Olgeta i Mas Tokaut Long Biknem Bilong Jehova
‘Yupela i mas amamas long biknem na strong bilong Bikpela. Em i namba wan, olsem na yupela i mas litimapim biknem bilong em.’— SONG 96:7, 8.
1, 2. Wanem ol samting i save givim biknem long Jehova? Husat tu i mas mekim dispela samting?
DEVIT, pikinini bilong Jesi, i go bikpela olsem man bilong lukautim ol sipsip klostu long Betlehem. Ating planti taim long nait em i bin lukluk i go antap long skai i pulap long ol sta taim em i lukautim ol sipsip bilong papa bilong em long hap ol sipsip i save kaikai gras long en! Em i mas tingim ol dispela samting taim holi spirit bilong God i kirapim em long raitim na singim ol gutpela tok i stap long Song 19: “Skai i soim yumi olsem God em i nambawan tru. Olgeta samting bilong antap i soim yumi gutpela wok bilong em. Tasol tulait na tudak i skulim ol manmeri long olgeta hap bilong graun. Na tok bilong tupela i go inap long olgeta ples.”—Song 19:1, 4.
2 Ol nambawan gutpela samting Jehova i bin wokim ol i no gat maus na ol i no inap toktok, tasol ol i tokaut long biknem bilong em long olgeta de na olgeta nait. Ol samting God i bin wokim i save tokaut oltaim long biknem bilong Em, na taim yumi tingim pasin bilong ol long tokaut long biknem bilong God “long olgeta hap bilong graun” na bai ol man i ken lukim, dispela i kirapim yumi long daunim yumi yet. Tasol dispela tokaut em ol samting God i bin wokim i save mekim, dispela i no inap. Ol man i stap gut long God, ol tu i mas bungim nek na tokaut long biknem bilong Em. Wanpela man bilong raitim song, em yumi no save long nem bilong em, holi spirit i kirapim em long mekim dispela tok long ol man i lotuim God na stap gut long em: “Yupela i mas amamas long biknem na strong bilong en. Bikpela em i namba wan, olsem na yupela i mas litimapim biknem bilong en.” (Song 96:7, 8) Ol man i pas gut wantaim Jehova ol i amamas long bihainim dispela tok. Tasol wanem ol samting i insait long wok bilong givim biknem long God?
3. Bilong wanem ol man i save givim biknem long God?
3 Bilong givim biknem long God, pasin bilong toktok tasol i no inap. Lain Israel long taim bilong Aisaia i givim biknem long God long maus bilong ol, tasol planti bilong ol i no pilim tru long bel ol tok ol i mekim. Jehova i tok long rot bilong Aisaia: “Ol dispela lain manmeri ol i save litimapim nem bilong mi long maus bilong ol, tasol bel na tingting bilong ol i stap longwe tru long mi.” (Aisaia 29:13) Ol tok dispela kain man i mekim bilong givim biknem long God i no gat as bilong en. Ol tok bilong litimapim Jehova i mas kam long bel em pasin bilong laikim Jehova i pulap long en na man i mas pilim tru olsem i no gat narapela i gat kain biknem olsem Jehova. Jehova tasol em i Man Bilong Wokim olgeta samting. Em i God i Gat Olgeta Strong, Man i Gat Stretpela Pasin, na i win tru long pasin bilong laikim tru narapela. Em i Man Bilong Kisim Bek yumi na King tru em olgeta man long heven na graun i mas aninit long em. (KTH 4:11; 19:1) Sapos yumi bilip tru long ol dispela samting, orait yumi mas givim biknem long em long bel olgeta.
4. Jisas i tokim yumi long mekim wanem bilong givim biknem long God? Olsem wanem yumi ken bihainim dispela tok?
4 Jisas Krais i tokim yumi long rot bilong givim biknem long God. Em i tok: “Yupela i mas karim planti kaikai na i stap disaipel bilong mi, na long dispela pasin Papa bilong mi i kisim biknem.” (Jon 15:8) Olsem wanem yumi karim planti kaikai? Namba wan samting, yumi mas givim bel tru long autim “gutnius bilong kingdom” na long dispela rot yumi bung wantaim ol samting God i bin wokim long tokaut long ol “pasin bilong God i stap hait.” (Matyu 24:14; Rom 1:20) Na long dispela rot yumi olgeta i insait long wok bilong kamapim ol nupela disaipel em ol i mekim lain bilong litimapim nem bilong God Jehova i go bikpela. Namba tu, yumi kisim ol pasin holi spirit i save kamapim na wok strong long bihainim ol gutpela pasin bilong God Jehova. (Galesia 5:22, 23; Efesus 5:1; Kolosi 3:10) Sapos yumi mekim olsem, pasin bilong yumi long olgeta de bai givim biknem long God.
