Tokaut Long Olgeta Hap Long “De Bilong Kisim Bek Yumi i Klostu!” Kibung Distrik
Ol Pablisa Long Olgeta Kongrigesen Bai Tilim Pepa Bilong Singautim Ol Man
1 Kirap long Epril samting bilong 2006 ol kibung distrik bai kamap long hap Not na bihain long olgeta hap. Bai i gat wanpela bikpela wok bilong tilim pepa bilong singautim ol man i kam long ol kibung distrik bai kamap long 155 kantri samting. Dispela bikpela wok bai kamap tu long ol hap we i gat ol spesel kibung, olsem long Jemani, Ripablik Sek, na Polan. Ol dispela spesel kibung bai kamap long Julai na long namba wan wik bilong Ogas 2006.
2 Nau yumi stap long laspela hap bilong taim bilong las de, olsem na ol man i gat gutpela bel bai amamas tru long harim ol tok bilong kibung i stori long tok promis bilong God long kisim bek ol man long pasin nogut bilong dispela graun. Dispela tok i bilong kirapim ol long tingim ol samting bai kamap bihain. Bilong planti milion manmeri i ken harim tok bilong mekim gut bel bilong ol na ol i ken wetim gutpela samting long bihain, winim 98,000 kongrigesen bilong ol Witnes Bilong Jehova long olgeta hap i kisim tok bilong strongim ol long insait long dispela wok bilong tokaut long kibung em ol bai go long en.
3 Mipela bai salim planti pepa bilong singautim ol man i go long olgeta kongrigesen na bai olgeta pablisa i ken kisim inap olsem 50 pepa. Sapos i gat planti pepa tumas, orait ol painia i ken mekim wok long ol. Olgeta wan wan kongrigesen bai kirap mekim dispela wok tripela wik paslain long kibung bilong ol i kamap. Long dispela rot ol kongrigesen i ken tilim dispela pepa long klostu olgeta teritori bilong ol.
4 Sapos inap, yupela i ken tilim dispela pepa long olgeta wan wan man long haus. Tasol sapos i no gat man long haus, orait lusim wanpela pepa long dua bilong haus we i no pulim ai bilong ol man. Yupela i mas wok strong long tilim olgeta pepa long dispela tripela wik.
5 Mipela i bilip tru olsem dispela wok bilong tokaut long “De Bilong Kisim Bek Yumi i Klostu!” Kibung Distrik, bai i opim rot long yumi long autim tok long planti man moa. Mipela i beten long Jehova i ken blesim hatwok yupela i mekim taim yupela i insait long dispela bikpela wok.