Ol Gutpela Meri Kristen i Save Lotu Long God

“Wanpela meri inap givim switpela tok long yumi, tasol pasin bilong en i narakain. Na maski meri i luk nais tru, em i no inap i stap olsem oltaim. Mobeta yumi litimapim nem bilong meri i save aninit long Bikpela.”​—⁠SINDAUN 31:⁠30.

1. Skelim tingting bilong Jehova wantaim tingting bilong graun long naispela skin.

OL LAIN bilong graun i tingim gutpela skin i bikpela samting, na ol i tingim moa yet gutpela skin bilong ol meri. Tasol Jehova i save tingim pasin i stap insait long bel bilong meri, em inap kamap naispela moa taim meri i wok long go lapun. (Sindaun 16:31) Olsem na Baibel i tokim ol meri: “Yupela i no ken bilasim skin ausait tasol, long pasin bilong bilasim gras na putim bilas gol na kain kain naispela klos. Nogat. Mobeta yupela i bilasim insait bilong yupela tu long olkain bilas i no inap long bagarap. Dispela kain bilas em pasin bilong i stap belgut na i stap bel isi. Dispela kain pasin em i gutpela moa yet long ai bilong God.”​—⁠1 Pita 3:​3, 4.

2, 3. Long taim bilong ol aposel, olsem wanem ol meri i helpim wok bilong autim gutnius na em i go kamap long planti hap? I gat wanem tok profet long dispela samting bai kamap?

² Planti meri em stori bilong ol i stap long Baibel ol i gat dispela kain gutpela pasin yumi inap litimapim nem bilong ol. Long taim bilong ol aposel, sampela ol i bin mekim wok bilong helpim Jisas na ol aposel bilong em. (Luk 8:​1-3) Bihain, ol meri Kristen i kamap meri bilong wok strong long autim gutnius; sampela i bin mekim ol wok bilong helpim ol man Kristen em ol i go pas long lukautim lain bilong God​—⁠wanpela em aposel Pol; na sampela ol i mekim gut tru long ol Kristen na singautim ol i kam kaikai, na ol i larim kongrigesen i mekim ol miting long haus bilong ol.

³ Baibel i tok profet pinis olsem Jehova bai mekim bikpela wok long ol meri bilong kamapim ol samting em i tingting pinis long mekim. Olsem: Joel 2:​28, 29 i tok profet olsem ol man na meri wantaim, ol yangpela na lapun, ol bai kisim holi spirit na mekim wok bilong autim gutnius bilong Kingdom long ol man. Dispela tok profet i kirap long kamap tru long Pentikos bilong 33 C.E. (Aposel 2:​1-4, 16-18) Sampela meri em holi spirit i bin makim ol, ol i kisim ol presen bilong holi spirit, na wanpela em presen bilong autim tok bilong God olsem profet. (Aposel 21:​8, 9) Dispela traipela lain sista i wok strong tru long autim tok, na dispela i mekim na long taim bilong ol aposel lotu Kristen i go kamap kwiktaim long planti hap. Olsem na long 60 C.E. samting, aposel Pol i tok ol i bin autim gutnius “long olgeta manmeri i stap long graun.”​—⁠Kolosi 1:⁠23.

Strongpela Bel, Wok Strong, na Mekim Gut Long Ol Man

4. Olsem wanem na i gat as tru na Pol i givim gutpela tok amamas long planti meri insait long kongrigesen Kristen long taim bilong ol aposel?

