Olgeta Kristen Tru Ol i Man Bilong Autim Gutnius
“Singim song long Bikpela. Litimapim nem bilong en. Long olgeta de yupela i mas tokaut olsem, Bikpela i save kisim bek ol manmeri.”—SONG 96:2.
1. Ol manmeri i mas harim wanem gutpela tok? Olsem wanem ol Witnes Bilong Jehova i bin mekim gut wok bilong autim dispela gutpela tok?
OL BIKPELA bagarap i save kamap long olgeta de, tasol Baibel i tok klostu nau, pasin raskol, pait, hangre, na pasin bilong daunim ol man, ol bai pinis. Yumi save long dispela na em i mekim gut bel bilong yumi. (Song 46:9; 72:3, 7, 8, 12, 16) Tru tumas, dispela em i wanpela gutpela tok olgeta man i mas harim, a? Ol Witnes Bilong Jehova i ting olsem. Long olgeta hap ol i gat nem olsem lain bilong “bringim gutpela tok.” (Aisaia 52:7) Tru, ol man i bin mekim nogut long planti Witnes, long wanem, ol i strong long autim gutnius. Tasol ol Witnes i laik helpim tru ol manmeri. Na ol stori bilong ol Witnes i kamapim klia pasin bilong ol long wok strong na no ken les!
2. Wanem wanpela as na ol Witnes Bilong Jehova i save wok strong?
2 Pasin bilong ol Witnes Bilong Jehova long wok strong i wankain olsem pasin bilong ol Kristen long taim bilong ol aposel long wok strong. Wanpela nius (L’Osservatore Romano) bilong misin Katolik i stori long ol aposel i tokaut stret olsem: “Taim ol Kristen bilong pastaim i kisim baptais, ol i ting em wok bilong ol long autim Gutnius. Long maus bilong ol, ol wokboi nating i autim Gutnius long ol narapela wokboi.” Bilong wanem ol Witnes Bilong Jehova i wok strong, olsem ol Kristen bilong pastaim i bin mekim? Namba wan as i olsem: Gutnius ol i autim i kam long God Jehova yet. I no gat narapela gutpela as i winim dispela, a? Tok bilong man bilong raitim song i kirapim ol long autim tok. Em i tok: “Singim song long Bikpela. Litimapim nem bilong en. Long olgeta de yupela i mas tokaut olsem, Bikpela i save kisim bek ol manmeri.”—Song 96:2.
3. (a) Wanem namba tu as na ol Witnes Bilong Jehova i wok strong? (b) God bai “kisim bek ol manmeri” long wanem ol samting?
3 Tok bilong man bilong raitim song i kirapim yumi long tingim namba tu as na ol Witnes Bilong Jehova i wok strong. Ol i tokim ol man olsem God i laik kisim bek ol manmeri. Sampela man i save mekim wok dokta samting, o helpim sindaun bilong ol man, o helpim ol samting bilong mani, na tru tumas, kain wok olsem i gutpela tru. Tasol wok wanpela man inap mekim bilong helpim narapela i liklik tasol taim yumi skelim dispela wantaim wok God i mekim bilong “kisim bek ol manmeri.” Long rot bilong Jisas Krais, Jehova bai kisim bek ol man long sin, sik, na indai. Ol manmeri God bai kisim bek ol, ol bai kisim laip i stap oltaim! (Jon 3:16, 36; KTH 21:3, 4) Long nau wok bilong kisim bek ol man i wanpela “gutpela wok” ol Kristen i autim tok long en taim ol i bihainim dispela tok: “Yupela i mas tokim olgeta lain manmeri long biknem bilong [God] na long ol gutpela gutpela wok em i bin mekim. Bikpela em i namba wan tru na yumi mas litimapim nem bilong em moa yet. Ol arapela god i no olsem Bikpela. Olsem na yumi mas aninit long Bikpela.”—Song 96:3, 4.
Bikman i Stap Olsem Gutpela Piksa
4-6. (a) Wanem namba tri as na ol Witnes Bilong Jehova i wok strong? (b) Olsem wanem Jisas i kamapim klia olsem em i givim bel tru long wok bilong autim gutnius?
