Yu No Ken Lusim Resis Bilong Kisim Laip!
“Yumi mas strongim bel na ran strong long dispela resis God i bin makim bilong yumi ran long en.”—HIBRU 12:1.
1, 2. Nau long taim bilong las de, wanem ol samting i kamap na i kirapim tru ol wokboi bilong Jehova?
YUMI stap long wanpela taim i kirapim tru yumi, na em i taim bilong planti hevi tu. Inap 80 yia samting i go pinis, long yia 1914, Jisas i kamap King long Kingdom bilong God. Long dispela taim, “de bilong Bikpela” na “taim bilong las de” i kirap. (KTH 1:10; Daniel 12:9) Bihain long dispela yia ol Kristen i mas ran strong moa yet long resis bilong kisim laip. Ol wokboi bilong God i bin taitim bun tru bambai ol i ken wokabaut wantaim karis bilong Jehova long heven, em oganaisesen bilong em long heven, em i wokabaut i go bilong kamapim ol laik bilong Jehova na i no gat wanpela samting inap pasim.—Esekiel 1:4-28; 1 Korin 9:24.
2 Olsem wanem? Lain bilong Jehova i bin kisim amamas taim ol i ‘ran long resis’ i go bilong kisim laip i stap oltaim? Tru tumas! Ol i bin amamas tru long lukim wok bilong bungim hap lain bilong ol brata bilong Jisas ol i stap yet long graun, na ol i amamas long save olsem wok bilong putim mak long hap lain bilong 144,000 ol i stap yet long graun, klostu bai i pinis. (KTH 7:3, 4) Na tu, ol i amamas long kisim save olsem dispela King Jehova i bin makim em i putim pinis naip bilong em bilong katim “olgeta kaikai bilong graun i mau pinis.” (KTH 14:15, 16) Na planti kaikai tru i redi long gaden! (Matyu 9:37) King i bungim pinis planti manmeri, winim 5 milion—em “planti manmeri tru . . . , i no inap man i kaunim namba bilong ol. Dispela ol manmeri ol i bilong olgeta lain man na bilong olgeta kantri na bilong olgeta kain skin na bilong olgeta tok ples.” (KTH 7:9) I no gat wanpela man i save, dispela lain bai i go bikpela inap long wanem mak, long wanem, i no gat wanpela man inap kaunim namba bilong dispela lain.
3. Wanem ol hevi i stap tasol yumi mas wok strong oltaim long kisim pasin bilong bel i amamas?
3 Tru, Satan i wok strong long pundaunim yumi o mekim yumi i lusim pasin bilong spit i go long dispela resis na bai yumi les na ran isi tasol. (KTH 12:17) Na yumi bin hatwok long ran yet long dispela resis, long wanem, i gat ol bikpela pait, na bikpela hangre, na ol bikpela sik, na ol narapela hevi i kamap, em ol i olsem mak bilong taim bilong las de. (Matyu 24:3-9; Luk 21:11; 2 Timoti 3:1-5) Tasol pinis bilong dispela resis i wok long kam klostu moa, na bel bilong yumi i amamas tru. Yumi wok strong long kisim wankain tingting olsem Pol i bin tokim ol wanwok Kristen long kisim: “Oltaim yupela i mas amamas long Bikpela.”—Filipai 4:4.
4. Ol Kristen bilong Filipai i gat wanem kain pasin?
4 Ol Kristen em Pol i bin raitim dispela pas i go long ol, ol i kisim amamas long bilip bilong ol. Yumi save long dispela, long wanem, Pol i tokim ol: “Yupela i mas [“wok yet long,” NW] amamas long Bikpela.” (Filipai 3:1) Kongrigesen Filipai i gat pasin bilong givim planti samting long ol narapela, na ol i laikim tru ol narapela insait long kongrigesen, na ol i wok strong long mekim wok bilong God. (Filipai 1:3-5; 4:10, 14-20) Tasol i no olgeta Kristen long taim bilong ol aposel ol i gat dispela pasin. Sampela Juda Kristen em Pol i bin raitim Buk Hibru i go long ol, pasin bilong ol i mekim na em i tingting planti long ol.
‘Holim Strong Dispela Tok Long Tingting’
5. (a) Taim namba wan kongrigesen Kristen i kamap, ol Kristen Hibru i gat wanem kain tingting na pasin? (b) Stori long tingting na pasin bilong sampela Kristen Hibru long yia olsem 60 C.E.