“Long Olgeta Hap Bilong Graun”
5. Stori long olsem wanem Pol i kamapim klia wok ol Kristen i mas mekim bilong givim biknem long God long rot bilong autim bilip bilong ol long ol narapela.
5 Long pas Pol i raitim long ol Rom em i kamapim klia wok ol Kristen i mas mekim bilong givim biknem long God long rot bilong autim bilip bilong ol long ol narapela. Bikpela tok bilong Buk Rom em olsem: God bai kisim bek ol man husat i bilip long Jisas Krais. Long sapta 10 bilong dispela pas, Pol i soim olsem ol Juda long taim bilong em ol i traim long kamap stretpela manmeri long ai bilong God long rot bilong bihainim Lo Bilong Moses, tasol “Krais em inapim pinis lo bilong Moses.” Olsem na Pol i tok: “Sapos yu tokaut klia long Jisas em i Bikpela, na sapos long bel bilong yu yu bilip long God i bin kirapim bek em long matmat, orait bai God i kisim bek yu.” Kirap long dispela taim, “ol Juda na Grik i wankain tasol. Bikpela wanpela tasol em i Bikpela bilong yumi olgeta. Na em i save mekim gut tru long olgeta manmeri i singaut long em na askim em long helpim ol. Olsem na ‘olgeta manmeri i askim Bikpela [“Jehova,” NW ] long helpim ol, em bai i kisim bek ol.’ ”—Rom 10:4, 9-13.
6. Pol i tok Song 19:4 i tok long wanem samting?
6 Orait nau Pol i askim olsem: “Sapos ol i no bilip long em, olsem wanem bai ol i askim em long helpim ol? Na sapos ol i no harim tok long em, olsem wanem bai ol i bilip long em? Na sapos i no gat wanpela i autim tok long ol, olsem wanem bai ol i harim?” (Rom 10:14) Pol i tok long pasin bilong lain Israel: “I no olgeta manmeri i kisim gutnius.” Bilong wanem ol Israel i no bihainim gutnius? Long wanem, ol i no bilip, i no olsem ol i no gat rot long bihainim gutnius. Pol i kolim tok bilong Song 19:4 bilong kamapim klia dispela samting, na em i tok dispela ves i tok long wok bilong ol Kristen long autim tok, na i no tok long ol samting God i bin wokim i givim biknem long em. Em i tok: “Yumi save, ‘Ol manmeri long olgeta hap bilong graun i harim pinis nek bilong ol. Na tok bilong ol i go inap long olgeta ples.’ ” (Rom 10:16, 18) Yes, olsem ol samting God i bin wokim i givim biknem long Jehova, ol Kristen long taim bilong ol aposel i autim gutnius long God bai kisim bek ol man na long dispela rot ol i litimapim nem bilong God “long olgeta hap.” Long pas Pol i raitim long ol Kolosi, em i tok tu long wok bilong autim gutnius i go bikpela olsem wanem. Em i tok ol i bin autim gutnius “long olgeta manmeri i stap long graun.”—Kolosi 1:23.
Ol i Givim Bel Long Autim Tok
7. Jisas i tok ol Kristen i gat wanem wok bilong mekim?
7 Ating Pol i raitim pas bilong em long ol Kolosi inap 27 yia bihain long i dai bilong Jisas Krais. Olsem wanem wok autim tok inap i go longwe olsem long Kolosi insait long sotpela haptaim tasol? Dispela samting i kamap, long wanem, ol Kristen bilong bipo ol i givim bel long autim tok na Jehova i blesim ol. Jisas i bin tok profet olsem ol disaipel bilong em bai mekim wok autim tok. Em i tok: “Olgeta lain man i mas harim man i autim gutnius pastaim.” (Mak 13:10) Jisas i mekim sampela tok moa long dispela tok profet long ol laspela ves bilong Gutnius Matyu i raitim: “Yupela i mas i go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit. Na yupela lainim ol long bihainim olgeta tok mi bin givim long yupela. Harim. Mi save stap wantaim yupela olgeta de, i go inap long dispela taim i pinis.” (Matyu 28:19, 20) Bihain liklik long Jisas i go long heven, ol disaipel bilong em i kirap truim ol dispela tok.
