Lotu—Yu Ting Em i Strongim Gutpela Pasin o i Helpim Pasin Nogut?
“MI AMAMAS long ol samting lotu Kristen i bin mekim bilong helpim mi, na ol man husat i bin stap long ol kantri Kristen insait long laspela 2,000 yia, ol tu i mas amamas olsem.”—Tok i go pas bilong buk Two Thousand Years—The First Millennium: The Birth of Christianity to the Crusades.
Dispela tok amamas long lotu “Kristen” i bilong wanpela man Inglan i save raitim ol buk na mekim ol tok long TV, em Melvyn Bragg. Tok bilong em i kamapim tingting bilong planti milion manmeri husat i gat wankain bikpela amamas long lotu. Ol i bilip tru olsem lotu i bin strongim ol long mekim gutpela pasin. Olsem: Wanpela man bilong raitim ol buk i tok lotu Islam “i bin kamapim wanpela gutpela lain tru . . . [i ] helpim olgeta man.”
Wok Bilong Lotu—Gutpela o Nogut?
Tasol narapela tok Bragg i mekim i kamapim bikpela askim long lotu i bin strongim gutpela pasin o nogat. Em i tok moa: “Lotu Kristen i gat wok long kliaim tingting bilong mi.” Em i laik save long wanem samting? Em i tok em i laik save “long ol narapela samting em lotu Kristen i gat nem long en, olsem no ken orait long tingting bilong ol narapela, mekim nogut long narapela, na i no sori liklik long man, na i nolaik bai man i kisim sampela save.”
Planti bai tok ol dispela pasin i makim olsem klostu olgeta lotu bilong dispela graun kirap long bipo yet. Ol i ting lotu i giaman na stap olsem gutpela helpim—olsem gutpela pasin na pasin holi bilong lotu em i samting bilong skin tasol; tru tru em i pulap long man i gat tupela maus na pasin giaman. (Matyu 23:27, 28) Buk A Rationalist Encyclopædia i tok: “Wanpela tok i save kamap planti taim long ol buk bilong yumi em olsem lotu em i bikpela helpim bilong man.” Na buk i skruim tok moa olsem: “Tasol tru tru planti samting i bin kamap bipo i kamapim olsem ol dispela tok olsem lotu em i bikpela helpim em i giaman tasol.”
Maski wanem wanem niuspepa yu ritim bilong nau, bai yu lukim planti stori bilong ol hetman bilong lotu husat i tokaut long pasin laikim, bel isi, na pasin sori, tasol ol i helpim pasin bilong bel nogut i kamap strong moa na ol i yusim nem bilong God bilong mekim olsem pait nogut bilong ol i stret. Olsem na yumi no kirap nogut long tingting bilong planti man olsem planti taim lotu em i samting nogut bilong bagarapim man!
Yu Ting i Gutpela Sapos i Nogat Lotu?
Sampela i gat wankain tingting olsem wanpela man bilong Inglan, em Bertrand Russell, olsem em bai i gutpela sapos bihain “olgeta lotu i pinis.” Ol i ting sapos lotu i no stap moa, dispela tasol i rot bilong pinisim olgeta hevi bilong man. Tasol ol i no laik tingim dispela samting, ol man husat i givim baksait long lotu, ol tu inap kirapim pasin birua na no orait long ol narapela lain, wankain olsem ol man husat i sapotim lotu. Meri i raitim ol buk long samting bilong lotu, em Karen Armstrong, em i tok: “Lain Natsi i kilim i dai planti Juda, dispela i kamapim klia olsem lain i no gat lotu ol tu [inap] bagarapim planti man wankain olsem lotu em ol i strong long ol man i mas bihainim lotu bilong ol.”—The Battle for God—Fundamentalism in Judaism, Christianity and Islam.
Olsem na yumi laik save, lotu em i strongim gutpela pasin, o tru tru em i as bilong ol hevi bilong graun? Yu ting rot bilong pinisim ol dispela hevi em long pinisim olgeta lotu? Skelim tok Baibel i mekim long dispela samting long stori i kamap bihain long dispela. Ating bai yu kirap nogut long bekim bilong ol dispela askim.