Ol Man i Givim Glori Long God Ol i Kisim Blesing
“Olgeta lain manmeri . . . bai ol i litimapim nem bilong yu.”—SONG 86:9.
1. Bilong wanem yumi inap givim glori long God moa yet, winim ol samting i no gat laip em God i bin wokim?
I STRET olgeta samting Jehova i bin wokim i mas litimapim nem bilong em. Ol samting i no gat laip em God i wokim, maski ol i no gat maus ol i save givim biknem, olsem glori, long em. Tasol yumi man inap skelim ol samting na kliagut long en na tenkyu long samting yumi lukim na pilim, na yumi inap mekim lotu. Olsem na man bilong raitim song i toktok long yumi olsem: “Yumi olgeta manmeri bilong graun, yumi amamas na singaut na litimapim nem bilong God. Singim song na tokaut long biknem bilong em. Litimapim biknem bilong en antap moa.”—Song 66:1, 2.
2. Husat i kirap bihainim tok bilong givim glori long nem bilong God? Bilong wanem ol i mekim olsem?
2 Klostu olgeta man i no laik luksave long God na givim glori long em. Tasol long 235 kantri, winim 6 milion Witnes Bilong Jehova i kamapim klia olsem ol i lukim ol “pasin bilong God i stap hait” taim ol i lukim ol samting em i bin wokim. Na maski ol dispela samting em i bin wokim i no gat maus, ol Witnes i “harim” tokaut bilong ol. (Rom 1:20; Song 19:2, 3) Long rot bilong stadi long Baibel, ol i kisim save long Jehova na ol i laikim em tru. Song 86:9, 10 i tok profet: “Olgeta lain manmeri yu bin wokim ol, bai ol i go brukim skru long yu, na bai ol i litimapim [“givim glori long,” NW ] nem bilong yu. Long wanem, yu tasol yu gat bikpela strong. Na yu tasol yu save mekim ol kain kain gutpela gutpela samting. Yu wanpela tasol yu God tru.”
3. Olsem wanem lain “planti manmeri tru” i save mekim wok bilong God “long san na long nait”?
3 Kamapim Tok Hait 7:9, 15 i mekim wankain tok long “planti manmeri tru” ol i lotu na “long san na long nait ol i save stap long haus bilong [God] na mekim wok bilong en.” I no olsem God i tok ol wokboi bilong em i mas litimapim nem bilong em long olgeta taim, no gat malolo, nogat. Ol man i lotuim em i stap long olgeta hap. Olsem na taim em i nait long wanpela hap, orait ol wokboi bilong God long hapsait bilong graun we san i stap ol i bisi long autim tok. I olsem long olgeta aua bilong de i gat sampela man i wok long givim glori long Jehova. Klostu nau “olgeta samting i gat laip” bai singaut strong na litimapim nem bilong Jehova. (Song 150:6) Tasol yumi wan wan i ken mekim wanem samting long nau bilong givim glori long God? Wanem samting inap givim hatwok long yumi? Na ol man i givim glori long God bai kisim wanem ol blesing? Bilong bekim ol dispela askim yumi laik skelim stori bilong lain Gat bilong lain Israel.
Wanpela Traim Bilong Bipo
4. Wanem traim i painim lain Gat?
4 Taim ol i no go insait yet long Graun Bilong Promis, lain Gat i askim long kisim graun i gutpela bilong ol bulmakau long hap i stap is long wara Jordan. (Namba 32:1-5) Bilong i stap long dispela hap ol bai bungim sampela bikpela traim. Ples daun bilong wara Jordan bai pasim ol birua long kam insait long graun bilong ol lain husat i sindaun long hap i stap wes long wara Jordan. (Josua 3:13-17) Tasol long buk The Historical Geography of the Holy Land, George Adam Smith i tok long ol graun long hap i stap is long wara Jordan: ‘Ol dispela hap graun i flet na stret tasol na i no gat samting bilong pasim ol man. Olsem na long olgeta taim ol lain tripman husat i laikim graun i gat gras bilong ol bulmakau sipsip samting bilong ol i ken kaikai, ol i save kam insait long dispela graun long olgeta yia.’
5. Jekop i kirapim ol tumbuna pikinini bilong Gat long mekim wanem taim ol man i laik pait long ol?
5 Lain Gat bai stap olsem wanem taim ol narapela man i laik kisim graun bilong ol long olgeta taim? Planti handet yia paslain, tumbuna bilong ol Jekop i bin tok profet olsem: “Gat, ol stilman bai i kam pait long yu. Tasol bai yu bekim pait bilong ol na rausim ol i go.” (Stat 49:19) Sapos yu ritim antap antap tasol i luk olsem dispela i stori long ol samting nogut. Tasol tru tru dispela tok profet i tokim lain Gat long bekim pait. Jekop i tokim ol, sapos ol i bekim pait, ol stilman bai ranawe na ol lain Gat bai rausim ol i go.