⁴ Aposel Pol i amamas tru long wok bilong God em sampela meri i bin mekim​—⁠na ol wasman Kristen bilong nau tu i tingim tru wok bilong ol meri i save givim bel long autim tok. Pol i kolim nem bilong sampela, olsem ‘Trifina wantaim Trifosa, tupela i save hatwok long mekim wok bilong Bikpela,’ na ‘Persis, em pren tru bilong mi, em i bin hatwok long mekim wok bilong Bikpela.’ (Rom 16:12) Na Pol i tok long Yuodia na Sintike, olsem “tupela i bin poroman gut wantaim mi long wok bilong autim gutnius.” (Filipai 4:​2, 3) Prisila wantaim man bilong en Akwila ol tu i bin wok wantaim Pol long autim tok. Prisila na Akwila i bin “redi long i dai” bilong helpim Pol, olsem na em i tok: “I no mi tasol i tenkyu long tupela. Nogat. Olgeta sios bilong ol arapela lain manmeri, ol tu i save tenkyu long tupela.”​—⁠Rom 16:​3, 4; Aposel 18:⁠2.

5, 6. Prisila i bin mekim wanem na em i stap olsem gutpela piksa bilong ol sista long nau?

⁵ Wanem samting i mekim na Prisila i gat strongpela bel na em i bin wok strong? Aposel 18:​24-26 i givim sampela tingting long yumi, em i tok Prisila i bin wok wantaim man bilong em long helpim Apolos, em i gat save tru long mekim tok, na tupela i helpim em long kisim save long ol tok i tru i bin kamap ples klia long dispela taim. Em nau, i luk olsem Prisila i bin givim bel long stadi long Baibel na tok bilong ol aposel. Olsem na em i bin kisim sampela gutpela pasin tru, na dispela i mekim na em i olsem gutpela samting tru long ai bilong God na man bilong em, na em i wanpela meri bilong helpim gut kongrigesen bilong pastaim. Na i gat planti gutpela sista Kristen bilong nau tu i save wok strong na ol i givim bel long stadi long Baibel na kisim ol kaikai bilong spirit Jehova i save givim long rot bilong “bosboi i gat gutpela tingting.”​—⁠Luk 12:⁠42.

⁶ Akwila na Prisila i save strong tru long kisim ol man na mekim gut long ol. Pol i bin stap long haus bilong ol taim em i wok wantaim ol long samapim ol haus sel long Korin. (Aposel 18:​1-3) Taim tupela i go i stap long Efesus, na bihain ol i go long Rom, ol i wok yet long mekim gutpela pasin Kristen bilong lukautim ol Kristen, na tu, ol i larim kongrigesen i mekim ol miting long haus bilong ol. (Aposel 18:​18, 19; 1 Korin 16:​8, 19) Na ol i bin mekim ol miting bilong kongrigesen long haus bilong Nimfa na bilong Maria tu, em mama bilong Jon Mak.​—⁠Aposel 12:12; Kolosi 4:⁠15.

Ol i Olsem Gutpela Samting Tru Long Nau

7, 8. Planti meri Kristen bilong nau ol i bin mekim wanem ol gutpela wok insait long wok bilong God? Ol i ken bilip tru long wanem samting?

⁷ Olsem long taim bilong ol aposel, ol gutpela meri Kristen long nau i save mekim bikpela wok insait long ol samting Jehova i laik mekim bilong kamapim laik bilong em, na moa yet long wok bilong autim gutnius. Tru tumas, ol dispela meri i bin mekim gutpela wok tru! Tingim Gwen, em i bin mekim wok bilong Jehova inap 50 yia samting, i go inap long taim em i dai long yia 2002. Man bilong em i tok: “Long taun bilong mipela, Gwen i gat nem olsem meri bilong wok strong long autim gutnius. Em i bin tingim olgeta wan wan man olsem ol inap kisim sori bilong Jehova na ol tok promis bilong em. Em i strong long i stap gut long God, na oganaisesen bilong em, na famili bilong mipela, na em i save strongim bel bilong mipela taim mipela i bel hevi, na dispela pasin bilong em i bin helpim gut mi na ol pikinini bilong mipela long olgeta yia mitupela i stap wantaim. Mipela save wari tru long em.” Gwen wantaim man bilong em ol i bin marit inap 61 yia.