8, 9. Olsem Buk Aposel i kamapim, ol Kristen i bin mekim wanem taim Jisas i tokim ol long mekim ol samting?
8 Bihain long holi spirit i kam daun long Pentikos 33 C.E. long ol disaipel i stap gut long Jisas, namba wan samting ol i mekim em ol i go autim tok, ol i tokim ol manmeri long Jerusalem long “ol strongpela wok bilong God.” Ol i mekim gut wok bilong ol long autim tok, na “samting olsem 3,000 manmeri” i kisim baptais. Ol disaipel i givim bel long mekim yet wok bilong litimapim nem bilong God long ol man, na ol gutpela samting i kamap.—Aposel 2:4, 11, 41, 46, 47.
9 I no longtaim na ol bikman bilong lotu i harim stori long ol samting ol dispela Kristen i mekim. Ol i no amamas long pasin bilong Pita na Jon long tokaut strong na i no pret, na ol i tokim tupela long ol i no ken autim tok moa. Ol aposel i tok: “Mitupela i mas autim tok long olgeta samting mitupela i bin lukim na harim.” Ol bikman i pretim ol na bihain ol i larim ol i go, na Pita na Jon i go bek long ol brata na olgeta i beten wantaim long Jehova. Ol i gat strongpela bel na ol i askim Jehova olsem: “Yu mas helpim mipela . . . na bai mipela i ken strong tru long autim tok bilong yu, na mipela i no ken pret.”—Aposel 4:13, 20, 29.
10. Wanem kain pasin birua i kamap? Ol Kristen tru i bin mekim wanem?
10 Dispela beten i stret wantaim laik bilong Jehova, olsem i kamap ples klia long bihain liklik. Ol i putim ol aposel long kalabus na bihain long rot bilong mirakel wanpela ensel i helpim ol long lusim kalabus. Ensel i tokim ol: “Yupela go sanap insait long banis bilong tempel na autim tok long ol manmeri long olgeta pasin bilong dispela nupela laip.” (Aposel 5:18-20) Ol aposel i harim tok, na long dispela as Jehova i wok yet long blesim ol. Olsem na “long olgeta de, ol i save go long tempel na long ol haus bilong ol manmeri, na ol i wok long skulim ol manmeri. Ol i no lusim wok bilong autim gutnius. Nogat. Ol i tokaut klia olsem, Jisas em i dispela man God i bin promis long salim i kam bilong kisim bek ol manmeri bilong en.” (Aposel 5:42) Tru tumas, maski ol i wok strong long stopim ol disaipel bilong Jisas long givim biknem long God, ol i no inap.
11. Ol Kristen bilong bipo i gat wanem tingting long wok autim tok?
11 Bihain liklik ol i holim Stiven na tromoi ston long em na kilim em i dai. Dispela i kirapim bikpela pasin birua long Jerusalem, na olgeta disaipel i mas ranawe i go nabaut, tasol ol aposel i stap yet long Jerusalem. Yu ting pasin birua i mekim na ol i bel hevi? Nogat tru. Baibel i tok: “Ol dispela manmeri i bin ranawe i go nabaut long olgeta hap, ol i autim gutnius long ol ples ol i stap long en.” (Aposel 8:1, 4) Pasin bilong ol long givim bel long givim biknem long God i kamap ples klia planti taim. Long Aposel sapta 9, yumi ritim stori bilong Farisi Sol bilong Tarsus. Em i wokabaut i go long Damaskus bilong kirapim pasin bilong birua long ol disaipel bilong Jisas long dispela hap, na long dispela taim em i lukim Jisas long wanpela samting olsem driman na em i kamap aipas. Long Damaskus, Ananaias i oraitim Sol long rot bilong mirakel na em inap lukluk gen. Wanem namba wan samting Sol—bihain em i kisim nem aposel Pol—i mekim? Baibel i tok: “Em i go stret long ol haus lotu bilong ol Juda, na em i autim tok olsem, ‘Jisas em i Pikinini Bilong God.’ ”—Aposel 9:20.
