‘Yupela i Mas Strongim Bel’
“Yupela i mas sanap strong, olsem bai yupela i ken bihainim laik bilong God. Na yupela i ken kisim ol gutpela samting, bipo God i promis long givim yupela.”—HIBRU 10:36.
1, 2. (a) Wanem samting i bin painim sampela Kristen long taim bilong ol aposel? (b) Wanem ol samting inap mekim na bilip bilong yumi i no strong moa?
PLANTI taim aposel Pol i toktok long bilip, winim ol narapela man bilong raitim Baibel. Na planti taim em i toktok long ol man em bilip bilong ol i no strong moa o i dai pinis. Em i stori long Himeneus na Aleksander, em “bilip bilong ol i bagarap olgeta olsem sip i bruk long rip.” (1 Timoti 1:19, 20) Demas i lusim Pol, long wanem, “em i laikim tumas ol pasin bilong dispela graun.” (2 Timoti 4:10) Sampela i mekim ol pasin i no stret long ol Kristen i mekim, na long dispela pasin ‘ol i lusim pinis bilip.’ Na sampela i bihainim ol save giaman na dispela i paulim ol na ‘ol i lusim pasin bilong bilip.’—1 Timoti 5:8; 6:20, 21.
2 Wanem samting i mekim na ol dispela Kristen God i bin makim ol i lusim bilip olsem? Tingim dispela samting: “Pasin bilong bilip em i olsem. Yumi save gut tru olsem, olgeta gutpela samting God i promis pinis long givim yumi na yumi wet long kisim, em bai yumi kisim tru. Maski ai bilong yumi i no lukim ol dispela samting, yumi save gut tru olsem, dispela olgeta samting i stap.” (Hibru 11:1) Yumi bilip long samting yumi no inap lukim. Yumi no gat wok long bilip long ol samting yumi save lukim. I no hatwok long yumi wok strong long kisim planti mani kago samting em yumi inap lukim; tasol i hatwok long yumi wok strong long kisim planti samting bilong spirit em yumi no inap lukim. (Matyu 19:21, 22) Planti samting yumi inap lukim—olsem ol samting “bel i kirap” long en na yumi “aigris” long en—skin bilong yumi i gat sin em i laikim tru ol dispela samting, na ol inap mekim na bilip bilong yumi i no strong moa.—1 Jon 2:16.
3. Kristen i mas wok long kisim wanem kain bilip?
3 Tasol Pol i tok, “man i laik i go klostu long God, em i mas bilip olsem God i stap, na em i mas bilip olsem God i save mekim gut tru long ol man i wok long painim em.” Moses i gat kain bilip olsem. Em “i ting long dispela gutpela pe God i laik givim em,” na em “i mekim wankain pasin olsem man i bin lukim God, na em i stap strong tru.” (Hibru 11:6, 24, 26, 27) Kristen i mas i gat kain strongpela bilip olsem. Olsem yumi lukim pinis long stori i kamap paslain long dispela, Abraham i stap olsem gutpela piksa tru long dispela samting.
Abraham i Gat Strongpela Bilip
4. Bilip bilong Abraham i mekim wanem long i stap bilong em i go inap long taim em i dai?
4 Abraham i bin sindaun long Ur taim God i tok promis long em olsem em bai kamapim wanpela pikinini na dispela pikinini bai mekim gut long olgeta lain bilong graun. (Stat 12:1-3; Aposel 7:2, 3) Abraham i tingim dispela tok promis na em i bihainim tok bilong Jehova—pastaim em i go long Haran na bihain em i go long Kenan. Long Kenan Jehova i tok promis long givim dispela graun long lain tumbuna pikinini bilong Abraham. (Stat 12:7; Nehemia 9:7, 8) Tasol planti samting long ol tok promis God i bin givim long Abraham ol i bilong kamap tru bihain long taim Abraham i dai. Olsem: Abraham yet i no gat wanpela hap graun bilong em long Kenan—em i gat dispela hul bilong ston ol i kolim Makpela, em i bin baim olsem ples matmat, em tasol. (Stat 23:1-20) Tasol em i bilip long tok bilong Jehova. Na em i bilip na wetim “dispela taun i stap strong tru, em dispela taun God wanpela tasol i bin tingim pasin bilong wokim na em yet i bin wokim.” (Hibru 11:10) Kain strongpela bilip olsem i bin strongim em i go inap long taim em i dai.