4 I gat namba tri as na ol Witnes Bilong Jehova i wok strong. Ol i bihainim pasin bilong Jisas Krais. (1 Pita 2:21) Dispela man i gutpela olgeta em i amamas long mekim wok bilong ‘bringim gutpela tok long ol rabisman.’ (Aisaia 61:1; Luk 4:17-21) Olsem na em i kamap man bilong autim gutnius. Em i raun long olgeta hap bilong Galili na Judia na “autim gutnius bilong kingdom.” (Matyu 4:23) Em i save planti man bai harim gutnius, olsem na em i tokim ol disaipel bilong em olsem: “Planti kaikai tumas i mau pinis long gaden, tasol i no gat planti wokman i stap bilong kisim. Olsem na yupela i mas beten long Papa bilong gaden, bai em i salim ol wokman i go bungim kaikai bilong en.”—Matyu 9:37, 38.
5 Jisas i mekim ol samting i stret wantaim beten bilong em, olsem na em i skulim ol narapela long kamap man bilong autim gutnius. Bihain, em i salim ol aposel yet i go autim tok na em i tokim ol: “Yupela go na autim tok olsem, ‘Kingdom bilong heven em i kam klostu pinis.’ ” Yu ting i gutpela moa sapos ol i bin kamapim ol wok samting bilong pinisim ol hevi long sindaun bilong ol man long dispela taim? O gutpela sapos ol i bin insait long wok politik bilong pinisim pasin bilong paulim ol samting? Nogat. Jisas i makim pasin olgeta Kristen i autim gutnius i mas bihainim taim em i tokim ol: “Yupela go na autim tok.”—Matyu 10:5-7.
6 Bihain, Jisas i salim narapela lain disaipel i go autim tok olsem: “Kingdom bilong God i kam klostu pinis.” Taim ol i kam bek bilong stori long ol gutpela samting raun bilong ol i bin kamapim, Jisas i amamas tru. Em i beten: “Papa, yu Bikpela bilong heven na graun, mi tenkyu long yu, long wanem, yu bin haitim ol dispela samting long ol man i gat gutpela save na tingting, na yu bin soim long ol man i stap olsem ol liklik pikinini tasol.” (Luk 10:1, 8, 9, 21) Ol disaipel bilong Jisas, em bipo ol i wok strong olsem ol man bilong kisim pis, na fama samting, ol i olsem ol liklik pikinini taim yumi skelim ol wantaim ol bikman bilong lotu i bin kisim bikpela skul. Tasol ol disaipel i bin kisim skul bilong autim nambawan gutpela tok i winim olgeta narapela tok.
7. Taim Jisas i go bek pinis long heven, ol disaipel i autim gutnius long husat pastaim?
7 Taim Jisas i go bek pinis long heven, ol disaipel i wok yet long autim gutnius long God bai kisim bek ol man. (Aposel 2:21, 38-40) Pastaim ol i autim tok long husat? Ol i go long ol lain man i no save long God? Nogat, pastaim ol i autim tok long lain Israel, em dispela lain i bin save long Jehova inap olsem 1,500 yia pinis. Olsem wanem? I stret ol i autim tok long wanpela kantri we ol manmeri i lotu pinis long Jehova? Yes, i stret. Jisas i tokim ol: “Yupela bai i autim tok bilong mi long Jerusalem, na long olgeta hap bilong Judia, na long distrik Samaria, na i go inap long olgeta hap bilong graun.” (Aposel 1:8) Lain Israel i mas harim gutnius wankain olsem ol narapela lain man.
8. Olsem wanem ol Witnes Bilong Jehova long nau i bihainim pasin bilong ol disaipel bilong Jisas bilong pastaim?
8 Na olsem tasol ol Witnes Bilong Jehova i save autim tok long olgeta hap bilong graun. Ol i wok gut wantaim ensel Jon i lukim, em “i gat gutnius bilong i stap oltaim oltaim, na em i gat wok bilong autim dispela gutnius long ol manmeri i stap long graun. Em i autim long ol manmeri bilong olgeta lain man na bilong olgeta kantri na bilong olgeta tok ples na bilong olgeta kain skin.” (KTH 14:6) Long yia 2001, ol i autim tok long 235 kantri, long ol kantri tu i gat nem Kristen. Olsem wanem? I gat rong long ol Witnes Bilong Jehova i autim tok long ol hap em lain Kristendom i kamapim pinis ol lotu bilong ol? Sampela i tok dispela i gat rong, na ol inap ting kain wok olsem bilong autim gutnius i olsem “pasin bilong stilim ol sipsip.” Tasol ol Witnes Bilong Jehova i tingim pasin bilong Jisas long sori tru long ol Juda i gat pasin daun. Maski ol i gat lain pris, Jisas i no surik long autim gutnius long ol. Em i “sori tru long ol, long wanem, . . . ol i stap nogut tru, olsem ol sipsip i no gat wasman.” (Matyu 9:36) Taim ol Witnes Bilong Jehova i painim ol man i gat pasin daun em ol i no save long Jehova na Kingdom bilong em, yu ting ol i no ken autim gutnius long ol dispela man, long wanem, wanpela lotu i tok ol i lain bilong en? Mipela i bihainim pasin bilong ol aposel bilong Jisas, olsem na mipela i tok, nogat. Ol Witnes i mas autim gutnius long “olgeta lain man.” Ol i no ken abrusim wanpela lain.—Mak 13:10.
