No Ken Les Long Mekim Gutpela Pasin
“Yumi no ken les long mekim gutpela pasin. Sapos yumi no slek long mekim wok, orait long taim bilong kisim kaikai yumi bai kisim gutpela kaikai tru.”—GALESIA 6:9.
1, 2. (a) Bilong mekim wok bilong God, bilong wanem yumi mas sanap strong na no ken les? (b) Olsem wanem Abraham i soim olsem em i sanap strong? Wanem samting i helpim em long mekim olsem?
YUMI ol Witnes Bilong Jehova i amamas long mekim laik bilong God. Na tu, taim yumi kisim “plang” bilong wok disaipel na putim long sol, em i givim nupela strong long yumi. (Matyu 11:29) Tasol sampela taim i gat hatwok long mekim wok bilong Jehova wantaim Krais. Olsem na aposel Pol i tokim ol wanlain Kristen: “Yupela i mas sanap strong, olsem bai yupela i ken bihainim laik bilong God. Na yupela i ken kisim ol gutpela samting, bipo God i promis long givim yupela.” (Hibru 10:36) Yes, yumi mas sanap strong, long wanem, sampela taim i gat hatwok long mekim wok bilong God.
2 Ol samting i bin painim Abraham i kamapim klia dispela samting. Planti taim em i gat hatwok long makim ol samting em bai mekim na long karim ol hevi i painim em. God i bin tokim em long lusim gutpela sindaun bilong em long Ur, na dispela i givim hatwok long em. I no longtaim na bikpela hangre i kamap, na ol lain i stap klostu ol i birua long em, na klostu ol i kisim meri bilong em, na sampela wanlain i bel nogut long em, na pait i givim hatwok long em. Na i gat ol bikpela hevi moa i mas painim em bihain. Tasol Abraham i no les long mekim gutpela pasin. Yumi kirap nogut long dispela, long wanem, em i no gat Baibel olgeta olsem yumi long nau. Tasol em i save long namba wan tok profet i bin kamap, em God i bin tokaut olsem: “Bai mi mekim yu i stap birua bilong meri, na meri i stap birua bilong yu. Na bai mi mekim ol lain bilong yu i birua long lain [olsem “pikinini,” NW ] bilong meri.” (Stat 3:15) Dispela Pikinini bai kamap long lain bilong Abraham, olsem na Satan bai birua tru long Abraham. Abraham i save long dispela samting, na ating dispela i helpim em long sanap strong na amamas long karim ol hevi.
3. (a) I gat wanem as na lain bilong Jehova long nau i mas save, hevi bai painim ol? (b) Galesia 6:9 i mekim wanem tok i strongim bel bilong yumi?
3 Lain bilong Jehova long nau ol tu i mas save, hevi bai painim ol. (1 Pita 1:6, 7) Kamapim Tok Hait 12:17 i toksave long yumi olsem Satan i mekim “pait” long liklik hap lain God i bin makim na ol i stap yet long graun. Na “ol arapela sipsip” i save poroman wantaim ol, olsem na Satan i belhat long dispela lain tu. (Jon 10:16) Taim ol Kristen i mekim wok bilong autim tok, sampela i save birua long ol, na tu, sampela hevi i save painim ol long i stap bilong ol yet. Pol i tok: “Yumi no ken les long mekim gutpela pasin. . . . Long taim bilong kisim kaikai yumi bai kisim gutpela kaikai tru.” (Galesia 6:9) Yes, maski Satan i strong long bagarapim bilip bilong yumi, yumi mas strong long sakim em, na sanap strong long bilip. (1 Pita 5:8, 9) Taim yumi stap gut long Jehova, wanem samting inap kamap? Jems 1:2, 3 i tok: “Sapos ol kain kain traim i kamap long yupela, orait yupela i ken ting olsem, em i samting bilong amamas tasol. Yupela i save, samting i kamap na i traim bilip bilong yupela, em i save kamapim pasin bilong sanap strong na karim hevi.”
