Yu Mas Amamas Long Jehova
“Yu mas amamas long Bikpela, na em bai i givim yu ol samting yu laikim tru.”—SONG 37:4.
1, 2. Husat i As bilong amamas tru? King Devit i stori long dispela samting olsem wanem?
“OL MANMERI husat i save, ol i mas kisim ol samting bilong spirit, em ol i ken amamas. . . . Ol manmeri i save marimari long ol arapela, em ol i ken amamas. . . . Ol manmeri i save mekim dai ol kros na pait, em ol i ken amamas.” Ol dispela 3-pela tok wantaim 6-pela tok moa i stori long wanem kain man i ken amamas, ol i stap olsem kirap bilong bikpela tok Jisas i mekim antap long maunten, em Matyu i bin raitim long Gutnius bilong em. (Matyu 5:3-11; NW ) Ol dispela tok bilong Jisas i kamapim klia olsem yumi inap i stap amamas.
2 Wanpela song King Devit bilong Israel bipo i raitim, em i stori long As bilong amamas tru, em Jehova. Devit i tok: “Yu mas amamas long Bikpela, na em bai i givim yu ol samting yu laikim tru.” (Song 37:4) Tasol olsem wanem yumi ken “amamas” long save long Jehova na ol gutpela pasin bilong em? Na taim yumi tingim ol samting Jehova i bin mekim na ol samting em bai mekim bilong kamapim laik bilong em, olsem wanem dispela inap mekim na yumi ken tingting long kisim “ol samting [yumi] laikim tru”? Bilong bekim ol dispela askim, yumi ken skelim Song 37, ves 1 i go 11.
“No Ken Bel Nogut”
3, 4. Long Song 37:1, Devit i givim wanem gutpela tok? Bilong wanem i stret yumi bihainim dispela tok long nau?
3 Yumi stap long taim bilong “planti hevi nogut tru” na pasin nogut i pulap. Yumi lukim pinis truim bilong dispela tok bilong aposel Pol: “Ol man nogut na ol giaman profet ol bai i wok long giamanim ol manmeri. Na . . . pasin bilong ol bai i kamap nogut tru.” (2 Timoti 3:1, 13) Taim i luk olsem ol man nogut i gat gutpela sindaun na ol samting ol i mekim i kamap gutpela tasol, dispela inap pulim yumi na yumi no strong moa long ol samting bilong spirit. Olsem na namba wan ves bilong Song 37 i tok: “Yu no ken wari long pasin ol man nogut i save mekim. Yu no ken bel nogut long ol samting bilong ol man i save mekim pasin nogut.”
4 Long olgeta de, ol nius na TV samting i save kamapim stori bilong ol pasin i no stret. Ol bisnisman i save paulim mani na ol i no kisim strafe. Ol raskol i mekim nogut long ol man i no inap helpim ol yet. Ol man i kilim narapela i dai ol i abrusim strafe. Ol dispela pasin i no stret inap kirapim yumi long kros, na bel i no stap isi. Na taim i luk olsem ol samting bilong ol man nogut i kamap gutpela tasol, ating dispela inap mekim na yumi jeles. Tasol sapos yumi bel hevi olsem, yu ting dispela inap helpim yumi? Sapos yumi jeles long ol samting bilong ol man nogut, yu ting dispela inap senisim wanpela samting? Nogat tru! Na tu, i no gat as na yumi mas “wari.” Bilong wanem?
5. Olsem wanem ol man nogut i kain olsem gras?
5 Man bilong raitim song i bekim dispela askim, olsem: “Liklik taim tasol na bai ol man nogut i bagarap, olsem gras i save drai, na olsem lip bilong diwai i drai.” (Song 37:2) Nupela grinpela gras i luk naispela, tasol i no longtaim na em i save drai na bagarap. Na i wankain tu long ol man nogut. Gutpela sindaun bilong ol i no bilong i stap oltaim. Taim ol i dai, mani samting ol i bin kisim long rot bilong paulim mani i no inap helpim ol moa. Bihain, ol man nogut bai kisim strafe. Pol i tok: “Sin i save givim pe long ol wokboi bilong en. Dispela pe em dai tasol.” (Rom 6:23) Em nau, ol man nogut bai kisim “pe” long ol pasin nogut ol i bin mekim, ol bai no kisim narapela samting. I stap bilong ol i no bin helpim ol liklik!—Song 37:35, 36; 49:16, 17.
