Wok Bilong Autim Gutpela Tok—Em Samting Bilong Lotu i Tru
“Mi no laik save bilong man i kamapim bilip bilong yupela. Nogat. Mi laik strong bilong God tasol i kamapim dispela bilip.”—1 KORIN 2:5.
1. (a) Ol man long olgeta hap i save Ol Witnes Bilong Jehova i man bilong mekim wanem wok? (b) Dispela wok em i bikpela wok?
OL MAN long olgeta hap ol i save Ol Witnes Bilong Jehova i man bilong autim gutpela tok, olsem ol evanselis. Wanpela man bilong Englan, em J. A. Beckford (Social Compass bilong Janueri 1977) em i tok: “Ol Witnes i wok strong tru long autim gutpela tok, winim olgeta narapela man bilong autim gutnius long dispela taim.” Na em i tok moa, olsem: “Em wanpela samting na lain bilong Wastaua i go bikpela long nau.” Tasol yu ting Jehova i amamas long dispela wok bilong autim gutpela tok bilong Kingdom na kamapim ol disaipel? Tru tumas em i amamas! Samting i bin kamap long bipo na long nau i makim olsem Jehova em i amamas long dispela wok. Wok bilong autim gutpela tok bilong Kingdom bilong God em i as tru bilong lotu Kristen. Long bipo na long nau tu em i mak bilong lain bilong God.
2. Wok bilong autim tok bilong Kingdom i mekim wanem?
2 Wok bilong autim tok bilong Kingdom i mekim wanem? Em i helpim man long kamapim bel bilong em, em i givim bel tru long God I Gat Olgeta Strong, na em i laikim tru ol man God i bin wokim ol. (Matyu 22:37-39) Na bikpela samting em olsem: Long rot bilong wok bilong autim tok ol man inap kisim save long bikpela strong na bikpela save bilong Jehova.—Aposel 1:8; 4:33; Efesas 3:10.
Jehova Em i As Bilong Dispela Gutpela Tok
3. (a) Olsem wanem na yumi ken tok, Jehova em i wanpela evanselis o man bilong autim gutpela tok? (b) Dispela gutpela tok i makim husat, na God i salim em i kam bilong mekim wanem wok?
3 Jehova em i namba wan Evanselis o Man bilong autim gutpela tok. Namba wan tok profet em i mekim i gutpela tok long rot bilong kisim bek ol sinman. Em bai mekim dispela samting long rot bilong wanpela ‘pikinini.’ (Jenesis 3:15) Bihain, long maus bilong profet Aisaia, God i tok dispela namba wan ‘pikinini,’ em Krais Jisas, em i mas “autim gutpela tok long ol man i gat pasin daun.” (Aisaia 61:1, NW) Olsem na Jehova i laik bai Jisas i mas kamap wanpela evanselis o man bilong autim gutpela tok.
4, 5. Olsem wanem ol ensel i bin mekim wok bilong autim gutpela tok, olsem wok evanselis?
4 Jehova i bin givim wok long sampela man moa tu bilong autim gutpela tok. Em i givim Na dispela tok “evanselis” ol i kisim long tupela tok Grik, insait bilong en i olsem “gutpela” na “ensel” (o “man bilong bringim tok i kam”). Wanpela ensel bilong God em i “telimautim gutnius long Ebraham.” (Galesia 3:8; Jenesis 22:15-18) Dispela “gutnius” i makim wanpela man long lain bilong Ebraham bai kamapim dispela ‘pikinini’ na bai olgeta lain man i kisim blesing long rot bilong em. (Jenesis 12:2, 3) Tu tausen yia bihain, ensel Gebriel i mekim wok olsem “evanselis” na em i autim gutpela tok long Sekaraia long em bai kamap papa bilong Jon Bilong Baptais. Em i tok: “God yet i salim mi na mi kam bilong tokim yu, na bilong bringim dispela gutpela nius long yu.” Jon Bilong Baptais i redim rot bilong dispela namba wan pikinini bilong ‘ol pikinini’ bilong Ebraham, em Krais Jisas.—Luk 1:19.