5, 6. Long ol samting bilong tok promis bilong Jehova, wanem samting i traim bilip bilong Abraham?
5 Dispela i kamap klia long ol samting bilong dispela tok promis olsem ol tumbuna pikinini bilong Abraham bai kamap bikpela lain tru. Bilong dispela samting i ken kamap, Abraham i mas i gat wanpela pikinini man, na em i wet longtaim tru long kisim dispela pikinini. Em i gat hamas krismas taim em i bin harim tok promis bilong God pastaim, em yumi no save. Tasol taim em i kirap na i go long Haran, Jehova i no givim yet wanpela pikinini long em. (Stat 11:30) Em i stap long Haran longpela taim liklik, inap long em i ken kisim planti samting na kisim “ol wokman na wokmeri,” na taim em i go long Kenan, em i gat 75 krismas na Sara i gat 65 krismas. Tasol tupela i no gat wanpela pikinini man. (Stat 12:4, 5) Taim Sara i gat 75 krismas samting, em i ting em i lapun pinis na em i no inap kamapim wanpela pikinini bilong Abraham. Olsem na em i bihainim wanpela pasin bilong dispela taim bipo na em i givim wokmeri bilong em, Hagar, long Abraham, na Abraham i kamapim wanpela pikinini man long dispela wokmeri. Tasol em i no dispela pikinini God i bin tok promis long en. Bihain Abraham i salim Hagar wantaim pikinini bilong em Ismael i go. Tasol taim Abraham i krai long Jehova long helpim ol, Jehova i tok promis long em bai mekim gut long Ismael.—Stat 16:1-4, 10; 17:15, 16, 18-20; 21:8-21.
6 Long taim God yet i makim—bihain bihain long taim tupela i bin harim tok promis bilong em long namba wan taim—Abraham, em i gat 100 krismas, na meri bilong em Sara, em i gat 90 krismas, tupela i gat wanpela pikinini man, em Aisak. Em gutpela samting tru, a? Long dispela tupela lapun, i olsem tupela i kirap bek long matmat, na bodi bilong tupela em pastaim i olsem “i dai pinis,” nau i kamapim wanpela nupela pikinini. (Rom 4:19-21) Tru, tupela i wet longtaim, tasol taim God i truim tok promis bilong em, tupela i kisim gutpela samting tru.
7. Olsem wanem bilip i poroman wantaim pasin bilong sanap strong?
7 Pasin bilong Abraham i soim yumi olsem yumi no ken holim bilip inap long sotpela taim tasol na yumi lusim. Pol i bungim bilip wantaim pasin bilong sanap strong. Em i tok: “Yupela i mas sanap strong, olsem bai yupela i ken bihainim laik bilong God. Na yupela i ken kisim ol gutpela samting, bipo God i promis long givim yupela. . . . Tasol yumi no man bilong surik na lus. Nogat tru. Yumi ol manmeri bilong bilip na kisim laip.” (Hibru 10:36-39) Planti ol i bin wet longtaim tru long kisim ol gutpela samting God i bin tok promis long givim long ol. Sampela i bin wet i go inap long taim ol i lapun pinis. Strongpela bilip bilong ol i bin strongim ol. Na olsem Abraham, ol bai kisim tru dispela gutpela pe long taim Jehova yet i makim.—Habakuk 2:3.