6. Song 37:1, 2 i skulim yumi long wanem samting?
6 Olsem na yu ting i gat as na yumi ken larim gutpela sindaun ol man nogut i kisim inap liklik taim i bagarapim bel isi bilong yumi? Samting Song 37:1, 2 i skulim yumi long en, i olsem: Taim ol samting bilong ol man nogut i kamap gutpela, no ken larim dispela i pulim yu long lusim rot yu bin makim long mekim wok bilong Jehova. Wok long tingim ol gutpela blesing bilong spirit yu inap kisim na ol mak bilong spirit yu laik winim.—Sindaun 23:17.
“Bilip Tru Long God, na Mekim Gutpela Pasin”
7. Bilong wanem yumi mas bilip tru long Jehova?
7 Man bilong raitim song i tok: “Yu mas bilip tru long God, na mekim gutpela pasin.” (Song 37:3a) Taim yumi tingting planti o yumi gat tupela tingting, yumi mas bilip strong long Jehova. Em tasol inap helpim yumi long stap gutpela long ol samting bilong spirit. Moses i tok: “Man i go long God Antap Tru, bilong God i ken lukautim em, em i stap klostu long God I Gat Olgeta Strong, na God i karamapim em.” (Song 91:1) Taim yumi no stap isi, long wanem, pasin nogut i go bikpela, yumi mas bilip strong moa yet long Jehova. Sapos yumi wokabaut na lek i tanim, yumi amamas sapos wanpela pren i helpim yumi. Na olsem tasol, taim yumi wok strong long wokabaut long stretpela pasin, Jehova i mas helpim yumi.—Aisaia 50:10.
8. Taim yumi insait long wok Kristen bilong autim tok, olsem wanem dispela i save helpim yumi na yumi no tingting planti tumas long gutpela sindaun bilong ol man nogut?
8 Wanpela samting bilong helpim yumi na bai yumi no tingting planti long gutpela sindaun bilong ol man nogut, em yumi mas wok strong long painim ol man i kain olsem sipsip na helpim ol long kisim stretpela save long ol samting Jehova i tingting pinis long mekim. Pasin nogut i wok long go bikpela, olsem na yumi mas givim bel tru long helpim ol narapela. Aposel Pol i tok: “Yupela i mas mekim gutpela pasin long ol manmeri. Na sapos sampela i sot long ol samting, orait yupela i mas givim sampela samting bilong yupela bilong helpim ol. Yupela i no ken lusim tingting long mekim ol dispela kain pasin, long wanem, em dispela kain ofa God i save laikim tru.” Nambawan “gutpela pasin” yumi ken mekim em pasin bilong autim gutnius bilong Kingdom bilong God long ol narapela. Wok bilong yumi long autim tok i olsem ‘ofa bilong litimapim nem bilong God.’—Hibru 13:15, 16; Galesia 6:10.
9. Stori long dispela tok bilong Devit, “stap gut oltaim long graun bilong yu.”
9 Devit i tok moa: “Stap gut oltaim long graun bilong yu,” na “mekim stretpela pasin.” (Song 37:3b; NW ) “Graun” long taim bilong Devit em Graun Bilong Promis Jehova i bin givim long ol Israel. Taim Solomon i stap king, mak bilong dispela graun i stat long Dan long hap not na i go long Berseba long hap saut. Em graun bilong ol Israel. (1 King 4:25) Long nau, maski yumi stap we long graun, yumi wet long graun olgeta i kamap wanpela paradais long nupela taim i gat stretpela pasin long en. Tasol taim yumi wet i stap, yumi stap gut long ol samting bilong spirit.—Aisaia 65:13, 14.
10. Wanem samting i save kamap taim yumi “mekim stretpela pasin”?
10 Wanem samting bai kamap taim yumi “mekim stretpela pasin”? Wanpela savetok bilong Baibel i tok: “Sapos man i bihainim stretpela pasin, bai God i mekim gut tru long em.” (Sindaun 28:20) Taim yumi mekim stretpela pasin na wok strong long autim gutnius long olgeta man, maski yumi stap we, Jehova i save mekim gut tru long yumi. Olsem: Foti yia i go pinis, Frank na meri bilong em Rose i kirap mekim wok painia long wanpela taun long noten Skotlan. I gat sampela long dispela taun em bipo ol i gat laik long harim tok i tru, tasol isi isi ol i bin lusim. Tasol maski i olsem, dispela tupela painia i kirap autim tok na kamapim ol disaipel. Nau i gat wanpela strongpela kongrigesen long dispela taun. Tru tumas, Jehova i bin mekim gut tru long dispela tupela ol i bin bihainim stretpela pasin na autim gutnius. Long pasin daun, Frank i tok: “Nambawan gutpela blesing mipela i bin kisim, i olsem: Mipela i stap yet insait long tok i tru na Jehova i save mekim yet wok long mipela.” Yes, taim yumi “mekim stretpela pasin,” yumi save kisim planti gutpela blesing.