5 Na Gebriel i autim gutpela tok long Maria. Em i tokim Maria, Maria bai kamap mama bilong Jisas. (Luk 1:26-38) Sampela mun bihain sampela wasman bilong sipsip ol i kirap nogut, long wanem wanpela ensel i bringim gutpela tok long ol, olsem: “Yupela i no ken pret. Harim, mi bringim gutnius long yupela, em bilong mekim olgeta manmeri i amamas tru.” Bihain ol i lukim planti ensel moa i stap wantaim dispela ensel na olgeta ol i tokaut olsem. (Luk 2:8-14) God yet i as bilong ol dispela gutpela tok na em i salim ol dispela ensel i go autim dispela tok long Pikinini bilong em i kamap pinis long graun. Bihain tu, long taim bilong ol Kristen bilong pastaim, em i wok yet long salim ol ensel bilong mekim gutpela wok olsem. Wanpela ensel i helpim ol aposel long lusim kalabus na em i tokim ol: “Yupela i go … autim tok long ol manmeri.” (Aposel 5:20) God i salim sampela ensel bilong helpim ol wokboi bilong em na bilong helpim ol long painim ol man i laik harim tok. (Aposel 8:26; 10:3; 12:7-11) Spirit holi i givim tingting long aposel Jon na em i stori long ol samting bai kamap “long de bilong Bikpela.” Em i lukim ‘wanpela ensel i flai long skai em i gat gutnius bilong oltaim oltaim, na em i gat wok long autim dispela gutnius long ol manmeri i stap long graun.’ Dispela ensel i olsem i bosim wok bilong ol wokboi bilong God long graun bilong autim tok bilong Kingdom long olgeta hap.—Revelesen 1:10; 14:6.
Wok Bilong Krais: Autim Gutpela Tok!
6. (a) Jisas i mekim wanem na wok bilong autim gutpela tok i gat strongpela as bilong en? (b) Jisas i mekim wanem bambai wok bilong autim gutpela tok i no ken pinis taim em i dai?
6 Olsem wanem na ol Kristen bilong pastaim ol i no pret long autim tok na ol i wok strong tru? Long wanem Krais, em as bilong kongrigesen Kristen, em i mekim wok long save na strong bilong God na em i kamapim wanpela lain bilong autim tok ol bai stap strong. Pastaim em inapim wok bilong em yet, em wok bilong “autim gutpela tok long ol man i gat pasin daun.” (Aisaia 61:1, NW) Na bihain em i lainim 12-pela poroman tru bilong em long autim tok, na bihain em i lainim 70 moa. Olsem na Krais i kamapim wanpela lain bilong autim tok ol inap mekim yet dispela wok taim em i dai pinis.—Matyu 10:5-42; Luk 10:1-16.
7. Long wok bilong bringim dispela gutpela tok i go long ol man, olsem wanem save bilong God i narapela kain long save bilong ol man?
7 Jisas em i man bilong wok; em i wok strong long autim tok bilong Kingdom. Em i save ol man i mas harim dispela gutpela tok long Kingdom bilong God, em dispela nupela gavman bilong heven em bai kamapim gutaim long graun bilong i stap oltaim, na em bai pinisim olgeta samting nau i givim hevi long ol man. Jisas i raun na autim tok long ol taun na long ol liklik ples, na em i lukim ol man i stap rabis tru long ol samting bilong spirit. Olsem na em i tokim ol disaipel bilong em: “Planti kaikai tumas i mau pinis long gaden, tasol i no gat planti wokman. Olsem na yupela i mas beten long Papa bilong gaden, bai em i salim wokman i go bungim kaikai bilong em.” (Matyu 9:37, 38) Kwiktaim Jisas i kirap salim sampela wokman i go. Em i tokim ol aposel: “Yupela i go na telimautim tok olsem: ‘Kingdom bilong heven em i kam klostu pinis.’” Oltaim em i tokim ol, ol i mas autim tok long ol man. Sapos em i bihainim tingting o save bilong ol man, ating bai em i tingting long putim sampela ofis bilong givim welfe, olsem rot bilong helpim ol man. O ating bai em i kirapim ol man long hait na mekim pait bilong daunim gavman. Tasol nogat. Em i no mekim olsem. Em i bihainim save bilong God na em i tok tasol: “Yupela i go na telimautim tok.”—Matyu 10:7.
8.Taim ol disaipel i go long autim tok na ol i kam bek, Krais i tok wanem? Bilong wanem em i tok olsem?
