Yu Lukluk i Go Stret Long Prais?
SIK glokoma i nambawan as na man i kamap aipas. Dispela sik i save kamap long ai na i go bikpela isi isi. Pastaim ai i no inap lukim gut ol samting i stap long arere arere. Sapos man i no kisim marasin samting, sik inap go long namel bilong ai, na bihain man inap kamap aipas olgeta.
Isi isi tasol ai tru bilong yumi inap go nogut na yumi kamap aipas, na olsem tasol yumi inap kamap aipas long spirit. Olsem na em i bikpela samting long oltaim yumi mas lukluk i go stret long ol samting bilong spirit.
Lukluk i Go Stret Long Prais
Wanpela “samting yumi no inap lukim” long ai tru, em gutpela prais tru olsem laip i stap oltaim oltaim, em Jehova i promis long givim long ol manmeri i stap gut long em. (2 Korin 4:18) Tru, nambawan as na ol Kristen i mekim wok bilong God, em ol i save laikim em tru. (Matyu 22:37) Tasol Jehova i laik bai yumi tingim gutpela prais bai yumi kisim. Em i laik bai yumi tingim em olsem wanpela gutpela Papa “i save mekim gut tru long ol man i wok long painim em.” (Hibru 11:6) Olsem na ol man i save tru long God na i laikim em, ol i amamas tru long ol gutpela samting em i promis long givim na i wetim ol i kamap tru.—Rom 8:19, 24, 25.
Planti man bilong ritim dispela nius wantaim nius Kirap!, ol i amamas long lukim ol piksa i makim Paradais bihain bai kamap long graun. Tru, yumi no save tru Paradais bai luk olsem wanem, na ol piksa i stap long ol dispela nius em samting ol man bilong droim piksa i tingim, na ol i kisim tingting long ol ves bilong Baibel olsem Aisaia 11:6-9. Tasol wanpela meri Kristen i tok: “Taim mi lukim ol piksa bilong Paradais long ol Wastaua na Kirap!, mi save skelim gut tru, olsem yumi mekim long ol buk i gat piksa bilong ol gutpela ples ol turis i save go long en. Mi traim long putim mi yet insait long ol dispela piksa, long wanem, em ples mi gat bikpela laik tru long i stap long en long taim God yet i makim.”
Aposel Pol i gat wankain tingting long prais bilong em ‘olsem God i singautim em bilong i go antap.’ Tru, em i no ting em i kisim pinis, long wanem, em i mas i stap gut long God i go inap long taim em i dai. Tasol em i “wok strong long kisim dispela samting bai i kamap bihain.” (Filipai 3:13, 14) Jisas tu, em i karim pen na i dai long diwai, long wanem, em i tingting long “bihain em bai i stap gut na amamas moa yet.”—Hibru 12:2.
Olsem wanem? Sampela taim yu bin ting yu no inap go insait long nupela taim? Tru, yumi no ken hambak na ting yumi inap kisim laip, long wanem, bilong kisim dispela prais yumi mas i stap gut long God i go inap long pinis. (Matyu 24:13) Tasol sapos yumi wok strong long mekim ol samting God i laikim, orait yumi ken bilip tru olsem yumi bai kisim dispela prais. Jehova “i no laik bai wanpela man i lus. Em i laik bai olgeta man i mas tanim bel.” (2 Pita 3:9) Sapos yumi bilip na wetim Jehova, em bai helpim yumi long winim dispela mak bilong yumi. I no pasin bilong em long painim as na bai ol man i laik tru long mekim laik bilong em ol i no inap kisim prais.—Song 103:8-11; 130:3, 4; Esekiel 18:32.
Taim yumi save Jehova i ting olsem wanem long lain bilong em, yumi inap bilip na wetim gutpela samting—dispela em bikpela samting tru, wankain olsem pasin bilong bilip. (1 Korin 13:13) Wanpela tok Grik em Baibel i tanim olsem “wetim,” em i olsem bel i kirap tru long “wetim gutpela samting i kamap.” Aposel Pol i tingim dispela na em i tok: “Yupela olgeta i mas wok strong olsem tasol, na holimpas bilip bilong yupela, na wetim dispela taim God i makim bilong mekim gut long yumi. Yupela i no ken les. Yupela i mas bihainim pasin bilong ol man i bilip tru na i no les kwik, na ol i kisim olgeta samting bipo God i tok long givim.” (Hibru 6:11, 12) Em nau, sapos yumi wok long stap gut long wok bilong Jehova, yumi inap bilip tru olsem samting yumi wet long en bai yumi kisim, na ‘yumi no wet nating’ long kisim, olsem planti samting ol lain bilong graun i wet long en. (Rom 5:5) Orait yumi ken mekim wanem na samting yumi wet long en i ken stap klia tru long tingting olsem yumi lukluk i go stret long en?