Pait Long Ples Klia
4. Olsem wanem Satan i bin pait long lain bilong God long ples klia na bai ol i no stap gut long Em?
4 Ol hevi i bin painim Abraham i olsem piksa na i makim ol “kain kain traim” inap painim ol Kristen long nau. Olsem: Taim sampela lain bilong Babilonia i kam pait, Abraham i mas kirap mekim sampela samting bilong sakim ol. (Stat 14:11-16) Long nau tu, Satan i wok yet long mekim wankain pasin—em i save kirapim ol man long mekim nogut long ol Kristen. Bihain long Namba Tu Pait, i gat planti kantri em gavman i bin putim tambu long wok Kristen bilong ol Witnes Bilong Jehova long skulim ol man. Yiabuk bilong ol Witnes Bilong Jehova bilong 2001 i stori long ol Kristen long Angola em ol i bin kisim nogut tru long han bilong ol birua. Tasol ol brata long ol kain hap olsem, ol i wetim Jehova i helpim ol, na ol i sanap strong na i no lusim wok bilong ol! Tasol ol i no pait na mekim nogut long ol birua o bikhet na kirapim pait long gavman, nogat; long pasin bilong gutpela tingting ol i strong long mekim wok autim tok.—Matyu 24:14.
5. Olsem wanem sampela i save mekim nogut long ol yangpela Kristen long skul?
5 Tasol sampela taim ol man i no save paitim o bagarapim yumi bilong mekim nogut long yumi. Bihain Abraham i gat tupela pikinini man—Ismael na Aisak. Stat 21:8-12 i tok, wanpela taim Ismael i tok “pilai” long Aisak. Long pas bilong ol Galesia, Pol i soim olsem dispela i no tok pilai nating, long wanem, em i tok Ismael i bin mekim nogut long Aisak! (Galesia 4:29) Olsem na taim ol wanskul bilong Kristen i tok bilas long em, na ol birua i toknogutim wanpela Kristen, i stret yumi ken tok, ol i mekim nogut long em. Wanpela yangpela Kristen nem bilong em Ryan, em i stori long taim em i bin kisim bikpela hevi tru long han bilong ol wanskul. Em i tok: “Mi save kisim bas bilong go i kam long skul. Tasol dispela 15 minit mi stap long bas i olsem planti aua, long wanem, ol i save toknogutim mi. Ol i save kukim skin bilong mi long pin bilong pasim pepa, em ol i bin hatim long sigaret laita.” Bilong wanem ol i mekim olsem? Em i tok: “Oganaisesen bilong God i bin lainim mi na dispela i mekim na mi stap narapela kain long ol wanskul.” Tasol papamama i helpim Ryan na em inap sanap strong na stap gut long God. Yupela ol yangpela, ol wankrismas bilong yu i bin tok bilas long yu na yu bel hevi long dispela? Sapos olsem, yu no ken les! Sapos yu sanap strong na stap gut long God, orait tok bilong Jisas bai kamap tru long yu: “Sapos . . . ol i tok nogut long yupela na ol i mekim nogut long yupela na sutim kain kain tok giaman long yupela, orait yupela i ken amamas.”—Matyu 5:11.
Ol Hevi Bilong Ol Wan Wan De
6. Wanem ol samting inap bagarapim pasin wanbel namel long ol Kristen long nau?
6 Planti hevi yumi save bungim long nau, em ol hevi bilong olgeta wan wan de. Abraham yet i bin karim hevi bilong kros i bin kamap namel long ol wokman bilong em na bilong Lot. (Stat 13:5-7) Long nau tu, sampela taim i gat ol liklik kros o bel kaskas i kamap namel long ol Kristen na ol no stap wanbel moa, na dispela inap bagarapim bel isi bilong kongrigesen tu. “Ol man i save bel nogut long ol arapela man, na oltaim ol i save painim rot bilong apim nem bilong ol yet, . . . ol i save mekim olgeta kain pasin nogut.” (Jems 3:16) Olsem na yumi no ken les—yumi mas putim pasin wanbel i stap olsem nambawan samting na daunim pasin bilong tingim yumi yet, olsem Abraham i bin mekim, na yumi mas painim rot bilong helpim ol narapela.—1 Korin 13:5; Jems 3:17.
7. (a) Kristen i ken mekim wanem sapos narapela Kristen i bagarapim bel bilong em? (b) Olsem wanem Abraham em i gutpela piksa long pasin bilong i stap wanbel wantaim ol narapela?
