Wanpela Strongpela “Man Bilong Raun Raun Long Autim Gutnius”
WANPELA ripot i tok, taim George Borrow i gat 18 krismas, em i save long mekim 12-pela tok ples. Tupela yia bihain em inap tanim tok i go long 20 tok ples na “mekim long ol naispela tok i klia tru na i gutpela long harim.”
Long 1833, Baibel Sosaiti (British and Foreign Bible Society) long London, Inglan, i singautim dispela saveman long kam na ol bai toktok wantaim em. Em yet i no inap baim rot bilong i go, tasol em i lukim olsem rot i op long em, olsem na em i strong long go. Long dispela taim Borrow i gat 30 krismas, na em i lusim ples bilong em, em taun Norwich, na em i wokabaut i go inap 180 kilomita, na em i mekim insait long 28 aua tasol.
Baibel Sosaiti i givim wanpela bikpela wok long em—insait long 6-pela mun em i mas lain long tok ples Manchu, em ol i mekim long sampela hap bilong Saina. Em i askim ol long wanpela buk i gat ol lo bilong mekim dispela tok ples, tasol ol i no gat; ol i givim em Gutnius Matyu i Raitim, long tok ples Manchu, na wanpela dikseneri bilong tok Frans na tok Manchu, em tasol. Tasol maski i olsem, insait long 19 wik tasol em i raitim pas i go long London na i tok: “Mi kisim pinis tok ples Manchu,” na em i tok: “God i helpim mi long mekim.” Yumi kirap nogut long dispela samting em i mekim, long wanem, long dispela taim stret ol i tok em i wok long stretim Gutnius Luk i Raitim, ol i bin tanim long tok ples Nahuatl, em wanpela tok ples bilong ol Meksiko.
Baibel Long Tok Ples Manchu
Namel long yia 1601 na 1700, em namba wan taim ol i bin raitim tok ples Manchu, na ol i bihainim rait Uighur bilong ol Mongolia. Long dispela taim Manchu i kamap tok ples em gavman bilong Saina i mekim wok long en. Bihain ol man i wok long lusim dispela tok ples, tasol sampela insait long Baibel Sosaiti ol i gat laik long prinim na tilim ol Baibel long tok Manchu. I kam inap long 1822, ol i bin putim mani bilong prinim 550 kopi bilong Gutnius Matyu i Raitim, em Stepan V. Lipoftsoff i tanim. Em i bilong wanpela dipatmen bilong gavman bilong Rasia (Russian Foreign Office) na em i bin sindaun long Saina inap 20 yia. Ol i prinim dispela Gutnius long St. Petersburg, tasol ol i tilim wan wan tasol na ol narapela em ol i no tilim yet bikpela tait wara i kamap na bagarapim ol.
I no longtaim na ol i tanim olgeta hap bilong Ol Skripsa Grik bilong Baibel. Long 1834 ol i painim sampela olpela rait bilong klostu olgeta hap bilong Ol Skripsa Hibru, na dispela i kirapim laik bilong ol man long ritim Baibel. Orait husat inap lukautim wok bilong stretim ol tok bilong Baibel Manchu na tanim ol narapela hap bilong en ol i no tanim yet? Baibel Sosaiti i salim George Borrow bilong mekim dispela wok.
Em i Go Long Rasia
Taim Borrow i kamap pinis long St. Petersburg, em i kirap wok strong long stadi long ol samting bilong tok Manchu bambai em i ken mekim gut wok bilong ritim na skelim gut na stretim ol rait bilong Baibel. Tasol maski em i kisim gut save long mekim dispela wok, em i gat hatwok tru long mekim, na planti taim em i save wok inap 13 aua long wanpela de bilong helpim ol long wokim ol rait bilong masin bilong prinim Baibel The New Testament. Bihain ol man i stori long dispela Baibel olsem ‘wanpela naispela buk tru ol i bin wokim long tok ples Saina.’ Long 1835 ol i prinim wan tausen Baibel olsem. Borrow i gat bikpela laik tru long kisim ol dispela Baibel i go long Saina na tilim long ol man, tasol em i no inap. Gavman bilong Rasia i pret, nogut gavman bilong Saina i ting ol i laik salim Borrow i go olsem misineri, na dispela inap pinisim gutpela pasin pren i stap namel long tupela kantri hia. Olsem na Rasia i no larim Borrow i go long boda bilong Saina sapos em i karim “wanpela Baibel Manchu” i go.
Inap 10-pela yia samting bihain ol i tilim wan wan Baibel, na long 1859 ol i prinim Gutnius Matyu i Raitim na Gutnius Mak i Raitim, na long ol wan wan pes i gat tupela blok, wanpela i gat tok Manchu na wanpela i gat tok Saina. Tasol long dispela taim, ol man i save long ritim tok Manchu ol i laik ritim tok Saina tasol, olsem na i luk olsem i no gat wok long tanim na prinim Baibel olgeta long tok Manchu. Dispela tok ples i wok long pinis, na i no longtaim na tok Saina bai kisim ples bilong en. Dispela senis i kamap long 1912, taim Saina i kamap wanpela ripablik.
Poin Bilong Iberia
Ol samting George Borrow i bin mekim i givim nupela strong long em na em i go bek long London. Long 1835 ol i salim em i go long Potugal na Spen bilong “skelim tingting bilong ol man, em ol i redi long kisim ol tok i tru bilong lotu Kristen o nogat.” Long dispela taim, Baibel Sosaiti i no bin mekim sampela wok long tupela kantri hia, long wanem, i gat ol kros pait namel long ol lain politik, na ol man tu i gat kros long sindaun bilong ol. Long Potugal, Borrow i amamas tru long toktok wantaim ol lain i sindaun long ol hap ausait long ol taun, tasol i no longtaim na em i lukim olsem ol man i no tingim ol samting bilong lotu na ol i les long harim, olsem na em i go long Spen.