“Amamas Long Bikpela”
11, 12. (a) Olsem wanem yumi ken “amamas long Bikpela”? (b) Yu ken putim wanem mak bilong winim taim yu stadi? Wanem samting inap kamap long dispela?
11 Bilong strongim pasin bilong yumi long pas gut wantaim Jehova na holim strong pasin bilong bilip tru long em, yumi mas “amamas long Bikpela.” (Song 37:4a) Yumi mekim dispela olsem wanem? Yumi no ken tingim tumas ol samting bilong yumi yet, maski yumi gat planti hevi. Yumi mas tingim Jehova. Wanpela rot bilong mekim olsem, em yumi mas makim taim bilong ritim Baibel. (Song 1:1, 2) Olsem wanem? Taim yu ritim Baibel, dispela i save givim amamas long yu? Pasin bilong ritim Baibel bai givim amamas long yu sapos yu putim mak bilong kisim sampela save moa long Jehova taim yu ritim. Taim yu ritim pinis sampela ves, askim yu yet, ‘Ol dispela ves i lainim mi long wanem samting bilong Jehova?’ Holim notbuk o hap pepa samting taim yu ritim. Taim yu malolo liklik bilong tingim mining bilong ol tok yu ritim pinis, raitim ol tok i kirapim yu long tingim wanpela bilong ol gutpela pasin bilong God. Long narapela song, Devit i tok: “Bikpela, mi laik bai tok bilong mi na tingting bilong mi i ken i orait long ai bilong yu. Bikpela, yu ples hait bilong mi na helpim bilong mi.” (Song 19:14) Dispela pasin bilong putim tingting olgeta i go long Tok Bilong God, em samting “i orait long ai” bilong Jehova—na i givim amamas long yumi.
12 Olsem wanem yumi ken kisim amamas long pasin bilong stadi na tingim tingim ol tok? Yumi ken putim mak long save gut moa long Jehova na ol pasin bilong em. Ol buk olsem Nambawan Man Tru i Winim Olgeta Narapela Man na Draw Close to Jehovaha i gat planti tok long en em yumi ken tingim gut long bel. Sapos yumi mekim olsem, orait olsem Devit i tokim ol stretpela man, Jehova “bai i givim yu ol samting yu laikim tru.” (Song 37:4b) Dispela kain bilip long God i bin kirapim aposel Jon long raitim dispela tok: “Sapos yumi bihainim laik bilong God yet na yumi beten na askim em long wanpela samting, orait em i save harim beten bilong yumi. . . . Olsem na taim yumi askim em long givim wanpela samting long yumi, yumi save olsem yumi kisim tru dispela samting.”—1 Jon 5:14, 15.
13. Long ol yia i go pinis, wok bilong autim tok bilong Kingdom i bin go bikpela olsem wanem long planti kantri?
13 Nambawan bikpela laik bilong yumi ol man i stap gut long God, em yumi laik lukim taim Jehova i kamapim klia olsem i stret em i stap Nambawan Bos. (Sindaun 27:11) Yumi amamas tru taim yumi harim tok bilong bikpela wok autim tok ol brata bilong yumi i mekim long ol kantri em bipo ol dikteta o hatpela gavman i bosim. Orait nau yumi laik save wanem samting moa bai kamap paslain long pinis bilong dispela pasin bilong nau. Planti wokboi bilong Jehova em ol i sindaun long ol kantri we ol i stap fri long mekim wok Kristen, ol i wok strong long autim tok long ol stiuden na ol refiuji na sampela moa em ol i sindaun sotpela taim long ol dispela kantri we ol i stap fri long mekim lotu. Yumi gat bikpela laik olsem taim ol dispela manmeri i go bek long ples, ol bai wok yet long larim lait bilong tok i tru i lait, maski long ples bilong ol i gat tambu long mekim wok autim tok.—Matyu 5:14-16.
