Lukluk i Go Long Ol Samting Nau Yu No Inap Lukim!
EM GUTPELA samting tru taim ai bilong yumi inap lukluk gut. Planti man i save tok, gutpela ai em i nambawan samting bilong ol. Tasol ol Kristen i tingim narapela kain ai em aposel Pol i toktok long en, na em i winim pasin bilong lukluk gut long ai tru bilong yumi. Pol i tok: “Yumi no save lukluk i go long ol samting yumi inap lukim long ai. Nogat. Yumi save lukluk strong long ol samting yumi no inap lukim long ai.” (2 Korin 4:18) Man! Dispela kain ai em inapim yumi long lukluk strong long ol samting yumi no inap lukim long ai, em i narapela kain tru! Em i strongpela ai bilong spirit.
Bilong Wanem Yumi Mas i Gat Dispela Kain Ai?
Ol Kristen long taim bilong ol aposel ol i mas i gat dispela kain ai bilong spirit. Taim ol i mekim wok Kristen bilong autim tok, planti hevi tru i painim ol. Olsem Pol i tok: “Long olgeta hap, ol kain kain hevi i save kamap long mipela, tasol ol i no pinisim tru strong bilong mipela. Planti samting i save paulim tingting bilong mipela, tasol tingting bilong mipela i no bagarap olgeta. Ol man i save mekim nogut long mipela, tasol God i no save lusim mipela. Ol i save paitim mipela na mekim mipela i pundaun, tasol ol i no bagarapim [mipela] olgeta.”—2 Korin 4:8, 9.
Tasol maski ol dispela bikpela hevi i painim ol, ol gutpela disaipel i sanap strong. Ol i bilip strong long God, olsem na ol inap mekim wankain tok olsem Pol, em i tok: “Mipela i no save slek long mekim wok bilong God. Tru, bodi bilong mipela i laik bagarap. Tasol bel bilong mipela i save kamap nupela gen long olgeta de.” Wanem samting i mekim na bel bilong ol i kamap nupela long olgeta de? Pol i tok moa olsem: “Long wanem, mipela i save, ol dispela hevi na pen mipela i save karim, ol i no bikpela tumas, na ol bai i stap sotpela taim tasol. . . . Na mipela i save, ol dispela gutpela samting mipela bai i kisim, ol i winim tru olgeta arapela samting. Yumi no save lukluk i go long ol samting yumi inap lukim long ai. Nogat. Yumi save lukluk strong long ol samting yumi no inap lukim long ai, long wanem, samting yumi save lukim long ai, em bai i stap sotpela taim tasol. Tasol ol dispela gutpela samting yumi no inap lukim long ai, ol bai i stap oltaim oltaim.”—2 Korin 4:16-18.
Pol i laik kirapim ol brata spirit bilong em long ol i no ken larim ol hevi o pasin birua ol man i mekim long ol—maski wanem kain hevi—i pasim ai bilong ol na ol i no inap lukim gutpela pe tru ol bai kisim. Ol i no ken lukluk tasol long ol samting i painim ol long nau—ol i mas putim ai i go long ol gutpela samting bai kamap long pinis bilong rot Kristen ol i bihainim. Dispela i helpim ol long tingting strong long olgeta de long mekim yet wok bilong ol. Ol Kristen bilong nau tu ol i mas i gat gutpela ai bilong spirit.
Tingim Hevi Bilong Nau i Bilong Sotpela Taim Tasol!
Maski yumi laik o nogat, long olgeta de yumi save lukim ol samting yumi no laik lukim. Taim yumi lukluk long glas, yumi save lukim ol samting long skin olsem ol liklik buk o mak bilong sua samting i makim olsem skin bilong yumi i no gutpela tumas. Taim yumi lukluk long glas, olsem Baibel, yumi lukim ol liklik mak nogut bilong spirit i stap long yumi yet na ol narapela tu. (Jems 1:22-25) Na taim yumi kaunim ol nius o yumi lukim nius long televisen, yumi lukim sampela lain ol i daunim nogut ol narapela lain, na bagarapim skin bilong ol man, na i gat ol narapela bagarap na hevi tu i painim ol man, na bel bilong yumi i bagarap tru taim yumi lukim ol dispela samting.
