Ol Witnes Bilong Jehova—Lain Tru Bilong Autim Gutnius
1 Krais Jisas i bin putim wok bilong autim gutnius long han bilong olgeta disaipel bilong em, na em i tokim ol, ol i mas autim gutnius bilong Kingdom. (Mt 24:14; Ap 10:42) Ol disaipel bilong em long bipo i makim pasin yumi ken bihainim. Ol i bin wok strong long autim tok bilong Kingdom—ol i no mekim long haus lotu tasol, nogat, ol i autim tok long ol ples bung na long haus bilong ol man. (Ap 5:42; 20:20) Yumi ol Witnes Bilong Jehova i stap long nau, yumi bin kamapim klia olsem yumi lain tru bilong autim gutnius, na yumi autim tok bilong Kingdom long 232 kantri na insait long 3-pela yia i go pinis yumi bin baptaisim 1 milion nupela disaipel! Bilong wanem wok bilong yumi long autim gutnius em i bin kamap gutpela?
2 Gutnius i Save Kirapim Yumi: Ol man bilong autim tok, ol i man bilong bringim gutnius i go long ol man. Olsem na yumi gat gutpela wok tru bilong tokaut long Kingdom bilong Jehova—em dispela tok tasol i gutnius tru tru bilong helpim ol manmeri i bel hevi i stap. Yumi amamas tru long ol gutpela save yumi kisim long nupela skai em bai bosim nupela graun na ol gutpela manmeri bai stap long en long taim Paradais i kamap. (2 Pi 3:13, 17) Yumi tasol i save wetim dispela gutpela samting, na yumi gat bikpela laik tru long tokim ol narapela long en.
3 Pasin Sori i Save Kirapim Yumi: Wok bilong autim gutnius em wanpela wok bilong helpim ol man long abrusim bagarap. (Ro 1:16) Olsem na yumi save kisim bikpela amamas taim yumi autim tok bilong Kingdom. Yumi lain tru bilong autim gutnius, na yumi laikim tru ol manmeri, na dispela i save kirapim yumi long autim gutnius long ol—em ol wanfamili bilong yumi, ol man i stap klostu, ol man yumi save long ol, na planti narapela manmeri moa. Taim yumi givim bel olgeta long mekim dispela wok, dispela em wanpela gutpela rot bilong kamapim klia olsem yumi laikim tru ol narapela.—1 Te 2:8.
4 Spirit Bilong God i Save Helpim Yumi: Baibel i strongim yumi olsem: Taim yumi planim na givim wara long pikinini kaikai bilong Kingdom, Jehova yet i save “mekim kaikai i kamap.” Yumi lukim dispela samting i kamap nau long oganaisesen bilong yumi. (1 Ko 3:5-7) Spirit bilong God yet i save helpim yumi long wok autim tok bilong yumi na i save mekim wok bilong yumi i kamap gutpela.—Jol 2:28, 29.
5 Tok bilong 2 Timoti 4:5 long “mekim wok bilong autim gutnius long ol manmeri,” na pasin bilong laikim tru olgeta manmeri dispela i mas kirapim yumi long autim gutnius bilong Kingdom long olgeta taim. Na yumi ken bilip tru olsem Jehova bai wok yet long blesim ol wok bilong yumi.