Wanpela Spesel Wok i Kamapim Gutpela Samting
Tripela wik paslain long kibung bilong ol i kirap, ol kongrigesen bai insait gen long spesel wok bilong singautim ol man i kam long kibung. I gat gutpela as na yumi mekim dispela spesel wok long olgeta yia. Ol man husat i kisim invatesen na kam long kibung, planti taim ol i save kirap nogut long harim ol tok bilong Baibel, lukim ol volantia i wok gut wantaim, na lukim gutpela pasin na pasin wanbel i stap namel long yumi. (Sng. 110:3; 133:1; Ais. 65:13, 14) Maski i olsem, wok yumi mekim i kamapim gutpela samting, moa yet long ol hap we sampela i mas i kam longwe hap bilong harim ol tok bilong kibung.
Olsem: Bihain long kibung distrik long 2011, wanpela brens ofis i kisim pas i kam long wanpela meri husat i bin kisim wanpela invatesen pepa long dua bilong em. Em i save hait taim ol Witnes Bilong Jehova i paitim dua bilong em. Em i tok: “Mi gat gutpela haus, na man bilong mi em i gutpela man, na mi ting olgeta samting mi gat inap mekim mi amamas. Tasol mi no stap amamas na laip bilong mi i no gat as tru bilong en. Olsem na mi draiv inap 320 kilomita bilong i go harim program bilong Sarere.” Em i amamas tru long kibung, olsem na em i ringim man bilong em na tokim em olsem em bai slip long dispela hap na go long kibung long Sande tu. Em i tok: “Mi putim yau long olgeta tok, mi bungim planti Witnes Bilong Jehova, na mi no laik bai dispela kibung i pinis.” Taim em i go bek, em i kirap stadi long Baibel na 4-pela mun bihain em i kamap wanpela pablisa i no baptais. Em i tok: “Mi amamas olsem mi bin painim dispela invatesen pepa, long wanem, nau laip bilong mi i gat as tru bilong en!”
Sampela husat i kisim invatesen pepa bai kam long kibung. Olsem na yumi mas givim bel tru long insait long dispela spesel wok. Kisim i kam long kibung ol invatesen pepa em yupela i no tilim, na tilim taim yupela i autim tok long kain kain taim na ples.
[Blok long pes 5]
Rot Bilong Tilim Invatesen Pepa
Bilong inapim olgeta hap bilong teritori bilong yumi, mekim sotpela tok tasol. Yumi ken tok olsem: “Gut de. Long olgeta hap bilong graun, mipela i tilim dispela invatesen pepa long ol man. Na dispela em invatesen pepa bilong yu. Yu ken lukim sampela tok moa i stap long pepa.” Soim olsem yu amamas long mekim. Taim yupela i tilim invatesen pepa long ol wiken, yupela i ken tilim tu ol magasin wantaim sapos i stret long mekim olsem.