Olgeta Kristen Bilong Pastaim i Autim Gutnius
9. Long taim bilong ol aposel, husat long kongrigesen Kristen i insait long wok autim tok?
9 Husat ol i autim tok long taim bilong ol aposel? Ol samting i kamapim klia olsem olgeta Kristen ol i man bilong autim gutnius. Man bilong raitim buk, W. S. Williams, i tok: ‘Planti man i tok olsem olgeta Kristen bilong Kongrigesen bilong pastaim, ol i autim gutnius.’ Baibel i stori long ol samting i kamap long de Pentikos 33 C.E., olsem: “Holi Spirit i pulap long olgeta dispela manmeri, na ol i stat long mekim tok long ol kain kain tok ples. Holi Spirit i mekim na ol inap mekim ol dispela toktok.” Ol man na meri, ol yangpela na lapun, ol wokboi nating na man i stap fri, olgeta i kamap man bilong autim gutnius. (Aposel 1:14; 2:1, 4, 17, 18; Joel 2:28, 29; Galesia 3:28) Taim ol man i kirap mekim nogut long ol Kristen na planti ol i mas ranawe lusim Jerusalem, “ol dispela manmeri i bin ranawe i go nabaut long olgeta hap, ol i autim gutnius long ol ples ol i stap long en.” (Aposel 8:4) Olgeta “dispela manmeri i bin ranawe i go nabaut” ol i autim gutnius—ol i no makim wan wan man tasol long mekim dispela wok.
10. Ol i bin mekim wanem tupela wok paslain long taim ol pasin na lo ol Juda i stap aninit long en i bagarap?
10 Tru tumas, ol i bin autim gutnius long dispela taim bipo. Jisas i tok profet: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.” (Matyu 24:14) Hap truim bilong dispela tok i kamap long taim bilong ol aposel, ol i autim gutnius long planti hap paslain long taim lain ami bilong Rom i bagarapim pasin bilong lotu na wok politik ol Juda i stap aninit long en. (Kolosi 1:23) Na tu, olgeta disaipel bilong Jisas i bihainim tok bilong em, olsem: “Yupela i mas i go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit. Na yupela lainim ol long bihainim olgeta tok mi bin givim long yupela.” (Matyu 28:19, 20) Ol Kristen bilong pastaim i no tokim ol man i gat pasin daun long bilip long Jisas na bihain larim ol yet i makim rot ol i laik bihainim, olsem sampela man bilong autim tok long nau i save mekim. Nogat. Ol i skulim ol long kamap disaipel bilong Jisas, na bungim gut ol na kamapim ol kongrigesen, na skulim ol bambai ol i ken autim gutnius na kamapim ol disaipel. (Aposel 14:21-23) Ol Witnes Bilong Jehova long nau i bihainim dispela pasin.
11. Long nau husat i autim nambawan gutpela tok long ol manmeri?
11 Planti Witnes Bilong Jehova i bihainim pasin bilong Pol, Barnabas, na ol narapela, na ol i go long ol narapela kantri olsem misineri. Wok bilong ol i bin helpim tru ol man, long wanem, ol i no insait long wok politik o insait long ol narapela samting na ol i lusim wok bilong ol long autim gutnius, nogat. Ol i bihainim tasol tok bilong Jisas: “Yupela go na autim tok.” Tasol planti Witnes Bilong Jehova i no mekim wok misineri long ol narapela kantri. Planti ol i mekim wok mani bilong lukautim ol yet, na sampela ol i skul yet. Sampela ol i mekim bikpela long ol pikinini. Tasol olgeta Witnes i autim gutnius ol yet i bin lainim. Ol yangpela na lapun, ol man na meri, ol i amamas long bihainim tok bilong Baibel, olsem: “Yu mas strong long autim tok bilong em. Maski sapos ol man i redi long harim tok o ol i no redi, oltaim yu mas wok strong long autim tok bilong Krais.” (2 Timoti 4:2) Olsem ol man long taim bilong ol aposel, ol i wok yet na ol i ‘no lusim wok bilong autim gutnius long Krais Jisas.’ (Aposel 5:42) Ol i autim nambawan gutpela tok long ol manmeri.