7 Taim yumi pilim olsem wanpela wanbilip i bin mekim nogut long yumi, i hatwok long i stap bel isi. Sindaun 12:18 i tok: “Sapos man i no tingting gut na i tok, orait tok bilong en inap bagarapim bel bilong narapela man olsem bainat i sutim em.” Taim man i no tingting gut na i mekim tok, dispela inap bagarapim tru bel bilong yumi, maski em i no bin tingting long mekim olsem. Na dispela bel hevi bai bikpela moa yet sapos em i bin krungutim gutnem bilong yumi o tok baksait long yumi. (Song 6:6, 7) Tasol taim Kristen i kisim bel hevi olsem, nogut dispela i daunim em na em i les! Sapos yu gat hevi olsem, orait long gutpela pasin yu ken toktok wantaim man i bin bagarapim bel bilong yu na traim stretim dispela hevi. (Matyu 5:23, 24; Efesus 4:26) I gutpela yu ken lusim tingting long rong bilong em. (Kolosi 3:13) Sapos yumi lusim pasin bilong bel nogut long brata, ating bel bilong yumi bai orait gen na yumi stap wanbel gen wantaim em. Sapos pastaim Abraham i bin bel nogut liklik long Lot, em i no larim dispela pasin i stap long bel bilong em. Taim birua i painim Lot wantaim famili bilong em, kwiktaim Abraham i go helpim em!—Stat 14:12-16.
Ol Hevi Yumi Putim Long Yumi Yet
8. (a) Ol Kristen inap mekim wanem na ol i karim bikpela hevi moa? (b) Olsem wanem na Abraham inap kisim stretpela tingting long ol samting bilong skin?
8 Tru, i gat sampela hevi em yumi putim long yumi yet. Jisas i bin tokim lain bilong em: “Yupela i no ken bungim ol gutpela gutpela samting bilong yupela hia long dispela graun. Long dispela graun ol binatang na ros i save bagarapim ol samting, na ol stilman i save brukim banis na stilim.” (Matyu 6:19) Tasol sampela brata i save putim ol samting bilong skin i go pas long ol samting bilong Kingdom, na “ol i karim bikpela hevi moa.” (1 Timoti 6:9, 10) Abraham i orait long lusim gutpela sindaun bilong em bambai em i ken mekim ol samting God i laikim. “Em i bilip na i go sindaun long dispela graun bipo God i tok long givim em. Na em i stap long dispela graun olsem man bilong narapela lain. Em i sindaun long haus sel wantaim Aisak na Jekop, em . . . God i bin promis long givim dispela graun long ol. Oltaim Abraham i bilip na i wet long lukim dispela taun i stap strong tru, em dispela taun God . . . yet i bin wokim.” (Hibru 11:9, 10) Abraham i bilip strong long wanpela “taun,” olsem gavman bilong God, bai kamap bihain, olsem na em i no bilip long mani kago samting. Sapos yumi mekim olsem, bai yumi bihainim gutpela tingting, a?
9, 10. (a) Sapos yumi gat laik long kisim biknem, olsem wanem dispela inap givim hevi long yumi? (b) Wanpela brata long nau i ken mekim wanem bilong “i stap liklik tru”?
9 Tingim narapela samting. Baibel i tok: “Sapos wanpela man i ting em i gat nem, tasol em i no gat nem, orait dispela man i giamanim em yet.” (Galesia 6:3) Na tu, Baibel i tok: “Yupela i no ken tingting long yupela yet tasol, na wok long kamapim biknem bilong yupela. Nogat. Yupela i mas daunim yupela yet.” (Filipai 2:3) Sampela i no save bihainim dispela tok na ol i givim hevi long ol yet. Ol i gat bikpela laik long kisim biknem, tasol ol i no gat bikpela laik long mekim “gutpela wok,” olsem na taim ol i no kisim wok insait long kongrigesen, ol i bel hevi na bel nogut.—1 Timoti 3:1.
10 Abraham i stap olsem gutpela piksa, olsem em ‘i no ting save na pasin bilong em i winim ol arapela.’ (Rom 12:3) Taim Abraham i bungim Melkisedek, em i no mekim olsem em i winim Melkisedek, long wanem, em i stap pren bilong God, nogat. Em i givim namba 10 hap bilong ol samting bilong em long Melkisedek, na long dispela pasin em i tokaut olsem Melkisedek i winim em. (Hibru 7:4-7) Long nau tu, Kristen i mas amamas long “i stap liklik tru” na i no ken strong long ol man i mas lukluk i go long em olsem em i samting tru. (Luk 9:48) Sapos i luk olsem ol elda long kongrigesen i no laik givim sampela wok bilong kongrigesen long yu, i gutpela sapos yu skelim yu yet na bai yu ken save, wanem sampela pasin bilong yu o pasin yu save bihainim long mekim ol wok samting, em yu mas stretim. Yu no ken tingting long ol wok bilong kongrigesen yu no holim na yu bel nogut long dispela—yu mas givim bel long mekim ol wok yu holim pinis, olsem wok bilong helpim ol man long kisim save long Jehova. Yes, “yupela i mas daunim laik bilong yupela yet na stap aninit long strongpela han bilong God. Na long taim em yet i makim, em bai i litimapim yupela.”—1 Pita 5:6.