Putim Yau Long Tok Bilong God
8. Olsem wanem yumi save putim yau long tok bilong God long nau? Olsem wanem dispela bai strongim bilip bilong yumi?
8 I gat olsem 4-pela samting i bin strongim bilip bilong Abraham, na ol wankain samting inap helpim yumi tu. Namba wan samting i olsem: Taim Jehova i givim tok long Abraham, em i putim gut yau long dispela tok, na long dispela pasin em i kamapim long ples klia bilip bilong em, em i “bilip olsem God i stap.” Olsem na em i narapela kain long ol Juda i stap long taim bilong Jeremaia, em ol i bilip long Jehova tasol ol i no bilip long tok bilong em. (Jeremaia 44:15-19) Long nau Jehova i save givim tok long yumi long rot bilong Baibel, em Tok bilong em. Pita i tok, tok bilong Jehova i olsem “lam i lait i stap long ples tudak . . . insait long bel bilong yupela.” (2 Pita 1:19) Taim yumi kaunim Baibel na tingim gut tok bilong en, bai yumi “kisim bikpela strong long ol gutpela tok yumi bilip long en.” (1 Timoti 4:6; Rom 10:17) Na tu, long dispela taim bilong las de, “wokboi i gat gutpela tingting” em i save givim kaikai bilong spirit long yumi “long taim bikman i makim,” na soim rot long yumi bambai yumi ken bihainim ol lo bilong Baibel na kisim gut as bilong ol tok profet. (Matyu 24:45-47) Bilong kisim strongpela bilip, em bikpela samting tru long yumi mas putim yau long tok Jehova i givim long yumi long ol dispela rot.
9. Wanem samting bai kamap sapos yumi bilip tru long ol samting ol Kristen i wet long en?
9 Abraham i bilip na wet long ol samting God i bin tok promis long en, na dispela i strongim bilip bilong em. “Em i bilip tru [long ol dispela tok promis], olsem man i save pinis long ol samting bai i kamap. Olsem na em i kamap ‘tumbuna bilong planti lain manmeri.’ ” (Rom 4:18) Dispela em i namba 2 samting inap helpim yumi. Yumi no ken lusim tingting olsem Jehova “i save mekim gut tru long ol man i wok long painim em.” Aposel Pol i tok: “Yumi bilip tru long [God bilong i stap oltaim] na yumi wetim em i mekim gut tru long yumi, olsem na olgeta taim yumi save mekim hatwok tru.” (1 Timoti 4:10) Sapos yumi bilip tru long ol gutpela samting ol Kristen i wet long en, orait olgeta samting yumi mekim long i stap bilong yumi bai kamapim long ples klia strongpela bilip bilong yumi, olsem Abraham i bin mekim.
Toktok Wantaim God
10. Wanem kain beten bai strongim bilip bilong yumi?
10 Abraham i toktok wantaim God, na dispela em i namba 3 samting i bin strongim bilip bilong em. Long nau yumi tu inap toktok wantaim Jehova, olsem beten long em long rot bilong Krais Jisas. (Jon 14:6; Efesus 6:18) Jisas i kamapim wanpela tok piksa bilong soim yumi olsem yumi mas beten oltaim, na bihain em i mekim dispela askim: “Taim Pikinini Bilong Man i kam, em bai i lukim ol manmeri i stap long graun ol i bilip, o nogat?” (Luk 18:8) Kain beten i save strongim bilip, i no olsem beten em man i kolim nating tasol. Bel i mas pilim tru. Olsem: Beten em bel i pilim tru, dispela i bikpela samting taim yumi laik skelim sampela bikpela samting yumi mas mekim, o taim wanpela bikpela hevi i painim yumi.—Luk 6:12, 13; 22:41-44.
11. (a) Taim Abraham i kamapim bel bilong em long God, dispela i strongim em olsem wanem? (b) Samting i bin painim Abraham, dispela inap skulim yumi long wanem samting?