“Putim Laip Bilong Yu Long Han Bilong Bikpela”
14. Wanem samting i kamapim klia olsem yumi ken bilip tru long Jehova?
14 Yumi ken amamas long save olsem ol wari na ol samting i daunim yumi, ol inap tekewe! Dispela samting inap kamap olsem wanem? Devit i tok: “Yu mas putim laip bilong yu long han bilong Bikpela. Bilip strong long em, na em bai i helpim yu.” (Song 37:5) Long ol kongrigesen bilong yumi, i gat planti samting i kamapim klia olsem yumi ken wetim Jehova i helpim yumi. (Song 55:22) Ol painia, ol wasman raun, ol misineri, o ol volantia i wok long Betel, olgeta inap tokaut olsem Jehova i bin lukautim gut ol. Toktok wantaim ol na askim ol olsem wanem Jehova i bin helpim ol. Bai yu harim planti ekspiriens i kamapim klia olsem long taim nogut tu, Jehova i save helpim ol. Olgeta taim em i save helpim ol long ol samting ol i mas i gat.—Song 37:25; Matyu 6:25-34.
15. Olsem wanem stretpela pasin bilong lain bilong God i save kamap ples klia olsem lait bilong san?
15 Taim yumi bilip strong long Jehova, dispela tok bilong man bilong raitim song bai kamap tru long yumi: “Bai em i mekim gutpela pasin bilong yu i kamap ples klia olsem lait bilong san. Na bai em i mekim stretpela pasin bilong yu i klia tumas long ai bilong ol man, olsem lait bilong san long belo kaikai.” (Song 37:6) Planti taim ol man i sutim kain kain tok giaman long yumi ol Witnes Bilong Jehova. Tasol Jehova i save opim ai bilong ol man i gat gutpela bel na i helpim ol long save olsem samting i kirapim yumi long autim tok, em pasin bilong laikim tru Jehova na ol narapela. Stretpela pasin tu bilong yumi—em planti man i sutim tok giaman long en—i stap ples klia. Maski wanem kain pasin nogut ol man i mekim long yumi, Jehova i save strongim yumi long karim. Dispela i save mekim na stretpela pasin bilong lain bilong God i save kamap ples klia olsem lait bilong san.—1 Pita 2:12.
“Sindaun Isi . . . Wetim Em”
16, 17. Olsem Song 37:7 i tok, nau em taim bilong mekim wanem? Bilong wanem i olsem?
16 Orait nau man bilong raitim song i tok: “Yu mas sindaun isi klostu long Bikpela. Stap bel isi na wetim em i helpim yu. Yu no ken mangal long ol man i kisim planti gutpela samting long pasin ol i mekim. Tru tumas, yu no ken wari long ol man i save tingting long ol kain kain pasin nogut, na ol i mekim ol dispela kain pasin.” (Song 37:7) Devit i kamapim klia olsem yumi mas stap isi na wet long Jehova i helpim yumi. Tru, pinis bilong dispela pasin bilong nau i no kamap yet, tasol yumi no ken toktok planti long dispela. Nau yumi lukim marimari na pasin isi bilong Jehova i kamap bikpela moa yet, winim samting yumi tingim pastaim, a? Olsem na taim yumi wok strong long autim gutnius paslain long pinis i kamap, yumi tu i mas stap isi na wet i stap. (Mak 13:10) Nau em taim bilong tingting gut pastaim, nogut yumi kirap hariap na mekim sampela samting em inap tekewe amamas bilong yumi na pasin bilong yumi long stap gut long ol samting bilong spirit. Nau em taim bilong wok strong moa yet long sakim ol pasin nogut bilong dispela graun em Satan i bosim. Na tu, nau em taim bilong stap stret long pasin bilong yumi—nogut yumi mekim sampela pasin kranki na nau yumi no stap stretpela man moa long ai bilong Jehova. Yumi mas wok yet long rausim ol tingting nogut long bel bilong yumi na no ken mekim sampela pasin i no stret long narapela—man i mas was gut long pasin em i mekim long meri, na long man tu, na meri i mas was gut long pasin em i mekim long man o narapela meri.—Kolosi 3:5.
17 Devit i tok: “Yu no ken kros, na yu mas lusim pasin bilong belhat. Yu no ken wari long ol samting na kirap nogut. Dispela pasin em inap pulim yu long mekim pasin nogut. Ol man nogut bai i bagarap olgeta. Tasol ol manmeri i bilip na wetim Bikpela i helpim ol, bai ol i stap gut long graun bilong ol.” (Song 37:8, 9) Yes, yumi ken bilip na wetim dispela taim—klostu nau bai kamap—na Jehova bai rausim olgeta pasin nogut wantaim ol man i kamapim dispela pasin.