Bilip Long Ol Samting Yu No Inap Lukim
11, 12. (a) Wanem samting inap mekim na sampela insait long kongrigesen i no pilim moa olsem taim i sot pinis? (b) Olsem wanem Abraham i stap olsem gutpela piksa long larim bilip bilong em long ol tok promis bilong God i bosim olgeta samting em i mekim?
11 Na narapela hevi tu, i olsem God i lusim taim long pinisim pasin nogut bilong graun. Olsem 2 Pita 3:12 i tok, ol Kristen i mas “wetim De bilong God i kamap.” Tasol planti ol i bin wetim dispela “De” inap planti yia pinis. Olsem na ating sampela i bel hevi na i no pilim moa olsem taim i sot pinis.
12 Long dispela samting tu, Abraham i stap olsem gutpela piksa. Em i bilip tru long ol tok promis bilong God na dispela i bosim olgeta samting em i bin mekim, maski sampela tok promis i no inap kamap tru long taim bilong em. Tru, em i bin stap na lukim pikinini bilong em Aisak i kamap bikpela man pinis. Tasol sampela handet yia i mas lus na bai ol tumbuna pikinini bilong Abraham i kamap planti tru olsem “ol sta bilong skai” o olsem “wesan bilong nambis.” (Stat 22:17) Tasol Abraham i no bel nogut o bel hevi long dispela. Olsem na aposel Pol i tok long Abraham na ol narapela bilipman bilong bipo olsem: “Ol i bilip long God i go inap long taim ol i dai. . . . Ol i no kisim ol dispela gutpela samting God i bin promis long givim ol. Nogat. I olsem ol i sanap na lukluk i go long ol dispela samting i stap longwe tru long ol, na ol i amamas long lukim ol. Na ol i no sem long tokaut olsem, ‘Mipela i stap long dispela graun olsem ol manmeri bilong narapela kantri.’ ”—Hibru 11:13.
13. (a) Olsem wanem ol Kristen long nau i stap olsem “ol manmeri bilong narapela kantri”? (b) Bilong wanem Jehova bai pinisim pasin nogut bilong graun?
13 Sapos Abraham inap larim ol promis i stiaim olgeta samting em i bin mekim, maski truim bilong ol i stap “longwe tru,” orait yumi mas strong moa long mekim olsem, long wanem, truim bilong ol dispela samting i kam klostu pinis! Olsem Abraham, yumi mas ting olsem yumi stap long dispela graun bilong Satan “olsem ol manmeri bilong narapela kantri,” na yumi no laik sindaun gut na kisim ol gutpela samting bilong yumi yet. Tru, yumi laik bai ‘pinis bilong olgeta samting’ i kamap nau tasol, i no bihain liklik. (1 Pita 4:7) Ating yumi gat bikpela sik, o yumi gat bikpela hevi long mani. Tasol yumi mas tingim dispela samting: Jehova i no tingting tasol long kisim bek yumi long ol bikpela hevi na long dispela as em i laik pinisim dispela pasin nogut bilong graun, nogat. Em i laik mekim holi nem bilong em yet. (Esekiel 36:23; Matyu 6:9, 10) Pinis bai kamap long taim i stret tru long Jehova i ken kamapim ol samting em i gat laik long mekim, na i no long taim i stret long yumi yet, nogat.
14. Olsem wanem pasin bilong God long isi long ol man i helpim ol Kristen long nau?
14 Na tingting tu olsem, “Bikpela i no save wok isi isi long kamapim samting em i bin promis long mekim . . . Tasol em i no laik bai wanpela man i lus. . . . Olsem na em i isi long yupela na em i wet i stap yet.” (2 Pita 3:9) Em nau, God i “isi long yupela”—ol manmeri bilong kongrigesen Kristen. Yumi ken ting olsem sampela bilong yumi i mas i gat hap taim moa long senisim sampela pasin na tingting bambai ol i ken “i stap klin long ai bilong God na i no gat asua long wanpela samting.” (2 Pita 3:14) Olsem na yumi mas tenkyu tru long God i bin isi long yumi, a?
Stap Amamas, Maski Ol Hevi
15. Olsem wanem Jisas inap i stap amamas, maski planti hevi i painim em? Taim ol Kristen i bihainim pasin bilong em, dispela i save helpim ol olsem wanem?
