Mekim Gut Wok Bilong God Maski i Gat “Planti Hevi”

1. Wai na ol wokman bilong God i no kirap nogut long ol hevi?

OLSEM WANEM? Yu kirap nogut long luksave olsem yu bai bungim “planti hevi” paslain long yu kisim prais bilong laip oltaim? Ating nogat. Maski yu nupela long tok i tru o yu stap wokman bilong Jehova inap planti yia pinis, yu save olsem hevi i pulap tru long dispela graun em Satan i bosim.—Rev. 12:12.

2. (a) Ol Kristen i bungim ol hevi i save kamap long olgeta man, tasol wanem narapela hevi tu i save painim ol? (Lukim piksa long kirap bilong stadi.) (b) Husat i kirapim ol man long birua long yumi? Hau na yumi save long dispela?

² Ol Kristen i bungim ol hevi “i save kamap long olgeta man,” tasol ol i save bungim tu wanpela hevi i narapela kain. (1 Kor. 10:13) Em wanem kain hevi? Ol birua i mekim nogut tru long ol bikos ol i sanap strong long bihainim ol lo bilong God. Jisas i tokim ol disaipel olsem: “Wokboi i no winim bosman bilong en. Sapos ol i bin mekim nogut long mi, orait ol bai mekim nogut long yupela tu.” (Jon 15:20) Husat i kirapim ol man long mekim kain pasin birua olsem? Satan i kirapim ol man, na Baibel i kolim em olsem “wanpela laion i singaut strong na i painim ol man bilong kaikai,” em ol manmeri bilong God. (1 Pita 5:8) Satan bai yusim olgeta kain rot bilong pulim ol disaipel bilong Jisas na bai ol i no ken i stap gut long God. Tingim samting i painim aposel Pol.

BIKPELA HEVI I KAMAP LONG LISTRA

3-5. (a) Pol i bungim wanem hevi taim em i stap long Listra? (b) Pol i toktok long ol hevi bai kamap long bihain, na olsem wanem dispela i strongim ol disaipel?

³ Pol em i bilipman, olsem na planti taim ol birua i mekim nogut long em. (2 Kor. 11:23-27) Wanpela taim hevi i painim em long Listra. Pol na Barnabas i oraitim wanpela man husat i stap lek nogut kirap long taim mama i karim em. Ol manmeri i givim biknem long tupela na kolim tupela olsem ol god. Pol na Barnabas i strong long ol manmeri i no ken givim biknem long tupela. Tasol i no longtaim, sampela Juda i kam kamap na ol i mekim tok giaman na pulim tingting bilong ol manmeri. Kwiktaim tingting bilong ol manmeri i senis! Ol i tromoi ston long Pol, na ol i lusim em taim ol i ting olsem em i dai pinis.—Apo. 14:8-19.

⁴ Pol na Barnabas i go visitim ol Kristen long Derbe, “na bihain tupela i go bek long Listra na long Aikoniam na long Antiok. Tupela i strongim bel bilong ol disaipel, na kirapim ol long stap strong long bilip, na tupela i tok: ‘Bilong i go insait long kingdom bilong God, yumi mas karim planti hevi.’” (Apo. 14:21, 22) Taim ol Kristen i harim dispela tok, ol inap kisim narapela tingting, long wanem, sapos man i karim planti hevi, dispela inap mekim em i bel hevi, na i no inap strongim em. Taim Pol na Barnabas i tokim ol disaipel olsem planti hevi moa bai painim ol, olsem wanem dispela i “strongim bel bilong ol disaipel”?

⁵ Yumi inap kisim bekim bilong dispela askim sapos yumi skelim gut tok bilong Pol. Em i no tok tasol olsem: “Yumi mas sanap strong na karim planti hevi,” nogat. Em i tok: “Bilong i go insait long kingdom bilong God, yumi mas karim planti hevi.” Pol i strongim ol disaipel taim em i kolim prais ol bai kisim sapos ol i holimpas bilip. Dispela prais em i no driman nating. Jisas i tok: “Man i sanap strong i go inap long pinis, God bai kisim bek em.”—Mat. 10:22.

6. Ol manmeri i sanap strong na karim hevi, ol bai kisim wanem blesing?

⁶ Sapos yumi sanap strong na karim hevi, yumi bai kisim blesing. Ol Kristen God i bin makim, ol bai kisim laip oltaim long heven na ol i no inap i dai moa, na ol bai mekim wok king wantaim Jisas. “Ol arapela sipsip” bai kisim laip oltaim long graun “na stretpela pasin tasol bai i stap long en.” (Jon 10:16; 2 Pita 3:13) Tasol olsem Pol i tok, yumi bai bungim planti hevi long nau. Skelim 2-pela kain hevi we inap painim yumi.

