Wanem Samting i Bosim i Stap Bilong Yu Long Bihain?
WANPELA man i bilip long evolusen, em John Gray, em i tok: “Ol man i no inap bosim ol samting bai painim ol bihain, olsem ol narapela animal i no inap mekim.” Tasol man bilong raitim buk, em Shmuley Boteach, em i gat narapela tingting. Long buk bilong em (An Intelligent Person’s Guide to Judaism), em i tok: “Man i no wanpela animal, olsem na oltaim em inap bosim ol samting bai painim em bihain.”
Planti man i wanbel long tok bilong Gray na ol i bilip olsem sampela strong nating i bosim ol samting bai painim ol man. Na sampela i ting God i bin wokim ol man na em i bin inapim ol long bosim ol samting bai painim ol bihain.
Sampela i ting ol man i gat bikpela strong ol i bosim ol samting bai painim ol man bihain. Man bilong raitim buk, em Roy Weatherford, i tok: “Klostu olgeta man long graun—na moa yet ol meri long bipo na i kam inap nau—ol i . . . no gat strong bilong bosim i stap bilong ol yet, na as bilong en, em ol man i save daunim ol na mekim nogut long ol olsem ol wokboi nating bilong ol.” (The Implications of Determinism) Planti manmeri i bin tingting long ol bai stap amamas long bihain, tasol ol pait politik o ol pait bilong kantri i mekim na ol i lukim olsem gutpela samting ol i bin tingim i no inap kamap.
Kirap long bipo sampela lain i bin ting ol i no inap helpim ol yet, long wanem, i gat sampela bikpela strong i no bilong dispela graun i bosim ol samting bai painim ol bihain. Boteach i tok: “Ol Grik bilong bipo i bilip olsem ol i no inap tingting na wet long gutpela samting bai kamap, long wanem, ol god i makim pinis ol samting i mas painim ol na ol i no inap senisim.” Ol i ting i gat sampela god meri i makim ol samting i mas painim olgeta wan wan man. Ol i bilip olsem ol dispela god meri i makim wanem taim man bai dai, na ol i makim hamas hevi na pen stret em i mas karim i go inap long taim em i dai.
Long nau planti man i bilip olsem i gat wanpela strong i no bilong dispela graun i bosim ol samting bai painim yumi bihain. Olsem: Planti man i bilip olsem God i makim pinis ol samting i mas painim olgeta wan wan man bihain, na wanem taim stret bai yumi dai. Na i gat dispela bilip olsem God i Gat Olgeta Strong i makim pinis samting i mas painim ol bihain, olsem ol bai kisim laip o ol bai bagarap. Planti man i tok ol i Kristen ol i bilip olsem.
Orait wanem tingting bilong yu? Yu ting i gat sampela strong i makim pinis ol samting i mas painim yu bihain na yu no inap senisim? O yu ting William Shakespeare bilong Inglan, em man bilong raitim ol pilai, em i tok tru taim em i tok: “Sampela taim ol man yet i bosim ol samting bai painim ol bihain”? Orait yumi ken skelim ol tok bilong Baibel long dispela samting.