Yu Inap Bosim Ol Samting Bai Painim Yu Bihain?

YU TING God i makim pinis ol samting i mas painim yumi? Ol samting yumi tingim na mekim long nau, yu ting ol bai mekim sampela samting long yumi long bihain?

Orait sapos man yet i bosim ol samting bai painim em, yu ting taim wanpela man i no kamap yet God inap makim em long mekim wanpela wok o holim wanpela namba? Na olsem wanem God inap kamapim laik bilong em long graun sapos ol man i stap fri long makim wanem rot ol i laik bihainim? Baibel i kamapim ol gutpela bekim bilong ol dispela askim.

Tupela Kain Tingting i Ken Stret Wantaim?

Yumi ken tingim pasin bilong God Jehova long wokim yumi. Baibel i tok: “God i wokim ol manmeri na ol i kamap olsem God yet. God i mekim ol i kamap man na meri.” (Stat 1:27) God i bin wokim yumi i kamap olsem em, olsem na yumi inap kamapim ol pasin bilong em, olsem pasin laikim, stretpela pasin, savetingting, na strong. Na God i wokim yumi bilong i stap fri long makim wanem samting yumi laik mekim. Dispela i mekim na yumi narapela kain long ol narapela samting em i bin wokim long graun. Yumi ken tingting olsem yumi bai bihainim rot bilong stretpela pasin em God i soim long yumi o nogat. Olsem na profet Moses i tok: “I gat rot bilong i stap gut na rot bilong i dai. Long wanpela rot God bai i mekim gut long yupela, na long narapela rot bai yupela i painim bagarap. Orait nau yupela i mas makim wanem rot yupela i laik bihainim. . . . Tasol mi laikim yupela i mas bihainim rot bilong i stap gut. Yupela i mas laikim tru God, Bikpela bilong yumi, na yupela i mas harim tok bilong en na bel tru long em oltaim. Olsem na bai yupela na ol lain pikinini bilong yupela inap i stap longpela taim.”​—Lo 30:​19, 20.

Tru, yumi stap fri long makim rot yumi laik bihainim, tasol yumi no stap fri olgeta. Yumi gat wok long bihainim ol lo i bosim ol samting bilong graun na ol lo bilong stretpela pasin em God i bin putim bambai olgeta samting long ples antap na graun i ken wok gut na i stap gutpela. God i bin putim ol dispela lo bilong helpim yumi, na sapos yumi kalapim, bai samting nogut inap painim yumi. Tingim samting bai kamap sapos yumi sakim lo bilong graviti na yumi go antap long rup bilong wanpela haus i antap tru na yumi kalap i go daun!​—Galesia 6:7.

Yumi ol man i stap fri tasol i gat mak long ol samting yumi inap mekim. Tasol ol samting God i no bin wokim ol bilong i stap fri, ol i no olsem. Man bilong raitim buk, em Corliss Lamont, i askim olsem: ‘Sapos yumi bilip olsem God yet i makim pinis ol samting ol man i tingim na mekim, orait olsem wanem yumi ken tok ol man i gat wok long mekim ol samting i stret na yumi givim strafe long ol taim ol i mekim rong?’ Yumi no inap tok olsem, a? Ol animal i save bihainim nating ol lo i stap pinis long skin na i no gat wanpela inap kotim ol long ol samting ol i mekim, na olsem tasol i no gat man inap kotim ol kompiuta long wok ol i mekim, em ol man yet i wokim ol olsem. Tasol yumi stap fri long makim ol samting yumi laikim, olsem na dispela i givim bikpela wok long yumi na God bai kotim yumi long ol samting yumi mekim.

Taim mama i no karim yet yumi, sapos God Jehova i makim pinis rot yumi mas bihainim, na bihain yumi mas kot long ol samting yumi mekim, em i no mekim pasin sori na pasin i stret long yumi, a? Tasol em i no save mekim olsem, long wanem, ‘God i as bilong pasin bilong laikim ol arapela,’ na “pasin bilong en i gutpela na stretpela tasol.” (1 Jon 4:8; Lo 32:4) Em i bin wokim yumi bilong i stap fri long makim rot yumi laik bihainim, olsem na em i no ‘skelim long bipo yet olsem em bai kisim bek husat na em bai bagarapim husat,’ olsem ol man bilong bilip long dispela samting ol i save tok. Yumi stap fri long makim rot yumi laik bihainim​—God yet i no bin makim dispela rot.

