Laip Stori
‘Bai Mi Givim Wanem Samting Long Bikpela?’
STORI BILONG MARIA KERASINIS
Taim mi gat 18 krismas, mi givim bikpela sem long papamama, na famili bilong mi i givim baksait long mi na mi kamap olsem samting ol lain long ples i lap long en. Ol i krai, ol i subim mi, na pretim mi long mi mas lusim God—tasol mi no mekim olsem. Mi bilip tru olsem mi bai kisim ol gutpela samting bilong spirit sapos mi stap gut long bihainim ol tok i tru bilong Baibel. Taim mi tingting i go bek long dispela 50 yia mi mekim wok bilong Jehova, mi wanbel tru long tok bilong man bilong raitim song, em i tok: ‘Bai mi givim wanem samting long Bikpela?’—Song 116:12.
MAMA i karim mi long 1930, long Aggelokastro, em wanpela ples i stap 20 kilomita longwe long pasis bilong Cenchreae, long hap is bilong Korin. Long taim bilong ol aposel, ol i bin kirapim wanpela kongrigesen bilong ol Kristen tru long dispela hap.—Aposel 18:18; Rom 16:1.
Famili bilong mi i stap bel isi wantaim. Papa em i lida bilong komiuniti na olgeta man i save rispektim em. Mi namba 3 bilong 5-pela pikinini. Papamama i mekim bikpela long mipela insait long Misin Otodoks. Mi save go long Misa long olgeta Sande. Mi save brukim skru long ol imis na mekim ol beten bilong makim olsem mi sori long ol rong mi mekim, laitim ol kandel long ol haus lotu, na bihainim gut ol hap taim bilong tambu long kaikai. Planti taim mi save tingting long kamap wanpela sister bilong misin. Bihain, mi kamap namba wan long famili i mekim papamama i bel hevi.
Amamas Long Tok i Tru Bilong Baibel
Taim mi gat 18 krismas samting, mi harim olsem Katina, em susa bilong tambu man bilong mi—em i save stap long wanpela ples klostu—em i wok long ritim ol buk na nius bilong ol Witnes Bilong Jehova, na em i no save go moa long lotu. Dispela i mekim na mi tingting planti, na mi tingting long helpim em long kam bek gen long rot mi ting i stret. Olsem na taim em i kam lukim mipela, mi stretim rot bilong mitupela i ken go raun, na mi tingting long mitupela bai go long haus bilong pris. Pris i kirap mekim ol tok bilas bilong bagarapim nem bilong ol Witnes Bilong Jehova, na em i tok ol i lusim bilip bilong misin na ol i paulim Katina. Inap tripela nait olgeta tupela i toktok. Katina i redi gut na em i kamapim ol tok bilong Baibel i soim olsem ol tok bilong pris i no stret. Orait nau pris i tokim em olsem em i naispela meri, na em i gat save, olsem na em i mas amamas taim em i stap yangpela yet, na bihain taim em i lapun orait em i ken tingting long God.
Mi no tokim papamama long dispela samting i bin kamap, tasol long Sande bilong wik antap, mi no go long lotu. Long belo, pris i kam long stua bilong mipela. Mi givim eskius olsem mi stap long stua bilong helpim papa.
Pris i askim mi, “Dispela em i as tru na yu stap, o dispela yangpela meri i givim tingting long yu long mekim olsem?”
Mi bekim tok bilong em stret olsem, “Ol dispela lain i gat ol gutpela bilip winim bilong yumi.”
Pris i tokim papa olsem: “Mista Economos, yu mas rausim kwik Katina long haus bilong yu, em i bagarapim famili bilong yu.”
Famili i Birua Long Mi
Dispela samting i kamap long 1948 samting, taim bikpela pait i wok long kamap insait long kantri Grik. Papa i pret long ol paitman i kisim mi, olsem na em i stretim rot bilong mi long i go stap wantaim bikpela susa bilong mi long ples em Katina i stap long en. Insait long tupela mun mi stap long hap, mi kisim save long tok bilong Baibel long planti samting. Mi bel hevi long lukim olsem Baibel i no as bilong planti bilip bilong Misin Otodoks. Mi kisim save olsem God i no laikim pasin bilong lotuim em long rot bilong ol imis, na ol Kristen i no as bilong sampela pasin bilong lotu, olsem lotuim kruse. Mi kisim save tu olsem bilong amamasim God, man i mas lotuim em “long strong bilong Holi Spirit na long pasin i tru.” (Jon 4:23; Kisim Bek 20:4, 5) Nambawan bikpela samting, mi kisim save olsem Baibel i tok yumi inap i stap laip oltaim long graun! Ol dispela gutpela tok i tru bilong Baibel ol i sampela bilong ol samting mi kisim long Jehova.