Kirapim Ol Man o Autim Tok Long Ol?
12. Sampela i ting olsem wanem long pasin bilong autim bilip bilong kirapim man long bihainim wanpela lotu?
12 Long nau sampela man i tok pasin bilong autim bilip bilong kirapim man long bihainim wanpela lotu i save nogutim ol man. Lain World Council of Churches i kamapim wanpela pepa na dispela pepa i tok long “sin bilong autim bilip bilong kirapim man long bihainim wanpela lotu.” Bilong wanem ol i tok olsem? Nius Catholic World Report i tok: “Lotu Otodoks i toktok planti, olsem na ol man i ting pasin bilong ‘autim bilip bilong kirapim man long bihainim wanpela lotu’ i olsem pasin bilong subim man long tanim bel.”
13. Stori long sampela man i bin autim bilip bilong kirapim ol man long bihainim wanpela lotu na dispela i bin nogutim ol.
13 Yu ting pasin bilong autim bilip bilong kirapim man long bihainim wanpela lotu inap nogutim em? Em inap mekim olsem. Jisas i tok dispela pasin ol saveman bilong lo na ol Farisi i bin mekim i nogutim ol man em ol i bin kirapim ol long tanim bel. (Matyu 23:15) Tru tumas, pasin bilong “subim man long tanim bel” i no stret. Saveman Josifas i tok, taim Jon Hirkanus bilong lain Makabi i daunim ol Idom, em i “larim ol i stap long kantri bilong ol sapos ol i katim skin na redi long bihainim ol lo bilong ol Juda.” Bilong i stap aninit long wok bos bilong ol Juda, ol Idom i mas insait tu long lotu bilong ol Juda. Ol saveman i tok, long 750 C.E. samting, Charlemagne i daunim ol haiden bilong Saxon long noten Yurop na mekim nogut tru long ol bilong subim ol long tanim bel na bihainim lotu bilong em.a Tasol yu ting ol Saxon na ol Idom i pilim tru ol samting na dispela i kirapim ol long tanim bel? Yu ting King Herot bilong Idom—em i bin traim long kilim i dai pikinini Jisas—i laikim tru Lo Bilong Moses em spirit bilong God i kirapim em long raitim?—Matyu 2:1-18.
14. Sampela misineri bilong lain Kristendom i mekim wanem bilong kirapim ol man long tanim bel?
14 Olsem wanem? Long nau tu sampela i save subim ol man long tanim bel na bihainim wanpela lotu? Ating ol i save mekim. Ol i tok sampela misineri bilong lain Kristendom i tokim ol man i laik tanim bel long ol bai baim skul bilong ol long narapela kantri. O ol i tokim wanpela refiuji i hangre nogut tru long ol bai givim kaikai long em sapos em i sindaun na harim tok ol i autim. Wanpela pepa ol i kamapim long kibung bilong ol Bisop Otodoks long 1992 i tok, “sampela taim ol i tok promis long ol man long givim ol samting bilong skin long ol, o ol i mekim nogut long ol bilong kirapim ol long bihainim wanpela lotu.”
15. Ol Witnes Bilong Jehova i save autim bilip bilong kirapim man long bihainim lotu bilong ol? Stori long dispela.
15 I no stret long subim man long senisim lotu bilong em. Ol Witnes Bilong Jehova i no save mekim olsem, nogat tru.b Olsem na ol i no autim bilip bilong kirapim man long bihainim lotu bilong ol. Tasol olsem ol Kristen long taim bilong ol aposel, ol i save autim gutnius long olgeta man. Ol man i gat laik long harim tok, ol Witnes i save singautim ol long kisim sampela save moa long rot bilong stadi long Baibel. Ol kain man olsem ol i lain long bilip long God na ol samting em i laik mekim, na stretpela save bilong Baibel i as bilong dispela bilip. Olsem na ol i singaut long nem bilong God, em Jehova, bilong em i ken kisim bek ol. (Rom 10:13, 14, 17) Ol i bilip long gutnius o nogat, em samting bilong ol yet long skelim. No gat wanpela i subim ol. Sapos ol i subim ol, pasin bilong ol long tanim bel i no gat as bilong en. Bel bilong man yet i mas kirapim em long lotuim God bambai God i ken orait long en.—Lo 6:4, 5; 10:12.
