Husat Ol i Evanselis Tru?
MASKI yu stap long wanem wanem hap, tasol wok evanselis Krais Jisas i kirapim i mekim samting long yu. Tasol sampela man ol i tok ol i bihainim Krais na i no autim tok i tru bilong Baibel. Long bipo na long nau tu, sampela evanselis i no bihainim tru pasin bilong ol disaipel bilong Krais long pastaim, em ol i wok strong tru long autim tok na mekim wok misineri.
Long nau ol misin ol i kolim Kristen, ol i gat 222,000 misineri ol i wok i stap, tasol ol dispela misineri ol i evanselis tru o nogat? Taim Krais i salim ol disaipel i go autim tok long ol man, em i no laik bai ol i daunim ol dispela man o helpim gavman bilong narapela kantri long bosim ol. (Lukim Jems 4:4.) Na wok autim tok o wok evanselis bilong ol Kristen tru i no kirapim ol man long mekim pasin bikhet long gavman na wok long senisim gavman o ol lo bilong gavman. Nogat. Na taim Jisas i salim ol man long autim tok, em i no laik bai ol i bihainim pasin bilong ol man bilong nau, em ol i autim strong tok bilong Baibel long televisen o long redio na ol i kirapim ol man long mekim lotu bambai ol i ken kisim ol gutpela samting bilong skin. (Jon 17:16; Matyu 6:24) Orait, ol evanselis i mas mekim wanem kain wok?
Wok Evanselis Tru
Taim ol i raitim Baibel long pastaim, ol i bin raitim long tok Hibru na tok Grik, na long dispela tupela tok ples, dispela tok “evanselis” i makim man i autim gutpela tok o gutnius. Ol i mas autim wanem gutpela tok? Gutpela tok long rot bilong kisim bek ol man, na stretpela wok gavman, na gutaim o pasin sekan. Aisaia 52:7 (NW) i tok: “Man i wokabaut long ol maunten na bringim gutpela tok, lek bilong em i gutpela tru, em dispela man i autim tok bilong pasin sekan, na em i bringim gutpela tok bilong samting i gutpela moa, na em i autim tok long rot bilong kisim bek ol man, na em i tokim Saion: ‘God bilong yu i kamap king pinis!’”
Na taim Pikinini Bilong God i kamap man long graun na mama i karim em, ol ensel i tokim sampela wasman bilong sipsip: “Yupela i no ken pret. Harim, mi bringim gutnius long yupela, em bilong mekim olgeta manmeri i amamas tru. Long dispela de long taun bilong Devit, wanpela meri i karim pikinini. Em i man bilong kisim bek yupela. Em i Krais. Em i Bikpela.” (Luk 2:10, 11) Olsem na dispela gutnius o gutpela tok em i bilong Krais Jisas.
Inap olsem 30 yia bihain, Jisas i go long haus lotu long Nasaret long de Sabat na em i sanap na kaunim tok bilong God. “Ol i givim buk bilong profet Aisaia long em. Em i opim buk, na em i painim rait i tok olsem: ‘Spirit bilong [Jehova] i stap long mi. Em i makim mi bilong telimautim gutnius long ol rabisman.’” Em i kaunim pinis ol dispela tok na bihain em “i pasim buk na i givim bek long wasman, na em i sindaun. Na olgeta manmeri i stap long haus lotu ol i lukluk long em wanpela tasol. Orait, em i stat na i tokim ol, ‘Tude dispela rait bilong God em i kamap tru, na yupela i harim pinis.’” Jisas em i man bilong autim gutnius o gutpela tok, na gutnius em i autim em i gutnius bilong “kingdom bilong God.”−Luk 4:17-21; 8:1.
Jisas i tok, wok evanselis bilong em i olsem wok bilong bungim kaikai long gaden. Em i tok: “Planti kaikai tumas i mau pinis long gaden, tasol i no gat planti wokman.” (Matyu 9:36-38) Olsem na em i lainim ol disaipel bilong em long mekim wok evanselis tu na em i givim dispela wok long ol. (Matyu, sapta 10; Luk, sapta 10) Na bikpela tok ol i mas autim em tok bilong “kingdom bilong heven,” olsem Tisa bilong ol i bin mekim. (Matyu 10:7) Ol aposel bilong Jisas i mas autim tok bilong Kingdom, tasol i no ol aposel tasol i mas mekim dispela wok; ol narapela tu i mas mekim.