Susa bilong mi na man bilong em i luksave olsem mi no save mekim mak bilong kruse long taim bilong kaikai, na tu, mi no save beten long ol imis. Long wanpela nait tupela i paitim mi. Long de bihain mi lusim haus bilong tupela na mi go long haus bilong anti bilong mi. Tambu man bilong mi i toksave long papa. Na i no longtaim bihain papa i kam na em i krai na traim long senisim tingting bilong mi. Tambu man bilong mi i brukim skru long fran bilong mi na askim mi long lusim rong bilong em, na mi mekim olsem. Bilong stretim dispela hevi, ol i askim mi long go bek long lotu, tasol mi sanap strong na mi no mekim olsem.
Taim mi go bek long ples bilong papa, ol i wok yet long birua long mi. Mi no gat rot long toktok wantaim Katina, na mi no gat Baibel na ol buk na nius. Mi amamas tru taim wanpela kasen bilong mi i helpim mi. Taim em i go long Korin, em i painim wanpela Witnes na em i kisim buk “Let God Be True” na wanpela kopi bilong buk Ol Skripsa Grik i kam long mi, na mi hait na ritim.
Senis i Kamap Long i Stap Bilong Mi
Ol i mekim nogut long mi inap 3-pela yia. Mi no bung wantaim wanpela Witnes na mi no inap kisim ol buk na nius. Tasol mi no save olsem sampela bikpela senis i laik kamap long sindaun bilong mi.
Papa i tokim mi olsem mi mas i go long ankol bilong mi long Tesalonaika. Paslain long mi go long Tesalonaika, mi go long wanpela stua bilong samapim ol klos long Korin bambai ol i ken wokim wanpela saket bilong mi. Mi kirap nogut tru taim mi painimaut olsem Katina i wok long dispela stua! Mipela i amamas stret long bung gen bihain long longpela taim mipela i no bin lukim narapela narapela. Taim mitupela i lusim stua, mipela i bungim wanpela yangpela man em i pinis long wok na em i raun long baiskol bilong i go long haus. Nem bilong em Charalambos. Bihain long taim mitupela Charalambos i kisim save gut long narapela narapela, mitupela i pasim tok long marit. Long dispela taim tu, long Janueri 9, 1952, mi kamapim klia dediket bilong mi long Jehova taim mi kisim baptais.
Charalambos i bin baptais paslain. Famili bilong em tu i bin birua long em. Charalambos em i man bilong givim bel tru. Em i mekim wok olsem helpim bilong wasman bilong kongrigesen na em i mekim planti Baibel-stadi. I no longtaim bihain, ol bikpela brata bilong em i kisim tok i tru, na nau klostu olgeta long famili bilong ol brata bilong em, ol i lotuim Jehova.
Papa bilong mi i laikim tru Charalambos, olsem na em i tok orait long mitupela i marit, tasol i hatwok long kirapim mama long orait long mi marit. Maski i gat ol dispela hevi, mitupela Charalambos i marit long Mas 29, 1952. Bikpela brata bilong mi na wanpela kasen brata bilong mi, tupela tasol i kam long marit bilong mi. Long dispela taim, mi no save olsem Charalambos bai kamap gutpela blesing tru—wanpela gutpela presen tru i kam long Jehova! Olsem poroman bilong em, mi inap putim wok bilong Jehova olsem namba wan samting long i stap bilong mi.
Strongim Ol Brata
Long 1953, mitupela i go sindaun long Atens. Charalambos i laik mekim bikpela wok moa bilong autim tok, olsem na em i lusim wok bisnis bilong famili bilong em na em i mekim wok haptaim. Long ol apinun, mitupela i save autim tok wantaim na mipela i mekim planti Baibel-stadi.