Long Spen ol samting i narapela kain, na ol Jipsi tu, em kwiktaim Borrow i kamap pren bilong ol, long wanem, em i save long tok ples bilong ol. Taim em i kamap long Spen, i no longtaim na em i kirap tanim “Nupela Testamen” i go long tok Jipsi bilong Spen, em Gitano. Long wanpela hap bilong dispela wok, em i singautim tupela meri Jipsi long helpim em. Em i ritim Baibel long tok Spen long tupela na nau em i askim tupela long tanim dispela tok. Long dispela pasin em inap lain long stretpela pasin bilong kolim sampela kain tok ol Jipsi i save mekim. Em i mekim dispela wok na long 1838 ol i prinim Gutnius Luk i Raitim. Dispela i kirapim wanpela bisop long tokaut olsem: “Long rot bilong tok ples Jipsi em bai kirapim olgeta man bilong Spen long tanim bel.”
Ol i bin givim wok long George Borrow long painim “wanpela man i gat gutpela save bambai em i ken tanim Baibel long tok ples Basque.” Ol i givim dispela wok long wanpela dokta, em Dokta Oteiza. Borrow i tok, “em i save gut long dispela tok ples em mi yet mi gat hap save long en.” Long 1838, Gutnius Luk i Raitim em namba wan buk bilong Baibel ol i wokim long tok Basque bilong Spen.
Bel bilong Borrow i kirap tru long givim save bilong Baibel long ol man nating. Olsem na planti taim em i raun longwe long ol rot nogut em inap kisim bagarap long en bilong tilim ol buk bilong Baibel long ol rabisman long ol komiuniti long hap bilong bus. Em i tingting long helpim ol long lusim ol bilip kranki bilong lotu i kalabusim ol. Em i laik kamapim long ples klia olsem pasin bilong ol long tromoi mani bilong baim ol sin bilong ol i no inap helpim ol liklik, olsem na em i save tokim ol: “God i gutpela, olsem na yu ting em bai orait long ol man i baim ol sin bilong ol?” Tasol Baibel Sosaiti i pret, nogut dispela pasin bilong sutim tok long ol bilip bilong lotu i mekim na gavman i tambuim wok bilong ol, olsem na ol i tokim Borrow long tilim Baibel na em tasol.
Long maus ol i givim tok orait long Borrow long prinim El Nuevo Testamento, em wanpela Nupela Testamen long tok Spen, em ol i no raitim bilip bilong Lotu Katolik long en. Em i kisim tok orait, maski pastaim praim minista i no orait liklik long dispela wok—em i bin tok, dispela Baibel ol i bin tanim em inap nogutim ol man, na em i wanpela “buk i no stret.” Orait Borrow i painim wanpela haus long Madrid bilong tilim dispela Nupela Testamen bilong tok Spen, tasol dispela i mekim na ol bikman bilong lotu na bilong gavman i birua long em. Ol i kalabusim em inap 12-pela de. Taim em i tokaut olsem dispela i no stret, ol i tokim em long lusim isi dispela kalabus. Em i save pinis olsem pasin bilong ol long kalabusim em i no stret wantaim lo bilong gavman, olsem na em i kamapim stori bilong aposel Pol na em i tok em bai stap long kalabus inap long taim ol i tokaut olsem em i no gat rong, na ol i no ken bagarapim nem bilong em.—Aposel 16:37.
Taim dispela strongpela wokman i lusim Spen long 1840, Baibel Sosaiti i kamapim ripot olsem: “Insait long 5-pela yia i go pinis, ol i tilim olsem 14,000 Baibel long Spen.” Borrow i bin insait tru long dispela wok, olsem na em i tok, ol dispela yia em i bin wok long Spen “em ol yia bilong amamas tru, winim ol narapela yia long laip bilong mi.”
Buk The Bible in Spain, em pastaim ol i bin wokim long 1842—na ol i prinim yet sampela—em stori bilong George Borrow yet, i stori long ol hap em i bin raun long en na ol samting em i bin mekim. Long dispela buk em planti man i bin laik long ritim, em i kolim em yet olsem “man bilong raun raun long autim Gutnius.” Em i raitim tok olsem: “Mi bin tingting long go long ol ples nabaut i hait namel long ol maunten na toktok wantaim ol man long Krais, olsem mi save mekim oltaim.”
George Borrow i bin givim bel tru long tilim na tanim Baibel, na long dispela pasin em i opim rot bilong ol narapela i kam bihain long em na mekim wok bilong tilim na tanim Baibel—em wanpela gutpela wok tru ol inap mekim.
[Mep long pes 29]
(Bilong save ol dispela rait i stap we long pes, lukim buk o magasin)
Bilong mekim wok bilong tanim Baibel na tilim long ol man, George Borrow i kirap long (1) Inglan na i go long (2) Rasia, (3) Potugal, na (4) Spen
[Kredit Lain]
Mountain High Maps® Copyright © 1997 Digital Wisdom, Inc.
[Piksa long pes 28]
Namba wan tok long Gutnius bilong Jon long tok ples Manchu, ol i prinim long 1835, kirap long antap i go daunbilo, han kais i go han sut
[Kredit Lain]
From the book The Life of George Borrow by Clement K. Shorter, 1919
[Piksa Kredit Lain long pes 27]
From the book The Bible of Every Land, 1860