8 Jisas i tok olsem na bihain em i tokim sampela man moa ol i mas autim tok. Taim ol dispela man bilong autim tok i kam bek na ol i stori long wok bilong ol i kamap gutpela, Jisas i tok: “Papa, yu Bikpela bilong heven wantaim graun. Mi tenkyu long yu, yu bin haitim ol dispela samting long ol man i gat save na tingting, na yu bin soim long ol liklik pikinini tasol.” (Luk 10:21) Ol dispela “liklik pikinini” em ol disaipel bilong Krais ol i bikpela pinis, na wok bilong autim tok i olsem wanpela tul long han bilong ol bilong helpim ol man bambai ol i ken save long tok i tru bilong God. Olsem na save bilong ol man o strong bilong ol man i no as bilong lotu Kristen tru. Nogat. Strong na save bilong God i as bilong en, na ol i kamapim dispela save na strong long rot bilong wok bilong autim tok.
Olgeta Disaipel i Autim Tok
9. Sampela buk i tok wanem na yumi ken save, wok bilong autim tok bilong Kingdom em i as bilong lotu Kristen bilong pastaim?
9 Sapos wok bilong autim gutpela tok bilong Kingdom i olsem as bilong lotu Kristen, orait ating olgeta Kristen bilong pastaim i man bilong autim tok? Tru tumas, olgeta i save autim tok! Lukim tok ol dispela buk i mekim long ol Kristen bilong pastaim:
“Long dispela taim bipo olgeta Kristen i misineri.”—History of Western Civilization.
“I no ol aposel tasol i mekim wok misin long dispela misin bilong pastaim. Nogat. Olgeta Kristen i insait long dispela wok.”—New Catholic Encyclopedia.
“Olgeta Kristen wan wan i mas i gat laik long autim tok long bilip bilong em.”—Encyclopedia Americana.
10. (a) Wanem taim kongrigesen Kristen i kamap wanpela lain bilong autim gutpela tok? (b) God i givim wanem strong long ol Kristen bilong pastaim? Em bilong mekim wanem wok?
10 Kirap long taim kongrigesen Kristen i kamap nupela long yia 33 C.E., ol i lain bilong autim tok. Ol namba wan manmeri bilong dispela lain, ol inap olsem 120 samting, ol i no lusim taim—kwiktaim ol i kirap na autim tok bilong Kingdom. Baibel i tok: “Holi Spirit i pulap long olgeta dispela bilipman. Na ol i stat long mekim tok.” Yu lukim dispela tok? Olgeta, i no sampela tasol, ol i kirap long “telimautim tok bilong ol strongpela wok bilong God.” (Aposel 2:4, 11) Save na strong bilong God i givim strong long ol dispela manmeri bilong lotuim Em na ol inap autim tok long kain kain tok ples ol i no bin skul na lain long en. Wanpela mirakel i kamapim kongrigesen Kristen na wok bilong autim gutpela tok em i as bilong dispela kongrigesen.
11. Pita i tok wanem na yumi save, olgeta Kristen i mas autim tok?
11 Bihain liklik Pita i kamapim tok bilong profet Joel i makim dispela nupela kongrigesen Kristen, em i tok: “God i tok, ‘Klostu long las de bai mi kapsaitim strong bilong Spirit bilong mi long olgeta manmeri. Na ol pikinini man na pikinini meri bilong yupela bambai ol i telimautim tok olsem profet. Na bai mi soim narakain narakain samting long ol yangpela man bilong yupela, na mi givim driman long ol lapun bilong yupela. Yes, long dispela taim bambai mi kapsaitim strong bilong Spirit bilong mi long ol wokboi na ol wokmeri bilong mi, na bai ol i telimautim tok olsem profet.’” (Aposel 2:17, 18; Joel 2:28, 29) Olgeta Kristen i mas kamap evanselis o man bilong autim gutpela tok. Ol man na meri na ol yangpela tu, bai ol i insait long wok bilong telimautim tok. Ol i mas autim gutpela tok bilong God.
Ol i Mas Autim Gutpela Tok na Toksave Tu
12. Olsem wanem na tok bilong Kingdom bilong God em i no gutpela tok bilong olgeta man?
12 Tasol tok bilong Kingdom bilong God i no gutpela tok bilong olgeta man. Dispela tok i toksave tu long sampela man bai bagarap. Dispela pasin nogut bilong nau na olgeta manmeri i helpim dispela pasin, ol i mas pinis bambai gutpela tok bilong Kingdom i ken helpim tru ol man. (Provep 21:18) Ol manmeri i gat gutpela bel na ol i lotuim Jehova ol i no inap mekim dispela graun i kamap gutpela ples paradais sapos pasin nogut i stap yet bilong bagarapim. Dispela Man em i As bilong dispela gutpela tok em i tok long “autim tok long gutpela taim,” na em i tok tu long “autim tok long … de bilong God bilong yumi long bekim pe nogut.” (Aisaia 61:2, NW) Na wanpela ensel long Revelesen, em tu i mekim wankain tok. Em i tok: “Taim i kamap pinis bilong God i skelim olgeta man long kot. Olsem na yupela i mas pret long em na litimapim nem bilong em.”—Revelesen 14:7.