Ol Traim Long Lotu Bilong Yumi Long Nau
6, 7. Olsem wanem ol samting i painim ol Kristen bilong nau i wankain long ol samting i bin painim lain Gat?
6 Olsem lain Gat, ol Kristen long nau i gat ol traim na hevi em dispela graun Satan i bosim i putim long ol, na i no gat ol mirakel i pasim ol dispela samting long painim ol. (Jop 1:10-12) Planti bilong yumi i mas karim ol hevi bilong ol traim i bungim yumi taim yumi go long skul, mekim wok mani, na mekim bikpela long ol pikinini. Na i gat ol hevi bilong yumi yet. Sampela i gat wanpela ‘nil i sutim skin bilong ol,’ olsem wanpela bagarap bilong skin o sik. (2 Korin 12:7-10) Sampela i pilim olsem ol i pipia nating tasol. “Taim nogut” bilong i go lapun i mekim na sampela lapun Kristen ol i no inap mekim bikpela wok bilong Jehova olsem ol i bin mekim bipo.—Saveman 12:1.
7 Aposel Pol i kirapim yumi long tingim olsem “yumi pait long olgeta spirit nogut i stap antap.” (Efesus 6:12) Olgeta taim yumi pilim “spirit bilong dispela graun,” olsem pasin bilong bikhet na pasin sem samting em Satan na ol spirit nogut i kirapim ol man long insait long en. (1 Korin 2:12; Efesus 2:2, 3) Olsem Lot, em man bilong pret long God, yumi tu i bel hevi tru long ol pasin sem samting ol man i mekim na toktok long en. (2 Pita 2:7) Na tu Satan i save pait long yumi long ples klia. Satan i pait long lain remnan bilong ol Kristen God i makim, em ol i “save bihainim ol lo bilong God, na ol i save autim tok bilong Jisas na bihainim em.” (KTH 12:17) Long rot bilong tambuim wok bilong ol na mekim nogut long ol, Satan i pait long “ol arapela sipsip” bilong Jisas tu.—Jon 10:16.
Larim Ol i Win o Bekim Pait?
8. Taim Satan i pait long yumi, yumi mas mekim wanem? Bilong wanem yumi mas mekim olsem?
8 Taim Satan i pait long yumi, orait yumi mas mekim wanem? Olsem lain Gat bilong bipo, yumi mas i stap strong long samting bilong spirit na bihainim tok bilong God long pasin bilong bekim pait. Sori tru, ol hevi bilong nau i mekim na sampela i no pait strong moa, ol i no mekim ol samting bilong spirit em ol i mas mekim. (Matyu 13:20-22) Wanpela Witnes i tok long as na namba bilong ol man i kam long ol miting i go daun long kongrigesen bilong em: “Ol brata i pilim skin i les. Ol i pilim hatwok tru long karim ol hevi.” Tru, long nau i gat planti as na ol man i pilim skin i les. Olsem na i no hatwok long kisim tingting olsem wok bilong lotuim God em tu i wanpela hatwok yumi mas karim. Tasol olsem wanem? Kain tingting inap helpim yumi na em i stret long tingting olsem?
9. Taim yumi kisim plang bilong Krais, olsem wanem yumi kisim malolo?
9 Tingim tok Jisas i mekim long ol manmeri i stap long taim bilong em husat i pilim hatwok long karim ol hevi bilong laip: “Yupela ol man i save hatwok tru na i karim ol bikpela hevi, yupela olgeta kam long mi na bai mi givim malolo long yupela.” Yu ting Jisas i tok sapos yu lusim ol wok bilong God, dispela bai givim malolo long yu? Nogat. Jisas i tok: “Yupela kisim save long mi na aninit long tok bilong mi, olsem yupela i kisim plang ol i save putim long nek bilong ol bulmakau . . . , long wanem, mi save mekim pasin isi long ol man na mi save daunim mi yet. Na bai ol samting i no ken givim hevi long yupela na bai yupela i kisim malolo.” Dispela plang ol i wokim long diwai o hap ain i bilong helpim man o animal long karim wanpela hevipela samting. Wanem as na man i gat laik long kisim kain plang olsem? Yumi wok long karim “ol bikpela hevi” pinis, a? Em tru, tasol narapela mining bilong tok Grik Jisas i kolim, em olsem: “Aninit long plang wantaim mi.” Tingim: Jisas i tok long helpim yumi long karim hevi bilong yumi! I no olsem yumi mas mekim long strong bilong yumi yet tasol.—Matyu 9:36; 11:28, 29; 2 Korin 4:7.