I gat sampela tambu long wok bilong mipela long autim tok, olsem na mipela i mas tingim gut kain kain rot bilong autim tok. Olsem: Mipela i putim wanpela nius Wastaua long windo bilong wanpela liklik stua bilong salim niuspepa samting long namel bilong Atens, em dispela stua man bilong mi i mekim wok haptaim long en. Wanpela ofisa bilong polis i tokim mipela olsem i gat tambu long nius Wastaua. Tasol em i askim mipela sapos em inap kisim wanpela nius i go long wanpela lain bilong gavman bilong painimaut sapos i gat tambu long en. Taim ol i tokim em olsem i no gat tambu long dispela nius, em i kam bek na toksave long mipela. Taim ol narapela brata i gat ol liklik stua ol i harim dispela tok, ol tu i kirap putim ol Wastaua long ol windo long stua bilong ol. Wanpela man i kisim Wastaua long stua bilong mipela, na em i kamap wanpela Witnes, na nau em i mekim wok elda.
Mipela i amamas tu long lukim liklik brata bilong mi i kisim save long tok i tru. Em i bin kam long Atens long skul long wanpela koles bilong kamap boskru bilong sip, na mipela i kisim em i go long wanpela kibung. Mipela i save mekim hait ol kibung long bus. Em i laikim ol tok em i harim, tasol i no longtaim bihain em i kirap wok long sip. Long wanpela raun bilong em, em i sua long pasis bilong Ajentina. Long dispela hap, wanpela misineri i kalap long sip bilong autim tok, na brata bilong mi i askim em long ol magasin bilong mipela. Mipela i amamas tru taim mipela i kisim pas bilong em i gat tok olsem: “Mi painim pinis tok i tru. Plis stretim rot bilong mi long kisim sabskripsen bilong ol nius.” Long nau, em wantaim famili bilong em i stap gut long mekim wok bilong Jehova.
Long 1958 ol i singautim man bilong mi long mekim wok wasman sekit. I gat tambu long wok bilong mipela na em taim nogut tu, olsem na ol wasman sekit i no save kisim meri bilong ol i go wantaim ol taim ol i raun mekim wok bilong ol. Long Oktoba 1959, mipela i askim ol brata long brens-ofis sapos mi inap go wantaim man bilong mi. Ol i orait long dispela. Mipela i mas i go lukim na strongim ol kongrigesen long sentral na noten Grik.
I hatwok long raun long ol dispela hap. Planti rot i no gat kolta. Mipela i no gat ka, olsem na mipela i save raun long ol PMV o ol trak i gat ol kakaruk na ol narapela samting bilong salim i stap long en. Mitupela i save pasim su gumi bambai mitupela inap wokabaut long ol rot i gat graun malumalum. Long olgeta ples i gat ol paitman i stap, olsem na bilong go insait long ol dispela ples, mitupela i mas i go long nait bambai ol i no ken givim kain kain askim long mipela.
Ol brata long ol dispela hap i save amamas tru taim mipela i go lukim ol. Maski planti bilong ol i wok hat long ol gaden bilong ol, ol i save wok strong long go long ol miting i kamap long nait long ol narapela narapela haus. Ol brata i save mekim gut long mipela inap tru long mak bilong ol, maski ol i no gat planti samting. Sampela taim mipela i slip wantaim famili olgeta long wanpela rum. Bilip bilong ol brata, na pasin bilong ol long sanap strong na karim hevi, na givim bel long mekim wok, dispela tu i gutpela samting tru i helpim mipela.
Mekim Bikpela Wok Moa
Long Februeri 1961, taim mipela i go raun lukim brens-ofis long Atens, ol i askim mipela sapos mipela bai orait long mekim wok long Betel. Mipela i mekim tok bilong Aisaia: “Mi stap! Salim mi.” (Aisaia 6:8, NW ) Tupela mun bihain, mipela i kisim wanpela pas i singautim mipela long go hariap long Betel. Olsem na long Me 27, 1961, mipela i kirap mekim wok long Betel.
Mipela i laikim tru nupela wok bilong mipela, na kwiktaim mipela i lain long en. Man bilong mi i wok long Dipatmen Bilong Wok Autim Tok na bilong wokim ol sabskripsen, na bihain em i wok inap liklik taim long Komiti Bilong Brens. Na mi mekim ol narapela narapela wok long Betel. Long dispela taim i gat 18 brata sista long famili Betel, tasol klostu 5-pela yia olgeta, inap 40 manmeri i stap long Betel, long wanem, ol i mekim skul bilong ol elda long Betel. Long moning, mi save wasim ol plet kap, na helpim man bilong kuk, stretim 12-pela bet, na putim ol samting bilong lans long tebol. Long apinun, mi save ainim ol klos na klinim toilet na ol rum. Na tu, wanpela taim long olgeta wik mi save wok long ples bilong wasim ol klos. I gat planti wok, tasol mi amamas olsem mi inap helpim long mekim ol dispela wok.
