na bagarapim narapela, o kisim tingting kranki na tingting doti em planti manmeri long nau ol i holim long maritpasin. Sapos yu laik kisim pasin laikim tru, orait yu mas sakim spirit bilong dispela graun. (Jems 4:7) No ken bilip long strong bilong yu yet; askim Jehova long helpim yu. Spirit bilong em—i no gat narapela strong i winim dispela—i ken strongim yu na helpim yu i win.—Song 121:2.
Ol Brata Kristen Inap Lainim Yumi Long Pasin Laikim
Ol pikinini i lain long laikim narapela long rot bilong ol samting i kamap insait long famili, olsem na yumi olgeta—yangpela na lapun wantaim—inap kisim pasin bilong laikim ol narapela taim yumi bung wantaim ol narapela Kristen. (Jon 13:34, 35) Tru tumas, wanpela wok bilong kongrigesen Kristen em bilong kamapim sindaun we ol wan wan Kristen i ken “kirapim ol [narapela Kristen] long laikim ol arapela na mekim ol gutpela pasin long ol.”—Hibru 10:24.
Kain pasin bilong laikim narapela i save amamasim tru ol man em “tingting bilong ol i paul nabaut, na ol i stap nogut tru” long dispela graun we narapela i no tingim narapela. (Matyu 9:36) Ol man i luksave olsem taim man i stap pikinini na i no gat man i sori long em na laikim em, dispela inap nogutim em, tasol taim em i kamap bikpela pinis na i gat man i sori long em na laikim em, dispela inap helpim em long daunim ol hevi em i bin kisim taim em i stap pikinini. Olsem na em i bikpela samting tru long ol Kristen i dediket pinis long ol i mas tok amamas na tok welkam long ol nupela man i kam bung wantaim ol!
Pasin Laikim i No Inap Pinis
Baibel i tok “pasin bilong givim bel bilong yumi [“laikim tru,” NW ] long ol arapela, em i no inap pinis.” (1 Korin 13:8) Olsem wanem dispela tok em i tru? Aposel Pol i tokim yumi olsem: ‘Man i save givim bel bilong en [“laikim tru,” NW ] long ol arapela, em i no save kros kwik na bekim pasin nogut. Em i save mekim gutpela pasin long olgeta man. Em i no save bel nogut long ol man, litimapim nem bilong em yet, hambak, bikhet nabaut, tingting tumas long em yet, na belhat kwik. Em i no save tingim rong ol i mekim long em.’ (1 Korin 13:4, 5) Dispela pasin i no samting i kamap nating long bel tasol na i no gat as bilong en. Nogat. Ol man i kamapim dispela pasin ol i save olsem ol pen na hevi bai painim ol, tasol ol i no larim dispela i bagarapim pasin bilong ol long laikim ol narapela man. Dispela pasin bilong laikim narapela “em i nambawan pasin bilong mekim ol man i stap wanbel.”—Kolosi 3:12-14, NW.
Tingim samting i painim wanpela meri Kristen long Korea, em i gat 17 krismas. Taim em i kirap lotuim God Jehova, famili bilong em i no orait long en olsem na em i mas lusim haus. Tasol em i no belhat long ol, nogat; em i beten long dispela hevi na em i larim Tok Bilong God na spirit bilong em i stiaim tingting bilong em. Bihain, em i raitim planti pas long famili, na em i save tokim ol olsem em i laikim ol tru. Dispela i mekim na tupela bikpela brata bilong em i kirap stadi long Baibel na nau ol i kamap ol Kristen i dediket pinis. Mama bilong em na liklik brata bilong em tu ol i kisim tok i tru bilong Baibel. Bihain yet, papa bilong em, husat i bin birua tru long em, i senisim tingting bilong em. Dispela meri Witnes i tok: “Mipela olgeta i bin maritim ol wanbilip Kristen, na nau 23 insait long famili bilong mi i wanbel long mekim lotu.” Pasin bilong laikim narapela i win tru!
Olsem wanem? Yu laik kisim pasin bilong laikim narapela na helpim ol narapela tu long kisim dispela pasin? Sapos olsem, orait lukluk long Jehova, em As bilong dispela pasin. Yes, putim Tok bilong em long bel bilong yu, prea long kisim holi spirit, na oltaim bung wantaim ol brata Kristen. (Aisaia 11:9; Matyu 5:5) Yumi amamas long save olsem klostu nau ol man nogut bai pinis olgeta, na ol man i bihainim pasin Kristen bilong laikim narapela, ol tasol bai i stap laip! Tru tumas, pasin bilong laikim narapela em i ki bilong amamas na bilong laip.—Song 37:10, 11; 1 Jon 3:14.
[Ol Piksa long pes 6]
Beten na pasin bilong stadi long Tok Bilong God bai helpim yumi long kisim pasin tru bilong laikim narapela