10. Wanem samting i kamap taim yumi wok long givim glori long God?
10 Taim yumi kisim plang olsem wok bilong i stap disaipel, yumi mekim pait bilong sakim Satan. Jems 4:7 i tok: “Sakim Satan, na em bai i lusim yupela na ranawe.” Tasol long mekim olsem i no isi. Bilong mekim wok bilong God i gat hatwok bilong en. (Luk 13:24) Tasol Baibel i tok promis long Song 126:5: “Ol man i wok long krai na planim kaikai, bai ol i ken amamas na kisim ol kaikai i mau.” Em nau, yumi no lotuim wanpela God i no save tingim wok yumi mekim. Em “i save mekim gut tru long ol man i wok long painim em,” na em i blesim ol man husat i givim glori long em.—Hibru 11:6.
Givim Glori Long God Taim Yumi Autim Tok Bilong Kingdom
11. Olsem wanem wok autim tok i helpim yumi long sakim Satan?
11 Jisas i tok: “Yupela i mas i go mekim olgeta lain manmeri i kamap disaipel bilong mi.” Wok autim tok em i nambawan rot long “givim biknem long God . . . olsem ofa.” (Matyu 28:19; Hibru 13:15) Pasin bilong “redi long autim gutnius bilong God i laik wanbel wantaim ol manmeri . . . na putim dispela pasin olsem su” em i wanpela hap bilong “olgeta klos pait” bilong yumi—em samting i helpim yumi long sakim Satan. (Efesus 6:11-15) Wok bilong litimapim nem bilong God taim yumi autim tok em i gutpela rot long strongim bilip bilong yumi. (2 Korin 4:13) Em i helpim yumi long no ken tingting long ol samting i no gutpela tumas. (Filipai 4:8) Taim yumi autim tok yumi inap amamas na kisim strong long wok wantaim ol wanlotu.
12, 13. Olsem wanem pasin bilong autim tok long olgeta taim inap helpim ol famili? Stori long dispela.
12 Wok autim tok em i wanpela gutpela samting famili olgeta i ken mekim wantaim. Tru, ol yangpela i mas i gat sampela gutpela amamas. Tasol haptaim famili i lusim long autim tok wantaim i no ken i stap olsem samting bilong bel hevi long en. Papamama i ken mekim autim tok olsem samting bilong amamas sapos ol i skulim ol pikinini long mekim gut wok taim ol i autim tok. Ol yangpela i amamas long mekim ol samting ol i save mekim gut, a? Taim ol papamama i bihainim gutpela tingting na ol i no fosim ol pikinini long mekim samting i winim mak bilong ol, ol pikinini bai amamas long autim tok.—Stat 33:13, 14.
13 Na tu, ol famili i save wok wantaim long litimapim nem bilong God ol i save pas gut tru. Tingim wanpela sista em man bilong em i no bilip i lusim em na faipela pikinini. Sista i mas painim wok mani bilong lukautim ol pikinini bilong em. Em i gat planti samting em i mas mekim, olsem na yu ting em i larim ol dispela samting i mekim na em i no lukautim ol pikinini long samting bilong spirit? Sista i tok: “Mi bin wok strong long stadi long Baibel na ol buk i stori long Baibel na mi wok long bihainim tok mi ritim. Olgeta taim mi kisim ol pikinini i go long ol miting na long autim tok. Wanem samting i kamap long ol hatwok bilong mi? Olgeta faipela pikinini bilong mi ol i baptais pinis.” Sapos yu autim tok olgeta taim wantaim ol pikinini dispela inap helpim yu long mekim bikpela long ol na “stretim gut ol . . . na skulim ol long tok bilong Bikpela.”—Efesus 6:4.
14. (a) Olsem wanem ol yangpela i ken givim glori long God long skul? (b) Wanem samting inap helpim ol na bai ol i no “sem long autim gutnius”?