Taim yumi lukim ol dispela samting, Satan i laik bai bel bilong yumi i bagarap olgeta, o yumi tingting planti long en i go i go na nau bilip bilong yumi i no strong moa. Orait, yumi ken mekim wanem na bai dispela samting i no ken painim yumi? Yumi mas bihainim pasin bilong Krais Jisas, olsem Pita i tok: “God i singautim yupela pinis bilong bihainim dispela kain pasin, long wanem, Krais tu i bin karim pen bilong helpim yupela. Em i soim yupela pinis dispela pasin bilong em, bai yupela i ken bihainim.” (1 Pita 2:21) Long olgeta pasin em Kristen i mas bihainim long i stap bilong em, Jisas em i nambawan gutpela piksa bilong yumi.
Taim Pita i tok, Jisas i soim yumi long pasin bilong em bai yumi ken bihainim, Pita i tok, Jisas i bin karim pen. Tru tumas, taim Jisas i stap long graun, em i karim bikpela pen tru. Long bipo tru, taim Jisas i stap olsem “saveman i bosim wok” na em i helpim Jehova long wokim man, em i save gut tru long laik bilong God, em i laik bai ol man i stap olsem wanem. (Sindaun 8:30, 31) Tasol taim Jisas i stap long graun, em i lukim tru ol samting nogut sin i kamapim long ol. Long olgeta de em i mas wok wantaim ol man i gat sin na ol pasin kranki. Ating dispela i givim hevi tru long em.—Matyu 9:36; Mak 6:34.
Na Jisas i no lukim hevi bilong ol narapela man tasol—ol hevi i painim em tu. (Hibru 5:7, 8) Tasol em i gat gutpela ai tru bilong spirit, olsem na em i no lukim ol dispela hevi tasol—em i lukluk i go long pe em bai kisim sapos em i holimpas bilip—em laip i stap oltaim oltaim na em i no inap i dai moa. Orait bihain, taim em i kamap King Mesaia, em bai i gat gutpela wok bilong helpim ol man nau ol i stap nogut na karim planti hevi, na ol inap kamap gutpela oltaim olsem Jehova i laikim taim em i bin wokim man long pastaim tru. Jisas i wok long putim ai i go long ol dispela samting em bai mekim bihain, em ol samting em i no inap lukim long ai, na dispela i helpim em long i stap amamas long wok bilong God, maski em i lukim ol kain kain hevi i kamap long olgeta de. Bihain Pol i tok: “Jisas i save, sapos em i bihainim tru tok bilong God, orait bihain em bai i stap gut na amamas moa yet. Na em i tingting long dispela na em i stap strong, na em i karim pen na i dai . . . na nau em i sindaun long han sut bilong sia king bilong God.”—Hibru 12:2.
Jisas i no bin larim ol hevi bilong em i daunim em na bagarapim bel bilong em, o pulim tingting bilong em i go long ol dispela hevi, o bagarapim bilip bilong em, nogat. Yumi ol disaipel bilong em i mas bihainim dispela gutpela pasin bilong em.—Matyu 16:24.
Putim Ai Long Ol Samting Bilong i Stap Oltaim!
Taim Pol i stori long ol samting i bin helpim Jisas long sanap strong na karim hevi, Pol tu i toktok long rot yumi mas bihainim. Em i tok: “Yumi mas lusim olgeta kain samting i mekim yumi i no inap ran strong, na olgeta sin i save pas long yumi. Na yumi mas strongim bel na ran strong long dispela resis God i bin makim bilong yumi ran long en. Yumi mas lukluk i go long Jisas, em i as bilong bilip bilong yumi, na bihain em bai inapim tru bilip bilong yumi.” (Hibru 12:1, 2) Tru tumas, bilong ran long dispela rot bilong ol Kristen na kamap gut long mak na amamas long mekim, yumi no ken lukluk long ol samting i stap klostu—yumi mas lukluk long ol samting i stap longwe. Tasol olsem wanem yumi inap “lukluk i go” long Jisas? Na dispela bai helpim yumi olsem wanem?
Wanpela samting i olsem: Long 1914 Jisas i kamap King long Kingdom bilong God, na em i stap long heven na mekim wok king. Yumi no inap lukim dispela samting long ai tru bilong yumi. Tasol sapos yumi “lukluk i go” long Jisas, ai bilong spirit bai helpim yumi long lukim olsem nau em i redi i stap bilong pinisim dispela pasin nogut bilong graun na kalabusim Satan wantaim bikpela lain ensel nogut bilong em. Na sapos yumi lukluk i go moa, long ai bilong spirit bai yumi lukim dispela gutpela nupela taim, em “ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.”—KTH 19:11-16; 20:1-3; 21:4.