13. (a) Ol Kristen bilong pastaim i gat wanem tingting long wok bilong autim gutpela tok? (b) Kolim wanpela tok bilong Baibel i makim olsem ol Kristen bilong pastaim i pilim olsem i no gat bikpela hap taim moa na ol i hariap long mekim wok bilong autim tok?
13 Ol Kristen bilong pastaim i wok strong bambai ol inap autim kwik dispela gutpela tok. Dispela samting bilong gutpela tok i olsem mak bilong ol Kristen bilong bihain tu. Wanpela buk (Encyclopaedia Britannica) i tok: “Ol Kristen i bilip olsem pinis bai kamap, tasol ol i no save sindaun nating tasol na wetim Kingdom bilong God i kam. Nogat.” “Ol i wok strong tru bambai ol manmeri i ken redi na wetim Krais i kam bek na Kingdom i kam.” Oltaim ol i save mekim strongpela tok long ol kongrigesen long pinis i klostu na ol i mas redi. Ol aposel i save ol i mas wok strong long autim tok, em bikpela hap wok bilong ol Kristen, bambai olgeta manmeri i ken harim dispela tok paslain long taim bilong de bilong God long bekim pe nogut. Olsem na lotu Kristen i go bikpela kwiktaim.—Rom 10:13, 14; 1 Tesalonaika 5:2, 6; 2 Pita 3:11-14.
14, 15. Wok bilong autim gutpela tok i bin mekim wanem long ol man?
14 Taim ol aposel i dai pinis, dispela tok bilong Kingdom i go paul liklik, tasol ol Kristen i strong yet long bilip olsem pinis bai kamap. Sampela man bilong raitim stori long ol samting i bin kamap long bipo, ol i stori long Kolombas (Columbus) bilong namba 15 senseri na ol i tok, em i bin raun long sip long wanem em i ting liklik taim tasol bai Krais i kam bek na em i laik autim gutpela tok long hap bilong India pastaim. Na ol i tok, ol Puritan bilong namba 17 senseri i bin i go long ol narapela hap, long wanem ol tu i gat dispela tingting. Na ol Baptis na Kweka (Quaker) na Metodis long namba 18 senseri ol tu i gat wankain tingting na ol i go long Amerika. Na sampela Jeman bilong namba 18 na 19 senseri ol i go long Rasia na Palestain, long wanem ol i ting liklik taim tasol bai Krais i kam bek na ol i laik hariap autim tok long ol dispela hap pastaim. Em, sampela man i tok olsem.
15 Olsem na dispela wok bilong autim tok, em Krais i kirapim, yu ting em i go longwe na tanim tingting bilong planti man? Tru tumas, em i mekim olsem. Tru, sampela taim ol i no mekim wok olsem Krais i laik bai ol i mekim, tasol ol i mekim bikpela wok bilong autim tok. Wanpela buk (Encyclopaedia Britannica) i stori long “Lotu Kristen” na laspela tok em i mekim i olsem: “Lotu Kristen em strongpela samting bilong spirit i bin senisim tru planti samting long graun na tingting bilong planti man, ating winim olgeta narapela samting.”
Wok Bilong Autim Gutpela Tok long Nau
16. (a) Olsem na nau yumi save long wanem samting bilong ol Kristen bilong pastaim? (b) I gat wanem askim long wok bilong autim tok long nau?
16 Taim yumi skelim tok bilong Baibel na tok bilong ol dispela narapela buk i stori long ol samting i bin kamap long bipo, yumi ken save: Olgeta Kristen bilong pastaim ol i man bilong autim gutpela tok, olsem ol evanselis. Orait, olsem wanem long nau? Ating nau ol man i no laikim dispela pasin bilong lotuim God? Ating ol man i no laikim. Tasol God i laikim.—Provep 16:25; Jeremaia 8:9.