11 Taim Abraham i wok long go lapun na Jehova i no givim yet dispela pikinini long em olsem em i bin tok promis long en, em i tingting planti na em i toktok wantaim God long dispela samting. Jehova i givim tok long em bilong strongim bilip bilong em long dispela. Orait wanem samting i kamap? Abraham “i bilipim tok bilong Bikpela. Olsem na Bikpela i kolim em stretpela man.” Orait nau Jehova i givim wanpela mak long Abraham bilong strongim tok bilong em. (Stat 15:1-18) Sapos yumi beten na kamapim bel bilong yumi long Jehova, na yumi bilip long ol tok promis bilong em long Baibel, na bihainim tok bilong em olsem man i bilip tru long em, orait Jehova bai strongim bilip bilong yumi tu.—Matyu 21:22; Jut 20, 21.
12, 13. (a) Taim Abraham i bihainim tok bilong Jehova bilong stiaim em, Jehova i mekim gut long em olsem wanem? (b) Wanem ol stori bai strongim bilip bilong yumi?
12 Namba 4 samting i bin strongim bilip bilong Abraham, em Jehova i sambai long em taim em i bihainim tok bilong Jehova bilong stiaim em. Taim Abraham i go bilong kisim bek Lot long han bilong ol king i bin kam pait long Sodom, Jehova i helpim em na em i winim pait. (Stat 14:16, 20) Abraham i stap olsem man bilong sindaun sotpela taim tasol long dispela graun ol tumbuna pikinini bilong em bai kisim, tasol Jehova i mekim gut long em na em i gat planti samting bilong skin. (Skelim wantaim Stat 14:21-23.) Jehova i stiaim wokboi bilong Abraham long painim wanpela gutpela meri bilong Aisak. (Stat 24:10-27) Tru tumas, Jehova i mekim gut long Abraham na “olgeta samting Abraham i mekim i kamap gutpela.” (Stat 24:1) Ol dispela samting i mekim na bilip bilong em i strong tru, na em i pas gut tru wantaim God Jehova, olsem na Jehova i kolim em olsem “pren bilong mi.”—Aisaia 41:8; Jems 2:23.
13 Olsem wanem? Long nau yumi inap holim strongpela bilip olsem? Yumi inap. Olsem Abraham i mekim, sapos yumi traim Jehova, olsem yumi bihainim ol tok bilong em, orait em bai mekim gut long yumi tu, na dispela bai strongim bilip bilong yumi. Olsem: Sapos yumi skelim Ripot Bilong Yia Bilong Wok Bilong 1998, bai yumi lukim olsem Jehova i bin mekim gut tru long planti wokboi bilong em taim ol i bihainim tok bilong em long autim gutnius long ol man.—Mak 13:10.
Strongpela Bilip Long Nau
14. Olsem wanem Jehova i bin mekim gut long wok ol i bin mekim long Kingdom Nius Namba 35?
14 Long Oktoba 1997, wok bilong tilim Kingdom Nius Namba 35 long olgeta hap bilong graun em i kamap gutpela tru, long wanem, planti milion Witnes ol i givim bel na wok strong long mekim dispela wok. Yumi ken tingim samting i bin kamap long Gana. Ol i tilim olsem 2 milion 500 tausen nius long 4-pela tok ples, na ol i kisim olsem 2,000 Baibel-stadi long dispela wok. Long Saiprus tupela Witnes i tilim Kingdom Nius na ol i lukim wanpela pris i bihainim ol. Bihain liklik ol i soim wanpela Kingdom Nius long em. Em i kisim pinis wanpela na em i tok: “Mi kirap nogut long ol tok i stap insait long en, olsem na mi laik tok amamas long ol man i wokim dispela nius.” Long Denmak, ol i tilim 1 milion 500 tausen Kingdom Nius na ol gutpela samting i kamap long en. Wanpela meri i save wok long gavman long dispela hap em i tok: “Tok bilong dispela nius em i bilong helpim olgeta man. I no hatwok long kisim gut, na nius i save kirapim man na em i gat laik long kisim sampela save moa. Tok bilong en i stret tru!”