14 Ol yangpela, sapos yu stap long wanpela kantri we gavman i orait long yu long autim tok long skul, yu save mekim olsem, o yu larim pasin bilong pret long man i pasim yu? (Sindaun 29:25) Wanpela Witnes long Pueto Riko i gat 13 krismas i tok: “I no gat wanpela taim mi bin sem long autim tok long skul, long wanem, mi save em i tok i tru. Olgeta taim long klas mi save apim han na tokaut long samting mi bin lainim long Baibel. Sapos mi gat haptaim we mi stap nating, mi save go long laibreri na ritim buk Askim Bilong Ol Yangpela.”a Olsem wanem? Jehova i bin blesim wok bilong em? Em i tok: “Sampela taim ol klasmeit i givim ol askim long mi na sampela i laikim wanpela kopi bilong dispela buk.” Sapos yu no bin mekim kain samting olsem, orait long rot bilong stadi bilong yu yet yu mas wok yet long “save tru long laik bilong God.” (Rom 12:2) Taim yu pilim tru samting yu lainim em tok i tru, bai yu no inap “sem long autim gutnius.”—Rom 1:16.
‘Rot i Op’ Long Mekim Wok
15, 16. Sampela Kristen i bin bihainim wanem rot ‘i op pinis’ long mekim bikpela wok moa? Ol i bin kisim wanem ol blesing?
15 Aposel Pol i tok olsem “God i opim rot pinis” long em i ken mekim bikpela wok moa. (1 Korin 16:9) Yu ting sindaun bilong yu inap larim yu long bihainim rot i go long mekim bikpela wok moa? Bilong mekim wok painia oltaim o painia haptaim yu mas lusim 70 aua o 50 aua long autim tok long wanpela mun. Tru, ol wanbilip Kristen i amamas long ol gutpela wok ol painia i mekim. Tasol maski ol painia inap autim tok planti aua moa, winim ol arapela, dispela i no mekim na ol i pilim olsem ol i gutpela moa, winim ol bratasista bilong ol. Nogat. Ol i kisim tingting Jisas i tok long en: “Mipela i no gutpela wokboi. Samting mipela i mekim, em i wok tasol bilong mipela.”—Luk 17:10.
16 Bilong mekim wok painia yu mas bosim gut yu yet, stretim gut ol samting, na redi long lusim sampela samting bilong yu yet. Tasol taim yu mekim olsem bai yu kisim planti blesing. Tamika, wanpela yangpela painia, i tok: “Em i wanpela blesing long mekim gutpela wok long Tok Bilong God.” “Taim yu wok painia yu save yusim Baibel planti taim. Nau taim mi autim tok, mi inap tingim ol skripsa i stret long ol wan wan man mi toktok wantaim.” (2 Timoti 2:15) Mica, wanpela painia, i tok: “Taim mi lukim ol samting tok i tru i mekim long ol man em i narapela gutpela blesing.” Yangpela Matthew i mekim wankain tok long amamas em i kisim “taim wanpela man i kam insait long tok i tru. I no gat narapela kain amamas i winim dispela.”
17. Wanem samting i mekim na wanpela Kristen i daunim tingting kranki em i bin gat long wok painia?
17 Olsem wanem? Yu inap kirap mekim wok painia? Ating yu gat laik tasol yu pilim olsem yu no inap. Kenyatte, wanpela yangpela sista, i tok: “Mi bin i gat tingting kranki long wok painia. Mi ting olsem mi no inap mekim wok painia. Mi no gat save long redim ol kirap bilong tok na mi no save long pasin bilong toktok gut long ol tok bilong Baibel.” Tasol ol elda i makim wanpela sista painia i gat save long wok wantaim em. Kenyatte i tok: “Mi amamas long wok wantaim em. Dispela i bin kirapim mi long i gat laik long wok painia.” Sapos yu kisim sampela skul na tok bilong strongim yu, ating bai yu tu i gat laik long wok painia.
18. Ol bratasista i mekim wok misineri inap kisim wanem ol blesing?
18 Wok painia inap opim rot long mekim sampela narapela wok. Olsem: Sampela marit inap winim mak long kisim skul long kamap misineri na go autim tok long narapela kantri. Ol misineri i mas kisim save long nupela kantri, lainim nupela tok ples, nupela pasin bilong ples, na ol nupela kaikai. Tasol ol blesing ol i kisim i mekim na ol hatwok i olsem samting nating. Mildred, wanpela longtaim misineri long Meksiko, i tok: “I no gat wanpela taim mi pilim bel hevi olsem mi bin kirap mekim wok misineri. Em i samting mi bin i gat laik long mekim kirap long taim mi liklik pikinini.” Em i bin kisim wanem ol blesing? “Long ples, i hatwok long painim ol Baibel stadi. Tasol sampela taim long hia mi gat 4-pela sumatin i kirap seim taim long mekim wok autim tok.”
19, 20. Olsem wanem wok Betel, wok intenesenel, na Ministerial Trening Skul i bin givim blesing long planti brata?