PASIN BIRUA I KAMAP LONG PLES KLIA

7. Taim ol man i birua long yumi long ples klia, ol i save mekim wanem?

⁷ Jisas i tok profet olsem: “Ol man bai bringim yupela i go long kot, na ol bai paitim yupela insait long ol sinagog na ol bai sanapim yupela long ai bilong ol gavana na king.” (Mak 13:9) Dispela tok i makim olsem sampela Kristen bai karim bikpela hevi taim ol birua i mekim nogut long ol, na ating ol lida bilong lotu na wok politik bai kirapim ol man long birua long ol. (Apo. 5:27, 28) Tingim gen samting i painim Pol. Yu ting em i pret long ol birua bai mekim nogut long em? Nogat tru.—Ritim Aposel 20:22, 23.

8, 9. (a) Olsem wanem Pol i soim olsem em i tingting pinis long sanap strong na karim hevi? (b) Olsem wanem sampela long nau i soim olsem ol i holim wankain tingting olsem Pol?

⁸ Taim Satan i mekim na pasin birua i kamap long Pol long ples klia, Pol i sanap strong na tok: “Mi no tingim laip bilong mi em i bikpela samting. Mi laik tru long bihainim yet dispela rot mi wokabaut long en na pinisim wok mi bin kisim long Bikpela Jisas. Em wok bilong autim gut tru dispela gutnius bilong bikpela pasin helpim bilong God.” (Apo. 20:24) Dispela i soim klia olsem Pol i no pret olsem ol birua bai mekim nogut long em, nogat. Em i tingting pinis olsem em bai sanap strong na karim hevi maski wanem wanem hevi i kamap. Bikpela tingting bilong em i olsem, em i laik “autim gut tru dispela gutnius” maski wanem hevi i painim em.

⁹ Long nau, planti brata na sista bilong yumi i soim olsem ol tu i holim wankain tingting olsem Pol. Long wanpela kantri, sampela Witnes i no insait long pait, olsem na ol i sanap strong na karim hevi taim ol i stap long kalabus inap olsem 20-pela yia. Ol i no bringim dispela hevi i go long kot bikos kantri ol i stap long en i no gat lo bilong helpim ol. Taim ol i stap long kalabus, lo i tambuim famili bilong ol long visitim ol, na ol woda i paitim ol kalabusman na mekim nogut tru long ol.

10. Wai na yumi no ken pret taim ol bikpela hevi i kamap kwiktaim?

¹⁰ Sampela taim ol bikpela hevi i save kamap wantu tasol, na ol bratasista bilong yumi i save sanap strong na karim hevi. Sapos kain samting olsem i painim yu, orait yu no ken pret. Tingim samting i bin painim Josep. Ol brata bilong em i salim em olsem wokboi nating na ol i kisim mani long en, tasol Jehova i “kisim em bek long olgeta hevi i bungim em.” (Apo. 7:9, 10) Jehova inap mekim wankain samting bilong helpim yu. No ken lusim tingting olsem “Jehova i save long rot bilong kisim bek ol man i save givim bel tru long Em taim traim i painim ol.” (2 Pita 2:9) Olsem wanem? Yu bai wok yet long trastim Jehova, na bilip olsem em inap kisim bek yu long dispela haptaim nogut bilong nau na givim yu laip oltaim aninit long Kingdom bilong em? I gat gutpela risen tru long yu mas mekim olsem, na strongim bel long karim hevi taim ol birua i mekim nogut long yu.—1 Pita 5:8, 9.

PASIN BIRUA I KAMAP LONG PASIN HAIT

11. Olsem wanem pasin birua bilong Satan long pasin hait i narapela kain long pasin birua i kamap long ples klia?

¹¹ Narapela bikpela hevi we inap painim yumi em olsem, pasin birua inap kamap long pasin hait. Hau na dispela i narapela kain long pasin birua i kamap long ples klia? Pasin birua i kamap long ples klia i wankain olsem strongpela win i kamap na wantu em i bagarapim haus bilong yu. Pasin birua i kamap long pasin hait em i wankain olsem ol waitanis i go insait isi isi long haus bilong yu na kaikaim ol timba i go inap long haus i pundaun. Taim pasin birua i kamap long pasin hait, man i no inap save i go inap long taim bagarap i painim em.

12. (a) Wanem wanpela rot we Satan i save birua long yumi long pasin hait? (b) Wai na dispela em nambawan rot bilong Satan long daunim yumi? (c) Wanem samting i mekim na Pol i bel hevi?