17. Olsem wanem Ol Witnes Bilong Jehova i bin kirapim bek mak tru bilong wok evanselis?
17 Wok Ol Witnes Bilong Jehova i mekim long nau i soim yumi, ol i kirapim bek tok i tru bilong Kingdom. Ol i bihainim tok bilong Krais na ol i wok strong long mekim bikpela wok tru bilong autim dispela gutpela tok. Ol i laik mekim hariap, taim pinis i no yet. (Matyu 24:14) Inap 100 yia pinis dispela wok em i nambawan bikpela wok bilong Ol Witnes Bilong Jehova. Namba wan Wastaua long tok Inglis (pastaim ol i kolim Zion’s Watch Tower and Herald of Christ’s Presence) em i kolim wok bilong en, olsem:
‘Dispela Wastaua em i namba wan Wastaua na i stret yumi ken kolim wok bilong en. Em olsem: Yumi stap long “las taim” … na yumi laik bai “lain bilipman” ol i ken save tru long dispela samting.’—Wastaua tok Inglis, Julai 1879 (mipela tanim tok bilong en long tok Pisin).
Bihain, long yia 1884, Ol Witnes Bilong Jehova, dispela lain bilong autim gutpela tok, ol i kamapim wanpela Sosaiti. Long namba tu hap bilong lo bilong en ol i kolim wok bilong dispela Sosaiti, olsem:
‘Wok bilong dispela Sosaiti i bilong autim ol tok i tru bilong Baibel long kain kain tok ples long rot bilong ol liklik nius na pepa na buk na long ol narapela rot i stret long lo bilong gavman.’ (Mipela tanim dispela tok long tok Pisin).
Olsem wanem? Dispela tupela samting i mekim wok bilong ol? Tru tumas, ol i mekim!
18. Olsem wanem yumi ken save, ol man bilong olgeta hap ol i save long wok bilong autim gutpela tok lain bilong Jehova i mekim?
18 Ol man long olgeta hap ol i save long dispela wok bilong autim gutpela tok em Ol Witnes Bilong Jehova i mekim. Ol i raitim tok long en long ol niuspepa, na buk bilong bikpela kot, na long ol buk i stori long ol samting i bin kamap. Taim Ol Witnes i wokim namba wan Wastaua, ol i wokim 6,000 long mun na ol i wokim long tok Inglis tasol. Tasol nau ol i save wokim 10,050,000 long 102 tok ples. Ol i save wokim planti tru, winim olgeta narapela nius bilong lotu. Pastaim ol i save lusim liklik hap taim, olsem sampela tausen aua, long autim dispela gutpela tok, tasol bihain dispela wok i go bikpela tru. Long yia 1982 ol i lusim 384 milion aua long autim tok, na ol i tilim 286 milion nius na buk na Baibel samting, na ol i go long haus bilong wan milion hap manmeri long 205 hap na lainim ol long tok bilong Baibel, no gat pe. Na ol i no bikpela lain tru—inap 2,477,608 ol i bin mekim dispela bikpela wok long 1982.
19. (a) Wok bilong Ol Witnes long autim gutpela tok long olgeta hap em i kamap gutpela na ol i litimapim nem bilong husat long dispela samting? (b) Sapos yu wanpela evanselis, olsem man bilong autim gutpela tok, yu mas mekim wanem olsem Matyu 10:7 i tok?
19 Olsem wanem? Ol Witnes Bilong Jehova i ting ol i bin mekim dispela bikpela wok long strong na save bilong ol yet? Nogat. Ol i save litimapim nem bilong God Jehova, em i gat bikpela save na bikpela strong, na em i namba wan Man bilong autim gutpela tok. Olsem na yu bai mekim wanem? Sapos yu save ol man i laik lotu tru long God ol i mas autim tok, na yu laik mekim ol samting bambai Jehova i amamas long yu, orait, long olgeta taim, long olgeta wik, yu mas autim gutpela tok. Olsem Jisas i tok: “YUPELA I GO NA TELIMAUTIM TOK”!—Matyu 10:7.
Yu Inap Bekim Ol Dispela Askim—
□ Olsem wanem Jehova i as bilong wok bilong autim gutpela tok?
□ Ol ensel i bin mekim wanem wok bilong autim gutpela tok?
□ Krais Jisas i givim bel long mekim wanem wok?
□ Olsem wanem na i stret yumi ken tok, sapos man i laik kamap Kristen tru em i mas kamap wanpela evanselis o man bilong autim gutpela tok?
□ Ol man i tok ol i bihainim Krais ol i no lusim wanem bilip?
□ Ol Witnes Bilong Jehova long nau i mekim wanem na yumi save, ol i evanselis tru?
[Piksa long page 22]
Ol evanselis bilong heven na graun ol i wok wantaim long autim dispela gutpela tok