Olgeta i Insait Long Wok Autim Tok
12, 13. (a) Olsem ol saveman i tok, wanem samting i makim tru kongrigesen Kristen bilong bipo? (b) Olsem wanem stori bilong Buk Aposel na tok bilong Pol i wankain olsem tok bilong ol saveman?
12 Planti man i save olsem olgeta man bilong kongrigesen Kristen bilong pastaim ol i insait long wok autim tok. Philip Schaff i tok long ol Kristen bilong dispela taim olsem: “Wok bilong olgeta kongrigesen em wok bilong autim tok, na olgeta bilipman Kristen i wanpela misineri.” (History of the Christian Church) W. S. Williams i tok: “Planti man i tok olsem olgeta Kristen bilong Kongrigesen bilong pastaim, na moa yet ol man i gat presen bilong toktok gut [presen bilong holi spirit], ol i autim gutnius.” (The Glorious Ministry of the Laity) Em i tok moa olsem: “Jisas Krais i no bin tok wok autim tok em wok bilong ol man i gat namba insait long kongrigesen.” Wanpela birua bilong lotu Kristen long bipo, em Celsus, em tu i tok: “Ol man bilong wokim laplap samting long gras bilong sipsip, ol man bilong wokim su, ol man bilong putim kala long skin bilong bulmakau, na ol man nating i no save rit rait, ol i givim bel long autim gutnius.”
13 Ol tok i stap long Buk Aposel i kamapim klia olsem ol dispela tok em i tru. Long Pentikos 33 C.E., bihain long God i kapsaitim holi spirit, olgeta disaipel, ol man na ol meri, ol i autim tok long ol strongpela wok bilong God. Taim pasin birua i kamap bihain long ol i kilim i dai Stiven, olgeta Kristen husat i bin ranawe nabaut ol i autim gutnius long planti hap. Inap 28 yia bihain, Pol i raitim pas long olgeta Kristen Hibru, em i no rait long wanpela liklik lain pris tasol taim em i tok: “Oltaim yumi mas givim biknem long God long nem bilong Jisas, na dispela pasin i mas i stap olsem ofa yumi save givim long God. Yes, oltaim maus bilong yumi i mas litimapim nem bilong en.” (Hibru 13:15) Pol i stori long tingting bilong em yet long wok autim tok: “Taim mi autim gutnius, mi no inap apim nem bilong mi yet na mi amamas na tok, mi mekim gutpela pasin tru. Nogat. Autim gutnius em wok Bikpela i givim mi na mi mas mekim. Mi no inap lusim dispela wok. Sapos mi no autim gutnius, bai mi stap nogut tru.” (1 Korin 9:16) Na olgeta Kristen i stap gut long God long taim bilong ol aposel, ol i gat wankain tingting.
14. Olsem wanem bilip na pasin bilong wok autim tok i poroman wantaim?
14 Tru tumas, Kristen tru i mas insait long wok autim tok, long wanem, dispela wok i poroman wantaim bilip. Pol i tok: “Long bel yumi save bilip na God i kolim yumi stretpela manmeri. Na long maus yumi save autim bilip bilong yumi na God i kisim bek yumi.” (Rom 10:10) Olsem wanem? Liklik lain tasol insait long kongrigesen—olsem lain pris samting—ol i gat bilip, olsem na ol i gat wok long autim tok? Nogat tru! Olgeta Kristen tru i kisim strongpela bilip long Bikpela Jisas Krais na bel bilong ol i kirapim ol long autim bilip bilong ol long ol narapela. Sapos ol i no mekim olsem, bilip bilong ol i dai pinis. (Jems 2:26) Olgeta Kristen i stap gut long God long taim bilong ol aposel ol i kamapim bilip bilong ol long dispela rot, olsem na planti man i harim ol tok bilong litimapim tru nem bilong Jehova.
15, 16. Stori long ol samting i soim olsem wok autim tok i wok long i go bikpela, maski ol hevi i stap.
