Ol Manmeri Inap i Stap Laip Hamas Yia?
LONG Mas 3, 1513, Juan Ponce de León bilong Spen, man bilong raun na painim ol narapela ples, em i kirapim wanpela raun. Em i kisim bot na lusim Pueto Riko na em i laik go long ailan Bimini. Olsem wanpela stori tumbuna i tok, em i laik painim wanpela hul wara—Hul Wara Bilong Stap Yangpela Oltaim. Tasol em i go kamap long wanpela ples nau em Florida long Amerika. Em i no bin painim dispela hul wara, long wanem, dispela hul wara i no bin stap.
Long nau, planti manmeri i no save stap laip winim 70 o 80 yia. Tru, long Baibel i gat nem bilong ol manmeri ol i bin i stap laip longpela taim tru, tasol buk 2002 Guinness Book of World Record i tok krismas bilong wanpela meri i bin i stap laip longpela taim tru winim olgeta narapela man na meri, em 122 yia na 164 de. (Stat 5:3-32) Tasol John Harris, saveman bilong skelim ol samting i stret long mekim long sikman, em i tok: “Ol nupela wok painimaut i soim olsem ating i gat rot bilong pasim lapun na indai.” Planti saveman long nau i toktok long samting olsem “man i stap laip oltaim oltaim,” “bai i no gat pinis bilong laip bilong man kirap long yia 2099,” “rot bilong kamapim ol nupela sel oltaim,” na ol kain samting olsem.
Long buk The Dream of Eternal Life, Mark Benecke i tok: ‘Insait long ol yia yumi stap laip, planti taim klostu olgeta sel bilong bodi i save kamapim ol nupela sel bilong senisim olpela. Bihain long 7-pela yia, i olsem yumi gat nupela bodi.’ Tasol ol sel i no inap mekim olsem inap oltaim, long wanem, taim ol sel i inapim mak bilong kamapim ol nupela sel na kamap planti, bihain long en ol sel i no moa mekim olsem. Benecke i tok olsem sapos i no gat dispela mak, “bodi bilong ol manmeri inap senisim em yet i go inap longpela taim tru—na inap oltaim tu.”
Na tingim tu, kru inap holim planti samting tru, em i winim tru mak bilong ol wok samting yumi inap mekim long en long dispela sotpela laip bilong yumi. Olsem buk Encyclopædia Britannica i tok, kru bilong man “inap mekim bikpela wok tru, winim tru ol wok em man inap mekim long en long ol yia em i stap laip.” (1976 Edition, Volume 12, pes 998) Buk How the Brain Learns, bilong David A. Sousa, i tok: “Long olgeta kain samting, kru inap long holim planti save tru—i no gat mak bilong hamas save em kru i ken holim.”—Pes 78, Second Edition, copyright 2001.
Bilong wanem ol saveman i no inap painim wanpela samting long bodi bilong man em i as na yumi save dai? Na bilong wanem kru bilong man inap holim planti samting tru? Yu ting as bilong dispela samting em olsem Man i wokim yumi em i laik bai yumi ken wok long kisim save inap oltaim? Bilong wanem yumi inap tingting long laip i stap oltaim?
Baibel i tok: “[God] i putim tingting bilong laip i stap oltaim long bel bilong ol man, bambai ol i no inap save long olgeta samting God tru i mekim long bipo yet i go inap long bihain tru.” (Saveman 3:11, NW ) Dispela tok i makim olsem God i putim tingting bilong i stap oltaim long yumi. Olsem na long olgeta taim bai yumi gat sampela samting long lainim long God na ol wok bilong em. Sapos yumi stap planti bilion yia—yes, inap oltaim oltaim—long olgeta taim bai yumi inap long kisim save moa long ol gutpela gutpela wok bilong God.
Na tu, tok bilong Jisas Krais i kamapim olsem ol manmeri inap i stap oltaim. Em i tok: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.” (Jon 17:3) Olsem wanem long yu? Yu laik i stap laip oltaim oltaim?
[Ol Piksa long pes 3]
Juan Ponce de León i go painim hul wara bilong i stap yangpela oltaim
[Kredit Lain]
Ponce de León: Harper’s Encyclopædia of United States History