⁸ Planti tausen meri Kristen​—⁠ol singel na ol marit​—⁠ol i mekim wok bilong autim tok olsem painia na misineri, na ol liklik kaikai na klos samting ol i mas kisim bilong i stap laip, ol i ting em inap long ol na ol i mekim wok bilong autim tok bilong Kingdom long ol kain kain hap​—⁠long ol biktaun na ol ples i stap longwe. (Aposel 1:⁠8) Planti ol i no bin kisim wanpela haus bilong ol yet o kamapim famili bilong ol bambai ol i ken mekim wok bilong Jehova moa yet. Na sampela meri i save helpim tru man bilong ol em ol i mekim wok olsem wasman bilong raun, na planti tausen sista i save wok long ol haus Betel long olgeta hap. Tru tumas, ol dispela meri i bin daunim laik bilong ol yet ol i insait long “ol gutpela samting bilong olgeta lain” em Jehova i pulimapim long haus bilong em.​—⁠Hagai 2:​7, NW.

9, 10. Sampela insait long ol famili ol i tok wanem bilong kamapim olsem ol i pilim tru pasin bilong ol meri marit Kristen na ol mama em ol i stap olsem gutpela piksa?

⁹ Tru, planti meri Kristen i gat wok long lukautim famili bilong ol, tasol ol i save putim wok bilong Kingdom i go pas. (Matyu 6:​33, Nupela Testamen na Ol Sam) Wanpela sista painia i singel em i tok: “Mama bilong mi i gat strongpela bilip na em i stap olsem gutpela piksa tru, na em i bin mekim bikpela wok bilong helpim mi long kamap painia oltaim. Em i wanpela gutpela poroman tru bilong mi long wok painia.” Wanpela man i stori long meri bilong em, ol i gat 5-pela pikinini i bikpela pinis, olsem: “Long olgeta taim haus bilong mipela i klin na ol samting i stap stret. Bonnie i no pulimapim planti samting insait long haus​—⁠ol liklik samting tasol​—⁠na bai famili i ken tingim gut ol wok bilong spirit. Em i save lukautim gut mani bilong mipela, na dispela i mekim na mi inap mekim wok mani haptaim tasol inap 32 yia, olsem na mi inap lusim bikpela hap taim long stap wantaim famili na mekim ol wok bilong spirit. Na meri bilong mi i bin skulim ol pikinini long wok strong. Mi mas litimapim nem bilong em.” Long nau, dispela man wantaim meri bilong em i save mekim wok long hetkota bilong ol Witnes Bilong Jehova.

¹⁰ Wanpela man i stori long meri bilong em, ol i gat ol pikinini i bikpela pinis: “Ol pasin bilong Susan mi laikim tru, em pasin bilong em long laikim tru God na ol man, pasin bilong pilim tru tingting bilong man, pasin sori, na pasin bilong tok tru. Tingting bilong em i olsem: Jehova em inap tru long yumi mas givim ol nambawan samting tru long em​—⁠em wanpela lo em yet i save bihainim olsem wanpela wokmeri bilong God na wanpela mama.” Meri i bin helpim gut man bilong em, olsem na man inap holim sampela bikpela wok insait long kongrigesen, olsem wok elda, painia, helpim bilong wasman sekit, na wanpela bilong Hospital Lieson Komiti. Tru tumas, ol dispela meri i gutpela samting tru long ai bilong man bilong ol, na ol narapela Kristen, na bikpela samting moa, long Jehova yet.​—⁠Sindaun 31:​28, 30.

Ol Gutpela Meri i No Gat Man Bilong Ol

11. (a) Olsem wanem Jehova i bin kamapim klia olsem em i save tingim ol meri i stap gut long em, na moa yet ol meri, man bilong ol i dai pinis? (b) Ol meri Kristen em man bilong ol i dai pinis, na ol narapela gutpela sista i no gat man bilong ol, ol inap bilip tru long wanem samting?

