Amamas Long Mekim Gut Wok Autim Tok
1 Yumi olgeta i save amamas long mekim ol wok em yumi inap mekim gut. Mak 7:37 i tok, planti manmeri i tok long Jisas olsem: “Olgeta samting em i mekim, em i mekim gutpela tasol.” Olsem na Jisas i bin amamas long mekim laik bilong Jehova! (Skelim wantaim Song 40:8.) Taim yumi tingim ol tok i stap daunbilo, yumi tu inap kisim amamas taim yumi bihainim tok bilong Jisas long “autim tok long ol manmeri” na mekim gut dispela wok. (Ap 10:42) Long mun Janueri bai yumi tilim buk Stap Oltaim. Olsem wanem yumi inap mekim wok long dispela buk bilong mekim gut wok autim tok?
2 Planti taim ol manmeri i save tingting planti long ol sik samting, olsem na yu inap tok olsem:
◼ “Maski ol man i bin kamapim planti marasin samting bilong stretim ol sik, planti manmeri i wok long karim hevi, long wanem, ol i gat sik. Long tingting bilong yu, yu ting bilong wanem i olsem? [Larim man i bekim tok.] Krais Jisas i tok olsem wanpela mak bilong las de em ol bikpela sik. (Lu 21:11) Tasol Baibel i stori tu long wanpela taim i no gat sik moa long en. [Kaunim Aisaia 33:24.] Dispela buk i kirapim yumi long bilip long dispela tok Baibel i skulim yumi long en.” Kamapim sampela bikpela tok bilong buk Stap Oltaim i stori long dispela samting na tilim long man. Tokim man mipela i save lusim dispela buk wantaim ol man long liklik pe.
3 Taim yu autim tok klostu long ol stua, yu inap tok moning o apinun samting long man na nau yu ken mekim askim olsem:
◼ “Pe bilong ol samting i wok long i go antap. Olsem wanem? Yu pilim i hatwok long kisim mani bilong lukautim yu yet? [Larim man i bekim tok.] Yu ting wanpela taim bai kamap long bihain na olgeta man bai i no sot long ol samting bilong skin?” Larim man i bekim tok. Nau yu ken kamapim wanpela skripsa i stap long buk Stap Oltaim em i stori long dispela samting. Yu ken stori moa olsem: “Dispela buk i stori olsem, long rot bilong Kingdom, God bai stretim ol hevi i save givim hatwok long yumi long nau.” Tilim buk long pe stret. Tokim em yu amamas tru long toktok wantaim em na nau yu ken askim em: “Yu ting i gat rot bilong yumi ken stori moa long narapela taim?” Ating long dispela rot, yu inap kisim save long telefon-namba bilong em o haus em i stap long en.
4 Taim yu mekim wok long buk “Stap Oltaim,” ating yu inap traim dispela pasin bilong toktok wantaim man long gutaim bai kamap long graun:
◼ “Long tingting bilong yu, yu ting bilong wanem i hatwok long ol man long kamapim gutaim long graun? [Larim man i bekim tok, na soim em piksa i stap long pes 20, 21.] Dispela em piksa bilong wanpela samting i bin kamap na Baibel i stori long en long Buk Kamapim Tok Hait. [Kaunim KTH 12:7-9, 12, kaunim tok bilong en olsem i stap long paragraf 17. Nau kaunim tok i stap wantaim dispela piksa.] Wanpela as na gutaim i no stap long graun em olsem, Satan i kam daun pinis long graun. Dispela buk i bekim planti ol bikpela askim, na mi amamas long lusim wantaim yu long liklik pe. [Kolim pe bilong buk.]” Bilong kisim save long sampela gutpela rot bilong tilim buk Stap Oltaim, lukim laspela pes long Wok Kingdom bilong Disemba 1996, Septemba 1996, Septemba 1995, Ogas 1995, na Jun 1995.
5 Taim yu go bek bilong lukim ol man i bin harim tok, wok strong long kirapim Baibel-stadi, yu ken mekim kain tok olsem:
◼ “Taim mitupela i bin toktok long pastaim, yu bin kamapim wanpela gutpela tingting. [Kamapim wanpela tok man i bin mekim.] Mi bin tingim tingim dispela samting, na mi laik stori wantaim yu long sampela save mi bin kisim long dispela samting. [Kaunim wanpela skripsa i stori long dispela samting.] Mipela i save mekim Baibel-stadi wantaim ol man, i no gat pe, na dispela i bin helpim planti milion manmeri long kisim save long ol bikpela tok bilong Baibel insait long sotpela hap taim tasol. Taim yu mekim dispela stadi em bai strongim bilip bilong yu olsem ol tok promis bilong God bai kamap tru tru.” Stori long sampela askim, em inap kisim bekim bilong ol. Sapos man i no laik, tokim em olsem, mipela i gat wanpela Baibel-stadi kos em i ken mekim inap 15 minit tasol long olgeta wik na em inap pinisim insait long 16-pela wik tasol. Soim buklet Yumi Mas Mekim Wanem? long em, opim long Stadi 1 na askim em, yu inap soim em long pasin bilong mekim dispela stadi.
6 Mekim Wok Long Pepa Bilong Singautim Ol Man i Kam Long Ol Miting: Yumi inap mekim gutpela wok long ol dispela pepa long kirap bilong tok bilong yumi bilong kirapim ol man long laikim ol samting bilong spirit, o yumi inap givim long man sapos em i no kisim buk o magasin. Sapos man i laik harim tok, mekim wok long ol tok i stap long baksait bilong pepa bilong kirapim man long stadi long Baibel na kam long ol miting bilong yumi.
7 Yu mas save gut long mekim wok bilong yu, olsem bai yu amamas long mekim. Was gut oltaim na bai yu mekim tru wok autim tok. Na yu mas amamas long mekim olgeta hap wok bilong wok autim tok.—1 Ti 4:16.