Yumi Mas i Gat Pasin Bilong Laikim
MASKI man i gat hamas krismas, wanem kain sindaun, tok ples, o skin, olgeta man i laik bai narapela i mas laikim ol. Sapos i no gat man i laikim ol, ol i no inap amamas. Wanpela dokta i tok: “Pasin laikim na pasin bilong pas gut tru i as bilong ol samting i save mekim yumi sik na i mekim yumi orait, i mekim yumi bel hevi na i mekim yumi amamas, i mekim yumi karim pen na i mekim yumi kamap gut gen. Sapos i gat wanpela nupela marasin i mekim wankain wok, klostu olgeta dokta long kantri bai tokim ol sikman long kisim dispela marasin. Sapos ol dokta i no tok olsem, ol man bai tok ol i no mekim gut wok bilong ol.”
Tasol ol man long nau, ol niuspepa na TV samting, na ol man i gat nem, em ol man ol narapela i wok long bihainim pasin bilong ol, ol i tok mani kago, strong bilong bosim ol man, biknem, na maritpasin em ol bikpela samting, winim laik bilong man long pas gut na laikim tru narapela. Planti tisa i tok ol man i win tru em ol man i kisim ol wok skin i gat bikpela namba. Tru, kisim gutpela skul na mekim gutpela wok long save bilong yu em i bikpela samting, tasol yu ting em i stret long tingim dispela samting tasol na yu no tingim famili na ol pren? Wanpela saveman bilong bipo husat i bin skelim gut pasin bilong ol man i bin tok sapos wanpela man i gat bikpela save tasol em i no gat pasin bilong laikim narapela, em i olsem ‘belo i mekim planti nois o garamut i pairap nating.’ (1 Korin 13:1) Ol kain man olsem inap kamap maniman, o kisim biknem, tasol ol i no save stap amamas tru.
Jisas Krais i save gut long ol man bilong graun na em i laikim ol tru, na as bilong ol samting em i skulim ol man long en em pasin bilong laikim tru God na laikim ol wantok. Em i tok: “Yupela i mas laikim God, Bikpela bilong yumi. Yupela i mas laikim em tru long bel bilong yupela na long spirit bilong yupela na long tingting bilong yupela. . . . Yu mas laikim ol wantok olsem yu laikim yu yet.” (Matyu 22:37-39) Ol manmeri husat i bihainim dispela tok, ol tasol ol i disaipel tru bilong Jisas. Olsem na em i tok: “Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.”—Jon 13:35.
Tasol olsem wanem yumi inap kisim pasin bilong laikim narapela long nau? Na olsem wanem ol papamama i ken lainim ol pikinini bilong ol long mekim dispela pasin? Stori i kamap bihain long dispela bai bekim ol dispela askim.
[Ol Piksa long pes 3]
Em i hatwok long kisim pasin bilong laikim narapela long nau taim pasin mangal i bosim ol samting