Em Wanpela Pasin Nating Tasol o Em Grispasin?
LONG sampela skul koles long Polan, ol sumatin i save bungim mani bilong baim presen bilong ol tisa bilong ol, long wanem, ol i laik kisim gutpela mak long tes pepa bilong ol. Olsem na wanpela yangpela Kristen, nem bilong em Katarzyna, i gat hevi long dispela pasin. Em i tingting: “Bai mi givim mani o nogat?” Ol wanskul i tokim em: “Em pasin bilong olgeta sumatin. Yu no inap kisim hevi long dispela pasin, tasol bai yu kisim planti samting, olsem na bilong wanem yu gat tupela tingting?”
Katarzyna i tok: “Mi mas tokaut olsem long namba wan yia bilong mi long skul, mi bin insait long wok bilong kisim mani. Tasol bihain mi luksave olsem taim mi mekim olsem mi helpim pasin bilong kisim grismani, na Baibel i tambuim dispela pasin.” Em i tingim ol skripsa i kamapim olsem Jehova i no orait liklik long grispasin. (Lo 10:17; 16:19; 2 Stori 19:7) Katarzyna i tok: “Mi save olsem em i isi tru long ol poroman i pulim yu. Mi skelim dispela samting na kirap long dispela taim mi no insait gen long dispela pasin.” Insait long tripela yia i go pinis, maski ol wanskul i tok bilas long em, em inap long stori long sampela olsem em i no insait long pasin bilong bungim dispela kain “presen,” long wanem, Baibel i as bilong ol bilip bilong em.
Sampela i sutim tok long Katarzyna olsem em i tingim em yet na em i no tingim ol narapela na helpim lain insait long grup. Em i tok: “Mi no stap gut yet wantaim sampela. Tasol planti i rispek long tingting bilong mi, na dispela i mekim mi amamas.” Ol i save olsem Katarzyna em i wanpela Witnes Bilong Jehova na em i save bihainim ol stiatok bilong Baibel long olgeta de.