5 Namba wan kongrigesen Kristen i bin kamap long graun i gat ol Juda na ol manmeri bilong ol narapela lain i bihainim lotu Juda, na em i bin kamap long Jerusalem long yia 33 C.E. Dispela kongrigesen i gat wanem tingting na pasin? Sapos yumi kaunim ol sapta i stap long namba wan hap bilong Buk Aposel, bai yumi kisim save olsem dispela kongrigesen i givim bel tru long mekim wok na ol i amamas, maski ol man i mekim nogut long ol. (Aposel 2:44-47; 4:32-34; 5:41; 6:7) Tasol bihain sampela senis i kamap long tingting bilong ol, na ol i no ran strong moa long resis bilong kisim laip—ol i les na ran isi tasol. Wanpela buk i stori long pasin i stap namel long ol long yia 60 C.E. samting, olsem: “Bun bilong ol i slek na skin bilong ol i les; ol samting ol i wet long en i no kamap, na i olsem ol i wet longtaim long kisim samting ol i bilip na wet long en; long laik bilong ol yet ol i pundaun long mekim wok bilong ol, na ol i no bihainim pasin bilong bilip. Ol i Kristen, tasol ol i no pilim tru gutpela samting ol i kisim, olsem ol i insait long lain bilong go long heven.” Olsem wanem ol Kristen God i bin makim ol inap kamap slek olsem? Orait sapos yumi skelim sampela hap bilong pas Pol i raitim i go long ol Hibru (em i bin raitim long yia 61 C.E. samting), dispela bai helpim yumi long bekim dispela askim. Taim yumi skelim ol dispela tok, dispela bai helpim yumi olgeta long nau bambai yumi no ken kamap slek long ol samting bilong spirit.
6. Pasin bilong lotu aninit long Lo Bilong Moses i narapela kain olsem wanem long lotu em pasin bilong bilip long Krais Jisas i as bilong en?
6 Pastaim ol Kristen Hibru i bin stap insait long lotu bilong ol Juda, em ol i tok ol i bihainim Lo Jehova i bin givim long Moses. I olsem dispela Lo i wok yet long pulim tingting bilong planti Juda Kristen, na ating as bilong en i olsem: Inap planti handet yia pinis ol i gat dispela wanpela rot tasol bilong i go klostu long Jehova, na i gat ol lain pris, na ol ofa ol i save mekim long olgeta taim, na wanpela bikpela haus lotu long Jerusalem i gat nem long olgeta hap bilong graun. Tasol lotu Kristen i narapela kain. Lain bilong en i mas tingting long ol samting bilong spirit olsem Moses i bin mekim, “em i ting long dispela gutpela pe God i laik givim em [long bihain]” na em “i mekim wankain pasin olsem man i bin lukim God, na em i stap strong tru.” (Hibru 11:26, 27) I olsem planti Juda Kristen i no bin tingting long ol samting bilong spirit. Ol i gat tupela tingting, i olsem lek bilong ol i nogut na ol i no ran strong olsem man i tingting strong long kamap long mak.
7. Pasin bilong graun bipo yumi bin stap insait long en, em inap mekim wanem long pasin bilong yumi long ran long resis bilong kisim laip?
7 Orait olsem wanem? Kain pasin olsem i stap long nau tu? I no wankain stret. Tasol pastaim ol Kristen i bin stap insait long ol lain bilong graun i save mekim planti tok hambak. Ol lain bilong dispela graun i save tok ol inap givim rot long man long kisim planti samting, olsem amamas o biknem samting, tasol dispela graun i save putim planti hevi tu long ol man. Na tu, planti namel long yumi ol i save sindaun long ol kantri em planti man i no bilip tumas long ol samting, na ol i tingim skin bilong ol yet tasol na ol i tingim ol yet i namba wan. Tasol sapos yumi larim dispela kain tingting bilong graun i pulim yumi, bai ‘tingting bilong yumi’ i no gat lait long en—i olsem ai bilong yumi i no inap lukluk gut. (Efesus 1:18) Olsem wanem bai yumi inap ran strong long resis bilong kisim laip sapos yumi no inap lukim gut rot yumi go long en?