15. Wanem ol stori i soim yumi olsem Jehova i mekim gut long wok bilong ol Witnes long autim tok long ol man i stap long olgeta hap?
15 Long 1998 ol i wok strong long autim tok long ol man i stap long olgeta hap—i no long haus bilong ol tasol. Long Kot Diwa tupela misineri marit i go long 322 sip i sua long bris na tupela i autim tok long ol boskru samting. Ol i tilim 247 buk, 2,284 magasin, 500 buklet, na planti handet liklik nius, na sampela video em ol boskru i ken lukim taim sip i ran long solwara. Long Kanada wanpela Witnes i go long wanpela woksop i save wokim ol hap bilong ka. Papa bilong woksop i laik harim, na brata i stap inap 4 na hap aua, tasol em i lusim olsem wanpela aua tasol long autim tok long dispela man, long wanem, sampela taim ol man i save kam bilong baim ol samting. Bihain tupela i stretim tok long mekim stadi long 10 klok nait. Tasol sampela taim ol i save kirapim stadi long biknait na pinis long 2 klok moningtaim. Ating i hatwok long stadi long ol kain taim olsem, tasol ol gutpela samting i kamap long en. Man i tingting pinis olsem em bai pasim woksop bilong em long olgeta Sande na bai em i ken i go long ol miting. I no longtaim na em wantaim famili bilong em ol i wok long kamap strong.
16. Wanem ol stori i soim yumi olsem buklet Yumi Mas Mekim Wanem? na buk Save i olsem strongpela tul long wok bilong autim tok na skulim ol man?
16 Buklet God i Laik Yumi Mas Mekim Wanem? na buk Save i Bringim Man Long Laip Oltaim ol i stap yet olsem strongpela tul long wok bilong autim tok na skulim ol man. Long Itali wanpela sister bilong misin i wetim bas na em i kisim Kingdom Nius long wanpela Witnes. Long de bihain long en, Witnes i kamap gen long em na em i kisim buklet Yumi Mas Mekim Wanem? Long olgeta de bihain long en, Witnes i mekim Baibel-stadi wantaim em olsem 10 minit i go inap 15 minit long dispela ples bilong kisim bas. Em i mekim olsem inap wanpela mun hap, na nau em i tingting pinis long lusim haus sister na go bek long ples bilong em long Guatemala na bai em i ken stadi yet. Long Malawi wanpela meri i strong long go long lotu, nem bilong em Lobina, em i no amamas taim ol pikinini meri bilong em i kirap stadi long Baibel wantaim ol Witnes Bilong Jehova. Tasol ol dispela yangpela meri i wok long givim tok i tru bilong Baibel long mama bilong ol taim i gat rot long mekim. Orait long Jun 1997, Lobina i lukim buk Save na em i kirap nogut long dispela tok “Save i Bringim Man.” Long Julai em i orait long stadi long Baibel. Long Ogas em i go long kibung distrik na em i putim gut yau long olgeta tok i kamap long kibung. Long pinis bilong mun Ogas, em i lusim pinis misin bilong em na em i winim mak bilong kamap wanpela pablisa i no baptais. Em i kisim baptais long Novemba 1997.
17, 18. Olsem wanem yumi save, ol video bilong Sosaiti i bin helpim ol man long “lukim” ol samting bilong spirit?