Mipela i bisi tru long mekim wok bilong mipela long Betel na wok bilong autim tok. Planti taim mipela i mekim inap 7-pela Baibel-stadi. Long wiken, mi save go wantaim Charalambos taim em i go mekim ol tok long ol narapela narapela kongrigesen. Mipela i stap wantaim long olgeta taim.
Mipela i mekim Baibel-stadi wantaim tupela marit, em ol i insait tru long Misin Otodoks na ol i gutpela pren bilong wanpela pris husat i save painim ol man i sakim bilip bilong lotu. Long haus bilong tupela, i gat wanpela rum i pulap tru long ol imis, na ol i save kukim paura bilong kamapim smok smel na pilaim ol singsing bilong lotu long de olgeta. Inap longpela taim liklik, mipela i save go lukim tupela long ol Fonde bilong stadi wantaim tupela long Baibel, na dispela pris em pren bilong tupela, em i save go lukim tupela long ol Fraide. Wanpela taim tupela i singautim mipela long mipela i mas go long haus bilong ol, long wanem, ol i laik soim mipela long wanpela samting. Namba wan samting ol i soim mipela em dispela rum. Tupela i rausim pinis olgeta imis na stretim gen dispela rum. Dispela tupela marit i wok long kamap strong na ol i kisim baptais. Mipela i amamas long lukim inap olsem 50 manmeri olgeta em mitupela i stadi wantaim ol, ol i dediket long Jehova na kisim baptais.
Mi amamas tru long wok wantaim ol brata em God i bin makim ol long spirit holi. Taim ol memba bilong Gavening Bodi, kain olsem Brata Knorr, Brata Franz, na Brata Henschel i kam lukim mipela, dispela i bin strongim mi tru. Mi mekim wok long Betel winim 40 yia pinis, na mi pilim yet olsem dispela wok i wanpela gutpela wok tru mi inap mekim.
Karim Hevi Bilong Sik na Indai
Long 1982 mi luksave olsem sik alsaima i wok long kisim man bilong mi. Long 1990 skin bilong em i go nogut, na mi mas lukautim em long olgeta taim. Long laspela etpela yia bilong em i stap laip, mipela i no inap lusim Betel liklik, nogat tru. Planti gutpela brata long Betel i stretim rot bilong helpim mipela. Maski ol i helpim mipela, mi mas lusim planti aua long lukautim em long san na nait. Sampela taim i hatwok tru, na planti taim mi no slip gut.
Long Julai 1998 gutpela man bilong mi i dai. Tru, mi wari tru long em i no stap moa, tasol bel bilong mi i stap isi, long wanem, mi save olsem em i stap long han bilong Jehova, na Em bai tingim em na kirapim em bek wantaim planti narapela milion manmeri.—Jon 5:28, 29.
Mi Amamas Long Ol Samting Jehova i Givim Mi
Tru man bilong mi i dai pinis, tasol mi no stap wanpis. Mi mekim wok yet long Betel, na mi amamas long famili Betel i laikim mi na ol i save tingim na lukautim mi. Mi gat bikpela famili, na tu mi gat ol brata na sista bilong spirit long olgeta hap bilong Grik. Maski mi winim pinis 70 krismas, mi inap yet long mekim wok long haus kuk na rum kaikai long de olgeta.
Long 1999, samting mi bin gat bikpela laik long en i kamap tru taim mi go raun lukim hetkota bilong ol Witnes Bilong Jehova long New York. Mi kisim bikpela amamas tru. Em wanpela samting i strongim mi tru na mi no inap lusim tingting long en.
Taim mi tingting i go bek, mi bilip tru olsem mi bin mekim gutpela wok tru long laip bilong mi. Nambawan gutpela wok tru man inap mekim em long mekim wok bilong Jehova fultaim. Mi ken tok stret olsem mi no bin sot liklik long wanpela samting. Jehova i bin lukautim gut mi na man bilong mi long ol samting bilong spirit na ol samting bilong skin. Ol samting i bin painim mi i helpim mi long save long as na man bilong raitim song i kamapim dispela askim: ‘Bai mi givim wanem samting long Bikpela?’—Buk Song 116:12.
[Piksa long pes 26]
Mi na Charalambos i pas gut wantaim
[Piksa long pes 27]
Man bilong mi long ofis bilong em long brens
[Piksa long pes 28]
Mi pilim olsem wok bilong Betel em i wanpela gutpela wok tru