8. Lotu Kristen i winim lotu aninit long Lo Bilong Moses long wanem ol samting?
8 Bilong kirapim tingting bilong ol Juda Kristen, Pol i tokim ol olsem pasin ol Kristen i aninit long en i winim Lo Bilong Moses. Tru, taim lain Israel i stap yet olsem lain bilong Jehova na ol i aninit long Lo, Jehova i givim tok long ol long rot bilong ol profet em spirit holi i stiaim tingting bilong ol. Tasol Pol i tok, long dispela taim nau Jehova i save givim tok long yumi “long maus bilong Pikinini Man bilong em. God i makim dispela Pikinini pinis bilong kisim olgeta samting.” (Hibru 1:2) Na tu, Jisas i winim tru ol king i bin kamap long lain bilong Devit, olsem “ol poroman” bilong em. Na em i winim tu ol ensel.—Hibru 1:5, 6, 9.
9. Olsem ol Juda Kristen long taim bilong Pol, bilong wanem yumi tu i mas “holim strong long tingting” ol tok bilong Jehova?
9 Pol i tokim ol Juda Kristen: “Dispela tok yumi harim pinis, yumi mas holim strong long tingting na bihainim gut. Nogut yumi slek long bihainim dispela tok na yumi lusim olgeta.” (Hibru 2:1) Taim ol i kisim save long Krais, dispela i wanpela gutpela blesing tru ol i kisim, tasol ol i mas mekim sampela samting moa. Tok Bilong God ol i harim, ol i mas holim strong long tingting bambai ol inap sakim tingting bilong ol Juda i stap nabaut klostu long ol. Yumi tu i mas “holim strong long tingting” ol tok bilong Jehova, long wanem, i gat planti tok gris ol lain bilong dispela graun ol i wok long mekim na em inap pulim tingting bilong yumi. Olsem na yumi mas kisim pasin bilong stadi gut na makim taim bilong kaunim Baibel oltaim. Narapela tok Pol i mekim long pas em i bin raitim long ol Hibru em i tok, long olgeta taim yumi mas go long ol miting na autim bilip bilong yumi long ol man. (Hibru 10:23-25) Ol dispela wok bai helpim yumi long tingim gut ol samting bilong spirit na bai yumi inap lukluk i go oltaim long ol gutpela samting yumi wet long en. Sapos yumi putim ol tingting bilong Jehova i go long tingting bilong yumi, orait maski wanem wanem samting ol lain bilong dispela graun ol inap mekim long yumi, bai ol i no inap daunim yumi o mekim yumi i pundaun.—Song 1:1-3; Sindaun 3:1-6.
“Givim Gutpela Tok Long Ol Arapela”
10. (a) Wanem samting inap painim yumi sapos yumi no “holim strong long tingting” ol tok bilong Jehova long Baibel? (b) Olsem wanem yumi ken wok yet long “givim gutpela tok long ol arapela”?
10 Sapos yumi no holim strong ol samting bilong spirit long tingting bilong yumi, ating bihain bai yumi ting olsem ol tok promis bilong God i no samting tru. Dispela samting i bin kamap long taim bilong ol aposel; long dispela taim olgeta Kristen insait long ol kongrigesen em ol lain God i bin makim long spirit holi na i gat sampela aposel i stap yet. Pol i bin givim tok lukaut long ol Hibru olsem: “Ol brata, yupela i mas was gut. Nogut wanpela brata namel long yupela em i gat tingting nogut long bel bilong en na em i lusim bilip na i givim baksait long God i gat laip. . . . Olsem na long olgeta de yupela wan wan i mas givim gutpela tok long ol arapela manmeri bilong God, na kirapim tingting bilong ol, nogut pasin bilong sin i giamanim wanpela bilong yupela na em i pasim strong bel bilong en.” (Hibru 3:12, 13) Dispela tok bilong Pol, olsem “was gut,” i soim yumi olsem tingting bilong yumi i mas klia. Bagarap inap painim yumi! Pasin bilong lusim bilip—olsem “sin”—inap kamap long bel bilong yumi, na yumi surik i go longwe long God. (Jems 4:8) Pol i tokim yumi, “long olgeta de yupela wan wan i mas givim gutpela tok long ol arapela.” Yumi mas bung wantaim ol brata, em ol i save mekim gut bel bilong yumi. “Man i save stap wanpis, em i save tingting long em yet tasol. Maski sapos ol arapela man i gat gutpela tingting, dispela man i no laikim tingting bilong ol.” (Sindaun 18:1) Ol Kristen bilong nau ol i pilim olsem ol i mas bung wantaim ol brata, na dispela i save kirapim ol long go oltaim long ol miting bilong kongrigesen, na ol liklik na bikpela kibung.
11, 12. Bilong wanem yumi no ken ting sapos yumi kisim save long ol as tok tasol bilong ol bilip Kristen, dispela em inap long yumi?