Mekim Ai Bilong Spirit i Sap Moa
Ai tru bilong yumi i no inap lukluk i go stret long tupela samting wantaim. Na i wankain tu long ai bilong spirit. Sapos yumi lukluk i go stret long ol samting bilong graun, bai yumi no inap lukim klia long tingting dispela nupela taim God i promis long en, na taim yumi no lukim klia dispela piksa, ating bai em i no gutpela tumas long yumi na bihain yumi no inap lukim moa. Em bai i nogut tru, a? (Luk 21:34) Olsem na ai bilong yumi i mas “gutpela”—olsem em i lukluk i go stret long Kingdom Bilong God na prais bilong laip i stap oltaim oltaim!—Matyu 6:22.
Sampela taim i hatwok long lukluk i go stret long wanpela samting tasol. I gat ol hevi bilong olgeta de em yumi mas tingim, na ol samting bilong pulim tingting—na sampela traim tu—inap kamap. Long kain taim olsem, yumi ken mekim wanem bambai yumi inap lukluk i go stret long Kingdom na nupela taim God i promis pinis long en na yumi no lusim ol narapela bikpela wok yumi mas mekim? Orait yumi ken skelim 3-pela rot.
Stadi long Baibel long olgeta de. Pasin bilong ritim Baibel long olgeta de na stadi long ol buk samting bilong Baibel bai helpim yumi long putim tingting i go long ol samting bilong spirit. Tru, ating yumi bin stadi long Baibel inap planti yia pinis, tasol yumi mas stadi yet i go, wankain olsem yumi mas wok yet long kisim kaikai bilong skin bambai yumi ken i stap laip. Maski yumi bin kaikai inap planti tausen taim pinis, yumi no lusim kaikai—yumi save kaikai yet. Olsem na maski yumi save gut long Baibel, oltaim yumi mas wok long kisim kaikai bilong spirit i stap long en bambai yumi inap lukim klia tru long tingting gutpela samting yumi wet long en, na bilip bilong yumi wantaim pasin laikim em bai stap strong.—Song 1:1-3.
Skelim long bel Tok Bilong God na tenkyu long en. Bilong wanem dispela i bikpela samting? I gat tupela as. Namba wan, pasin bilong skelim long bel ol tok yumi ritim i helpim yumi long putim gut ol dispela tok long tingting na pilim tru long bel. Namba tu, pasin bilong skelim long bel ol tok yumi ritim i mekim na yumi no lusim tingting long Jehova, na ol gutpela wok bilong em, na ol samting em i promis long en na yumi wetim i stap. Olsem: Ol Israel i bin lusim Isip wantaim Moses, ol i bin lukim long ai bilong ol yet ol narakain samting tru i kamapim klia bikpela strong bilong Jehova. Na ol i pilim tu gutpela pasin bilong Jehova long lukautim ol taim em i stiaim ol i go long Graun Bilong Promis. Tasol taim ol i wokabaut i go na i kamap long ples drai nating, ol i kirap toktok planti, na dispela i kamapim klia olsem ol i no bilip. (Song 78:11-17) Bilong wanem i olsem?
Ol i no lukluk moa i go long Jehova na gutpela samting ol inap wetim olsem em i tok promis pinis long ol—ol i tingim i stap bilong ol long dispela taim tasol na ol samting bilong skin ol i laik kisim. Maski ol i bin lukim ol bikpela mirakel em i wokim, planti Israel ol i kamap man bilong toktok planti na i no bilip. Song 106:13 i tok: “Kwiktaim ol i lusim tingting long ol samting Bikpela i bin mekim.” Dispela pasin nogut bilong ol i mekim na ol i no inap go insait long Graun Bilong Promis.
Olsem na taim yu ritim Baibel o ol buk samting bilong Baibel, lusim haptaim bilong skelim long bel ol tok yu ritim. Dispela em i bikpela samting bilong helpim yu long stap strong na kamap bikpela long ol samting bilong spirit. Olsem: Taim yu ritim Song 106, em yumi kamapim pinis hap tok bilong en, skelim long bel ol gutpela pasin bilong Jehova. Tingim pasin bilong em long isi na marimari long lain Israel. Tingim ol samting em i bin mekim bilong helpim ol bambai ol i ken kamap long Graun Bilong Promis. Na tingim tu pasin bilong ol long bikhet long em planti taim. Pilim bel hevi bilong Jehova long ol dispela manmeri i no tenkyu liklik long em na dispela i traim pasin marimari na pasin bilong em long isi long ol. Na taim yu skelim ves 30 na 31—em i stori long Finias, em i gat strongpela bel na i strong long ol man i mas bihainim stretpela pasin—yumi bilip tru olsem Jehova i no save lusim tingting long ol man i stap gut long em na em i save praisim gut ol.
