Wanpela Bung i Mekim Sampela Samting Long Yu

TAIM Jisas Krais i stap long graun, em i kamapim wanpela bung i givim biknem long God. I no gat narapela bung bilong lotu Jisas yet i bin tokim ol disaipel bilong em long mekim. Em Kaikai Bilong Bikpela, sampela i kolim olsem Laspela Kaikai.

Piksaim long tingting olsem ol man i no inap lukim yu, tasol yu stap na lukim ol samting i kamap paslain stret long dispela bikpela samting i kamap. Jisas wantaim ol aposel bilong em i bung wantaim long wanpela rum antap bilong wanpela haus long Jerusalem, ol i laik mekim Pasova Bilong Ol Juda. Ol i kaikai pinis kaikai bilong Pasova, em sipsip ol i kukim long paia, pait kumu, bret i no gat yis, na retpela wain. Jisas i rausim Judas Iskariot, em dispela aposel i no stap gut long Jisas na bihain liklik em bai putim Bikman bilong em long han bilong ol birua. (Matyu 26:​17-25; Jon 13:​21, 26-30) Jisas i stap wantaim 11-pela aposel tasol. Matyu em i wanpela bilong ol.

Matyu i bin lukim ol samting i kamap, na em i tok Jisas i kamapim bung bilong Kaikai Bilong Bikpela olsem: “Jisas i kisim wanpela bret [bret i no gat yis], na i tenkyu long God na i brukim, na i givim long ol disaipel. Na em i tok, ‘Yupela kisim na kaikai. Dispela em i bodi bilong mi.’ Na em i kisim wanpela kap wain, na i tenkyu long God, na i givim long ol, na i tok, ‘Yupela olgeta dring long dispela. Dispela em i blut bilong mi bilong mekim kontrak. Mi kapsaitim bilong lusim sin bilong planti manmeri.’ ”​—⁠Matyu 26:​26-28.

I gat wanem as na Jisas i kamapim Kaikai Bilong Bikpela? Long taim em i mekim olsem, bilong wanem em i yusim bret i no gat yis na retpela wain? Olgeta man i bihainim Krais i mas kisim dispela samting o nogat? Ol i mas mekim dispela bung inap hamas taim? Na tru tru dispela bung i mekim sampela samting long yu o nogat?