¹² Satan i laik bagarapim pasin bilong yu long pas gut wantaim Jehova. Em inap birua long yu long ples klia—em inap kirapim ol man long mekim nogut long yu. O, em inap birua long yu long pasin hait—isi isi em inap pulim yu long lusim bilip. Nambawan rot bilong Satan long birua long yu long pasin hait em olsem, em i laik bai yu bel hevi. Aposel Pol i tok, sampela taim em i save bel hevi. (Ritim Rom 7:21-24.) Pol i gat strongpela bilip na ating em i memba bilong gavening bodi long taim bilong ol aposel. Orait, wai na em i “pilim nogut tru”? Pol i pilim olsem bikos em i tingim ol rong em i bin mekim. Em i laik tru long mekim ol pasin i stret, tasol em i pilim olsem narapela laik i wok long pasim em. Sapos sampela taim yu pilim olsem, ating yu bai belgut long save olsem aposel Pol tu i bin pilim olsem.

13, 14. (a) Wanem ol samting i save mekim na ol manmeri bilong God i bel hevi? (b) Husat i laik bai yumi lusim bilip? Bilong wanem?

¹³ Sampela taim, planti bratasista i bel hevi, tingting planti, na pilim olsem ol i no gat nem. Olsem: Wanpela strongpela painia, nem bilong em Deborah, em i tok: “Planti taim mi save tingim wanpela popaia bilong mi, na mi save pilim nogut moa long olgeta taim mi tingim dispela popaia. Taim mi tingim olgeta popaia bilong mi, mi pilim olsem i no gat wanpela inap laikim mi, na Jehova tu i no inap laikim mi.”

¹⁴ Wanem samting i mekim na sampela strongpela wokman na wokmeri bilong Jehova, kain olsem Deborah, i save bel hevi? Ating sampela samting i mekim na ol i bel hevi. Ating sampela i save pilim nogut long ol yet na sindaun bilong ol. (Snd. 15:15) Ating sampela narapela i gat bagarap long bodi. Maski i gat wanem risen, yumi mas luksave long husat man i laik yusim ol tingting kranki bilong yumi na daunim yumi. Husat tru i laik bai yumi bel hevi na lusim bilip? Husat bai karim bikpela pen na em i laik bai yu tu i pilim wankain olsem em? (Rev. 20:10) Em Satan tasol. Maski Satan i birua long yumi long ples klia o long pasin hait, em i gat wanpela tingting tasol—em i laik mekim yumi bel hevi, pasim yumi long givim bel tru long mekim wok bilong God, na pulim yumi long lusim bilip. No ken lusim tingting olsem ol manmeri bilong God i insait long wanpela pait long sait bilong bilip!

15. Hau bai yumi inap soim olsem yumi tingting strong long yumi no inap larim bel hevi i daunim yumi?

¹⁵ Strongim tingting olsem yu no inap lusim dispela pait. Putim tingting olgeta i go long prais yu bai kisim. Pol i raitim pas i go long ol Kristen long Korin na em i tok: “Yumi no givap, maski bodi bilong yumi i wok long bagarap, bel na tingting bilong yumi i wok long kisim nupela strong long olgeta de. Ol pen na hevi yumi karim ol i bilong sotpela taim na ol i no bikpela tumas, tasol long rot bilong ol dispela pen na hevi bai yumi kisim ol blesing i bikpela moa yet na i bilong oltaim oltaim.”—2 Kor. 4:16, 17.

REDI NAU LONG BUNGIM BIKPELA HEVI

16. Wai na em i bikpela samting long yumi mas redi nau long bungim bikpela hevi bai kamap?

¹⁶ Yumi luksave nau olsem Satan i save yusim kain kain rot bilong mekim “ol pasin trik.” (Efe. 6:11) Yumi olgeta wan wan i mas bihainim tok i stap long 1 Pita 5:9, olsem: “Yupela i mas sanap strong long bilip na sakim em.” Bilong mekim olsem, yumi mas redim tingting na bel bilong yumi, na trenim yumi yet long nau long bihainim stretpela pasin. Yumi ken tok piksa olsem: Ol soldia insait long lain ami i save mekim hatpela trening paslain yet long taim bilong pait. Ol manmeri long lain ami bilong Jehova tu i save bihainim wankain pasin. Yumi no save long wanem kain pait yumi bai insait long en long bihain. Olsem na i gutpela long yumi mas mekim sampela bikpela trening long dispela haptaim bilong nau we pasin birua i no bikpela tumas. Pol i raitim pas i go long ol Kristen long Korin na tok: “Oltaim yupela i mas skelim yupela yet na bai yupela i ken save olsem yupela i holimpas bilip o nogat. Oltaim yupela i mas skelim yupela yet na bai yupela i ken save olsem yupela i wanem kain man.”—2 Kor. 13:5.

