Wok Bilong Tokaut Long “Bihainim Krais!” Kibung Distrik
Ol Pablisa Bai Tilim Gen Wanpela Spesel Invatesen Pepa
1 Long yia i go pinis, wok bilong tokaut long “De Bilong Kisim Bek Yumi i Klostu!” Kibung Distrik i bin kirapim tru tingting bilong ol man i gat gutpela bel. Ol man husat i bin kisim dispela spesel invatesen na i kam long kibung, em namba wan taim ol i bin bung wantaim ol Witnes Bilong Jehova na ol i kisim ol gutpela kaikai bilong spirit. (Ais. 65:13) Ol i amamas long bung wantaim ol brata Kristen bilong yumi em ol i stap wanbel wantaim. (Sng. 133:1) Bilong yumi ken helpim planti man moa long kam long “Bihainim Krais!” Kibung Distrik, bai yumi mekim gen wok bilong tilim wanpela spesel invatesen pepa.
2 Ol Samting i Kamap Long Yia i Go Pinis: Gutpela samting tru i bin kamap long wok bilong tokaut long “De Bilong Kisim Bek Yumi i Klostu!” Kibung Distrik. Long wanpela kibung distrik bilong yumi, 4-pela bikman bilong lotu em ol i gat nem long hap bilong ol, ol i bin i kam. Ol i mekim tok amamas long ol brata long program bilong kibung i ron gut. Ol i pilim olsem ol tok i kamap i givim gutpela save tru na i kamap long taim stret bilong en. Long Papua Niugini, wanpela man i stap longwe tru long taun i harim toksave na invatesen bilong kibung distrik long redio. Long de bihain, em i wokabaut inap 5-pela aua na i kam kamap long haiwe, na em i kalap long PMV na i kam long taun we kibung distrik i kamap long en. Long kibung, em i kisim nupela buk na ol brata i stretim rot bilong wanpela brata i ken i go lukim em.
3 Long ol kibung distrik i bin kamap long olgeta hap bilong graun, planti manmeri i gat gutpela bel i kam long kibung na ol i kisim tu invatesen pepa i kam wantaim ol. Sampela i mas draiv long ol taun i stap longwe bilong ol i ken kam na harim ol tok bilong kibung. Gutpela wok em lain bilong Jehova long olgeta hap bilong graun i bin mekim bilong singautim ol man i kam long kibung i mekim na namba bilong ol manmeri i kam long kibung i go antap tru. Hia long Papua Niugini, mipela i amamas long tokaut olsem long 9-pela “De Bilong Kisim Bek Yumi i Klostu!” Kibung Distrik, inap 10,459 manmeri i bin kam bung, dispela i winim olgeta taim bipo. Dispela em i namba wan taim namba i go antap winim 10,000—em inap olsem 25 pesen moa winim yia i go pinis.
4 Inapim Ol Teritori: Yupela i ken kirap tilim ol invatesen pepa 3-pela wik paslain long kibung i kirap. Yupela i mas wok strong long inapim olgeta teritori bilong kongrigesen bilong yupela. Long ol kongrigesen i gat ol bikpela teritori, ol pablisa i ken putim ol invatesen pepa long ol haus i no gat man i stap long en paslain long wik bilong kibung. Kongrigesen i mas wok strong long tilim olgeta invatesen pepa na traim mekim planti teritori moa. Sapos i gat planti invatesen pepa i stap yet, orait ol painia i ken kisim na tilim.
5 Ol Tok Yu Ken Mekim: Yu ken mekim kain tok olsem: “Mipela i mekim dispela wok long olgeta hap bilong graun bilong singautim ol man i kam long wanpela bikpela bung tru bai kamap. Dispela em invatesen pepa bilong yu. Yu ken lukim ol narapela tok i stap long baksait bilong pepa.” Taim yu mekim sotpela tok tasol, dispela inap mekim na bai yu tilim invatesen pepa long planti man moa. Tasol sapos man bilong haus i gat askim, orait yu ken lusim sampela taim moa na stori wantaim em. Sapos man i gat laik long harim tok, orait kisim atres samting bilong em na go bek hariap long lukim em.
6 Em i bikpela samting tru long yumi mas wok strong long bihainim Krais! (Jo. 3:36) Dispela kibung distrik bilong yumi bai i helpim olgeta manmeri i kam bung long mekim olsem. Yumi ken bilip tru olsem dispela wok bilong yumi long tokaut long “Bihainim Krais!” Kibung Distrik bai i opim rot long yumi long autim tok long planti manmeri moa. Olsem na wok strong long singautim planti moa long kam long kibung. Jehova i ken blesim tru wok em yupela wan wan i mekim bilong insait long dispela spesel wok bilong tilim dispela invatesen pepa.