15 Long taim bilong ol aposel, Jehova i blesim lain bilong em na dispela lain i go bikpela, maski ol i gat ol hevi insait na ausait long kongrigesen. Olsem: Aposel sapta 6 i stori long tok pait i kamap namel long ol Kristen i save tok Hibru na ol Kristen i save tok Grik. Ol aposel i stretim dispela hevi. Baibel i tok long ol samting i kamap: “Tok bilong God i go nabaut long olgeta hap. Na planti manmeri moa i kamap disaipel long Jerusalem. Na planti pris tu ol i bihainim tok bilong God na ol i bilip.”—Aposel 6:7.
16 Bihain, sampela hevi i kamap namel long King Herot Agripa bilong Judia na ol lain manmeri bilong Tair na Saidon. Ol manmeri bilong dispela tupela taun i mekim sampela gutpela tok bilong kamapim bel isi, na bilong bekim tok bilong ol Herot i mekim bikpela tok long ai bilong ol. Na ol dispela manmeri i kirap singaut olsem: “Em i maus bilong wanpela god. Em i no maus bilong man.” Wantu ensel bilong Jehova i paitim Herot Agripa na em i dai, long wanem, “em i no laik litimapim nem bilong God.” (Aposel 12:20-23) Ol man i save bilip long ol bikman bilong graun ol i mas kirap nogut tru long dispela! (Song 146:3, 4) Tasol ol Kristen i wok long givim biknem long Jehova. Olsem na “tok bilong Bikpela i kamap strong na i go long planti ples,” maski ol dispela hevi i stap.—Aposel 12:24.
Bipo na Nau
17. Long taim bilong ol aposel, planti manmeri moa i mekim wanem?
17 Yes, kongrigesen Kristen long olgeta hap long taim bilong ol aposel i gat ol man i givim bel long litimapim nem bilong God Jehova. Olgeta Kristen i stap gut long God ol i autim gutnius. Sampela i bungim ol man i laik harim tok, na olsem Jisas i tok, ol i lainim ol long bihainim olgeta samting em i bin tokim ol long mekim. (Matyu 28:19, 20) Dispela i mekim na kongrigesen i go bikpela, na namba bilong ol manmeri i joinim King Devit bilong bipo long litimapim nem bilong Jehova i wok long i go antap. Olgeta i mekim dispela tok: “God, Bikpela bilong mi, mi givim bikpela tenkyu long yu. Na mi laik litimapim biknem bilong yu oltaim oltaim. Oltaim yu save laikim mi tumas.”—Song 86:12, 13.
18. (a) Olsem wanem kongrigesen Kristen bilong bipo i narapela kain long lain Kristendom bilong nau? (b) Long stori i kamap bihain long dispela bai yumi skelim wanem samting?
18 Tok bilong wanpela profesa bilong lotu, Allison A. Trites, i kirapim tingting bilong yumi. Em i skelim lain Kristendom bilong nau wantaim ol Kristen bilong bipo, na em i tok: ‘Ol misin long nau i save go bikpela taim ol pikinini bilong ol famili insait long misin i kamap bilipman, o taim wanpela memba bilong misin i kirap go long narapela haus lotu bilong misin. Tasol long Buk Aposel, misin i go bikpela long rot bilong ol man i tanim bel na kamap Kristen, em long dispela taim misin i kirap tasol long mekim wok bilong en.’ Yu ting dispela i makim olsem lotu Kristen tru i no go bikpela moa long rot Jisas i tok em bai go bikpela long en? Nogat. Ol Kristen tru long nau ol i givim bel long litimapim nem bilong God olsem ol Kristen bilong bipo i bin mekim. Bai yumi skelim dispela long stori i kamap bihain long dispela.
Yu Inap Stori Long Dispela?
• Long wanem ol rot yumi givim biknem long God?
• Pol i tok Song 19:4 i tok long wanem samting?
• Olsem wanem bilip na pasin bilong wok autim tok i poroman wantaim?
• Wanem samting i makim tru kongrigesen Kristen bilong bipo
[Piksa long pes 8, 9]
Oltaim skai i save givim biknem long Jehova
[Kredit Lain]
Courtesy of Anglo-Australian Observatory, photograph by David Malin
[Ol Piksa long pes 10]
Wok autim tok na beten i poroman wantaim