Wok Bilong Autim Gutnius Long Nau
16. Wok bilong ol Witnes Bilong Jehova long autim gutnius long nau i bin go bikpela olsem wanem?
16 Long taim bilong yumi, bikpela truim bilong Matyu 24:14 i kamap taim ol Witnes Bilong Jehova i bin autim gutnius bilong Kingdom. Wanpela bikpela tul bilong ol long autim gutnius em nius Wastaua.c Long 1879, taim namba wan nius Wastaua i kamap, ol i bin wokim inap 6,000 nius long wanpela tok ples. Long yia 2001, inap 122 yia bihain, ol i wokim 23,042,000 nius long 141 tok ples. Wok bilong ol Witnes Bilong Jehova long autim gutnius, em tu i go bikpela. Long 1890 samting ol i bin lusim sampela tausen aua long olgeta yia bilong autim gutnius, tasol long 2001 ol i lusim 1,169,082,225 aua. Tingim, long olgeta mun ol i bin mekim Baibel-stadi wantaim 4,921,702 manmeri, no gat pe. Ol i bin mekim bikpela wok tru! Na 6,117,666 man bilong autim tok bilong Kingdom i bin mekim dispela wok.
17. (a) Ol man i save lotuim wanem ol god giaman long nau? (b) Maski tok ples, lain, o namba bilong ol man i wanem kain, olgeta i mas save long wanem samting?
17 Man bilong raitim song i tok: “Olgeta god bilong ol arapela lain manmeri, ol i giaman god tasol. Tasol Bikpela i bin wokim skai.” (Song 96:5) Long nau, pasin bilong litimapim kantri, plak samting, ol man i gat nem, ol samting bilong skin, na mani tu i bin kamap olsem samting ol man i lotu long en. (Matyu 6:24; Efesus 5:5; Kolosi 3:5) Mohandas K. Gandhi i tok: “Mi ting . . . long nau ol man bilong Yurop i Kristen long skin tasol. Ol i save lotu long mani kago.” Em nau, ol man long olgeta hap i mas harim gutnius. Olgeta man bilong kain kain tok ples, lain, na namba, ol i mas save long Jehova na ol samting em i laik mekim. Mipela i laik bai olgeta man i bihainim dispela tok bilong man bilong raitim song: “Yupela i mas amamas long biknem na strong bilong en. Bikpela em i namba wan, olsem na yupela i mas litimapim biknem bilong en.” (Song 96:7, 8) Ol Witnes Bilong Jehova i lainim ol man long save long Jehova bambai ol i ken litimapim nem bilong em. Na ol man i mekim olsem i kisim ol gutpela samting. Wanem ol gutpela samting? Stori i kamap bihain long dispela bai skelim ol dispela samting.
[Ol Futnot]
a Buk The Catholic Encyclopedia i tok, taim lotu Talatala i kamap, ol i kamapim wanpela tok Latin bilong soim pasin bilong subim man long insait long wanpela lotu. Mining bilong dispela tok i olsem: “Man i bosim kantri em i makim lotu ol man bai insait long en.”
b Long miting bilong wanpela lain (United States International Religious Freedom Commission) long Novemba 16, 2000, wanpela man i tok, wok ol Witnes Bilong Jehova i mekim i narapela kain long ol lain i subim ol man long tanim bel na bihainim lotu bilong ol. Ol i tok olsem taim ol Witnes Bilong Jehova i autim tok, ol i mekim dispela long pasin i larim man long tok olsem “mi no laik harim” na pasim dua.
c Nem tru bilong dispela nius em Wastaua i Tokaut Long Kingdom Bilong Jehova.
Yu Inap Stori Long Dispela?
• Bilong wanem ol Witnes Bilong Jehova i wok strong long autim gutnius?
• Bilong wanem ol Witnes Bilong Jehova i autim tok long ol hap em lain Kristendom i kamapim pinis ol lotu long en?
• Olsem wanem yumi ken tok ol Witnes Bilong Jehova i no save autim bilip bilong kirapim man long bihainim wanpela lotu?
• Wok bilong ol Witnes Bilong Jehova long autim gutnius long nau i bin go bikpela olsem wanem?
[Piksa long pes 9]
Jisas em i strongpela man bilong autim gutnius na em i lainim ol narapela long mekim wankain wok
[Piksa long pes 10]
Olgeta man bilong kongrigesen long taim bilong ol aposel ol i autim gutnius
[Piksa long pes 11]
I no stret long subim man long senisim lotu bilong em