11 Long dispela pas Pol i givim sampela gutpela tok moa long ol Hibru, em i tok: “Yupela i kamap Kristen longpela taim pinis, na inap yupela i wok long skulim ol arapela long ol tok bilong God. Tasol nogat. Yupela i sot long tingting, na ol arapela man i mas skulim yupela gen long ol namba wan hap tru bilong tok bilong God. Yupela i no redi yet long kisim strongpela kaikai. Nogat. Yupela i dring susu i stap yet. . . . Tasol strongpela kaikai em i bilong ol man i kamap bikpela pinis. Ol kain man olsem ol i bin traim planti taim long skelim wanem ol pasin i gutpela na wanem ol pasin i nogut, na nau ol i save gut pinis na tingting bilong ol i klia.” (Hibru 5:12-14) Ating sampela Juda Kristen i no bin wok i go moa long kamap strong long pasin bilong skelim gut ol samting long tingting. Lait i wok long kamap long ol samting bilong Lo na pasin bilong katim skin, tasol ol i isi tumas long kisim dispela lait. (Aposel 15:27-29; Galesia 2:11-14; 6:12, 13) Ating sampela i tingim yet pasin ol tumbuna i bin bihainim, olsem Sabat bilong olgeta wik, na Bikpela De Bilong God i Tekewe Sin Bilong Ol Manmeri, em i save kamap long olgeta yia, na ol i ting ol dispela de i bikpela samting.—Kolosi 2:16, 17; Hibru 9:1-14.
12 Olsem na Pol i tok: “Orait yumi no ken toktok tasol long ol skul yumi save kisim pastaim long tok bilong Krais. . . . Yumi mas kisim olkain skul bilong ol man i bikpela pinis.” (Hibru 6:1, 2) Man bilong ran long wanpela longpela resis tru, sapos em i skelim gut ol kaikai em i save kisim, bai em inap ran long dispela resis i gat hatwok long en, na bai skin bilong em i no ken les hariap. Na Kristen tu i wankain. Sapos em i skelim gut ol kaikai bilong spirit em i save kisim—olsem em i no kisim tasol ol as tok bilong Baibel, olsem “ol skul yumi save kisim pastaim”—dispela bai helpim em long ran yet long dispela resis na kamap long mak. (Skelim wantaim 2 Timoti 4:7.) Bilong mekim olsem, yumi mas kisim laik long save gut long tok i tru, em dispela save “i bikpela tru, na i go longpela moa, na i go antap tru, na i go daun moa,” na dispela bai helpim yumi long kamap strong.—Efesus 3:18.
“Yupela i Mas Sanap Strong”
13. Long taim bipo, olsem wanem ol Kristen Hibru i bin kamapim klia olsem ol i holimpas bilip?
13 Bihain stret long Pentikos bilong yia 33 C.E., ol Juda Kristen i bin sanap strong, maski ol man i mekim nogut tru long ol. (Aposel 8:1) Ating Pol i tingim dispela samting taim em i tok: “Yupela i mas tingim gen dispela taim bipo, taim yupela i kisim lait bilong God. Long dispela taim ol i bin givim ol bikpela hevi long yupela, na yupela i karim planti pen. Tasol yupela i sanap strong na sakim ol dispela hevi.” (Hibru 10:32) Ol i bin stap gut long God na sanap strong, na dispela i kamapim klia olsem ol i laikim tru God; na tu, em i strongim ol na ol i no pret long autim tok bilong em. (1 Jon 4:17) Pol i tok strong olsem nogut bilip bilong ol i go slek na nau ol i pret long tokaut. Em i tokim ol: “Yupela i mas sanap strong, olsem bai yupela i ken bihainim laik bilong God. Na yupela i ken kisim ol gutpela samting, bipo God i promis long givim yupela. Yes, ‘I no longtaim. Liklik taim tasol, na dispela man i laik kam, em bai i kam. Em bai i kam kwik.’ ”—Hibru 10:35-37.
14. Wanem ol samting i mas helpim yumi long sanap strong maski yumi bin mekim wok bilong Jehova inap planti yia?
14 Orait olsem wanem long yumi long nau? Ating yumi olgeta, taim yumi lainim tok i tru bilong ol Kristen long pastaim, yumi bin givim bel tru long en. Tasol olsem wanem? Yumi givim bel yet long en? O nau yumi lusim pinis dispela laik yumi bin holim ‘taim yumi bilip nupela’? (KTH 2:4) Olsem wanem? Dispela laik bilong yumi i kol pinis, olsem yumi ting samting yumi bin wet long en i no kamap na yumi bel hevi long dispela, o yumi les long wetim Armagedon i kam? Tasol tingim dispela samting: Taim yu bin kisim tok i tru long pastaim, yu ting em i wanpela gutpela samting tru; tasol nau tu em i gutpela samting tru. Na Jisas i stap yet olsem King bilong yumi long heven. Yumi bilip na wet yet long kisim laip i stap oltaim long Paradais long graun, na yumi pas gut yet wantaim Jehova. Na yu no ken lusim tingting: “Dispela man i laik i kam, em bai i kam. Em bai i kam kwik.”