¹¹ Planti taim Jehova i kamapim olsem em i tingim tru ol meri, man bilong ol i dai pinis. (Lo 27:19; Song 68:5; Aisaia 10:​1, 2) Tingting bilong Jehova i no senis. Em i wok yet long tingim tru ol meri, man bilong ol i dai pinis, na ol mama wanpis, na ol meri em ol i stap singel long laik bilong ol yet o ol i no painim wanpela man Kristen ol i laik maritim. (Malakai 3:6; Jems 1:27) Sapos yu wanpela bilong ol dispela meri i save mekim wok bilong Jehova na yu no gat poroman Kristen bilong helpim yu, yu ken bilip tru olsem yu gutpela samting tru long ai bilong God.

12. (a) Olsem wanem sampela sista Kristen i kamapim klia olsem ol i strong long i stap gut long Jehova? (b) Sampela sista bilong yumi ol i gat wanem kain bel hevi?

¹² Yumi ken tingim ol sista Kristen bilong yumi i no bin marit, long wanem, ol i strong long bihainim tok bilong Jehova olsem yumi mas maritim “man i bilip long Bikpela.” (1 Korin 7:39; Sindaun 3:⁠1) Baibel i tokim ol olsem: “Sapos man i no lusim yu [Jehova], orait yu no save lusim em.” (2 Samuel 22:26) Tru tumas, long planti sista olsem, i gat hatwok long i stap singel. Wanpela sista i tok: “Mi bin pasim tok long bel olsem mi bai maritim man i bilip long Bikpela, tasol planti taim mi bin krai na aiwara i kapsait taim mi lukim ol pren bilong mi i maritim ol gutpela man Kristen tasol mi stap wanpis yet.” Narapela sista i tok: “Mi bin mekim wok bilong Jehova inap 25 yia pinis. Mi tingting strong olsem mi bai stap gut long em, tasol planti taim mi save bel hevi long i stap wanpis.” Na em i tok: “Ol sista olsem mi ol i laik tru long sampela i strongim bel bilong ol.” Orait olsem wanem yumi ken helpim ol kain meri olsem, em ol i strong long i stap gut long God?

13. (a) Ol meri i save go lukim pikinini meri bilong Jepta, pasin bilong ol inap skulim yumi long wanem samting? (b) Wanem ol narapela samting yumi ken mekim bilong soim olsem yumi tingim ol sista singel i stap long kongrigesen bilong yumi?

¹³ Yumi ken tingim wanpela samting i bin kamap bipo. Taim pikinini meri bilong Jepta i orait long em i no ken marit, ol manmeri i save, em i bin daunim laik bilong em yet bambai em i ken mekim olsem. Orait ol i mekim wanem bilong strongim bel bilong em? “Ol yangpela meri bilong Israel i save lusim ples na i go na krai [“givim gutpela tok,” “NW” ] long pikinini meri bilong Jepta, dispela man bilong Gileat. Ol yangpela meri Israel i save mekim dispela pasin inap long 4-pela de long olgeta yia.” (Hetman 11:​30-40) Olsem tasol yumi mas givim gutpela tok amamas long ol sista singel em ol i strong long bihainim lo bilong God.a Orait wanem narapela samting yumi ken mekim bilong soim olsem yumi tingim ol? Long beten bilong yumi, yumi mas askim Jehova long helpim ol dispela gutpela sista long mekim yet wok bilong God. Yumi mas tokim ol, yumi laikim tumas ol, na Jehova wantaim kongrigesen Kristen olgeta i amamas tru long ol.​—⁠Song 37:⁠28.

Ol Mama Wanpis i Mekim Gut Wok Bilong Ol

14, 15. (a) Bilong wanem ol mama wanpis Kristen i mas singaut long Jehova long helpim ol? (b) Olsem wanem ol mama wanpis inap mekim ol samting i stret wantaim beten bilong ol?