Bihainim ol stiatok bilong Baibel long laip bilong yu. Taim yumi bihainim ol stiatok bilong Baibel, yumi lukim olsem ol tok bilong Jehova bilong helpim yumi i save wok gut. Sindaun 3:5, 6 i tok: “Yu mas bilip strong long Bikpela. Yu no ken ting save bilong yu yet inap helpim yu. Long olgeta samting yu mekim, yu mas tingting strong long Bikpela na yu mekim, na em bai i soim yu stretpela rot long bihainim.” Planti manmeri i save mekim pasin pamuk samting na ol i kisim bikpela hevi tru long tingting na bel na long skin. Ol i painim amamas inap sotpela taim tasol, na ol i kisim bikpela hevi i go inap planti yia—o inap long taim ol i dai. Tasol ol manmeri i wokabaut long liklik rot ‘i hat long bihainim,’ ol i pilim pinis kain gutpela sindaun ol inap kisim long nupela taim, na dispela i strongim ol long wokabaut yet long rot i go long laip.—Matyu 7:13, 14; Song 34:8.
Yumi inap painim hatwok long bihainim ol stiatok bilong Baibel. Sampela taim i luk olsem i gat rot bilong pinisim kwik wanpela hevi, tasol dispela rot i no stret wantaim Baibel. Olsem: Taim yumi gat bikpela hevi long mani, ating yumi laik putim ol wok bilong Kingdom i stap olsem nambatu tasol. Tasol ol man i bilip na mekim ol samting na i lukluk i go stret long ol samting bilong spirit, ol i ken bilip olsem, bihain “man i aninit long God, bai i stap gut.” (Saveman 8:12) Ating sampela taim Kristen i mas wok ovataim, tasol nogut em i kamap olsem Iso, em i ting ol samting bilong spirit i samting nating tasol.—Stat 25:34; Hibru 12:16.
Jisas i tokaut klia long wok bilong yumi ol Kristen. Yumi mas “wok pastaim long painim kingdom bilong God wantaim stretpela pasin bilong em.” (Matyu 6:33, Nupela Testamen na Ol Sam) Sapos yumi mekim olsem, Jehova bai kamapim pasin bilong em long laikim yumi—em bai lukautim yumi long ol samting bilong skin yumi mas kisim. Em i no laik bai yumi bel hevi na tingting planti long ol samting em i tok em yet bai lukautim. Pasin bilong tingting planti tumas long ol dispela samting i wankain olsem sik glokoma bilong spirit—sapos yumi no wok strong long stretim, isi isi em bai mekim na ai bilong yumi i no sap moa—em inap lukim ol samting bilong skin tasol, na bihain bai yumi kamap aipas olgeta long spirit. Sapos yumi stap olsem, de bilong Jehova bai kamap long yumi wantu tasol, “olsem umben i save holimpas abus.” Em bai i nogut tru, a?—Luk 21:34-36.
Lukluk i Go Stret Olsem Josua
Oltaim yumi mas lukluk i go stret long gutpela samting bilong Kingdom yumi wet long en, na putim ol narapela wok yumi mas mekim i stap nambatu. Sapos oltaim yumi stadi, na skelim gut long bel, na bihainim ol stiatok bilong Baibel, yumi ken bilip olsem ol samting yumi wet long en bai kamap tru, olsem Josua i bin mekim. Taim em i bringim pinis ol Israel i go long Graun Bilong Promis, em i tok: “Yupela i save pinis, God, Bikpela bilong yumi i bin givim yupela olgeta gutpela samting em i bin promis long givim yupela. Olgeta samting em i bin promis long mekim, ol i kamap pinis, na i no gat wanpela promis i popaia.”—Josua 23:14.
Ol gutpela samting bilong Kingdom yumi wet long en i mas strongim yu na mekim bel bilong yu i amamas, na em i ken kamap klia long ol tingting i stap long bel bilong yu, na ol samting yu tingting long mekim, na ol wok bilong yu.—Sindaun 15:15; Rom 12:12.
[Piksa long pes 21]
Sampela taim yu bin ting yu no inap go insait long nupela taim?
[Piksa long pes 22]
Taim yu stadi long Baibel, em bikpela samting long skelim long bel
[Ol Piksa long pes 23]
Lukluk i go stret long ol samting bilong Kingdom