15. Sampela Kristen i bin karim wanem bikpela hevi long han bilong ol man tasol ol i sanap strong olsem Jisas i bin mekim?
15 Olsem na tok bilong Pol long Hibru 12:1, 2 i stret tru, em i tok: “Yumi mas lusim olgeta kain samting i mekim yumi i no inap ran strong, na [dispela] sin [olsem pasin bilong lusim bilip] i save pas long yumi. Na yumi mas strongim bel na ran strong long dispela resis God i bin makim bilong yumi ran long en. Yumi mas lukluk i go long Jisas, em i as bilong bilip bilong yumi, na bihain em bai inapim tru bilip bilong yumi. Jisas i save, sapos em i bihainim tru tok bilong God, orait bihain em bai i stap gut na amamas moa yet. Na em i tingting long dispela na em i stap strong, na em i karim pen na i dai long diwai . . . Tasol Jisas i no wari long sem em bai i kisim, na em i dai. Na nau em i sindaun long han sut bilong sia king bilong God.” I gat planti hevi na pen ol wokboi bilong God i bin karim nau long dispela taim bilong las de. Olsem Jisas i bin stap gut long God i go inap long taim ol i kilim em i dai, sampela brata sista bilong yumi ol tu i bin stap gut long God maski ol man i mekim nogut tru long ol—ol i kalabusim ol long ol banis kalabus, na givim bikpela pen long ol, na reipim ol, na kilim i dai sampela. (1 Pita 2:21) Taim yumi tingim pasin bilong ol long i stap gut long God, bel bilong yumi i pilim tru na yumi laikim ol moa yet, a?
16, 17. (a) Planti Kristen i gat wanem hatwok long holimpas bilip bilong ol? (b) Yumi mas tingim wanem samting na dispela bai helpim yumi long ran strong yet long resis bilong kisim laip?
16 Tasol tok Pol i mekim bihain long dispela, em i stret long planti brata sista bilong yumi. Pol i tok: “Tru, yupela i bin pait long daunim sin, tasol long dispela pait blut bilong yupela i no kapsait yet.” (Hibru 12:4) Tasol long dispela taim yumi stap long en, yumi olgeta i gat hatwok long bihainim tok i tru. Sampela i bel hevi long harim ol tok bilas “ol man bilong sin” i mekim long tok i tru long ples wok o long skul, na ol man i lap na tok bilas long ol na subim ol long mekim rong, tasol ol i wok long sakim. (Hibru 12:3) Sampela bikpela traim i bin painim sampela brata sista na dispela i daunim strongpela tingting bilong ol long holimpas ol lo bilong God. (Hibru 13:4, 5) Na sampela i bin lusim pasin bilong sanap strong taim ol i harim tok gris, olsem marasin nogut, bilong ol man i bin lusim bilip na givim baksait long God. (Hibru 13:9) Na sampela i larim pasin bilong narapela i skrapim bel bilong ol na dispela i pinisim amamas bilong ol. Na sampela Kristen i tingting tumas long kisim ol amamas bilong skin na ol samting ol inap mekim long taim bilong malolo, na nau ol i no strong moa. Na klostu olgeta i pilim olsem ol hevi i save kamap long i stap bilong ol long dispela graun i wok long daunim ol.
17 Tru, ‘blut bilong ol i no kapsait.’ Na sampela hevi bilong yumi, ating as bilong en em sampela popaia bilong yumi yet, olsem yumi no bin skelim gut ol samting yumi mas mekim. Tasol olgeta dispela hevi i givim hatwok long yumi long holimpas bilip. Olsem na yumi mas lukluk i go stret long Jisas, em i stap olsem gutpela piksa tru long pasin bilong karim hevi na sanap strong. Yumi no ken lusim tingting long gutpela samting yumi wet long kisim. Na yumi no ken lusim dispela bilip bilong yumi olsem Jehova “i save mekim gut tru long ol man i wok long painim em.” (Hibru 11:6) Olsem bai yumi gat strong bilong ran yet long resis bilong kisim laip.