Baibel i kamapim klia olsem ol samting yumi tingim na mekim bai senisim i stap bilong yumi long bihain. Olsem: God i singaut long ol man bilong mekim rong na i tokim ol: “Yupela olgeta wan wan i mas tanim bel na lusim rot nogut yupela i bihainim na lusim ol pasin nogut yupela i save mekim. . . . Sapos yupela i bihainim tok bilong Bikpela, em bai i no inap mekim nogut long yupela.” (Jeremaia 25:​5, 6) Tasol God i no ken tokim ol long mekim olsem sapos em i makim pinis ol samting i mas painim ol wan wan man long bihain. Na tu, Baibel i tok: “Yupela i mas senisim tingting nogut bilong yupela, na tanim bel, na bai God i rausim ol sin bilong yupela.” (Aposel 3:19) Jehova i no inap tokim ol man long tanim bel na lusim pasin nogut sapos em i save pinis olsem ol i no inap senisim ol samting bai painim ol long bihain, a?

Baibel i stori long sampela em God i singautim ol bilong mekim wok king long heven wantaim Jisas Krais. (Matyu 22:14; Luk 12:32) Tasol Baibel i tok olsem ol bai lus long kisim dispela wok sapos ol i no sanap strong i go inap long pinis. (KTH 2:10) Orait bilong wanem God bai i singautim ol sapos long bipo yet em i tingting pinis long em i no ken makim ol bilong mekim dispela wok? Na tingim tu tok aposel Pol i givim long ol wanbilip, em i tok: “Sapos yumi kisim save pinis long tok tru bilong Krais, na bihain, long laik bilong yumi yet yumi wokabaut long pasin bilong sin, orait i no gat narapela ofa moa i stap bilong tekewe dispela sin.” (Hibru 10:26) Kain tok lukaut olsem bai i no gat strong sapos God i makim pinis ol samting i mas painim ol bihain. Tasol sampela i tok God i bin makim sampela man long mekim wok king wantaim Jisas Krais. Olsem wanem long dispela tok?

Makim Wan Wan o Wanpela Lain?

Aposel Pol i tok: “Long Krais em i bin givim yumi olgeta gutpela samting bilong heven, bilong helpim spirit bilong yumi. Taim God i no mekim graun i kamap yet, na em i makim yumi pinis long pas wantaim Krais, . . . na em i makim yumi bilong kamap pikinini bilong em yet long wok Jisas Krais bai i mekim bilong kisim bek yumi.” (Efesus 1:​3-5) Long bipo yet God i bin makim wanem samting? Na wanem insait bilong dispela tok olsem em i bin makim ol taim em “i no mekim graun i kamap yet”?

Ol dispela ves i tok God i bin makim sampela pikinini bilong namba wan man Adam bilong mekim wok king wantaim Krais long heven. (Rom 8:​14-17, 28-30; KTH 5:​9, 10) Tasol dispela tingting olsem God Jehova i bin makim sampela man inap planti tausen yia paslain long taim mama i bin karim ol, em i pait wantaim tok bilong Baibel i tok God i bin wokim ol man bilong i stap fri long makim wanem rot ol i laik bihainim. God i no bin makim ol wan wan man yet, nogat​—em i bin makim wanpela lain.

Yumi ken tok piksa olsem: Sapos gavman i tingting long kamapim wanpela kampani bilong mekim wanpela kain wok. Em i makim pinis ol wok bilong en, na strong em bai kisim, na hamas man bai insait long en. Orait bihain kampani i kirap mekim wok, na ol man insait long en i mekim tokaut olsem: “Inap planti yia i go pinis gavman i tingim pinis ol wok bai mipela i mekim. Orait yumi ken kirap mekim dispela wok em i bin givim long yumi.” Em nau, yu ting inap planti yia paslain gavman i bin makim husat husat bai insait long dispela kampani? Nogat, a? Na olsem tasol, long bipo yet Jehova i tingting pinis olsem em bai kamapim wanpela wok bilong stretim bek ol samting nogut em sin bilong Adam i bin kamapim. Long bipo yet em i bin makim lain bilong mekim dispela wok​—tasol em i no makim ol wan wan bilong dispela lain. Bihain em bai makim ol, na ol samting ol yet i tingim na mekim, dispela bai makim olsem bihain God bai orait long ol o nogat.

Wanem dispela graun aposel Pol i bin tingim taim em i tok: “God i no mekim graun i kamap yet, na em i makim yumi pinis long pas wantaim Krais”? Dispela “graun” Pol i tok long en, em i no lain manmeri God i laik kamapim taim em i wokim Adam na Iv. Dispela “graun” i “gutpela”​—i no gat sin na pasin nogut long en. (Stat 1:31) I no gat wok long God i “lusim” sin bilong en.​—Efesus 1:7.