¹⁴ Ol meri Kristen em ol i mama wanpis ol tu i gat bikpela hatwok. Tasol ol i ken i go long Jehova bilong helpim ol long mekim bikpela long ol pikinini long pasin i stret wantaim ol stiatok bilong Baibel. Tru, sapos yu mama wanpis, yu no inap i stap olsem mama na papa tu long olgeta samting. Tasol Jehova bai helpim yu long mekim planti ol wok bilong yu sapos yu bilip na singaut long em. Yumi ken tok piksa olsem: Yu bin go long stua na kaikai i pulap long bilum bilong yu na yu mas karim i go long flet bilong yu i stap long plua antap tru long wanpela bikpela haus. Orait sapos i gat wanpela eleveta i stap klostu, bai yu wokabaut long lata i go antap? Nogat, a? Na olsem tasol yu no ken traim long karim ol bikpela hevi bilong yu sapos yu inap askim Jehova long helpim yu. Na em i singautim yu long go long em. Song 68:19 i tok: “Yumi litimapim nem bilong Bikpela. Olgeta de em i save karim ol hevi bilong yumi.” Na tu, 1 Pita 5:7 i singautim yu long putim olgeta hevi bilong yu long Jehova, long wanem, “[em] i save wari long yupela.” Olsem na taim yu tingting planti na i gat ol hevi tu i daunim yu, kamapim ol dispela hevi long Papa bilong yu long heven, na mekim “oltaim.”​—⁠1 Tesalonaika 5:17; Song 18:6; 55:⁠22.

¹⁵ Olsem: Sapos yu wanpela mama, ating yu tingting planti, nogut ol wanskul bilong ol pikinini bilong yu i pulim ol long bihainim pasin bilong ol, o i gat sampela samting inap traim pasin bilong ol long i stap gut long God. (1 Korin 15:33) I gat as na yu tingting planti long dispela. Tasol yu inap kamapim ol dispela tingting tu long beten. Yu ken beten wantaim ol pikinini long dispela samting taim ol i laik i go long skul, olsem long taim yupela i mekim pinis teks bilong de, a? Sapos yu beten long sampela samting stret na yu kamapim tru bel bilong yu, ol pikinini bilong yu bai pilim tru dispela beten. Na bikpela samting tru, taim yu wok strong long putim ol tok bilong God i go daun long bel bilong ol pikinini, yu inap kisim gutpela helpim long Jehova. (Lo 6:​6, 7; Sindaun 22:⁠6) No ken lusim tingting: “Bikpela i save lukautim ol stretpela manmeri, na em i save putim yau long ol beten bilong ol.”​—⁠1 Pita 3:12; Filipai 4:​6, 7.

16, 17. (a) Wanpela pikinini man i tok wanem long pasin sori mama i bin mekim? (b) Pasin bilong mama long tingim ol samting bilong spirit, dispela i mekim wanem long ol pikinini bilong em?

¹⁶ Yumi ken tingim Olivia, em i gat 6-pela pikinini. Man bilong em i no bilip, na em i bin lusim famili taim meri bilong em i karim laspela pikinini bilong ol, tasol Olivia i kirap na mekim wok bilong skulim ol pikinini bilong em long ol tok na lo bilong Jehova. Pikinini man bilong Olivia, em Darren, nau em i gat 31 krismas na i mekim wok olsem elda Kristen na painia, long dispela taim bipo em i gat 5-pela krismas. Na narapela hevi bilong Olivia, em bikpela sik i painim Darren na dispela sik i stap yet. Darren i stori long taim em i pikinini yet na em i tok: “Mi tingim yet taim mi bin sindaun long bet long haus sik na mi wetim mama i kam. Em i save sindaun klostu long mi na ritim Baibel long mi long olgeta de. Bihain long en em i save mekim wanpela singsing bilong Kingdom, ‘Jehova, Mipela Tenkyu Long Yu.’b I kam inap nau, mi save laikim tru dispela singsing bilong Kingdom, winim ol narapela.”