19 Ol bratasista i wok Betel long ol brens ofis bilong ol Witnes Bilong Jehova ol tu i kisim ol gutpela blesing. Sven, wanpela yangpela brata i wok long Jemani, i tok long wok bilong em long Betel olsem: “Mi pilim olsem samting i kamap long wok mi mekim bai stap oltaim. Mi inap yusim save bilong mi long mekim wok mani. Tasol bilong mekim olsem i olsem mi bungim mani long wanpela beng klostu em bai bagarap.” Tru, bilong mekim wok volantia i no gat pe yu mas lusim sampela samting bilong yu yet. Tasol Sven i tok: “Taim yu pinis wok, yu save olgeta samting yu bin mekim long dispela de yu bin mekim long Jehova. Na dispela i mekim na yu pilim amamas nogut tru.”
20 Sampela brata i bin kisim blesing long mekim wok intenesenel, olsem wok konstraksen long ol brens long ol narapela narapela kantri. Tupela marit husat i bin mekim wok long 8-pela kantri i tok: “Ol brata long hia ol i gutpela tru. Mipela bai bel hevi stret long lusim ol—em namba 8 taim mipela i bin bel hevi olsem. Mipela i amamas tru long ol samting i bin painim mipela!” Na tu i gat Ministerial Trening Skul. Dispela skul i givim trening bilong spirit long ol brata singel husat i winim mak. Wanpela brata i bin greduet long dispela skul i tok: “Mi hatwok long painim tok bilong tok tenkyu long dispela gutpela skul. No gat narapela oganaisesen bai mekim bikpela wok olsem long givim kain gutpela trening long ol man.”
21. Long wok bilong God ol i mekim, olgeta Kristen i mas mekim wanem?
21 Tru tumas, i gat planti rot bilong mekim bikpela wok moa. I tru planti bilong yumi i no inap wok long Betel o long narapela kantri. Jisas yet i luksave olsem sindaun bilong ol Kristen i no wankain olsem na “kaikai” ol i karim bai i narapela narapela. (Matyu 13:23) Olsem na wok bilong yumi Kristen em bilong mekim olgeta samting long wok bilong Jehova em sindaun bilong yumi i larim yumi long mekim. Taim yumi mekim olsem, yumi givim glori long Jehova, na yumi save em i amamas long samting yumi mekim. Tingim Ethel, wanpela lapun sista i stap long wanpela haus bilong lukautim ol lapun. Olgeta taim em i autim tok long ol wanhaus na em i autim tok long telefon. Maski em i gat planti samting i pasim em, em i save givim bel olgeta long mekim wok autim tok.—Matyu 22:37.
22. (a) Wanem sampela samting yumi ken mekim bilong givim glori long God? (b) Yumi wetim wanem gutpela taim?
22 Tasol tingim, wok autim tok em i wanpela rot tasol bilong givim glori long Jehova. Taim yumi stap olsem gutpela piksa long pasin wokabaut na lukluk bilong yumi long ples wok, skul, na long haus, yumi mekim Jehova i belgut tru. (Sindaun 27:11) Sindaun 28:20 i tok promis olsem: “Sapos man i bihainim stretpela pasin, bai God i mekim gut tru long em.” Olsem na yumi laik “planim planti” kaikai taim yumi mekim wok bilong God, na yumi save bai yumi kisim planti blesing. (2 Korin 9:6) Taim yumi mekim olsem, bai yumi stap long dispela gutpela taim em “olgeta samting i gat laip” bai givim glori long Jehova!—Song 150:6.
[Futnot]
a Ol Witnes Bilong Jehova i wokim dispela buk Sampela Askim Bilong Ol Yangpela—Ol Gutpela Bekim.
Yu Inap Tingim?
• Olsem wanem lain bilong God i mekim wok bilong Jehova “long san na long nait”?
• Wanem traim i painim lain Gat? Ol Kristen long nau inap lainim wanem samting long dispela?
• Olsem wanem wok autim tok i helpim yumi long sakim Satan?
• Sampela i bin bihainim wanem rot ‘i op pinis’ long mekim wok? Ol i bin kisim wanem ol blesing?
[Piksa long pes 15]
Olsem ol lain Gat i bin pait long ol stilman, ol Kristen i mas bekim pait long Satan
[Piksa long pes 17]
Yumi amamas na kisim strong taim yumi autim tok wantaim
[Ol Piksa long pes 18]
Wok painia inap opim rot bilong mekim bikpela wok moa, olsem:
1. Wok intenesenel
2. Wok Betel
3. Wok misineri