17-19. (a) Hau bai yumi inap skelim yumi yet? (b) Hau bai ol yangpela inap redi long sambai long bilip bilong ol taim ol i stap long skul?

¹⁷ Wanpela rot bilong bihainim tok bilong Pol em olsem, yumi mas skelim gut yumi yet. Yu ken askim yu yet olsem: ‘Mi save beten long olgeta taim? Taim ol wanlain i putim presa long mi, orait mi save bihainim tok bilong God o tok bilong ol man? Oltaim mi save go long ol miting Kristen? Mi save strongim bel na autim ol bilip bilong mi? Mi save lusim tingting long ol popaia bilong ol wanbilip, wankain olsem ol i save mekim long mi? Mi save stap daun long ol brata i go pas long lukautim kongrigesen bilong mi na ol brata i go pas long lukautim kongrigesen i stap long olgeta hap bilong graun?’

¹⁸ Tupela askim i stori long pasin bilong strongim bel na sambai long bilip bilong yumi na sanap strong na sakim ol wanlain taim ol i putim presa long yumi. Planti yangpela bilong yumi i mas mekim olsem taim ol i stap long skul. Ol i lain pinis olsem ol i no ken surik o sem long autim bilip bilong ol. Ol i save strongim bel na autim tok. Ol magasin bilong yumi i bin kamapim sampela gutpela tok bilong helpim ol yangpela. Olsem: Nius Kirap! bilong Oktoba 2009 i tok, sapos wanpela wanklas i askim olsem: “Bilong wanem yu no bilip long evolusen?” orait yu ken bekim tok olsem: “Bilong wanem mi mas bilip long evolusen? Ol saientis yet i no wanbel long en, em ol man husat i strong long dispela tingting!” Yupela ol papamama i mas helpim ol pikinini long prektisim tok ol bai mekim, na dispela bai redim ol long bekim tok taim ol wanlain long skul i putim presa long ol.

¹⁹ Em tru olsem sampela taim i hatwok long tokaut o mekim ol samting Jehova i laik bai yumi mekim. Sampela taim yumi mekim wok inap long de olgeta, na yumi mas fosim yumi yet long i go long miting. Long sampela moning, yumi mas daunim laik bilong slip na redi long i go autim tok. Tingim olsem: Sapos paslain yet yu kisim pasin bilong mekim gut ol wok bilong lotu, dispela bai redim yu long bungim ol bikpela hevi i kamap long bihain.

20, 21. (a) Taim yumi tingim tingim pe bilong baim bek man, hau bai dispela i helpim yumi long daunim ol tingting kranki? (b) Yumi mas holim wanem tingting long ol bikpela hevi?

²⁰ Yumi ken mekim wanem taim Satan i kamapim pasin birua long pasin hait? Olsem: Hau bai yumi inap daunim bel hevi bilong yumi? Nambawan rot em olsem, yumi mas tingim tingim long bel pe bilong baim bek man. Aposel Pol i bin mekim olsem. Em i save long em yet i save pilim olsem wanem sampela taim—em i save pilim nogut. Tasol em i save tu olsem Krais i dai bilong helpim ol sinman, na i no bilong helpim ol gutpela man tasol, nogat. Pol em wanpela bilong ol dispela sinman. Em i tok: “[Mi] bilip long Pikinini bilong God. Dispela Pikinini i bin laikim mi tumas na givim em yet bilong helpim mi.” (Gal. 2:20) Yes, Pol i bilip long pe bilong baim bek man. Em i luksave olsem dispela pe inap helpim em.

²¹ Sapos yu holim wankain tingting olsem Pol na yu tingim pe bilong baim bek man olsem presen Jehova i givim long yu yet, dispela bai helpim tru yu. Dispela i no makim olsem bel hevi bilong yumi bai pinis wantu tasol, nogat. Sampela bilong yumi bai mekim yet pait bilong daunim bel hevi i go inap long nupela taim i kamap. Tasol tingim: Ol manmeri husat i no givap, ol bai kisim prais. Yumi stap klostu tru long taim we Kingdom Bilong God bai kamapim bel isi na helpim olgeta stretpela man long kamap gutpela olgeta. Tingting strong long go insait long dispela Kingdom maski dispela i makim olsem yumi mas karim planti bikpela hevi.