15 Ol pasin Abraham i bihainim inap skulim ol Kristen long planti samting. Em i kamapim klia strongpela bilip bilong em na ol narapela pasin tu, olsem stap isi na wetim Jehova, tingting gut, strongpela bel, laikim tru ol narapela na i no tingim em yet tasol. Em i putim wok bilong lotuim Jehova i go pas long olgeta narapela samting. Tasol nambawan gutpela piksa yumi ken bihainim, em Jisas Krais. Planti hevi na traim i bin painim em tu, tasol em i no lusim pasin bilong amamas. Bilong wanem? Long wanem, long olgeta taim em i tingting strong long gutpela samting em i wetim i kamap bihain. (Hibru 12:2, 3) Olsem na Pol i beten olsem: “God wanpela tasol . . . i save mekim yumi sanap strong long bilip. Orait God i ken helpim yupela long bihainim tru pasin bilong Krais Jisas na holim dispela wanpela tingting tasol.” (Rom 15:5) Sapos yumi holim stretpela tingting, bai yumi stap amamas, maski Satan i putim ol kain kain samting bilong pasim rot bilong yumi.
16. Taim ol hevi i laik daunim yumi, yumi ken mekim wanem?
16 Taim ol hevi i laik daunim yu, tingim dispela samting: Jehova i bin laikim tru Abraham, na olsem tasol Jehova i save laikim yu tru. Em i laik bai yu winim ol hevi. (Filipai 1:6) Yu mas bilip na wetim Jehova na save tru olsem “God i . . . no inap larim wanpela bilong ol traim i kamap long yupela, em i winim strong bilong yupela. . . . God bai i wokim rot bilong helpim yupela. Dispela rot i olsem. Em bai i mekim yupela i sanap strong, na dispela traim bai i no inap daunim yupela.” (1 Korin 10:13) Kisim pasin bilong ritim Baibel long olgeta de. (Song 1:2) Beten oltaim na askim Jehova long helpim yu long sanap strong na no ken les. (Filipai 4:6) Em bai “givim Holi Spirit long ol man i askim em.” (Luk 11:13) Mekim wok long ol samting Jehova i givim long yumi bilong helpim yu long stap strong long ol samting bilong spirit, olsem ol buk na nius bilong Baibel yumi save kisim. Na tu, kisim helpim long ol brata. (1 Pita 2:17) Go oltaim long ol miting Kristen, long wanem, bai yu kisim ol tok bilong strongim yu bambai yu inap sanap strong. (Hibru 10:24, 25) Yu mas amamas long bilip olsem, pasin bilong yu long sanap strong na karim hevi, dispela i mekim na God bai orait long yu, na tu, pasin bilong yu long i stap gut long em i save mekim bel bilong em i amamas!—Sindaun 27:11; Rom 5:3-5.
17. Bilong wanem ol Kristen i no save larim ol hevi i daunim ol olgeta?
17 Jehova i laikim tru Abraham olsem “pren” bilong em. (Jems 2:23) Tasol planti traim na hevi i bin painim Abraham. Olsem na ol Kristen i mas save, wankain samting bai painim ol tu nau long dispela taim nogut bilong “las de.” Baibel i toksave olsem “ol man nogut na ol giaman profet ol bai i wok long giamanim ol manmeri.” (2 Timoti 3:1, 13) Yu no ken larim ol hevi i daunim yu olgeta. Ol hevi i painim yumi long nau i makim olsem pinis bilong dispela pasin nogut bilong graun Satan i bosim, em i klostu pinis. Tasol Jisas i tok, “ol manmeri i stap strong inap long las de, God bai i kisim bek ol.” (Matyu 24:13) Olsem na yumi “no ken les long mekim gutpela pasin”! Bihainim pasin bilong Abraham na stap insait long dispela lain “i bilip tru na i no les kwik, na ol i kisim olgeta samting bipo God i tok long givim long ol.”—Hibru 6:12.
Yu Tingim?
• Bilong wanem lain bilong Jehova long nau i mas save, ol traim na hevi bai painim ol?
• Wanem sampela pasin bilong Satan long pait long yumi long ples klia?
• Taim sampela kros i kamap namel long ol Kristen, ol inap stretim olsem wanem?
• Pasin antap na tingim yumi yet i samting tru, olsem wanem dispela inap kamapim hevi?
• Olsem wanem Abraham i stap gutpela piksa long wetim ol promis bilong God i kamap tru?
[Piksa long pes 26]
Planti yangpela Kristen i kisim hevi long ol narapela yangpela i save tok bilas long ol
[Piksa long pes 29]
Long taim bilong Abraham, truim bilong ol promis bilong God i stap “longwe tru,” tasol em i larim ol dispela promis i bosim olgeta samting em i mekim