¹⁷ Olivia i bilip tru long Jehova na laikim em tru, na dispela i mekim na wok bilong em olsem mama wanpis i kamap gutpela. (Sindaun 3:​5, 6) Gutpela tingting bilong em i kamap ples klia long pasin bilong em long kirapim ol pikinini long putim mak ol i laik winim. Darren i tok: “Oltaim mama i bin kirapim mipela long putim wok bilong autim tok fultaim olsem mak bilong winim. Olsem na long 5-pela susa bilong mi, 4-pela i bin mekim wok bilong God fultaim, na mi tu. Tasol mama i no hambak na tokim ol narapela long dispela. Mi save wok strong long bihainim ol gutpela pasin bilong em.” Tru, i no olgeta pikinini bai mekim wok bilong God taim ol i bikpela, olsem ol pikinini bilong Olivia i mekim. Tasol taim mama i wok strong tru long bihainim ol stiatok bilong Baibel long i stap bilong em, em i ken bilip tru olsem Jehova bai soim rot long em na helpim em.​—⁠Song 32:⁠8.

18 Olsem wanem yumi ken soim olsem yumi amamas long Jehova i bin givim kongrigesen Kristen long yumi?

¹⁸ Planti helpim Jehova i givim long yumi i save kam long rot bilong kongrigesen Kristen, oltaim em i save givim kaikai bilong spirit long yumi, na i gat lain brata Kristen bilong en, na ol man i stap olsem “presen” na ol i strong long ol samting bilong spirit. (Efesus 4:⁠8) Ol elda i save wok strong long strongim olgeta insait long kongrigesen, na ol i strong moa long helpim “ol pikinini, papamama bilong ol i dai pinis, na ol meri, man bilong ol i dai pinis.” (Jems 1:27) Olsem na yu mas i stap klostu long lain bilong God​—⁠yu no ken i stap longwe long ol.​—⁠Sindaun 18:1; Rom 14:⁠7.

Gutpela Pasin Bilong Daun Long Man

19. Meri i mas daun long man bilong em, tasol olsem wanem na dispela i no makim olsem em i samting nating tasol? Wanem stori long Baibel i helpim dispela tok?

¹⁹ Jehova i bin wokim meri olsem helpim bilong man. (Stat 2:18) Olsem na taim meri i daun long man bilong em, dispela i no makim olsem em i samting nating tasol, nogat. Dispela i makim olsem meri i gat nem, na em inap mekim wok long ol kain kain save bilong em i stret wantaim laik bilong God. Sindaun sapta 31 i stori long ol kain kain wok bilong gutpela meri marit long Israel bilong bipo. Em i save helpim ol manmeri i sot long ol samting, na planim ol gaden wain, na baim graun. Yes, “man bilong dispela kain meri i save gut long meri i bihainim gutpela pasin oltaim . . . na em i gat planti samting.”​—⁠Ves 11, 16, 20.

20. (a) Meri Kristen i mas ting olsem wanem long ol kain kain save bilong mekim wok em God i bin givim long em? (b) Esta i kamapim wanem ol gutpela pasin? Olsem na Jehova inap mekim wanem ol wok long em?

²⁰ Meri i gat pasin daun na i pret long God, em i no tingting long i stap antap long man o resis wantaim man long i stap bos. (Sindaun 16:18) Em i no mekim ol kain kain wok bilong skin bilong inapim ol laik bilong em yet. Em i mekim wok long ol save God i bin givim long em bilong helpim ol narapela​—⁠olsem famili bilong em, ol narapela Kristen, ol lain i sindaun klostu long em, na bikpela samting moa, em i tingim Jehova. (Galesia 6:10; Taitus 2:​3-5) Tingim stori bilong Kwin Esta long Baibel. Maski em i gat naispela skin, em i gat pasin daun na em i daun long ol man. (Esta 2:​13, 15) Na taim em i marit, em i daun tru long man bilong em, King Serksis​—⁠i no olsem Vasti, em pastaim em i stap meri bilong king. (Esta 1:​10-12; 2:​16, 17) Na tu, taim kasen brata bilong Esta, em Mordekai, i givim sampela tok long Esta, em i daun long dispela tok, na em i mekim yet taim em i kamap kwin pinis. Tasol i no olsem em i no gat bun. Em i kamapim long ples klia pasin bilong Haman, em wanpela man nogut i gat namba na em i laik wokim rot bilong kilim i dai olgeta Juda na pinisim ol. Jehova i mekim bikpela wok long Esta bilong lukautim lain bilong Em na bai ol i no ken bagarap.​—⁠Esta 3:8–4:17; 7:​1-10; 9:⁠13.