Taim ol man i kirap mekim nogut long nupela kongrigesen Kristen long Jerusalem, Aposel 8:1 i tok: “Olgeta manmeri bilong [kongrigesen] i ranawe i go nabaut long ol hap bilong Judia na Sameria. Tasol ol aposel i stap yet long Jerusalem.” Ol dispela disaipel i ranawe nabaut, ol i pret na hait i stap? Nogat. Ves 4 i tok: “Ol dispela manmeri i ranawe nabaut, ol i go long ol arapela arapela ples na Ol i telimautim gutnius.” Long dispela rot ol dispela evanselis bilong pastaim i ‘bungim planti kaikai’; planti man i bilip.
Wanpela buk i stori long Baibel (A Theological Word Book of the Bible) na i tok: ‘Long Nupela Testamen wok bilong autim tok i no makim wok bilong mekim tok insait long haus lotu na skulim ol man i bilip pinis, olsem planti man long nau i ting long en. Nogat. Em i makim wok bilong autim “gutnius bilong God” long ol man i no Kristen.’ Olsem na olgeta Kristen i mas mekim wok evanselis, na ol i no ken autim tok long ol wanlotu bilong ol tasol.
Tasol ol evanselis long nau i mas autim wanem tok? Jisas i tok, long taim bilong yumi “bai ol i autim dispela gutnius bilong kingdom long olgeta hap bilong graun, bai olgeta lain manmeri i ken harim, na bihain tasol bai las de i kamap.” (Matyu 24:14) Na tok Jisas i givim long ol man i lukim em i go antap, dispela tok em i bilong ol man ol bai kamap disaipel bilong em long bihain tu, em i tok: “Bambai yupela i autim tok bilong mi long Jerusalem, na long olgeta Judia, na long Sameria, na i go inap long olgeta hap graun.”−Aposel 1:8; lukim tu Matyu 28:19, 20.
Olsem na bikpela tok ol evanselis i mas autim em tok bilong Kingdom bilong God Jehova i stap long han bilong Krais Jisas; em i King Bilong Gutaim. (Aisaia 9:6) Na ol i mas autim olgeta tok i tru Jisas i bin mekim na ol disaipel i bin raitim long Baibel. Ol evanselis tru long nau i autim dispela tok tasol.
Husat i As Bilong Wok Evanselis Tru?
Ol evanselis tru i save lotuim God Jehova. Em i Nambawan Bikpela Evanselis; em i bilong wok bilong autim gutpela tok o gutnius. (Galesia 3:8; Revelesen 10:7) Na em laik bai olgeta manmeri long olgeta hap ol mas harim na bihainim tok bilong em. “God i no tingting tumas long nem na long lain bilong man.” Aposel Pita i tok olsem long sampela manmeri long ples Sisaria, na em i tok: “Long olgeta lain em i save laikim ol man i pret long em na i mekim stretpela pasin. Yupela i save long dispela tok God i salim long mipela lain bilong Isrel. Em i telimautim gutnius bilong Jisas Krais, em i Bikpela bilong olgeta man, na em i save mekim yumi kamap wanbel wantaim God.”−Aposel 10:34-36.
Baibel i tok profet na i tok, long taim bilong yumi tu bai ol evanselis i ‘bungim planti kaikai.’ (Revelesen 14:15, 16) Kaunim stori i kamap bihain long dispela, em i stori long sampela wok ol Witnes Bilong Jehova i mekim long dispela wok bilong ‘bungim kaikai.’ Na lukim tu ripot bilong wok autim tok bilong ol em i stap long pes 12-15. Na taim ol Witnes i kam long haus bilong yu, yu ken toktok wantaim ol, na bai yu inap save, ol i evanselis tru.