“I No Longtaim”
18, 19. Tok bilong Song 37:10 i strongim bel bilong yumi olsem wanem?
18 “I no longtaim na bai ol man nogut i lus olgeta. Bai yu wok long painim ol long ples bilong ol, tasol yu no inap lukim ol.” (Song 37:10) Ol dispela tok i save strongim bel bilong yumi taim yumi kam klostu long pinis bilong dispela pasin bilong nau na long pinis bilong ol samting nogut i bin kamap long pasin bilong sakim wok bos bilong Jehova! Maski wanem kain gavman ol man i bin kamapim, olgeta i bin pundaun long mekim gutpela wok bos. Yumi stap klostu long taim wok bos bilong God, em gavman tiokratik, bai kirap gen—em Kingdom bilong Jehova long han bilong Jisas Krais. Em bai bosim tru olgeta samting long graun na rausim olgeta birua bilong Kingdom bilong God.—Daniel 2:44.
19 Long nupela taim aninit long Kingdom bilong God, yumi no inap painim wanpela “man nogut.” Sapos man i bikhet long Jehova long dispela taim, kwiktaim Jehova bai rausim em. Man i birua long wok bos bilong God o i no laik stap aninit long wok king bilong em, em i no ken i stap. Olgeta neiba bilong yu bai i gat wankain laik long mekim ol samting Jehova i laikim. Dispela bai kamapim gutpela sindaun tru—bai i no gat lok long ol dua o ain i banisim ol windo. Bai i no gat wanpela samting bilong bagarapim amamas bilong yumi na pasin bilong bilip tru long narapela!—Aisaia 65:20; Maika 4:4; 2 Pita 3:13.
20, 21. (a) Husat dispela lain “manmeri i daunim nem bilong ol yet” em Song 37:11 i stori long ol? Ol i “sindaun gutpela tumas” long we? (b) Yumi inap kisim wanem ol blesing sapos yumi bihainim pasin bilong dispela Man em Devit i piksa bilong en?
20 Orait nau “ol manmeri i daunim nem bilong ol yet, bai God i givim olgeta graun long ol.” (Song 37:11a) “Ol manmeri i daunim nem bilong ol yet” em ol man i save wet long Jehova long stretim olgeta hevi i bin kamap long ol. “Bai ol i sindaun gutpela tumas na amamas i stap.” (Song 37:11b) Long nau tu yumi sindaun gutpela tumas long paradais bilong spirit insait long kongrigesen Kristen tru.
21 Maski ol hevi i stap yet, yumi save helpim narapela narapela na mekim gut bel bilong ol narapela i gat bel hevi. Dispela i mekim na lain bilong Jehova i stap bel isi. Ol brata i gat wok long mekim wok wasman, long gutpela pasin ol i save helpim yumi long ol samting bilong spirit—na long skin tu—na bai yumi inap sanap strong na karim ol hevi long bihainim stretpela pasin. (1 Tesalonaika 2:7, 11; 1 Pita 5:2, 3) Dispela bel isi em wanpela gutpela samting tru yumi holim! Na tu, yumi ken tingting long kisim laip i stap gut oltaim oltaim long Paradais i gat bel isi long en. Olsem na yumi mas bihainim Krais Jisas em Devit i piksa bilong en, em pasin bilong em long givim bel tru long Jehova i bin kirapim em long mekim wok bilong Jehova i go inap long pinis. (1 Pita 2:21) Sapos yumi mekim olsem, bai yumi stap amamas long litimapim nem bilong dispela man yumi amamas long en, em God bilong yumi, Jehova.
[Futnot]
a Ol Witnes Bilong Jehova i wokim.
Yu Inap Bekim?
• Song 37:1, 2 i bin skulim yu long wanem ol samting?
• Olsem wanem yu ken “amamas” long Jehova?
• Wanem samting i kamapim klia olsem yumi inap bilip tru long Jehova?
[Piksa long pes 9]
Ol Kristen i ‘no save bel nogut long ol man i mekim pasin nogut’
[Piksa long pes 10]
“Bilip tru long God, na mekim gutpela pasin”
[Piksa long pes 11]
Amamas long Jehova na lainim planti samting bilong em
[Piksa long pes 12]
“Ol manmeri i daunim nem bilong ol yet, bai God i givim olgeta graun long ol”