Dispela “graun,” olsem ol manmeri, Pol i tok long en, em i bin kirap bihain long taim Adam na Iv i bikhet long God​—dispela lain i narapela kain tru long lain manmeri God i tingting pinis long kamapim long pastaim tru. Dispela “graun,” o lain, i kirap taim ol pikinini bilong Adam na Iv i kamap. Ol manmeri bilong en i stap olsem birua bilong God na ol i stap kalabus long sin na bagarap. Ol i no olsem Adam na Iv em tupela i bin mekim sin long laik bilong ol yet, nogat​—ol i gat rot long God i ken kisim bek ol.​—Rom 5:12; 8:​18-21.

Wantu God Jehova inap mekim ol samting bilong stretim dispela hevi i kamap long pasin bikhet bilong tupela long Iden. Long taim stret em i makim pinis wanpela samting​—em Kingdom Bilong God long han bilong Jisas Krais​—Em bai mekim wok long en bilong kisim bek ol man long dispela sin Adam i bin kamapim. (Matyu 6:10) God i mekim dispela samting long taim em “i no mekim graun [olsem ol manmeri God inap kisim bek ol] i kamap yet,” olsem paslain long taim tupela bikhetman Adam na Iv i kamapim ol pikinini.

Taim ol man bilong graun i laik mekim wanpela wok, pastaim ol i mas tingim na skelim gut ol samting ol bai mekim. Dispela bilip olsem God i makim pinis ol samting i mas painim ol man, em i wankain long dispela tingting olsem God i bin skelim gut na makim olgeta liklik liklik wok samting bilong heven na graun, em God i tingim na makim pinis olgeta samting bai kamap long en. Roy Weatherford i tok: “Planti saveman ol i ting sapos God i no bin makim pinis olgeta wan wan samting bai kamap bihain, bai dispela i no stret wantaim bikpela strong bilong em olsem King.” Tasol yu ting paslain tru God i mas makim olgeta wan wan samting bai kamap bihain?

Jehova i gat olgeta strong na olgeta savetingting, olsem na em inap mekim ol samting bilong stretim olgeta hevi inap kamap taim ol man i mekim wok long dispela pasin bilong i stap fri. (Aisaia 40:​25, 26; Rom 11:33) Em inap mekim wantu tasol na em i no gat wok long skelim gut ol samting em bai mekim. Ol man bilong graun i sot long save bilong mekim olgeta samting, tasol God i Gat Olgeta Strong i no olsem​—em i no gat wok long skelim na makim olgeta wan wan samting bai painim olgeta man. (Sindaun 19:21) Long planti Baibel ol i bin tanim, Efesus 3:11 i tok God i “tingting” pinis long mekim ol samting bilong kamapim laik bilong em, na em i no skelim na makim olgeta wan wan samting i mas kamap.

Ol Samting Yu Ken Mekim

God i gat wanpela laik long dispela graun, na long pastaim tru em i makim pinis dispela laik. Kamapim Tok Hait 21:​3, 4 i tok: “Harim. Nau haus bilong God i stap wantaim ol manmeri. Em bai i stap namel long ol, na ol bai i stap ol lain manmeri bilong em. Yes, God yet bai i stap wantaim ol, na em bai i stap God bilong ol. Em bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.” Tru tumas, dispela graun bai kamap Paradais, olsem Jehova i bin laik mekim long pastaim. (Stat 1:​27, 28) Tasol olsem wanem? Yu bai stap long dispela Paradais? Ol samting nau yu tingting long mekim, dispela bai makim olsem yu bai stap long en o nogat. Jehova yet i no bin makim samting i mas painim yu long bihain.

Ofa bilong Pikinini Bilong God, Jisas Krais, bilong baim bek ol man, dispela i mekim na ol man i bilip long em ol i gat rot long kisim laip i stap oltaim. (Jon 3:​16, 17; Aposel 10:​34, 35) Baibel i tok: “Man i bilip long Pikinini, em i gat laip i stap gut oltaim oltaim. Tasol man i no bihainim tok bilong Pikinini, em bai i no inap kisim laip.” (Jon 3:36) Yu inap makim rot bilong kisim laip sapos yu kisim save long God, na Pikinini bilong em, na laik bilong God i stap long Baibel, na bihainim ol tok yu lainim. Ol man i bihainim trupela savetingting i stap long Baibel, “bai ol i stap gut. Na bai ol i no gat hevi na bai ol i no pret, long wanem, ol i save, samting nogut i no inap kamap long ol.”​—Sindaun 1:​20, 33.

[Ol Piksa long pes 5]

Ol man i no olsem ol animal​—ol i mas kot long ol samting ol i mekim

[Kredit Lain]

Eagle: Foto: Cortesía de GREFA