17 Ol video bilong Sosaiti i bin helpim planti man long “lukim” ol samting bilong spirit. Long Marisas wanpela man i lusim misin bilong em, long wanem, ol i no stap wanbel. Wanpela misineri i soim em long video United by Divine Teaching na bai em i ken lukim pasin wanbel bilong ol Witnes Bilong Jehova. Man i kirap nogut long dispela video na em i tok: “Yupela ol Witnes Bilong Jehova i stap pinis long Paradais!” Em i orait long stadi long Baibel. Wanpela sista long Japan i soim video long man bilong em i no bilip, nem bilong video, Jehovah’s Witnesses—The Organization Behind the Name. Dispela i kirapim em na em i stadi long Baibel long olgeta wik. Taim em i lukim video United by Divine Teaching, em i laik kamap wanpela Witnes Bilong Jehova. Wanpela stori i gat 3-pela hap na i stap long 3-pela video, nem bilong en The Bible—A Book of Fact and Prophecy, i helpim em long bihainim ol tok bilong Baibel long i stap bilong em. Orait taim em i lukim video Jehovah’s Witnesses Stand Firm Against Nazi Assault, dispela i soim em olsem Jehova i save strongim lain bilong Em long sakim Satan. Dispela man i kisim baptais long Oktoba 1997.
18 Em sampela tasol bilong planti planti stori bilong ol gutpela samting i bin kamap long yia bilong wok i go pinis. Ol i soim yumi olsem ol Witnes Bilong Jehova i gat kain bilip i save kirapim ol long mekim wok, na Jehova i mekim gut long wok bilong ol na long dispela rot em i strongim bilip bilong ol.—Jems 2:17.
Wok Long Kisim Bilip Long Nau
19. (a) Yumi winim Abraham long wanem ol samting? (b) Long yia i go pinis, hamas ol i kam long bung bilong tingim indai bilong Jisas? (c) Long yia i go pinis, wanem ol kantri i gat bikpela lain tru i bin kam long bung bilong Memorial? (Lukim sat long pes 12 i go inap 15.)
19 Long planti samting yumi ol man bilong nau i winim Abraham. Yumi save pinis olsem Jehova i bin truim olgeta tok promis em i bin mekim long Abraham. Ol tumbuna pikinini bilong Abraham i bin kisim tru graun bilong Kenan, na ol i bin kamap wanpela bikpela lain tru. (1 King 4:20; Hibru 11:12) Na tu, inap olsem 1,971 yia bihain long taim Abraham i lusim Haran, Jon Bilong Baptais i baptaisim wanpela tumbuna pikinini bilong Abraham, em Jisas, na bihain long en Jehova yet i baptaisim Jisas long spirit holi bilong kamap Mesaia, em Pikinini tru bilong Abraham long ol samting bilong spirit. (Matyu 3:16, 17; Galesia 3:16) Long Nisan 14, long yia 33 C.E., Jisas i givim laip bilong em olsem ofa bilong baim bek ol man em ol bai bilip long em. (Matyu 20:28; Jon 3:16) Nau planti milion manmeri ol inap kisim blesing long rot bilong em. Long yia i go pinis, inap 13,896,321 ol i bin bung long Nisan 14 bilong tingim dispela bikpela pasin sori tru Jisas i bin mekim. Em nau, dispela i kamapim klia olsem i stret Jehova i stap King bilong heven na graun, em Bikpela Man bilong bihainim ol tok promis bilong em!
20, 21. Long taim bilong ol aposel, olsem wanem ol manmeri bilong olgeta lain ol i bin kisim blesing long rot bilong Pikinini bilong Abraham? Olsem wanem ol i kisim blesing long nau?
20 Long taim bilong ol aposel, planti manmeri bilong olgeta lain—kirap long ol Israel bilong skin—ol i bilip long dispela Pikinini bilong Abraham na ol i kamap pikinini bilong God em i makim ol pinis, na ol i insait long wanpela nupela lain “Israel tru bilong God,” em Israel bilong spirit. (Galesia 3:26-29; 6:16; Aposel 3:25, 26) Ol inap bilip na wet long kisim laip olsem spirit long heven na ol i no inap i dai, na ol bai stap king wantaim Krais long Kingdom bilong God. Inap 144,000 tasol bai kisim dispela kain blesing, na long nau i gat wan wan tasol i stap yet long graun. (KTH 5:9, 10; 7:4) Long yia i go pinis, 8,756 ol i kisim bret na wain long bung bilong Memorial, na long dispela rot ol i kamapim bilip bilong ol olsem ol i bilong dispela lain.
