Mekim Gut Wok Long Pepa Bilong Singautim Ol Man i Kam Long Ol Miting
1 Ol pepa bilong kongrigesen bilong singautim ol man i kam long ol miting i gutpela bilong toksave long ol man long Haus Kingdom i stap long wanem hap na taim stret bilong ol miting. Gutpela yumi givim wanpela pepa long olgeta man yumi autim tok long ol. Bilong mekim olsem, olgeta wan wan kongrigesen i mas i gat planti bilong dispela kain pepa. Ol kongrigesen i save senisim taim bilong ol miting long olgeta yia, ol i mas putim oda long ol nupela pepa inap 3-pela mun paslain long taim ol bai senisim taim bilong miting. Long dispela rot ol bai i gat dispela nupela pepa bilong toksave long ol nupela taim bilong ol miting. Bilong putim oda, ol i mas mekim wok long pepa Handbill Request. Taim yupela i kisim pinis ol dispela pepa, olsem wanem yupela inap mekim gutpela wok long ol?
2 Planti pablisa i kisim save olsem, taim ol i givim wanpela pepa long man, na ol i kolim nem bilong ol, dispela em i gutpela rot bilong kirapim toktok wantaim man. Taim yumi soim taim bilong ol miting long man o stori long ol tok i stap long baksait, dispela inap opim rot bilong stori long wok bilong yumi na bilong wanem yumi mekim dispela wok. Ol papamama i ken helpim ol pikinini long insait long wok autim tok taim ol i larim ol pikinini i givim ol pepa long ol man. Ol pablisa i save autim tok long rot bilong pas, ol i ken putim pepa long pas na singautim man i kam long ol miting. Yumi ken lusim ol pepa long ol haus em ol man i no stap long en, tasol yumi mas putim gut aninit long dua bambai ol man i no ken lukim.
3 Ol dispela pepa i bin mekim bikpela wok bilong stiaim ol man i gat gutpela bel long i kam insait long tok i tru. Ekspiriens bilong wanpela meri i olsem, long rot bilong dispela pepa em inapim bikpela laik bilong em long kisim save long ol tok bilong Baibel. Em i bin beten long nait olgeta, na long moningtaim tupela marit Witnes i paitim dua bilong em. Em i lukluk i go ausait long liklik hul long dua na em i tokim ol olsem em i no inap opim dua. Tupela Witnes i subim wanpela pepa aninit long dua bilong em. Pepa i tok: “Kisim Save Long Baibel.” Em i lukim dispela pepa na em i opim dua. Wantu tasol ol i kirapim stadi na sampela taim bihain em i kisim baptais. Yumi ken ting spirit bilong God i gat strong long mekim wok, na yumi mas mekim gut wok long ol pepa bilong singautim ol man long kam long ol miting taim yumi mekim tru wok autim tok bilong yumi.—Lukim tu Wok Kingdom, Mas 1994, p. 2.