Askim
Taim Jisas i kirap bek pinis, bilong wanem em i tokim Tomas long holim em, tasol paslain long dispela em i bin pasim Maria bilong Makdala long mekim olsem?
Long sampela Baibel, i olsem Jisas i tokim Maria long no ken holim em. Buk Baibel i tanim dispela tok bilong Jisas olsem: “Yu no ken holim mi, long wanem, mi no i go antap yet long Papa bilong mi.” (Jon 20:17) Tasol long tok Grik bilong pastaim, sampela taim ol i tanim dispela tok “holim,” olsem “holimpas, holim strong, holim long han,” na kain tok olsem. Yumi save Jisas i no tambuim Maria long putim han na holim em, nogat; long wanem, sampela meri moa i bin stap long ples matmat na em i larim ol i “holim lek bilong en.”—Matyu 28:9.
Sampela Baibel, olsem New World Translation of the Holy Scriptures, The New Jerusalem Bible, na The New English Bible, ol i helpim yumi long kisim insait tru bilong tok bilong Jisas. Ol i tanim dispela tok bilong Jisas olsem: “Yu no ken holimpas mi.” Orait bilong wanem Jisas i tok olsem long Maria bilong Makdala, em wanpela gutpela poroman bilong em?—Luk 8:1-3.
I luk olsem Maria i tingting planti, nogut Jisas i laik lusim em na go antap long heven. Maria i gat bikpela laik tru long i stap wantaim Bikpela bilong em, olsem na em i holimpas Jisas na i no laik lusim em i go. Jisas i laik bai Maria i save em i no ken i go antap yet, olsem na em i tokim Maria long no ken holimpas em; Maria i mas i go na toksave long ol disaipel bilong Jisas olsem em i kirap bek pinis.—Jon 20:17.
Tasol tok Jisas i bin mekim long Tomas i narapela kain long dispela. Taim Jisas i kamap long sampela disaipel, Tomas i no bin stap. Orait bihain Tomas i tokaut olsem em i no bilip tumas long Jisas i bin kirap bek, na em i tok, sapos em i lukim mak bilong ol nil long han bilong Jisas na em i putim han i go long sait bilong Jisas i gat mak bilong spia long en, long dispela taim tasol bai em i bilip olsem Jisas i kirap bek pinis. Etpela de bihain Jisas i kamap gen long ol disaipel. Long dispela taim Tomas i stap, na Jisas i tokim em long putim han na holim ol mak bilong nil na spia i stap long skin bilong em.—Jon 20:24-27.
Olsem na dispela tok Jisas i bin givim long Maria bilong Makdala i bilong stretim tingting kranki bilong em, olsem em i gat laik long pasim Jisas na bai Jisas i no ken lusim em na i go. Tasol long Tomas—Jisas i laik helpim em, long wanem, em i no bilip tumas olsem Jisas i bin kirap bek. Olsem na i gat as tru na Jisas i mekim narapela narapela kain pasin long tupela.