21 Klostu olgeta Witnes Bilong Jehova long nau ol i bilong dispela lain “planti manmeri tru” em Kamapim Tok Hait 7:9-17 i tok profet long en. Ol i kisim blesing long rot bilong Jisas, olsem na ol inap wet long kisim laip i stap oltaim long Paradais long graun. (KTH 21:3-5) I gat 5,888,650 ol i insait long wok bilong autim tok long 1998, na dispela i kamapim klia olsem dispela lain ol i “planti manmeri tru.” Yumi amamas tru long lukim ripot bilong Rasia na Yukren, em tupela wantaim i winim 100,000 pablisa—em namba wan taim ol i bin mekim olsem. Na yumi amamas tu long ripot bilong Yunaitet Stets—i gat 1,040,283 pablisa long Ogas! Dispela em 3-pela tasol bilong 19 kantri ol i bin winim 100,000 pablisa long yia i go pinis.
Klostu Nau Ol Bai Kisim Gutpela Samting Ol i Wet Long En
22, 23. (a) Bilong wanem yumi mas strongim bel long nau? (b) Olsem wanem yumi ken kamapim klia olsem yumi wankain olsem Abraham, na yumi no olsem ol man i no gat bilip, em Pol i toktok long ol?
22 Ol manmeri i bin go long Memorial ol i harim ol tok i kirapim ol long tingim gen olsem nau yumi stap klostu tru long taim Jehova bai truim ol tok promis bilong em. Long 1914, Jisas i kamap King long Kingdom bilong God, na long dispela taim em i kam i stap na kisim strong bilong bosim Kingdom. (Matyu 24:3; KTH 11:15) Em nau, Pikinini bilong Abraham i stap King pinis long heven! Jems i tokim ol Kristen i stap long taim bilong em: “Strongim bel na stap isi na karim ol hevi i kamap long yupela. Taim bilong Bikpela i kam bek em i klostu tru. Olsem na bel bilong yupela i mas i stap strong.” (Jems 5:8) Nau Jisas i kam i stap pinis! Em gutpela as tru na yumi ken strongim bel!
23 Long olgeta taim yumi mas stadi long Baibel na beten, bambai yumi ken bilip strong oltaim long ol tok promis bilong God. Yumi mas bihainim tok bilong Jehova bambai em i ken wok yet long mekim gut long yumi. Sapos yumi mekim olsem, bai yumi wankain olsem Abraham; bai yumi no olsem ol man Pol i toktok long ol, em bilip bilong ol i go liklik na i dai olgeta. I no gat wanpela samting inap tekewe yumi long dispela gutpela bilip yumi holim. (Jut 20) Yumi beten long olgeta wokboi bilong Jehova bai stap strong olsem long yia bilong wok bilong 1999 na i go inap oltaim oltaim bihain.
Yu Save?
◻ Olsem wanem yumi inap putim yau long tok bilong God long nau?
◻ Taim yumi beten long God na pilim tru long bel, dispela inap helpim yumi olsem wanem?
◻ Sapos yumi bihainim ol tok bilong Jehova bilong stiaim yumi, dispela bai strongim bilip bilong yumi olsem wanem?
◻ Wanem ol samting long ripot bilong yia (pes 12 i go inap 15) yu amamas tru long en?
[Sat long pes 12-15]
RIPOT BILONG WOK BILONG OL WITNES BILONG JEHOVA LONG 1998
(Bilong save ol dispela rait i stap we long pes, lukim buk o magasin.)
[Piksa long pes 16]
Sapos yumi putim yau long Tok Bilong Jehova, bai yumi bilip strong moa long ol tok promis bilong em
[Piksa long pes 18]
Taim yumi mekim wok bilong autim tok, dispela i save strongim bilip bilong yumi