Askim
Olsem wanem Esekiel i kamap “mauspas” long taim ol birua i kam banisim na bagarapim Jerusalem?
Dispela i makim olsem i no gat wanpela tok moa em inap skruim long ol tok profet bilong Jehova em i bin autim pinis.
Profet Esekiel i kirapim wok bilong em olsem wasman bilong lain Israel i kalabus long Babilon long “namba 5 yia bihain long taim ol Babilon i bin i go long Juda na pait na kisim King Jehoiakin long Jerusalem na bringim em i kam long kantri bilong ol,” em long yia 613 B.C.E. (Esekiel 1:2, 3) Long namba 10 de bilong namba 10 mun bilong yia 609 B.C.E., God i toksave long em long ol Babilon i kirap long banisim Jerusalem. (Esekiel 24:1, 2) Wanem samting bai kamap long Jerusalem? Jerusalem na ol manmeri bilong en bai abrusim bagarap? Esekiel i mekim wok olsem wasman, na em i bin givim pinis tok bilong Jehova long bagarap bai kamap, na i no gat wok long em i mas skruim wanpela tok moa antap long dispela. Long samting ol birua i mekim bilong banisim Jerusalem, Esekiel i no mekim wanpela tok moa na i olsem em i kamap mauspas.—Esekiel 24:25-27.
Inap olsem 6-pela mun bihain long Jerusalem i bin bagarap long yia 607 B.C.E., wanpela man i bin ranawe lusim Jerusalem, em i kam long Esekiel long Babilon na em i tokim em, Jerusalem i bagarap pinis. Long apinun paslain long dispela man i kamap long Esekiel, Jehova i “mekim maus bilong [Esekiel] i orait gen na [em] inap long toktok.” (Esekiel 33:22) Dispela i pinisim hap taim bilong Esekiel i stap mauspas.
Olsem wanem? Tru tru Esekiel i bin i stap mauspas long dispela taim? Yumi save olsem em i no bin stap mauspas tru tru, long wanem, insait long dispela hap taim, em i mekim ol tok profet long ol kantri em ol i bin amamas long bagarap i painim Jerusalem. (Esekiel, sapta 25-32) Taim Esekiel i kirap long mekim wok olsem profet na wasman, Jehova i bin tokim em olsem: “Bai mi mekim maus bilong yu i pas, na bai yu no inap tok strong long ol dispela lain man i save sakim tok, bilong ol i mas lusim pasin nogut. Tasol sapos sampela taim mi laik yu autim tok bilong mi long ol manmeri, orait bai mi mekim yu inap long toktok.” (Esekiel 3:26, 27) Taim Jehova i no gat tok bilong givim long lain Israel, Esekiel i mas stap mauspas na no ken givim wanpela tok long dispela lain. Esekiel i mas mekim tasol ol tok Jehova i laik em i mas mekim, na em i mas mekim long taim stret Jehova i makim. Dispela tok olsem Esekiel i stap mauspas i makim olsem em i no ken mekim sampela tok profet long lain Israel.
Lain i stap wasman long nau, em ol Kristen God i bin makim ol long holi spirit, ol i bin givim tok lukaut long bagarap bai painim lain Kristendom, em Jerusalem i piksa bilong en. Taim “bikpela hevi tru” i kirap na bagarapim “Bikpela taun Babilon,” em olgeta lotu giaman, ol Kristen God i bin makim na Esekiel i piksa bilong ol, ol bai i no gat wok moa long stori long pinis bilong Kristendom, em wanpela bikpela hap bilong Bikpela Babilon.—Matyu 24:21; KTH 17:1, 2, 5.
Yes, wanpela taim bai kamap na lain remnan God i bin makim na ol poroman bilong ol bai kamap mauspas—ol bai i no gat wanpela tok moa bilong givim long lain Kristendom. Dispela samting bai kamap taim “dispela 10-pela kom” na “wel animal” i bagarapim tru Bikpela taun Babilon. (KTH 17:16) Tasol dispela i no makim olsem tru tru ol Kristen bai stap mauspas, nogat. Olsem ol i mekim long nau, ol bai litimapim nem bilong Jehova na tokaut long biknem bilong em long olgeta de na “olgeta lain i kamap bihain bai ol i tingim [em] oltaim.”—Song 45:17; 145:2.