Ol Toksave

◼ Samting bilong tilim long Janueri: Buk Yu Inap i Stap Oltaim Long Paradais Long Graun long K2.00. Februeri: Buk Kamapim Tok Hait​—Ol Bikpela Samting Bilong En i Laik Kamap! Mas: Buk Save i Bringim Man Long Laip Oltaim. Tingting strong long kirapim ol Baibel-stadi. Epril na Me: Sabskripsen bilong Wastaua na Kirap!

◼ Long Miting Bilong Wok bilong wik i kirap long Janueri 19, olgeta pablisa i baptais pinis ol bai kisim kat Advance Medical Directive/Release na kat Identity bilong pikinini bilong ol.

◼ Namel long Februeri 1 na Mas 1, ol wasman sekit bai kirap long mekim nupela pablik-tok nem bilong en, “Tingting Bilong Yu Long Laip i Wankain Olsem Bilong God?”

◼ Ol kongrigesen i mas redim gut ol samting bilong mekim Memorial bilong dispela yia long Sarere, Epril 11, taim san i go daun pinis. Tok bilong Memorial i ken kirap paslain long taim san i go daun, tasol yupela i mas tilim bret na wain long taim san i go daun pinis. Sapos inap, gutpela olgeta wan wan kongrigesen i ken mekim Memorial bilong ol yet. I no gutpela sapos tupela o tripela kongrigesen i bung wantaim bilong mekim. I no gutpela sapos Memorial i kirap bihaintaim tumas long taim san i go daun na bai ol nupela man i hatwok long kam. Na tu, taim kongrigesen i pinisim Memorial bilong ol, i no gutpela sapos narapela kongrigesen i kirapim hariap Memorial bilong ol​—⁠namel long tupela miting i mas i gat hap taim bilong sekanim ol nupela man, na stretim tok wantaim sampela bilong ol bilong kisim sampela save moa, na strongim bel bilong narapela narapela. Ol elda i mas skelim gut olgeta samting, na ol i mas stretim ol samting bambai Memorial i ken helpim tru ol man i kam bung long dispela taim.

◼ Bikpela pablik-tok yumi save mekim long taim bilong Memorial, em bai kamap long Sande, Mas 29. Mipela bai salim nupela autlain bihain. Ol kongrigesen i gat raun bilong wasman sekit o kibung sekit o bikpela de kibung long dispela wik, ol bai mekim dispela bikpela pablik-tok long wik bihain. No ken mekim bikpela pablik-tok paslain long Mas 29, 1998.

◼ Ol lain elda i mas tingim ol dispela senis long wik bilong bikpela de kibung o kibung sekit bilong ol: Long wik bilong bikpela de kibung, kongrigesen i ken mekim olgeta miting bilong dispela wik, tasol no ken mekim Miting Bilong Pablik-Tok na Stadi Wastaua. Long wik bilong kibung sekit yupela i ken mekim tasol ol Buk-Stadi long ol wan wan grup, ol narapela miting nogat.

◼ Ol kongrigesen i gat ol autlain bilong ol pablik-tok long fail, ol i mas stretim gut bambai ol i holim olgeta autlain i stap na i mas stret. Nau yupela inap putim oda bilong ol dispela autlain: Tok Pisin, Namba 1-50 (ol i stretim sampela tok long en); Namba 51-116 (ol i no stretim yet); Tok Hiri Motu, Namba 1-116 (ol i stretim sampela tok long en); Tok Inglis, Namba 1-124 (ol i stretim sampela tok long en). Plis tingim olsem, ol autlain Namba 117-124, em ol nupela autlain long tok Inglis tasol, na yupela i ken putim oda bilong ol dispela autlain tasol. Mipela bai toksave long wanem taim yupela i ken putim oda bilong ol dispela autlain long Tok Hiri Motu na Tok Pisin.

◼ Ol kongrigesen i mas kirap nau long putim oda bilong ol volyum bilong 1997 bilong Wastaua na Kirap! long tok Inglis. (Lukim Lista Bilong Ol Buk Samting, par. 6-8.) Yupela inap kisim tu ol volyum long ol dispela tok ples: Tok Saina, tok Frans, tok Jeman, tok Japan. Inap long taim ol volyum i redi na mipela i salim ol i go, mipela bai raitim long pepa Invoice bilong kongrigesen olsem “Mipela bai salim bihain.” Ol volyum i gat lo bilong baim kwik.