Olsem na ol hevi bilong nau tasol i save painim yumi long olgeta wan wan de, yumi no ken larim ol dispela hevi i daunim yumi. Yumi mas lukluk i go long ol samting i save stap oltaim. Yumi mas bilip strong na yumi no ken lukim tasol ol sik na ol pasin mangal samting bilong dispela graun—yumi mas lukluk i go moa na bai yumi lukim wanpela paradais i gat planti manmeri long en na ol i no gat sik, na ol i amamas na tingim ol narapela man. Na yumi no ken lukim tasol ol mak bilong sua na ol sik i stap long skin bilong yumi na ol liklik pasin kranki bilong yumi olsem mak bilong sua—yumi mas lukluk i go long strong bilong ofa bilong Krais i tekewe ol dispela samting long yumi inap oltaim oltaim. Na yumi no ken lukim tasol ol bikpela bagarap i painim ol man long ol pait nogut bilong nau i wok long bagarapim planti man, meri, pikinini, na yumi no ken lukim tasol ol pasin raskol na pait—yumi mas lukluk i go moa na lukim ol manmeri i kirap bek long matmat na ol i lain long i stap isi na bihainim stretpela pasin bilong Jehova.
Na bilong “lukluk i go” long Jisas, yumi mas putim ai bilong spirit, olsem tingting, i go long ol samting Kingdom i mekim pinis namel long lain bilong God long graun, olsem: Ol i stap wanbel, ol i stap bel isi, narapela i laikim tru narapela olsem brata brata, ol i gat planti gutpela samting bilong spirit. Wanpela meri Kristen long Jemani i lukim video United by Divine Teaching, na em i tok: “Dispela video bai helpim mi oltaim long tingim planti brata sista Kristen bilong olgeta hap ol i stap gut long Jehova na mekim wok bilong em, maski ol man i mekim nogut long ol. Tru tumas, pasin bilong yumi long pas gut wantaim olsem brata brata em i wanpela gutpela samting tru namel long ol man bilong dispela graun i save pait na birua long ol narapela lain!”
Olsem wanem? Yu tu yu save “lukim” Jehova, na Jisas, na ol gutpela ensel, na planti milion brata Kristen ol i sanap klostu long yu? Sapos olsem, orait bai yu no tingting planti tumas long ol hevi bilong dispela graun em inap daunim yu olgeta na yu lusim wok Kristen bilong yu long autim tok na yu no “karim kaikai.” (Matyu 13:22) Olsem na yu mas “lukluk i go” long Jisas—putim ai bilong spirit i go long Kingdom bilong God i kamap pinis na ol gutpela blesing bilong en bilong nau na bilong bihain.
Stap Laip na Lukim Ol Samting Nau Yu No Inap Lukim!
Nupela taim God bai kamapim na em i bilong i stap oltaim oltaim, yumi lukim olsem em i narapela kain tru long pasin bilong dispela graun nau i wok long bagarap. Olsem na dispela i mas kirapim yumi long bihainim pasin i stret bambai God i orait long yumi ken i stap na lukim tru ol samting nau yumi no inap lukim long ai tru—yumi lukim long bilip tasol. Planti milion milion manmeri i kirap bek long matmat bai ol i kirap nogut tru taim ol i lukim paradais i kamap long graun na stretpela pasin tasol i stap long en, em i narapela kain tru long pasin bilong dispela graun ol i bin lukim taim ol i no i dai yet. Man! Bai yumi amamas tru long i stap laip na sekanim ol na tokim ol long olgeta samting God i bin mekim!—Skelim wantaim Joel 2:21-27.
Sapos yumi gat gutpela ai bilong spirit na em i sap tru, dispela em i gutpela samting tru, na oltaim yumi mas wok strong bambai em i ken i stap olsem. Bilong mekim olsem, long olgeta taim yumi mas stadi long Baibel, na go long ol miting Kristen, na tokim ol narapela man long ol samting yumi bilip na wet long en, em Baibel i as bilong en; na bikpela samting tru, em yumi mas beten oltaim na askim God long soim rot long yumi. Sapos yumi mekim olsem, long olgeta taim ai bilong yumi bilong spirit bai sap na yumi lukluk gut, na yumi inap lukluk i go long ol samting nau yumi no inap lukim!