21. Olsem wanem meri Kristen inap kamap olsem gutpela samting moa yet long ai bilong Jehova?

²¹ Em i klia tru olsem long bipo na long nau tu, ol meri i daun long God i bin soim olsem ol i givim bel olgeta long Jehova na long lotuim em. Olsem na ol meri i save pret long God ol i gutpela samting tru long ai bilong Jehova. Yupela ol sista Kristen, larim Jehova i stretim stretim yupela i go na bai yupela i kamap olsem “dis” i gutpela moa yet na “i redi long mekim olgeta kain gutpela wok.” (2 Timoti 2:21; Rom 12:⁠2) Baibel i tok long ol dispela gutpela meri bilong lotuim God olsem: “Yumi mas tingting long gutpela pasin bilong meri na long gutpela wok em i bin mekim, na givim biknem long em. Olgeta manmeri i ken litimapim nem bilong en.” (Sindaun 31:31) Mipela laik bai dispela tok i stret long yupela olgeta wan wan.

[Ol Futnot]

Yu Inap Tingim?

• Olsem wanem sampela meri Kristen long taim bilong ol aposel i kamapim klia olsem ol i gutpela samting tru long ai bilong Jehova?

• Olsem wanem planti sista long taim bilong yumi ol i mekim ol yet i kamap gutpela samting tru long ai bilong God?

• Olsem wanem Jehova i save helpim ol mama wanpis na ol narapela sista i no gat man bilong ol?

• Olsem wanem meri i ken soim olsem em i daun tru long man bilong en, em het bilong famili?

[Blok long pes 17]

OL MERI I STAP OLSEM GUTPELA PIKSA

Yu laik ritim stori bilong sampela meri moa i bin stap gut long God na stori bilong ol i stap long Baibel? Sapos olsem, orait ritim ol skripsa i stap daunbilo. Taim yu tingim tingim pasin bilong ol dispela meri i stap long lista, traim long luksave long sampela stiatok yu inap bihainim moa yet long i stap bilong yu.​—⁠Rom 15:⁠4.

◆ Sara: Stat 12:​1, 5; 13:18a; 21:​9-​12; 1 Pita 3:​5, 6.

◆ Ol meri Israel i save givim ol samting: Kisim Bek 35:​5, 22, 25, 26; 36:​3-7; Luk 21:​1-4.

◆ Debora: Hetman 4:1–5:⁠31.

◆ Rut: Rut 1:​4, 5, 16, 17; 2:​2, 3, 11-13; 4:⁠15.

◆ Meri Sunem: 2 King 4:​8-37.

◆ Meri Fonisia: Matyu 15:​22-28.

◆ Marta na Maria: Mak 14:​3-9; Luk 10:​38-42; Jon 11:​17-29; 12:​1-8.

◆ Tabita: Aposel 9:​36-41.

◆ Fopela pikinini meri bilong Filip: Aposel 21:⁠9.

◆ Fibi: Rom 16:​1, 2.

[Piksa long pes 15]

Yu save givim gutpela tok amamas long ol sista singel ol i strong long bihainim lo bilong God?

[Piksa long pes 16]

Taim ol pikinini i laik i go long skul, pastaim mama i ken askim Jehova long wanem samting insait long beten bilong em?