Askim

Yu ting tok Jisas i mekim long bikpela beten bilong em i makim olsem God i wok long mekim laik bilong em i kamap long heven maski ol ensel nogut i no raus yet long heven?

Long Matyu 6:​10, Jisas i tok: “Mipela i mas bihainim laik bilong yu long graun olsem ol i save bihainim long heven.” Yumi inap kisim tupela narapela narapela tingting long mining bilong dispela tok. Namba wan, yumi askim God long kamapim laik bilong em long dispela graun olsem i save kamap long heven, na namba tu, yumi askim God long kamapim laik olgeta bilong em long heven na graun.a Insait bilong tok Jisas i mekim paslain, “kingdom bilong yu i mas i kam,” i soim olsem namba tu mining i stret wantaim ol tok bilong Baibel. Na tu dispela i makim stret samting i kamap long taim Jisas i stap long graun na ol samting i kamap planti yia bihain. Bilong wanem i olsem?

Buk Kamapim Tok Hait i stori long tupela samting i bin kamap taim Kingdom Bilong God i kamap long heven. Namba wan samting i kamap long heven yet, na namba tu i kamap long graun. Kamapim Tok Hait 12:​7-9, 12, i tok: “Orait nau bikpela pait i kirap long heven. Maikel wantaim ol ensel bilong en ol i pait long dispela traipela snek. Na snek wantaim ol ensel bilong en ol i bekim pait long ol, tasol ol i no gat strong bilong winim pait. Olsem na ol i no inap i stap moa long heven, na ol ensel bilong God i tromoi dispela snek i go daun. Em dispela snek bilong bipo yet, na ol i kolim em Satan na ‘Man I Save Kotim Olgeta Manmeri.’ Em i man bilong giamanim olgeta manmeri bilong graun. Ol i tromoi em i go daun long graun, na ol i tromoi ol ensel bilong en i go daun wantaim em. Olsem na yu heven, na yupela olgeta lain i stap long heven, yupela i ken amamas. Tasol yu graun, na yu solwara, yupela lukaut. Bikpela hevi i laik kamap long yupela. Satan i go daun pinis long yupela, na em i belhat nogut tru. Em i save, em i gat sotpela taim tasol bilong i stap.”

Heven i kamap gutpela taim ol i rausim Satan wantaim ol spirit nogut long heven long 1914, dispela i bringim bikpela amamas long olgeta gutpela ensel bilong Jehova, em namba bilong ol i winim tru namba bilong ol spirit nogut. (Jop 1:​6-​12; 2:​1-7; KTH 12:10) Olsem na tok Jisas i mekim long beten bilong em long laik bilong God i kamap long heven i bin kamap tru. Olgeta ensel i stap long heven ol i stap gut long Jehova na daun tru long wok bos bilong em.

Paslain long God i rausim ol long heven, ol ensel nogut i save go i kam long heven, tasol ol i no stap insait moa long famili bilong God na i gat ol strongpela tambu God i bin putim long ol. Olsem: Jut 6 i kamapim olsem long taim bilong ol aposel, ol dispela ensel i kalabus ‘long ol sen i save stap oltaim oltaim, na God i kalabusim ol i stap long dispela ples i tudak nogut tru [bilong spirit]. Ol i wetim De bilong bikpela kot bilong God.’ Namba Tu Pita 2:4 i tok moa: “Bipo sampela ensel i bin mekim sin, na God i no larim ol. Nogat. Em i kalabusim ol i stap long hel [“Tartarus,” NW, wanpela kain kalabus bilong tudak], long dispela hul i tudak nogut tru [bilong spirit]. Na ol i kalabus i stap yet na wetim De bilong bikpela kot bilong God.”b

Ol i gat nem olsem ol ensel i no stap insait moa long lain bilong God taim ol i bin stap long heven, tasol ol i gat strong long bosim ol man long graun. Baibel i tok Satan em “hetman i save bosim dispela graun” na i tok ol spirit nogut em ol lain “i save bosim graun long dispela taim bilong tudak.” (Jon 12:31; Efesus 6:​11, 12; 1 Jon 5:​19) Satan i gat namba long bosim graun olsem na em inap givim “olgeta strongpela kantri bilong dispela graun wantaim ol gutpela samting bilong ol” long Jisas sapos Jisas i lotuim em. (Matyu 4:​8, 9) Taim Kingdom Bilong God i “kam” long graun, em bai kamapim ol bikpela senis.

Hia long graun, taim Kingdom Bilong God i “kam” em bai kamapim wanpela nupela pasin tru. Kingdom bai bagarapim olgeta gavman bilong ol man na em wanpela tasol bai stap gavman bilong graun. Long wankain taim, ol manmeri i save pret long God bai stap olsem “nupela graun” na ol bai stap aninit long dispela gavman. (2 Pita 3:​13; Daniel 2:​44) Kingdom bai pinisim sin bilong olgeta manmeri i bihainim tok bilong God na em bai mekim olgeta hap bilong graun i kamap wanpela paradais, na long dispela rot em i rausim na pinisim olgeta samting i makim wok bos bilong Satan.​​—⁠Rom 8:​20, 21; KTH 19:⁠17-​21.

Long pinis bilong dispela Wan Tausen Yia, taim Kingdom Bilong Mesaia i kamapim pinis laik bilong God, “Pikinini Bilong God bai i putim em yet aninit long God. Pastaim God i bin putim olgeta samting aninit long Pikinini bilong en, tasol taim Pikinini Bilong God i putim em yet aninit long God, orait God bai i stap het tru bilong olgeta samting.” (1 Korin 15:28) Na bai i gat laspela traim, na bihain long en Satan na ol ensel nogut bilong em na ol man em Satan na ol ensel nogut i giamanim ol na ol i bikhet, ol bai bagarap olgeta long “namba 2 dai.” (KTH 20:​7-​15) Bihain long en, olgeta lain long heven na long graun em ol samting God i wokim bai amamas long i stap aninit long nambawan gutpela wok bos bilong Jehova. Dispela bai truim olgeta samting i insait long beten bilong Jisas.​​—⁠1 Jon 4:​8.

[Ol Futnot]