Yumi Inap Long Sanap Strong
18, 19. Wanem ol samting i bin kamap bipo na yumi ken ting ol Kristen Hibru i bihainim tok em Pol i bin givim long ol?
18 Ol Juda Kristen i ting olsem wanem long dispela pas bilong Pol? Inap olsem 6-pela yia bihain long taim em i bin raitim pas i go long ol Hibru, pait i kamap long Judia. Long yia 66 C.E., ol ami bilong Rom i kam banisim Jerusalem, na dispela i truim tok bilong Jisas, olsem: “Taim yupela i lukim ol ami i kam raunim Jerusalem i stap, orait yupela i ken save, taim bilong taun i mas bagarap em i klostu nau.” (Luk 21:20) Tasol bilong helpim ol Kristen em ol bai stap long Jerusalem long dispela taim, Jisas i tok moa olsem: “Long dispela taim ol manmeri i stap long distrik Judia ol i mas ranawe i go long ples maunten. Na ol man i stap insait long Jerusalem ol i mas lusim taun na i go long narapela hap. Na ol man i stap ausait long taun, ol i no ken i go insait long en.” (Luk 21:21) Olsem na dispela pait ol Juda i mekim wantaim Rom i olsem wanpela traim: Ol dispela Juda Kristen bai ranawe lusim Jerusalem, em nambawan ples bilong ol Juda long lotuim God na naispela haus lotu i stap long en?
19 Wantu tasol ol Rom i kirap na lusim Jerusalem, na i olsem i no gat as na ol i mekim. Ol Juda i save tingim lotu, ating taim ol i lukim dispela samting i kamap, ol i ting dispela i kamapim klia olsem God i lukautim taun holi bilong ol na em i no bagarap. Orait olsem wanem long ol Kristen? Stori bilong ol samting i bin kamap bipo i tok ol i ranawe. Orait long yia 70 C.E., ol Rom i kam bek na ol i bagarapim Jerusalem olgeta, na planti tausen tausen manmeri ol i bagarap. “De bilong Jehova” em Joel i bin tok profet long en, em i kamap pinis long Jerusalem. Tasol ol Kristen i stap gut long God ol i no stap moa long dispela taun. Ol i ranawe pinis na ‘ol i no bagarap.’—Joel 2:30-32, NW; Aposel 2:16-21.
20. Yumi save dispela bikpela “de bilong Jehova” i kam klostu pinis na dispela i mas kirapim yumi long mekim wanem ol samting?
20 Long nau yumi save, i gat narapela bikpela “de bilong Jehova” liklik taim bai painim olgeta hap bilong dispela graun. (Joel 3:12-14) Yumi no save wanem taim dispela de bai kamap. Tasol Baibel i tokim yumi pinis, dispela de bai kamap tru! Jehova i tok, em i no ken kam bihaintaim. (Habakuk 2:3; 2 Pita 3:9, 10) Olsem na “dispela tok yumi harim pinis, yumi mas holim strong long tingting na bihainim gut.” Yumi mas abrusim pasin bilong lusim bilip, em dispela “sin i save pas long yumi” sapos yumi no was gut. Tingting strong olsem yu bai karim ol hevi na sanap strong i go inap long pinis. Na tingim dispela samting: Oganaisesen bilong Jehova long heven i kain olsem wanpela traipela karis i wokabaut i go, na em bai kamapim tru ol laik bilong en. Olsem na yumi olgeta i mas ran strong yet na no ken lusim dispela resis bilong kisim laip!
Yu Tingim Yet?
◻ Yumi mas bihainim wanem tok Pol i bin givim long ol Filipai na dispela bai helpim yumi long ran strong yet long resis bilong kisim laip?
◻ Wanem samting bai helpim yumi long sakim pasin bilong dispela graun long pulim nabaut tingting bilong yumi?
◻ Olsem wanem narapela inap helpim narapela long ran strong yet long dispela resis?
◻ Wanem sampela samting inap pasim Kristen na em i no ran strong moa?
◻ Olsem wanem pasin bilong Jisas inap helpim yumi long karim hevi na sanap strong?
[Piksa long pes 8, 9]
Ol Kristen, olsem ol man i ran long resis, ol i no ken larim wanpela samting i pulim nabaut tingting bilong ol
[Piksa long pes 10]
I no gat wanpela samting inap pasim traipela karis bilong Jehova long heven long kamapim laik bilong God